SIR ಕುರಿತು ಚರ್ಚಿಸಲು ಕರ್ನಾಟಕದಲ್ಲಿ ವಿಶೇಷ ಅಧಿವೇಶನ ಕರಿಯಬೇಕು: ಪ್ರಕಾಶ್ ರಾಜ್ ಒತ್ತಾಯ

ಮೈಸೂರು: ಕರ್ನಾಟಕದಲ್ಲಿ ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ (ಎಸ್ಐಆರ್) ವಿಚಾರವಾಗಿ ಚರ್ಚಿಸಲು ವಿಶೇಷ ಅಧಿವೇಶ ಕರೆಯಬೇಕೆಂದು ಬಹುಭಾಷ ನಟ ಪ್ರಕಾಶ್ ರಾಜ್ ಒತ್ತಾಯಿಸಿದರು.

ಎಸ್ ಐಆರ್ ಪರಿಶೋಧ ಮತ್ತು ಪ್ರತಿರೋಧದ ಹಿನ್ನೆಲೆಯಲ್ಲಿ ಮೈಸೂರಿನ ರಾಮಕೃಷ್ಣನಗರದ ಕನ್ನಡ ನೃಪತುಂಗ ಶಾಲೆ ಆವರಣದಲ್ಲಿ ಮಂಗಳವಾರ ಎಸ್ಐಆರ್ ಸಂತ್ರಸ್ತರೊಂದಿಗೆ ಸಂವಾದ ನಡೆಸುವ ಮುನ್ನ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು.

ಎಸ್ ಐಆರ್ ಲೋಪದೋಷಗಳನ್ನು ಪತ್ತೆ ಮಾಡಲು ರಾಜ್ಯ ಸರಕಾರ ಎಲ್ಲಾ ಬೂತ್ ಗಳ ಸೋಶಿಯಲ್ ಆಡಿಟ್ ಮಾಡಬೇಕು, ಈಗಾಗಲೆ ನಾವು ಕೆಲ ಸಂಘಟನೆಗಳ ಜತೆಗೂಡಿ 100 ಬೂತ್ ಗಳಲ್ಲಿ ಪರಿಶೀಲಿಸಿ ಲೋಪದೋಷಗಳ ಪತ್ತೆ ಮಾಡಿ ಸಾಕ್ಷಿ ಸಂಗ್ರಹಿಸಿದ್ದೇವೆ. ರಾಜ್ಯ ಸರಕಾರ ಇದೇ ರೀತಿ ರಾಜ್ಯದ ಎಲ್ಲಾ ಬೂತ್ ಗಳ ದೋಷಗಳನ್ನು ಸೋಶಿಯಲ್ ಆಡಿಟ್ ಮುಖಾಂತರ ಪತ್ತೆ ಮಾಡಬೇಕು ಎಂದು ಹೇಳಿದರು.

SIR ವಿರುದ್ಧ ಜನರು ಬೀದಿಗಿಳಿಯುವವರೆಗೆ ಯಾವುದೇ ಪರಿಹಾರ ಕಂಡುಕೊಳ್ಳಲು ಆಗುವುದಿಲ್ಲ.‌ ಹಾಗಾಗಿ ಈ ನಿಟ್ಟಿನಲ್ಲಿ ಸಿಜೆಪಿಗಿಂತ ದೊಡ್ಡ ಮಟ್ಟದ ಹೋರಾಟ ನಡೆಯಬೇಕು. 2023 ರ ನಂತರ ಚುನಾವಣೆ ಆಯೋಗ ಮಾಡಿದ ನಿರ್ಧಾರಗಳ ಎಲ್ಲಾ ದಾಖಲೆಗಳನ್ನು ಸುಪ್ರೀಂಕೋರ್ಟ್ ವಶಕ್ಕೆ ಪಡೆಯಬೇಕು ಇಲ್ಲವಾದಲ್ಲಿ ಅದನ್ನೂ ಬೆಂಕಿಗೆ ಹಾಕಿ ನಾಶ ಮಾಡುತ್ತಾರೆ ಎಂದು ಎಚ್ಚರಿಸಿದರು.

