ಮೈಸೂರಿನ ಬಾನಂಗಳದಲ್ಲಿ ಸೂರ್ಯಕಿರಣ್ ಸಾಹಸ: ಮೈನವಿರೇಳಿಸಿದ ಏರ್ ಶೋ

ಮೈಸೂರು, ಅ.19: ಬಾನಂಗಳದಲ್ಲಿ ಲೋಹದ ಹಕ್ಕಿಗಳ ಚಿತ್ತಾರ, ಮೈನವಿರೇಳಿಸುವ ಸಾಹಸಮಯ ಹಾರಾಟ. ತ್ರಿವರ್ಣ ಧ್ವಜದ ಬಣ್ಣದ ಚಿತ್ತಾರ, ನಕ್ಷತ್ರ ಹಾಗೂ ಗರುಡದ ಆಕೃತಿಗಳನ್ನು ಮೂಡಿಸಿದ ಭಾರತೀಯ ವಾಯುಪಡೆಯ ಸೂರ್ಯಕಿರಣ್ ಏರೋಬ್ಯಾಟಿಕ್ ತಂಡದ ಪ್ರದರ್ಶನ ಸಹಸ್ರಾರು ಪ್ರೇಕ್ಷಕರನ್ನು ರೋಮಾಂಚನಗೊಳಿಸಿತು.

ನಗರದ ಬನ್ನಿಮಂಟಪದ ಪಂಜಿನ ಕವಾಯತು ಮೈದಾನದಲ್ಲಿ ಸೋಮವಾರ ನಡೆದ ಏರ್ ಶೋನಲ್ಲಿ ಬೆಳಿಗ್ಗೆ 11.55ಕ್ಕೆ ಸೂರ್ಯಕಿರಣ್ ತಂಡದ ಪೈಲಟ್‌ಗಳು ವೈಮಾನಿಕ ಪ್ರದರ್ಶನ ಆರಂಭಿಸಿದರು. ಸುಮಾರು 25 ನಿಮಿಷಗಳ ಕಾಲ ನಡೆದ ಪ್ರದರ್ಶನದಲ್ಲಿ ವಿಮಾನಗಳ ಸಾಹಸಮಯ ಹಾರಾಟ ನೋಡುಗರ ಗಮನ ಸೆಳೆಯಿತು.

ಕೆಂಪು ಮತ್ತು ಬಿಳಿ ಬಣ್ಣದ ಒಂಬತ್ತು ಹಾಕ್ ಎಂಕೆ-132 ಜೆಟ್ ವಿಮಾನಗಳು ಆಗಸದಲ್ಲಿ ಏಕಕಾಲದಲ್ಲಿ ಹಾರಾಟ ನಡೆಸಿ ವಿವಿಧ ಆಕೃತಿಗಳನ್ನು ಮೂಡಿಸಿದವು. ವಿಮಾನಗಳ ಸಂಘಟಿತ ಹಾರಾಟ, ವೇಗದ ಚಲನೆ ಹಾಗೂ ಆಕಾಶದಲ್ಲಿ ಮೂಡಿಸಿದ ಬಣ್ಣಬಣ್ಣದ ಚಿತ್ತಾರ ಪ್ರೇಕ್ಷಕರಲ್ಲಿ ಅಚ್ಚರಿ ಮೂಡಿಸಿತು.

ಹವಾಮಾನ ವೈಪರೀತ್ಯದ ಆತಂಕದ ನಡುವೆಯೂ ನಡೆದ ಪ್ರದರ್ಶನವನ್ನು ವೀಕ್ಷಿಸಲು ಸಾರ್ವಜನಿಕರು ಉತ್ಸಾಹದಿಂದ ಆಗಮಿಸಿದ್ದರು. ಸೂರ್ಯಕಿರಣ್ ತಂಡದ ಪೈಲಟ್‌ಗಳಾದ ಅಭಿಮನ್ಯು ತ್ಯಾಗಿ, ಅಜಯ್ ಕುಮಾರ್, ಗಗನ್, ವಿಷ್ಣು ಹಾಗೂ ದಿವಾಕರ್ ಸಿಂಗ್ ನೇತೃತ್ವದಲ್ಲಿ ನಡೆದ ವೈಮಾನಿಕ ಸಾಹಸಕ್ಕೆ ಪ್ರೇಕ್ಷಕರಿಂದ ಮೆಚ್ಚುಗೆ ವ್ಯಕ್ತವಾಯಿತು.

ರಸ್ತೆಯಲ್ಲೇ ನಿಂತು ವೀಕ್ಷಣೆ

ಕವಾಯತು ಮೈದಾನದಲ್ಲಿ ನಡೆದ ವೈವಾನಿಕ ಪ್ರದರ್ಶನವನ್ನು ಸಾವಿರಾರು ಮಂದಿ ಮೈದಾನದ ಹೊರಗೆ, ಮನೆಯ ಮಹಡಿ ಮೇಲೆ ನಿಂತು ಕಣ್ತುಂಬಿಕೊಂಡರು. ಮೈದಾನ ಭರ್ತಿಯಾಗಿದ್ದ ಹಿನ್ನೆಲೆಯಲ್ಲಿ ಒಳ ಹೋಗಲು ಆಗದೆ ಕೆಲವರು ರಸ್ತೆಯಲ್ಲೇ ನಿಂತು ವೀಕ್ಷಣೆ ಮಾಡಿದರು. ನಗರದ ಅನೇಕರು ತಮ್ಮ ಮನೆಯ ಮಹಡಿಯಲ್ಲಿ ನಿಂತು ವೀಕ್ಷಿಸಿದರು.

ದೇಶದಾದ್ಯಂತ ೮೦೦ ಶೋ ನೀಡಿದ್ದು, ನಾಲ್ಕೈದು ತಿಂಗಳು ೬೦೦ಕಿ.ಮೀ ವೇಗದಲ್ಲಿ ಸಂಚರಿಸುತ್ತದೆ. ಒಂಭತ್ತು ವಿಮಾನ ಹಾಗೂ 25ಮಂದಿ ಕಾರ್ಯನಿರ್ವಹಿಸುತ್ತಾರೆ. ಮೈಸೂರು ದಸರೆಯಲ್ಲಿ ಇಂದು ಯಶಸ್ವಿಯಾಗಿದ್ದು, ಜನ ಸಂಭ್ರಮಿಸಿದರೆ ನಮಗೆ ಅದೇ ಖುಷಿ ಕೊಡುತ್ತದೆ.

-ಅಭಿಮನ್ಯು ತ್ಯಾಗಿ.