ಬದಲಾಗಲಿದೆ JEE Advanced ಪರೀಕ್ಷಾ ವಿಧಾನ; ಹೇಗಿರಲಿದೆ ಪರೀಕ್ಷೆ?

ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರ ಅಧ್ಯಕ್ಷತೆಯಲ್ಲಿ ನಡೆದ ಕೌನ್ನಿಲ್ ಆಫ್ ಇಂಡಿಯನ್ ಇನ್ಸಿಟ್ಯೂಟ್ ಆಫ್ ಟೆಕ್ನಾಲಜಿ (Council of Indian Institutes of Technology) ಐಐಟಿಗಳನ್ನು ರಾಷ್ಟ್ರೀಯ ಅಭಿವೃದ್ಧಿ, ತಂತ್ರಜ್ಞಾನ ನಾವೀನ್ಯತೆ ಮತ್ತು ಸಮಗ್ರ ಬೆಳವಣಿಗೆಯ ಸಂಸ್ಥೆಗಳಾಗಿ ಮರುಸ್ಥಾಪಿಸಲು ಮಹತ್ವಾಕಾಂಕ್ಷೆಯ ಸುಧಾರಣಾ ಮಾರ್ಗಸೂಚಿಯನ್ನು ಅನುಮೋದಿಸಿದೆ. ಆಗಸ್ಟ್ 2025ರಲ್ಲಿ ಐಐಟಿ ದೆಹಲಿಯಲ್ಲಿ ನಡೆದ ಐಐಟಿ ಕೌನ್ಸಿಲ್‌ನ 56 ನೇ ಸಭೆಯಲ್ಲಿ ಈ ನಿರ್ಧಾರಗಳನ್ನು ತೆಗೆದುಕೊಳ್ಳಲಾಗಿದೆ. ಈ ಸಭೆ ಎಂಟೆಕ್ ಶಿಕ್ಷಣದಲ್ಲಿ ಸಮಗ್ರ ಸುಧಾರಣೆಗಳನ್ನು ಅನುಮೋದಿಸಿತು. ಇದು ಉದ್ಯಮ ಇಂಟರ್ನ್‌ಶಿಪ್‌ಗಳನ್ನು ಕಡ್ಡಾಯಗೊಳಿಸಿದ್ದು ಡ್ಯುಯಲ್-ಟ್ರ್ಯಾಕ್ ಎಂಟೆಕ್ ಕಾರ್ಯಕ್ರಮಗಳ ಪರಿಚಯವನ್ನು ಉತ್ತೇಜಿಸಿತು. ವಿದ್ಯಾರ್ಥಿಗಳ ಆಸಕ್ತಿಯನ್ನು ಪ್ರೋತ್ಸಾಹಿಸಲು ಮತ್ತು ವಿಕಸನಗೊಳ್ಳುತ್ತಿರುವ ಉದ್ಯಮದ ಅಗತ್ಯಗಳೊಂದಿಗೆ ತರಬೇತಿಯನ್ನು ಹೊಂದಿಸಲು ಬಹುಶಿಸ್ತೀಯ ಉತ್ಪನ್ನ ಆಧಾರಿತ ಎಂಟೆಕ್ ಕಾರ್ಯಕ್ರಮಗಳನ್ನು ವಿಸ್ತರಿಸಲು ಐಐಟಿಗಳಿಗೆ ಸೂಚಿಸಲಾಗಿದೆ. ಕೌನ್ಸಿಲ್ ಸಭೆಯಲ್ಲಿ JEE ಅಡ್ವಾನ್ಸ್ಡ್ ಪರೀಕ್ಷೆಯ ವಿಧಾನವನ್ನು ಬದಲಿಸುವ ಬಗ್ಗೆಯೂ ಮಹತ್ತರ ತೀರ್ಮಾನ ಕೈಗೊಳ್ಳಲಾಗಿದೆ.