ಇದು ಕೇವಲ ಮತಗಳ್ಳತನವಲ್ಲ, ಬಾಬಾ ಸಾಹೇಬರ ಸಂವಿಧಾನ ಕೊಲ್ಲುವ ಯತ್ನವಾಗಿದೆ. ಕೊಲೆಗಾರ ಜ್ಞಾನೇಶ್ ಕುಮಾರ್ ಎಂದು ಈಗಾಗಲೇ ಗೊತ್ತಾಗಿದೆ. ಇದನ್ನು ಮಾಡಲು ಹೇಳಿದವರು ಮೋದಿ ಮತ್ತು ಅಮಿತ್ ಶಾ ಆಗಿದ್ದಾರೆ. ಇವರನ್ನು ಯಾವುದೇ ಕಾರಣಕ್ಕೂ ಬಿಡುವುದಿಲ್ಲ, ಈ ಇಬ್ಬರೂ ದೇಶದ್ರೋಹಿಗಳನ್ನು ನೆಮ್ಮದಿಯಾಗಿ ತಪ್ಪಿಸಿಕೊಳ್ಳಲು ಬಿಡುವುದಿಲ್ಲ ಎಂದು ಹೇಳಿದರು.

ಜ್ಞಾನೇಶ್ ಕುಮಾರ್ ಮಾಡಿರುವುದು ಪತ್ರಿಕಾಗೋಷ್ಠಿಯಲ್ಲ, ಅದು ತಪ್ಪೊಪ್ಪಿಗೆ. ಕೊಲೆ ಮಾಡುವಾಗ ಅವರು ಸಿಕ್ಕಿಹಾಕಿಕೊಳ್ಳಲಿಲ್ಲ. ಸಾಕ್ಷಿ ನಾಶ ಮಾಡುವಾಗ ಸಿಕ್ಕಿಕೊಳ್ಳುತ್ತಿದ್ದಾರೆ. ಸಾಕ್ಷಿ ನಾಶ ಮಾಡಿದಷ್ಟು ಅವರ ಪಾಪದಕೊಡ ತುಂಬುತ್ತದೆ ಎಂದರು.

ಬಿಜೆಪಿ ಅವನತಿಗೆ ಹೋಗಲಿದೆ ಎಂದು ತಿಳಿದು ಅವರು ಈ ಕೆಲಸ ಮಾಡಿದ್ದಾರೆ. ಎಸ್ ಐಆರ್ ಅಕ್ರಮದ ಮುಖಾಂತರ ಪಶ್ಚಿಮ ಬಂಗಾಳ, ಬಿಹಾರದಂತಹ ರಾಜ್ಯಗಳಲಿ ಜಯಶಾಲಿಯಾದರು. ಚುನಾವಣೆ ಅಕ್ರಮದ ಮುಖಾಂತರ ಎಲ್ಲಾ ವಿರೋಧ ಪಕ್ಷಗಳನ್ನು ನಾಶ ಮಾಡುತ್ತಾ ಬಂದರು. ಈಗ ಸಾಕ್ಷಿ ಸಮೇತ ಸಿಕ್ಕಿ ಬಿದ್ದಿದ್ದಾರೆ. ಯಾವುದೇ ಕಾರಣಕ್ಕೂ ಬಿಡುವುದಿಲ್ಲ ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ವಿವಿಧ ಸಂಘಟನೆಗಳ ಮುಖಂಡರಾದ ಮೇಜರ್ ಜನರಲ್ ಒಂಬತ್ಕೆರೆ, ಕಮ್ಯುನಿಸ್ಟ್ ಪಕ್ಷದ ರವಿ, ದಸಂಸ ಮುಖಂಡ ಹರಿಹರ ಆನಂದಸ್ವಾಮಿ, ಎಸ್ ಡಿಪಿಐ ಮುಖಂಡ ಅಮ್ಜದ್ ಖಾನ್, ಹೋರಾಟಗಾರ್ತಿ ರತಿರಾವ್, ರೈತ ಸಂಘದ ಬಡಗಲಪುರ ನಾಗೇಂದ್ರ, ಸಂಸ್ಕೃತಿ ಚಿಂತಕ ಕೋಟಗಾನಹಳ್ಳಿ ರಾಮಯ್ಯ, ಜಿಲ್ಲಾ ಪತ್ರಕರ್ತರ ಸಂಘದ ಅಧ್ಯಕ್ಷ ಕೆ. ದೀಪಕ್, ವರಹಳ್ಳಿ ಆನಂದ್, ಡಾ.ಮ.ಪು. ಪೂರ್ಣಾನಂದ ಹಾಗೂ ಇನ್ನಿತರರು ಉಪಸ್ಥಿತರಿದ್ದರು.

