ಮೈಸೂರಿನಲ್ಲಿ ಮಹಿಷ ದಸರಾ ಆಚರಣೆ

ಮೈಸೂರು : ಹಲವು ವರ್ಷಗಳಿಂದ ಚಾಮುಂಡಿ ಬೆಟ್ಟದಲ್ಲಿರುವ ಮಹಿಷ ಪ್ರತಿಮೆಗೆ ಪುಷ್ಪಾರ್ಚನೆ ಮಾಡಲು ತಡೆಯೊಡ್ಡಿದ್ದ ಪೊಲೀಸರು ಶನಿವಾರ ಪ್ರತಿಮೆಗೆ ಪುಷ್ಪಾರ್ಚನೆಗೆೆ ಅವಕಾಶ ನೀಡಿದ್ದರಿಂದ ಅರಮನೆ ನಗರಿಯಲ್ಲಿ ಮಹಿಷ ದಸರಾ ಆಚರಣೆ ನಡೆಯಿತು.

ಮಹಿಷ ದಸರಾ ಆಚರಣಾ ಸಮಿತಿಯ ಉರಿಲಿಂಗಿ ಪೆದ್ದಿ ಮಠದ ಜ್ಞಾನಪ್ರಕಾಶ್ ಸ್ವಾಮೀಜಿ, ಮಾಜಿ ಮೇಯರ್ ಪುರುಷೋತ್ತಮ್, ಲೇಖಕ ಸಿದ್ದಸ್ವಾಮಿ ನೇತೃತ್ವದಲ್ಲಿ ಶನಿವಾರ ಬೆಳಗ್ಗೆ 8:30ಕ್ಕೆ ಚಾಮುಂಡಿ ಬೆಟ್ಟದಲ್ಲಿರುವ ಮಹಿಷನ ಪ್ರತಿಮೆ ಬಳಿಗೆ ತೆರಳಿದ ಮೂಲನಿವಾಸಿಗಳು ಮಹಿಷ ಪ್ರತಿಮೆಗೆ ಮಾಲಾರ್ಪಣೆ, ಪುಷ್ಪಾರ್ಚನೆ ನೆರವೇರಿಸಿ, ಬೌದ್ಧ ಆಚರಣೆ ಮೂಲಕ ದೀಪ ಬೆಳಗಿಸಿ ಪಂಚಶೀಲ ಬೋಧನೆ, ದಮ್ಮ ವಂದನೆ ಸಲ್ಲಿಸಿದರು.

ಬಳಿಕ ಮೈಸೂರು ನಗರದ ಪುರಭವನದ ಆವರಣದಲ್ಲಿ ನಡೆದ ವೇದಿಕೆ ಕಾರ್ಯಕ್ರಮದಲ್ಲಿ ಮಹಿಷ, ಬುದ್ಧ ಮತ್ತು ಅಂಬೇಡ್ಕರ್ ಅವರ ಕಂಚಿನ ಪ್ರತಿಮೆಗಳಿಗೆ ಪುಷ್ಪಾರ್ಚನೆ ಮಾಡುವ ಮೂಲಕ ಮಹಿಷ ದಸರಾ ಆಚರಣೆ ಕಾರ್ಯಕ್ರಮವನ್ನುಉದ್ಘಾಟಿಸಿ ಮಾತನಾಡಿದ ಪ್ರಗತಿಪರ ಚಿಂತಕ ವಿಠಲ್ ವಗ್ಗನ್ ಅವರು, ಮಹಿಷ ಎಂದರೆ ಬುದ್ಧ, ಮಹಿಷ ಜನಾಂಗವೇ ಬೌದ್ಧ ಜನಾಂಗ, ನಮ್ಮ ಮೂಲ ಪುರುಷನ ಇತಿಹಾಸ ಹೇಳಲು ನಾವು ಯಾರಿಗೂ ಹೆದರಬೇಕಿಲ್ಲ ಎಂದು ಹೇಳಿದರು.