JEE Advanced ಪರೀಕ್ಷಾ ವಿಧಾನದಲ್ಲಿ ಬದಲಾವಣೆ

ಜೆಇಇ ಅಡ್ವಾನ್ಸ್ಡ್ ಪರೀಕ್ಷೆಯನ್ನು ಹೆಚ್ಚು ವಿದ್ಯಾರ್ಥಿ ಸ್ನೇಹಿಯಾಗಿ ಮತ್ತು ವಿದ್ಯಾರ್ಥಿಗಳಲ್ಲಿ ಮಾನಸಿಕ ಒತ್ತಡವನ್ನು ಕಡಿಮೆ ಮಾಡುವುದಕ್ಕಾಗಿ ಪರೀಕ್ಷೆಯನ್ನು ನಡೆಸುವ ವಿಧಾನದಲ್ಲಿ ಪ್ರಮುಖ ಬದಲಾವಣೆಯನ್ನು ಐಐಟಿ ಕೌನ್ಸಿಲ್ ಪ್ರಸ್ತಾಪಿಸಿದೆ. ಅದೇನೆಂದರೆ ಅಭ್ಯರ್ಥಿಯ ಕಾರ್ಯಕ್ಷಮತೆಗೆ ಅನುಗುಣವಾಗಿ ನೈಜ ಸಮಯದಲ್ಲಿ ಪ್ರಶ್ನೆಗಳನ್ನು ನೀಡಲಾಗುತ್ತದೆ. ಸಾಮಾನ್ಯವಾಗಿ ಜೆಇಇ ಅಡ್ವಾನ್ಸ್ಡ್ ಪರೀಕ್ಷೆ ಅತೀ ಕಠಿಣ ಪರೀಕ್ಷೆ ಎಂದು ಪರಿಗಣಿಸಲಾಗುತ್ತದೆ. ಈ ಪರೀಕ್ಷೆಯಲ್ಲಿ ಪಾಸಾಗಲು ವಿದ್ಯಾರ್ಥಿಗಳಿಗೆ ಹೆಚ್ಚಿನ ಪರಿಶ್ರಮ ಅಗತ್ಯವಾಗಿರುತ್ತದೆ. ಪರೀಕ್ಷೆ ಕಠಿಣ ಆಗಿರುವುದರಿಂದ ಹೆಚ್ಚಿನ ಒತ್ತಡವೂ ಇವರ ಮೇಲಿರುತ್ತದೆ. ಇದನ್ನು ಕಡಿಮೆ ಮಾಡಲು Adaptive Test ಎಂಬ ಹೊಸ ವಿಧಾನ ಕೈಗೊಳ್ಳಲಾಗುತ್ತಿದೆ.

Adaptive Test ಹೇಗಿರುತ್ತದೆ ಅಂದರೆ ಪರೀಕ್ಷಾರ್ಥಿಯ ಉತ್ತರಗಳ ಆಧಾರದ ಮೇಲೆ ಮುಂದಿನ ಪ್ರಶ್ನೆಯನ್ನು ನೈಜ ಸಮಯದಲ್ಲಿ ಸರಿಹೊಂದಿಸುವ ಕ್ರಿಯಾತ್ಮಕ ಪರೀಕ್ಷೆಯಾಗಿದೆ. ಸರಳವಾಗಿ ವಿವರಿಸುವುದಾದರೆ ಮೊದಲು ಎಲ್ಲರಿಗೂ ಒಂದೇ ರೀತಿಯ ಪ್ರಶ್ನೆಗಳನ್ನು ನೀಡಲಾಗುತ್ತದೆ. ಅದಕ್ಕೆ ಸರಿಯುತ್ತರ ಕೊಟ್ಟ ಅಭ್ಯರ್ಥಿಗಳಿಗೆ ನಂತರ ಅದಕ್ಕಿಂತ ಸ್ವಲ್ಪ ಕಠಿಣ ಪ್ರಶ್ನೆಗಳನ್ನು ನೀಡಲಾಗುತ್ತದೆ. ತಪ್ಪು ಉತ್ತರ ಕೊಟ್ಟ ವಿದ್ಯಾರ್ಥಿಗಳಿಗೆ ನಂತರದ ಹಂತದಲ್ಲಿ ಸ್ವಲ್ಪ ಸುಲಭದ ಪ್ರಶ್ನೆಗಳನ್ನು ನೀಡಲಾಗುತ್ತದೆ. ಹೀಗೆ ಹಂತ ಹಂತವಾಗಿ ಪರೀಕ್ಷಾರ್ಥಿಗಳು ಕಠಿಣ ಪ್ರಶ್ನೆಗಳಿಗೆ ಉತ್ತರವನ್ನು ನೀಡುತ್ತಾ ಹೋಗಬೇಕು. ಪರೀಕ್ಷಾರ್ಥಿಯ ಕಾರ್ಯಕ್ಷಮತೆ, ಸಾಮರ್ಥ್ಯಕ್ಕೆ ಅನುಗುಣವಾಗಿ ಪ್ರಶ್ನೆಗಳನ್ನು ನೆೈಜ ಸಮಯದಲ್ಲಿ ಹೊಂದಿಸಲಾಗುತ್ತದೆ.

