ಸಂಘ ಪರಿವಾರದ ಕಾರ್ಯಕರ್ತರಿಂದ ಅಪ್ರಾಪ್ತ ದಲಿತ ಬಾಲಕಿಯ ಸರಣಿ ಅತ್ಯಾಚಾರ

ಆರ್. ಜೀವಿ

ನಮ್ಮೊಳಗೇ ಒಂದಿಷ್ಟಾದರೂ ಸಂವೇದನೆ, ಮಾನವೀಯತೆ ಇದೆ ಎಂದಾದರೆ ನಾವು ಕೇಳಿದರೆ ಬೆಚ್ಚಿ ಬೀಳಬೇಕಾದ ಸುದ್ದಿಯೊಂದು ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ವರದಿಯಾಗಿದೆ. ಅಂತಹದೊಂದು ಘೋರ ಘಟನೆ ಇತ್ತೀಚಿಗೆ ನಡೆದಿದೆ. ಇಲ್ಲಿನ ವಿಟ್ಲದಲ್ಲಿ ಅಪ್ರಾಪ್ತ ದಲಿತ ಬಾಲಕಿಯ ಮೇಲೆ ಸರಣಿ ಅತ್ಯಾಚಾರ ನಡೆದಿದೆ.

ಆ ಅಮಾಯಕ ಬಾಲಕಿಯ ಮೇಲೆ ಐದು ಮಂದಿ ಬೇರೆ ಬೇರೆ ಸಂದರ್ಭಗಳಲ್ಲಿ ಬೇರೆ ಬೇರೆ ರೀತಿಯಲ್ಲಿ ಪುಸಲಾಯಿಸಿ ಕರೆದುಕೊಂಡು ಹೋಗಿ ಅತ್ಯಾಚಾರ ಮಾಡಿದ್ದಾರೆ. ಈಗ ಪ್ರಕರಣ ತಡವಾಗಿ ಬೆಳಕಿಗೆ ಬಂದಿದೆ. ಪ್ರಕರಣದಲ್ಲಿ ಮೂವರನ್ನು ಬಂಧಿಸಲಾಗಿದೆ. ಇನ್ನಿಬ್ಬರು ತಲೆಮರೆಸಿಕೊಂಡಿದ್ದಾರೆ.

ಮೂಡುಬಿದರೆ ಮೂಲದ ಪ್ರಸ್ತುತ ಬೆರಿಪದವು ನಿವಾಸಿ ಅಕ್ಷಯ್ ದೇವಾಡಿಗ (24), ಬಾಯಾರು ಗ್ರಾಮದ ಕೊಜಪ್ಪ ನಿವಾಸಿ ಕಮಲಾಕ್ಷ ಬೆಳ್ಚಾಡ (30), ಬೆರಿಪದವು ನಿವಾಸಿ ಸುಕುಮಾರ ಬೆಳ್ಚಾಡ (28) ಬಂಧಿತ ಆರೋಪಿಗಳು ಎಂದು ಪೊಲೀಸರು ತಿಳಿಸಿದ್ದಾರೆ. ಈ ಮೂವರೂ ಸಂಘಪರಿವಾರದ ಕಾರ್ಯಕರ್ತರು ಎಂದು ತಿಳಿದು ಬಂದಿದೆ. ಇನ್ನಿಬ್ಬರು ಆರೋಪಿಗಳಾದ ಜಯಪ್ರಕಾಶ್ ಹಾಗು ರಾಜ ಈಗ ತಲೆಮರೆಸಿಕೊಂಡಿದ್ದಾರೆ.