ಮಹಿಷ ಎಂದರೆ ಎಮ್ಮೆ ಹಾಲು ಕುಡಿಯುವವರು, ಕೋಣದ ಜೊತೆ ಬೇಸಾಯ ಮಾಡುವವರು ಎಂದರ್ಥ. ಈ ನಾಡಿನ ಬಹುತೇಕರು ಆ ಕೆಲಸ ಮಾಡುತ್ತಿದ್ದರು. ಕ್ರಿಸ್ತ ಪೂರ್ವ ಏಳು ಸಾವಿರ ವರ್ಷಗಳ ಹಿಂದೆ ಮಹಿಷ ಸಿಂಧೂ ನದಿ ಬಯಲಿನ ನಾಗರಿಕತೆಯಲ್ಲಿದ್ದವರು. ಈ ವೇಳೆ ಭಾರತಕ್ಕೆ ಬಂದ ಆರ್ಯರು ಮಹಿಷನ ಜೊತೆ ಸಂಘರ್ಷಕ್ಕಿಳಿದು ಮಹಿಷನನ್ನು ಹತ್ಯೆ ಮಾಡುತ್ತಾರೆ. ಆ ನಡುವೆ ಭಾರತದಲ್ಲಿ ಆರ್ಯರ ಉಗಮವಾಗಿದೆ ಎಂದು ಹೇಳಿದರು.

ಮಹಿಷ ಮೈಸೂರಿಗಷ್ಟೇ ಸೀಮಿತವಾದ ವ್ಯಕ್ತಿಯಲ್ಲ, ಜಾರ್ಖಂಡ್ ಸೇರಿದಂತೆ ಅನೇಕ ಕಡೆಗಳಲ್ಲಿ ಮಹಿಷನ ಪ್ರತಿಮೆಗಳಿವೆ. ಕೋಲಾರದ ಕೆಜಿಎಫ್, ಹುಬ್ಬಳ್ಳಿಯ ಕೋಳಿವಾಡ, ಬೀದರ್‌ನ ಮಾಳೆಂಗಾವ್, ಉಡುಪಿಯ ಬಾರ್ಕೂರ್‌ನಲ್ಲಿ ಮಹಿಷ ಪ್ರತಿಮೆ ಮಂದಿರಗಳಿವೆ. ದೇಶದ ಸಾವಿರಾರು ಕಡೆಗಳಲ್ಲಿ ಮಹಿಷನ ಅಸ್ಮಿತೆ ಇನ್ನೂ ಜೀವಂತವಾಗಿದೆ. ಮಹಿಷ ಕೆಟ್ಟ ವ್ಯಕ್ತಿಯಾಗಿದ್ದರೆ, ಸಾವಿರಾರು ಕಡೆಗಳಲ್ಲಿ ಮಹಿಷ ಪ್ರತಿಮೆ ಇರಲು ಸಾಧ್ಯವೇ ಎಂದು ಪ್ರಶ್ನಿಸಿದರು.

ಬುದ್ಧ, ಅಂಬೇಡ್ಕರ್ ಪ್ರತಿಮೆಗಳ ನಂತರ ಮಹಿಷ ಪ್ರತಿಮೆಗಳು ದೇಶಾದ್ಯಂತ ಹೆಚ್ಚು ಇವೆ. ಮಹಿಷ ಚಾರಿತ್ರಿಕ ಪುರುಷ. ಆತ ಈ ನಾಡಿನಲ್ಲಿದ್ದ ಎಂಬುದಕ್ಕೆ ಅನೇಕ ಸಾಕ್ಷಿಗಳಿವೆ, ಕುರುಹುಗಳಿವೆ, ವಿವಿಧ ರಾಜ್ಯಗಳ ಗೆಜೆಟಿಯರ್‌ನಲ್ಲಿ ದಾಖಲಾಗಿದೆ. ಅಷ್ಟೇ ಯಾಕೆ ನಮ್ಮನ್ನು ವಿರೋಧಿಸುವ ಮನುಸ್ಮತಿಯ ಅಧ್ಯಾಯ 3 ಪುಟ ಸಂಖ್ಯೆ 63, ಶ್ಲೋಕ 167 ರಲ್ಲಿ ಎಮ್ಮೆ ಹಾಲು ಕುಡಿದವರು, ಕೋಣದ ಜೊತೆ ಬೇಸಾಯ ಮಾಡಿದವರು ಮಹಿಷ ಎಂಬ ಉಲ್ಲೇಖವಿದೆ ಎಂದು ಹೇಳಿದರು.

ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ವಹಿಸಿದ್ದ ಮಾಜಿ ಮೇಯರ್ ಮಹಿಷ ದಸರಾ ಆಚರಣಾ ಸಮಿತಿ ಅಧ್ಯಕ್ಷ ಪುರುಷೋತ್ತಮ್ ಮಾತನಾಡಿ, ಮೈಸೂರಿನ ಚಾಮುಂಡಿ ಬೆಟ್ಟದಲ್ಲಿರುವ ಮಹಿಷ ಪ್ರತಿಮೆಗೆ ಪುಷ್ಪಾರ್ಚನೆ ಮಾಡಲು ಅವಕಾಶ ಮಾಡಿಕೊಟ್ಟು ಗೃಹ ಸಚಿವ ಪ್ರಿಯಾಂಕ್ ಖರ್ಗೆ ತಮ್ಮ ಧೀರತನವನ್ನು ಮೆರೆದಿದ್ದಾರೆ ಎಂದು ಧನ್ಯವಾದ ಸಲ್ಲಿಸಿದರು.

ಲೇಖಕ ಸಿದ್ಧಸ್ವಾಮಿ ಪ್ರಾಸ್ತವಿಕವಾಗಿ ಮಾತನಾಡಿದರು. ಇತಿಹಾಸ ತಜ್ಞ ಪ್ರೊ.ನಂಜರಾಜ ಅರಸ್ ಕಾರ್ಯಕ್ರಮ ಕುರಿತು ಮಾತನಾಡಿದರು.

ಇದೇ ವೇಳೆ ಪ್ರಗತಿಪರ ಚಿಂತಕ ವಿಠಲ್ ವಗ್ಗನ್ ಅವರ ಮಹಿಷ ಚಾರಿತ್ರಿಕ, ಚಾಮುಂಡಿ ಕಾಲ್ಪನಿಕ ಪುಸ್ತಕ ಬಿಡುಗಡೆ ಮಾಡಲಾಯಿತು.

ಕಾರ್ಯಕ್ರಮದಲ್ಲಿ ಹಿರಿಯ ಸಾಹಿತಿ ಪ್ರೊ.ಕೆ.ಎಸ್.ಭಗವಾನ್, ಹೋರಾಟಗಾರರಾದ ಹರಿಹರ ಆನಂದಸ್ವಾಮಿ, ಅಹಿಂದ ಜವರಪ್ಪ, ಅಶೋಕಪುರಂ ಮಹೇಶ್, ದಸಂಸ ಮುಖಂಡರಾದ, ದೇವಗಳ್ಳಿ ಸೋಮಶೇಖರ್, ಆಲಗೂಡು ಶಿವಕುಮಾರ್, ಭುಗತಹಳ್ಳಿ ಮಣಿಯಯ್ಯ, ಮಲ್ಲಹಳ್ಳಿ ನಾರಾಯಣ್, ದಲಿತ ವೆಲ್‌ಫೇರ್ ಟ್ರಸ್ಟ್ ಅಧ್ಯಕ್ಷ ಚಿಕ್ಕಂದಾನಿ, ಯುವ ಮುಖಂಡ ಭರತ್ ರಾಮಸ್ವಾಮಿ, ಸಿದ್ದರಾಜು, ಸೋಮಯ್ಯ ಮಲೆಯೂರು, ಬನ್ನಹಳ್ಳಿ ಸೋಮಣ್ಣ , ಮತ್ತಿತರರು ಉಪಸ್ಥಿತರಿದ್ದರು.