ಪ್ರಮುಖ ಸಂಸ್ಥೆಗಳ ಅತ್ಯುನ್ನತ ಸಮನ್ವಯ ಸಂಸ್ಥೆಯಾಗಿರುವ ಕೌನ್ಸಿಲ್, ಈ ವರ್ಷದ ಮುಂದಿನ JEE ಅಡ್ವಾನ್ಸ್ಡ್ ಪರೀಕ್ಷೆಗೆ ಮುಂಚಿತವಾಗಿ ಕಾರ್ಯಕ್ಷಮತೆಯ ಕುರಿತು ಡೇಟಾವನ್ನು ಸಂಗ್ರಹಿಸಲು ಐಚ್ಛಿಕ ಅಡಾಪ್ಟಿವ್ ಪರೀಕ್ಷೆಯನ್ನು ಪ್ರಾಯೋಗಿಕವಾಗಿ ನಡೆಸಬೇಕೆಂದು ಶಿಫಾರಸು ಮಾಡಿದೆ. ಫಲಿತಾಂಶಗಳ ಆಧಾರದ ಮೇಲೆ ಅಡಾಪ್ಟಿವ್ ಪರೀಕ್ಷೆ ಪರಿವರ್ತನೆಗಾಗಿ ನಿರ್ದಿಷ್ಟ ಸಮಯಾವಧಿಯೊಂದಿಗೆ ಹಂತ ಹಂತದ ಮಾರ್ಗಸೂಚಿಯನ್ನು ರೂಪಿಸಬಹುದು ಎಂದು ಕೌನ್ಸಿಲ್ ಸಭೆಯಲ್ಲಿ ತೀರ್ಮಾನಿಸಲಾಗಿದೆ.

ಸಾಮಾನ್ಯವಾಗಿ ಮೇ ತಿಂಗಳಲ್ಲಿ ನಡೆಯುವ ಪರೀಕ್ಷೆಗೆ ಎರಡು ತಿಂಗಳ ಮೊದಲು ಉಚಿತ ಅಣಕು ಪರೀಕ್ಷೆಯನ್ನು ನಡೆಸಲು ಕೌನ್ಸಿಲ್ ಸೂಚಿಸಿದೆ. ಕಳೆದ ವರ್ಷ, 1.80 ಲಕ್ಷಕ್ಕೂ ಹೆಚ್ಚು ಅಭ್ಯರ್ಥಿಗಳು ಕಂಪ್ಯೂಟರ್ ಆಧಾರಿತ ಜೆಇಇ ಅಡ್ವಾನ್ಸ್ಡ್ ಪರೀಕ್ಷೆಗೆ ಹಾಜರಾಗಿದ್ದರು. ಇದರಲ್ಲಿ 54,378 ಅಭ್ಯರ್ಥಿಗಳು ಅರ್ಹತೆ ಪಡೆದಿದ್ದರು.