ಈ ಪ್ರಕರಣದ ವಿವರ ಪೊಲೀಸರಿಗೆ ಸಲ್ಲಿಸಲಾದ ದೂರಿನ ಪ್ರಕಾರ ಹೀಗಿದೆ :

ಪರಿಶಿಷ್ಟ ಪಂಗಡಕ್ಕೆ ಸೇರಿದ ಬಾಲಕಿಯನ್ನು 2019ನೇ ಇಸವಿಯಲ್ಲಿ ಆಕೆಯ ಸಂಬಂಧಿಕರ ಮನೆಯಲ್ಲಿ ಜಯಪ್ರಕಾಶ್‌ ಎಂಬಾತ ಅತ್ಯಾಚಾರ ನಡೆಸಿದ್ದಾನೆ.‌ ಕಳೆದ ಜನವರಿಯಲ್ಲಿ ಅಚ್ಚು ಯಾನೆ ಅಕ್ಷಯ್‌ ಎಂಬಾತ ಬೆರಿಪದವು ಶಾಲೆಯ ಬಳಿಗೆ ಬಂದು ಬೇರೆ ಬೇರೆ ದಿನಗಳಲ್ಲಿ 3 ಬಾರಿ ಅತ್ಯಾಚಾರ ನಡೆಸಿದ್ದಾನೆ. ಕಳೆದ ಮೇ ತಿಂಗಳಿನಲ್ಲಿ ಬೆರಿಪದವು ರಾಜ ಎಂಬಾತ ಬಾಲಕಿಗೆ ಕರೆ ಮಾಡಿ ಮಾತನಾಡಿಕೊಂಡಿದ್ದು, ಬೆರಿಪದವು ವಿದ್ಯಾರಣ್ಯ ಶಾಲೆಯ ಗುಡ್ಡ ಜಾಗಕ್ಕೆ ಬರಲು ಹೇಳಿ, ಬಾಲಕಿಯನ್ನು ಮದುವೆಯಾಗುತ್ತೇನೆಂದು ಪುಸಲಾಯಿಸಿ ಅತ್ಯಾಚಾರ ನಡೆಸಿರುತ್ತಾನೆ. ಕಳೆದ ಜೂನ್‌ ತಿಂಗಳಿನ ಮೊದಲ ವಾರದಲ್ಲಿ ಅಚ್ಚು ಯಾನೆ ಅಕ್ಷಯ್‌ ಎಂಬಾತನ ಮುಖಾಂತರ ಸುಕುಮಾರ ಪರಿಚಯಿಸಿಕೊಂಡು ಮುದುವೆಯಾಗುತ್ತೇನೆಂದು ಬೆರಿಪದವು ಎಂಬಲ್ಲಿಗೆ ಬರಲು ಹೇಳಿ ಅಲ್ಲಿನ ವಿದ್ಯಾರಣ್ಯ ಶಾಲೆಯ ಗುಡ್ಡ ಜಾಗದಲ್ಲಿ ಅತ್ಯಾಚಾರ ನಡೆಸಿದ್ದಾನೆ.

ಅಲ್ಲದೆ ಮೊನ್ನೆ ಜುಲೈ 28 ರಂದು ರಾತ್ರಿ ವೇಳೆ ಕಮಾಲಾಕ್ಷ ಕಮಲಾಕ್ಷ ಬೆಳ್ಚಾಡನು ಮದುವೆಯಾಗು ತ್ತೇನೆಂದು ಭರವಸೆ ನೀಡಿ, ಬಾಯಾರು ಗ್ರಾಮದಲ್ಲಿರುವ ಅವರ ಸಂಬಂಧಿಯವರ ಖಾಲಿ ಮನೆಯಲ್ಲಿ ಅತ್ಯಾಚಾರ ಮಾಡಿರುತ್ತಾನೆ. ಈ ಎಲ್ಲ ಘಟನೆಗಳನ್ನು ಬಾಲಕಿ ಪೊಲೀಸರ ಮುಂದೆ ಹೇಳಿಕೆ ನೀಡಿದ್ದು, ಅದರಂತೆ ಪೋಕ್ಸೋ , ಅತ್ಯಾಚಾರ ಪ್ರಕರಣ ದಾಖಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಮನುಷ್ಯತ್ವ ಎಂಬುದು ಕಾಳಿನಷ್ಟಾದರೂ ಇರುವವರು ಈ ಘಟನೆಯ ವಿವರ ಕೇಳಿದರೆ ಬೆಚ್ಚಿ ಬೀಳುತ್ತಾರೆ. ಒಬ್ಬ ಅತ್ಯಂತ ದುರ್ಬಲ ವರ್ಗದ ಅಮಾಯಕಿಯನ್ನು ಅದೇನೇನೋ ಹೇಳಿ, ಇನ್ನು ಏನೇನೋ ಹೆದರಿಸಿ, ಬೆದರಿಸಿ, ಪುಸಲಾಯಿಸಿ, ಬ್ಲ್ಯಾಕ್ ಮೇಲ್ ಮಾಡಿ ಆಕೆಯ ಅಷ್ಟೂ ಅಸಹಾಯಕತೆಯನ್ನು ದುರುಪಯೋಗ ಮಾಡಿಕೊಂಡು ಈ ರೀತಿ ಆಕೆಯ ಮೇಲೆ ಸರಣಿ ಅತ್ಯಾಚಾರ ನಡೆಸಲಾಗಿದೆ.