ಎಸ್ ಐಆರ್ ಅಕ್ರಮಗಳ ದಾಖಲೆಗಳನ್ನು ಸಂಗ್ರಹ:

ರಾಜ್ಯದ ಹಲವು ಜಿಲ್ಲೆಗಳಲ್ಲಿ ಸಂಚರಿಸಿ ಎಸ್ ಐಆರ್ ಅಕ್ರಮಗಳ ದಾಖಲೆಗಳನ್ನು ಸಂಗ್ರಹಿಸಿದ್ದೇವೆ. ನ್ಯಾಯಮೂರ್ತಿ ನಾಗಹಮೋಹನ್ ದಾಸ್ ಕೆಲ ಸಂಘಟನೆಗಳ ಮುಖಂಡರು ಹಾಗೂ ನಾನು ಸೆ.30 ರ ಬುಧವಾರ ಬೆಳಗ್ಗೆ ಶಾಸಕರ ಭವನದಲ್ಲಿ ಶಾಸಕರುಗಳ ಮುಂದೆ ಈ ಸಾಕ್ಷಿಗಳನ್ನು ಪ್ರಸ್ತುತಪಡಿಸಲಾಗುವುದು. ಮಧ್ಯಾಹ್ನ ಸಿಎಂ ಡಿ.ಕೆ.ಶಿವಕುಮಾರ್ ಭೇಟಿ ಮಾಡಿ ಅವರಿಗೂ ದಾಖಲೆಗಳ ಪಟ್ಟಿ ನೀಡಲಾಗುವುದು ಎಂದು ಪ್ರಕಾಶ್ ರಾಜ್ ತಿಳಿಸಿದರು.

ನಮ್ಮ ಹೋರಾಟಕ್ಕೆ ಬಿಜೆಪಿಯವರು ಬಂದರೆ ಅವರನ್ನು ಸೇರಿಸಿಕೊಳ್ಳುತ್ತೇವೆ. ಮಾಜಿ ಸಂಸದ ಪ್ರತಾಪ್ ಸಿಂಹ ಬಂದರೂ ಸೇರಿಸಿಕೊಳ್ಳುತ್ತೇವೆ ಎಂದು ಪ್ರಕಾಶ್‌ ರಾಜ್‌ ಹೇಳಿದರು.

ಮಾಧ್ಯಮದವರಿಗೂ ನನಗೂ ಭಿನ್ನಾಭಿಪ್ರಾಯವಿದೆ. ಅದನ್ನು ಮುಖಾಮುಖಿಯಾಗಿ ಸರಿತಪ್ಪುಗಳನ್ನು ಸರಿಪಡಿಸಿಕೊಳ್ಳಬೇಕು. ಪ್ರಜೆಗಳ ಸಮಸ್ಯೆ ಬಗೆಹರಿಸಬೇಕಾದರೆ ಮಾಧ್ಯಮದವರ ಪಾತ್ರವೂ ಮುಖ್ಯ. ಹೀಗಿದ್ದರೂ ಬರಬೇಕಾದ ಮಾಧ್ಯಮದವರೇ ಬಂದಿಲ್ಲ. ದೇಶದ ಮಾಧ್ಯಮವರನ್ನು ಕೊಂಡುಕೊಂಡಿದ್ದಾರೆ. ಅದೇ ಮಾಧ್ಯಮದ ಒಬ್ಬ ಪತ್ರಕರ್ತೆ ಇವರ ನಿಜ ಬಣ್ಣ ಬಯಲು ಮಾಡಿದ್ದಾಳೆ.

-ಪ್ರಕಾಶ್ ರಾಜ್, ಬಹುಭಾಷ ನಟ.