ಅಡಾಪ್ಟಿವ್ ಪರೀಕ್ಷೆಯಲ್ಲಿ ಪ್ರಶ್ನೆಗಳನ್ನು ಕ್ಷಣಾರ್ಧದಲ್ಲಿ ರಚಿಸಲಾಗುತ್ತದೆ.ಇಲ್ಲಿ ವಿವಿಧ ಹಂತಗಳಲ್ಲಿ ಪ್ರಶ್ನೆಗಳಿರುತ್ತವೆ. ಸರಳ ಪ್ರಶ್ನೆಗಳೊಂದಿಗೆ ಪರೀಕ್ಷೆ ಶುರುವಾಗುತ್ತದೆ. ವಿದ್ಯಾರ್ಥಿಯು ಇವುಗಳನ್ನು ಪರಿಹರಿಸುತ್ತಾ ಹೋದಂತೆ, ಕಠಿಣ ಪ್ರಶ್ನೆಗಳನ್ನು ಪರಿಹರಿಸಬೇಕಾಗುತ್ತದೆ . ಸ್ವಲ್ಪ ಸಮಯದ ನಂತರ, ವಿದ್ಯಾರ್ಥಿಯು ಪ್ರಶ್ನೆಗಳನ್ನು ಪರಿಹರಿಸಬಹುದಾದ ಪ್ರಶ್ನೆಗಳ ಮಟ್ಟವನ್ನು ಅಂದರೆ ಅದು ಎಷ್ಟು ಕಠಿಣವಾದದದು ಅಥವಾ ಕಷ್ಟವಾದದ್ದು ಎಂಬುದನ್ನು ನೀವು ಗುರುತಿಸಬಹುದು ಎಂದು ಐಐಟಿ ಕಾನ್ಪುರದ ನಿರ್ದೇಶಕ ಪ್ರೊಫೆಸರ್ ಮನೀಂದ್ರ ಅಗರ್ವಾಲ್ ಹೇಳಿರುವುದಾಗಿ ದಿ ಇಂಡಿಯನ್ ಎಕ್ಸ್‌ಪ್ರೆಸ್ ವರದಿ ಮಾಡಿದೆ

"ನಾವು ಯೋಗ್ಯತಾ ಆಧಾರಿತ ಪ್ರಶ್ನೆಗಳ ಅಂಶವನ್ನು ತಂದರೆ, ಅದು ತರಬೇತಿಯ ಪರಿಣಾಮವನ್ನು ಕಡಿಮೆ ಮಾಡುತ್ತದೆ.ಇದು ಸಹಜ ಬುದ್ಧಿವಂತಿಕೆಯೊಂದಿಗೆ ಸಂಬಂಧ ಹೊಂದಿದೆ. ತರಬೇತಿಯು ವಿದ್ಯಾರ್ಥಿಗಳಿಗೆ ಬುದ್ಧಿಮತ್ತೆಯನ್ನು ಉತ್ತಮವಾಗಿ ಬಳಸಲು ಮಾತ್ರ ತರಬೇತಿ ನೀಡುತ್ತದೆ. ಅದು ಆ ಬುದ್ಧಿಮತ್ತೆಯನ್ನು ಬದಲಾಯಿಸಲು ಸಾಧ್ಯವಿಲ್ಲ ಎಂದು ಅಗರ್ವಾಲ್ ಹೇಳಿದ್ದಾರೆ.

ವಿದ್ಯಾರ್ಥಿಯ ಯೋಗಕ್ಷೇಮ ಮತ್ತು ಮಾನಸಿಕ ಆರೋಗ್ಯದ ಮೇಲೆ ಕೇಂದ್ರೀಕರಿಸುವಂತೆ ಸೂಚನೆ

ವಿದ್ಯಾರ್ಥಿಗಳ ಯೋಗಕ್ಷೇಮದ ಬಗ್ಗೆ ಹೆಚ್ಚುತ್ತಿರುವ ಕಳವಳಗಳನ್ನು ಪರಿಹರಿಸಲು ಐಐಟಿಗಳಲ್ಲಿ ಸಮರ್ಪಿತ ಮಾನಸಿಕ ಆರೋಗ್ಯ ಕೇಡರ್‌ಗಳನ್ನು ರಚಿಸಲು ಕೌನ್ಸಿಲ್ ಶಿಫಾರಸು ಮಾಡಿದೆ. ಇದರಲ್ಲಿ ಕ್ಯಾಂಪಸ್‌ಗಳಲ್ಲಿ ದೀರ್ಘಕಾಲೀನ, ರಚನಾತ್ಮಕ ಮಾನಸಿಕ ಆರೋಗ್ಯ ಬೆಂಬಲವನ್ನು ಖಚಿತಪಡಿಸಿಕೊಳ್ಳಲು ಸಲಹೆಗಾರರು, ಮನಶ್ಶಾಸ್ತ್ರಜ್ಞರು ಮತ್ತು ಮನೋವೈದ್ಯರಿಗೆ ಮಂಜೂರಾದ ಹುದ್ದೆಗಳು ಸೇರಿವೆ. AI ಆಧಾರಿತ ಉಪನ್ಯಾಸಗಳು ಮತ್ತು ಅಧ್ಯಯನ ಸಾಮಗ್ರಿಗಳ ನೈಜ-ಸಮಯದ ಅನುವಾದದಿಂದ ಬೆಂಬಲಿತವಾದ ಭಾರತೀಯ ಭಾಷೆಗಳಲ್ಲಿ ಬೋಧನೆಯನ್ನು ವಿಸ್ತರಿಸಲು ಕೌನ್ಸಿಲ್ IIT ಗಳನ್ನು ಒತ್ತಾಯಿಸಿದೆ. ಅದೇ ವೇಳೆ ಲಿಂಗ ಸಮಾನತೆ, ಗ್ರಾಮೀಣ ಜನರ ಭಾಗವಹಿಸುವಿಕೆಯನ್ನು ಹೆಚ್ಚಿಸುವುದು ಮತ್ತು 2047ರ ವೇಳೆಗೆ ವ್ಯಾಪಕವಾದ ಸಂಪರ್ಕ ಉಪಕ್ರಮಗಳ ಕಡೆಗೆ ಕೆಲಸ ಮಾಡಲು ಸಂಸ್ಥೆಗಳಿಗೆ ಸೂಚಿಸಿದೆ.