ಒಂದು ಕ್ಷಣ ಆಕೆಯ ಬಗ್ಗೆ ಯೋಚಿಸಿದರೆ, ಆಕೆ ಮಾನಸಿಕವಾಗಿ ಅದೆಷ್ಟು ಜರ್ಜರಿತಳಾಗಿರಬಹುದು ಎಂದು ಊಹಿಸಿದರೇ ಸಾಕು. ಮನುಷ್ಯನಾದವನು ಅದನ್ನು ಸಹಿಸುವುದು ಕಷ್ಟ. ಆದರೆ ಉಡುಪಿಯಲ್ಲಿ ನಾಲ್ವರು ಹೆಣ್ಣು ಮಕ್ಕಳು ತಮಾಷೆಗೆ ಮೊಬೈಲ್ ನಲ್ಲಿ ವೀಡಿಯೊ ಮಾಡಿದ್ದನ್ನು ರಾಷ್ಟ್ರೀಯ, ಅಂತರ್ ರಾಷ್ಟ್ರೀಯ ಷಡ್ಯಂತ್ರ ಎಂದು ಹೇಳಿಕೊಂಡು ರಾಜ್ಯವಿಡೀ ತಿರುಗಾಡುತ್ತಿರುವ ಬಿಜೆಪಿ ಹಾಗು ಸಂಘ ಪರಿವಾರದ ನಾಯಕರಿಂದ ಇಂತಹ ಮನುಷ್ಯತ್ವವನ್ನು ನೀವು ನಿರೀಕ್ಷಿಸುವುದು ತೀರಾ ದುಬಾರಿಯಾಗುತ್ತದೆ.

ಒಬ್ಬ ಅಮಾಯಕ ಹಿಂದೂ ಬಾಲಕಿಯ ಮೇಲೆ ಈ ರೀತಿಯ ಘೋರ ಅನ್ಯಾಯವಾದಾಗ ಆ ಬಗ್ಗೆ ಒಬ್ಬನೇ ಒಬ್ಬ ಬಿಜೆಪಿ ಅಥವಾ ಸಂಘ ಪರಿವಾರದ ನಾಯಕ ಮಾತಾಡಿದ್ದನ್ನು ನೀವೆಲ್ಲಾದರೂ ಕೇಳಿದ್ದೀರಾ ? ಉಡುಪಿ ಪ್ರಕರಣದ ಬಗ್ಗೆ ಹಸಿ ಹಸಿ ಸುಳ್ಳು ಟ್ವೀಟ್ ಮಾಡಿದ ರಶ್ಮಿ ಸಾಮಂತ್ ವಿಟ್ಲದ ಆ ಅಮಾಯಕ ದಲಿತ ಬಾಲಕಿಯ ಪರವಾಗಿ ಹೇಳಿಕೆ ಕೊಟ್ಟಿದ್ದನ್ನು, ಬಂಧಿತ ಸಂಘ ಪರಿವಾರದ ಕಾರ್ಯಕರ್ತರ ನಡೆಯನ್ನು ಖಂಡಿಸಿದ್ದನ್ನು, ಅವರ ಹಿಂದೆ ಯಾವುದೋ ಷಡ್ಯಂತ್ರವಿದೆ ಎಂದು ಆರೋಪಿಸಿದ್ದನ್ನು ಯಾರಾದರೂ ನೋಡಿದ್ದಾರಾ ?