ಮಾನಸಿಕ ಒತ್ತಡದಿಂದಾಗಿ ಇತ್ತೀಚಿನ ವರ್ಷಗಳಲ್ಲಿ ಐಐಟಿಗಳಲ್ಲಿ ವಿದ್ಯಾರ್ಥಿಗಳು ಆತ್ಮಹತ್ಯೆ ಮಾಡುತ್ತಿದ್ದು ಇದನ್ನು ಪರಿಹರಿಸಲು ಕೌನ್ಸಿಲ್ ಮಾನಸಿಕ ಆರೋಗ್ಯ ವೃತ್ತಿಪರರ ನಿಯೋಜನೆಯನ್ನು ಕೋರಿತ್ತು.

3,000 ರಿಂದ 18,000 ವಿದ್ಯಾರ್ಥಿಗಳನ್ನು ಹೊಂದಿರುವ ಐಐಟಿಗಳಲ್ಲಿ ಸುಸ್ಥಿರ ಮತ್ತು ದೀರ್ಘಕಾಲೀನ ಪರಿಹಾರವನ್ನು ಸೃಷ್ಟಿಸಲು, ಅಧ್ಯಾಪಕರು, ಕುಟುಂಬಗಳು ಮಾನಸಿಕ ಆರೋಗ್ಯವನ್ನು ಖಚಿತಪಡಿಸಿಕೊಳ್ಳಲು ಹುದ್ದೆಗಳ ಸರಿಯಾದ ರಚನೆ ಮತ್ತು ಕೇಡರ್ ಅನ್ನು ರಚಿಸಬೇಕು. ಐಐಟಿಗಳಲ್ಲಿ ಸಲಹೆಗಾರರಿಂದ ಹಿಡಿದು ಮನಶ್ಶಾಸ್ತ್ರಜ್ಞರು ಮತ್ತು ಮನೋವೈದ್ಯರವರೆಗಿನ ಹುದ್ದೆಗಳನ್ನು ರಚಿಸಬೇಕಾಗಿದೆ ಎಂದು ಕಾರ್ಯಸೂಚಿಯಲ್ಲಿ ತಿಳಿಸಲಾಗಿದೆ.

ಹುದ್ದೆಗಳನ್ನು ನಿಯಮಿತ ಅಥವಾ ಒಪ್ಪಂದದ ಆಧಾರದ ಮೇಲೆ ಭರ್ತಿ ಮಾಡಬಹುದು ಎಂದು ಕೌನ್ಸಿಲ್ ಸೂಚಿಸಿದೆ. ಬಡ್ತಿ ಮತ್ತು ಗುಣಮಟ್ಟದ ಮೌಲ್ಯಮಾಪನಕ್ಕೆ ಮಾರ್ಗಗಳನ್ನು ಒಳಗೊಂಡಂತೆ ಐಐಟಿಗಳಲ್ಲಿ ಈ ಹುದ್ದೆಗಳಿಗೆ ಸರಿಯಾದ ರಚನೆಯನ್ನು ವ್ಯಾಖ್ಯಾನಿಸಲು ಅದು ಐಐಟಿ ಗಾಂಧಿನಗರವನ್ನು ಕೇಳಿದೆ.

ಎಂಜಿನಿಯರಿಂಗ್ ಸಂಸ್ಥೆಗಳು ಮತ್ತು ಐಐಟಿಗಳಲ್ಲಿ ಮಾನಸಿಕ ಯೋಗಕ್ಷೇಮವು ಬಹಳ ಗಂಭೀರವಾದ ಕಾಳಜಿಯಾಗಿದೆ. ಈಗ ಐಐಟಿಗಳಲ್ಲಿ ಅಂತಹ ಸಮಸ್ಯೆಗಳನ್ನು ಪೂರ್ವಭಾವಿಯಾಗಿ ನಿರ್ವಹಿಸಲು ಮನಶ್ಶಾಸ್ತ್ರಜ್ಞರನ್ನು ನಿಯಮಿತವಾಗಿ ನೇಮಿಸಿಕೊಳ್ಳಲಾಗುತ್ತದೆ. ಪ್ರತಿ ಐಐಟಿ ತನ್ನದೇ ಆದ ಕಾರ್ಯವಿಧಾನವನ್ನು ಹೊಂದಿದೆ. ಕೆಲವು ಐಐಟಿಗಳು 500 ವಿದ್ಯಾರ್ಥಿಗಳಿಗೆ ಒಬ್ಬ ಸಲಹೆಗಾರರನ್ನು ಹೊಂದಿದ್ದರೆ ಕೆಲವು ಕಡೆ ವಿದ್ಯಾರ್ಥಿಗಳಿಗೆ ಒಬ್ಬ ಸಲಹೆಗಾರರನ್ನು ಹೊಂದಿರಬಹುದು. ಕೆಲವು ಸಂಸ್ಥೆಗಳು ನಿಗದಿತ ಸಂಖ್ಯೆಯ ಸಲಹೆಗಾರರನ್ನು ಹೊಂದಿವೆ. ಕ್ಲಿನಿಕಲ್ ಕೌನ್ಸೆಲಿಂಗ್ ಮತ್ತು ವೈದ್ಯಕೀಯ ಹಸ್ತಕ್ಷೇಪ ಸೇರಿದಂತೆ ವಿವಿಧ ಹಂತದ ಹಸ್ತಕ್ಷೇಪವೂ ಇದೆ. ಮುಂದಿನ ಐಐಟಿ ಕೌನ್ಸಿಲ್ ಸಭೆಯಲ್ಲಿ ಇದನ್ನು ಮಂಡಿಸಲಾಗುವುದು. ಐಐಟಿಗಳು ಈ ಕುರಿತು ಶಿಫಾರಸನ್ನು ರಚಿಸುವ ಗುರಿಯನ್ನು ಹೊಂದಿವೆ ಎಂದು ಐಐಟಿ ಗಾಂಧಿನಗರ ನಿರ್ದೇಶಕ ಪ್ರೊ.ರಜತ್ ಮೂನಾ ಹೇಳಿದ್ದಾರೆ.

ಎಂಜಿನಿಯರಿಂಗ್ ಶಿಕ್ಷಣದ ಪ್ರಮುಖ ಭಾಗವಾಗಲಿದೆ AI

ಕೃತಕ ಬುದ್ಧಿಮತ್ತೆಯ ಪರಿವರ್ತನಾತ್ಮಕ ಪರಿಣಾಮವನ್ನು ಗುರುತಿಸಿದ ಕೌನ್ಸಿಲ್, ಪಠ್ಯಕ್ರಮ, ಶಿಕ್ಷಣಶಾಸ್ತ್ರ ಮತ್ತು ಸಂಶೋಧನೆಯಾದ್ಯಂತ AI ಮತ್ತು ಮೆಶೀನ್ ಲರ್ನಿಂಗ್ ಪ್ರಮುಖ ಸಾಮರ್ಥ್ಯಗಳಾಗಿ ಸಂಯೋಜಿಸಲು IIT ಗಳಿಗೆ ನಿರ್ದೇಶನ ನೀಡಿತು. ಈ ಪರಿವರ್ತನೆಗೆ ಮಾರ್ಗದರ್ಶನ ನೀಡಲು ಪ್ರತಿ IIT ಸಂಸ್ಥೆ AI ಕಾರ್ಯಪಡೆಯನ್ನು ಸ್ಥಾಪಿಸಲಿದೆ.