ಎಲ್ಲಿದ್ದಾರೆ ಶೋಭಾ ಕರಂದ್ಲಾಜೆ ? ಎಲ್ಲಿದ್ದಾರೆ ಸಿ ಟಿ ರವಿ ? ಎಲ್ಲಿದ್ದಾರೆ ಯಶಪಾಲ್ ಸುವರ್ಣ ? ಎಲ್ಲಿದ್ದಾರೆ ಡಾ. ಕಲ್ಲಡ್ಕ ಪ್ರಭಾಕರ್ ಭಟ್ ?. ಈ ಹಿಂದೆ ಪುತ್ತೂರಿನಲ್ಲಿ ನಾರಾಯಣ್ ರೈ ಎಂಬ 71 ವರ್ಷದ ಆರೆಸ್ಸೆಸ್ ಮುಖಂಡ 17 ವರ್ಷದ ದಲಿತ ಬಾಲಕಿ ಮೇಲೆ ಅತ್ಯಾಚಾರ ಮಾಡಿ ಆಕೆ ಗರ್ಭಿಣಿಯಾಗಿ ಮಗುವಿಗೆ ಜನ್ಮ ನೀಡಿದ ಪ್ರಕರಣ ನಡೆದಿತ್ತು. ಇಡೀ ಪ್ರಕರಣ ಮುಚ್ಚಿ ಹಾಕಲು ನಾರಾಯಣ ರೈ ಸಾಕಷ್ಟು ಕಿತಾಪತಿ ಮಾಡಿದ್ದೂ ಬೆಳಕಿಗೆ ಬಂದಿತ್ತು.

ಆಗಲೂ ಈ ಬಿಜೆಪಿ , ಸಂಘ ಪರಿವಾರದ ಮುಖಂಡರು ಬಾಯಿ ಬಿಟ್ಟಿರಲಿಲ್ಲ. ಮೊನ್ನೆ ತೀರ್ಥಹಳ್ಳಿಯಲ್ಲಿ ಇವರದೇ ಎಬಿವಿಪಿಯ ಅಧ್ಯಕ್ಷ ಪ್ರತೀಕ್ ಗೌಡ ಎಂಬಾತ ಯುವತಿಯ ಅಶ್ಲೀಲ ವೀಡಿಯೊ ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟು ಆಕೆಯ ಮಾನ ಹರಾಜು ಹಾಕಿದ್ದ. ಆ ಬಗ್ಗೆಯೂ ಬಿಜೆಪಿ ಮುಖಂಡರು ಗಪ್ ಚುಪ್.

ಉಡುಪಿ ವೀಡಿಯೊ ಪ್ರಕರಣದಲ್ಲಿ ಬಿಜೆಪಿ ನಾಯಕರು ಏನೇನು ಇಲ್ಲಸಲ್ಲದ ಆರೋಪಗಳನ್ನು ತಾವೇ ಸೃಷ್ಠಿ ಮಾಡಿದ್ದರೋ, ಅವೆಲ್ಲವೂ ನಿಜವಾಗಿ ವಿಟ್ಲದಲ್ಲಿ, ಪುತ್ತೂರಿನಲ್ಲಿ, ತೀರ್ಥಹಳ್ಳಿಯಲ್ಲಿ ನಿಜವಾಗಿ ನಡೆದಿವೆ. ತೀರ್ಥಹಳ್ಳಿಯಲ್ಲಿ ಎಬಿವಿಪಿ ನಾಯಕ ಪ್ರತೀಕ್ ಗೌಡ ಹಿಂದೂ ಯುವತಿಯ ಅಶ್ಲೀಲ ವೀಡಿಯೊ ಎಲ್ಲೆಡೆ ಹರಿಬಿಟ್ಟಿದ್ದ. ಪುತ್ತೂರಿನಲ್ಲಿ ನಾರಾಯಣ ರೈ ಎಂಬ ಆರೆಸ್ಸೆಸ್ ಮುಖಂಡ ದಲಿತ ಬಾಲಕಿಯ ಮೇಲೆ ಅತ್ಯಾಚಾರ ಮಾಡಿ ಆಕೆಯನ್ನು ಗರ್ಭಿಣಿ ಮಾಡಿದ್ದ. ಅದೇ ಪುತ್ತೂರಿನಲ್ಲಿ ಸಾಮೂಹಿಕ ಅತ್ಯಾಚಾರ ಮಾಡಿದ ಪ್ರಕರಣದಲ್ಲಿ ಐದು ಮಂದಿ ಎಬಿವಿಪಿ ಕಾರ್ಯಕರ್ತರು ಬಂಧನವಾಗಿದ್ದರು. ಈಗ ವಿಟ್ಲದಲ್ಲಿ ಸಂಘ ಪರಿವಾರದ ಕಾರ್ಯಕರ್ತರು ಒಬ್ಬ ಅಮಾಯಕ ಬಾಲಕಿಯನ್ನು ಅತ್ಯಾಚಾರ ಮಾಡಿದ್ದಾರೆ.

ಈಗ ಬಿಜೆಪಿ ಹಾಗು ಸಂಘ ಪರಿವಾರದ ಮುಖಂಡರು ತಾವು ಹೇಳಿಕೊಳ್ಳುವಂತೆ ನಿಜವಾಗಿಯೂ ಹಿಂದೂ ಪರ ಹೌದು ಎಂದಾದರೆ ಅವರೆಲ್ಲರೂ ವಿಟ್ಲಕ್ಕೆ ಹೋಗಬೇಕು. ಅಲ್ಲಿನ ಬಸ್ ಸ್ಟಾಂಡ್ ನಲ್ಲಿ ಆ ಬಂಧಿತರ ವಿರುದ್ಧ ದೊಡ್ಡ ಪ್ರತಿಭಟನೆ ನಡೆಸಬೇಕು. ಬಂಧಿತರ ಹಿಂದೆ ಇನ್ನೂ ಯಾರ್ಯಾರು ಇದ್ದಾರೆ ಎಂದು ತನಿಖೆ ನಡೆಸಲು ಆಗ್ರಹಿಸಬೇಕು. ಬಂಧಿತರು ಅತ್ಯಾಚಾರದ ವೀಡಿಯೊ ಮಾಡಿದ್ದಾರಾ ? ಅದನ್ನು ಬೇರೆ ಕಡೆ ಕಳಿಸಿದ್ದಾರಾ ? ಈ ಬಗ್ಗೆ ತನಿಖೆ ಮಾಡಿ ಎಂದು ಕಾಂಗ್ರೆಸ್ ಸರಕಾರಕ್ಕೆ ಒತ್ತಡ ಹೇರಬೇಕು.

ಹಾಗೆ ಮಾಡ್ತಾರಾ ಅವರು ?. ಇನ್ನು ಈ ಸಂಘ ಪರಿವಾರದ ಬೆಂಬಲಿಗ ಐಟಿ ಪಡೆ ಸೋಷಿಯಲ್ ಮೀಡಿಯಾದಲ್ಲಿ ವಿಟ್ಲ ಘಟನೆ ಬಗ್ಗೆ ಏನು ಬರೆದಿದೆ ?. ಭಟ್ಟಂಗಿ ಮಾಧ್ಯಮಗಳು ವಿಟ್ಲದ ಘಟನೆಯನ್ನು ಹೇಗೆ ವರದಿ ಮಾಡಿವೆ ಎಂದು ಒಮ್ಮೆ ನೋಡಿ. ನಿಮಗೆ ತೀವ್ರ ನಿರಾಶೆ ಖಚಿತ. ಅಂದ್ರೆ. ಇವರಿಗಿರೋದು ಹಿಂದೂಗಳ ನಿಜವಾದ ಕಾಳಜಿ ಅಲ್ಲ. ಇವರಿಗಿರೋದು ಮುಸ್ಲಿಂ ದ್ವೇಷ ಹಾಗು ಎಲ್ಲದರಲ್ಲೂ, ಹೇಗಾದರೂ ಮಾಡಿ, ಏನು ಮಾಡಿಯಾದರೂ ರಾಜಕೀಯ ಲಾಭ ಪಡೆಯುವ ದುರುದ್ದೇಶ ಮಾತ್ರ. ಅಲ್ವಾ ?