Mysuru | ವಿಶ್ವವಿಖ್ಯಾತ ದಸರಾ ಲೈಟಿಂಗ್ಸ್ ಮುಕ್ತಾಯ

ಮೈಸೂರು : ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವದ ಜಗಮಗಿಸುವ ಲೈಟಿಂಗ್ಸ್ ರವಿವಾರ ಅಂತ್ಯಗೊಂಡಿದ್ದು, ಬಣ್ಣ ಬಣ್ಣದ ಬೆಳಕಿನ ಚಿತ್ತಾರಕ್ಕೆ ಕೊನೆ ದಿನವೂ ಸಾರ್ವಜನಿಕರು ಫೋಟೊ ಮತ್ತು ಸೆಲ್ಫಿ ತೆಗೆಸಿಕೊಳ್ಳಲು ಮುಗಿಬಿದ್ದರು.

ವಿಶ್ವವಿಖ್ಯಾತ ಮೈಸೂರು ದಸರಾ-2026 ಅ.11 ರಂದು ವಿಧ್ಯುಕ್ತವಾಗಿ ಚಾಲನೆಗೊಂಡ ದಿನದಂದು ಕಂಗೊಳಿಸಿದ ಲೈಟಿಂಗ್ಸ್ ಅ.21 ರಂದು ದಸರಾ ಜಂಬೂಸವಾರಿ ಮುಗಿದರೂ ಅ.31 ರ ಶನಿವಾರದವರೆಗೂ ವಿಸ್ತರಿಸಲಾಗಿತ್ತು. ನ.1 ರವಿವಾರ 71ನೇ ಕನ್ನಡ ರಾಜ್ಯೋತ್ಸವ ಅಂಗವಾಗಿ ಮತ್ತೊಂದು ದಿನ ಮುಂದೂಡಲ್ಪಟ್ಟಿತ್ತು. ಜಗಮಗಿಸುವ ಲೈಟಿಂಗ್ಸ್ ಕಣ್ತುಂಬಿಕೊಳ್ಳಲು ಲಕ್ಷಾಂತರ ಮಂದಿ ಮೈಸೂರಿಗೆ ಆಗಮಿಸಿ ಲೈಟಿಂಗ್ಸ್ ಕಂಡು ಸಂತಸಪಟ್ಟರು.

ಕೊನೆ ದಿನವಾದ ಇಂದು ಲೈಟಿಂಗ್ಸ್ ನೋಡಲು ಸಾವಿರಾರು ಮಂದಿ ದೇವರಾಜ ಅರಸು ರಸ್ತೆ, ಅಶೋಕ ರಸ್ತೆ, ನೂರಡಿ ರಸ್ತೆ, ಸಯ್ಯಾಜಿರಾವ್ ರಸ್ತೆ, ಕೆ.ಆರ್.ಸರ್ಕಲ್, ಹಾರ್ಡಿಂಜ್ ವೃತ್ತ, ಪುರಭವನದ ಅಂಬೇಡ್ಕರ್ ಪುತ್ಥಳಿ, ಗನ್ ಹೌಸ್ ವೃತ್ತಗಳಲ್ಲಿ ಸಂಚರಿಸಿ ಅಲ್ಲಲ್ಲಿ ಸೆಲ್ಫಿಗಳನ್ನು ತೆಗೆದುಕೊಂಡರು. ಕೆ.ಆರ್.ವೃತ್ತದಲ್ಲಿ ಯುವಕ, ಯವತಿಯರಂತೂ ಬೆಳಕಿನ ಸೊಬಗಿಗೆ ರಸ್ತೆಯಲ್ಲೇ ನಿಂತು ಫೋಟೊ ತೆಗೆಸಿಕೊಳ್ಳುತ್ತಿದ್ದು ಸಾಮಾನ್ಯವಾಗಿತ್ತು. ಕೆ.ಆರ್.ಸರ್ಕಲ್‌ನಿಂದ ಜಗನ್ಮೋಹನ ಪ್ಯಾಲೇಸ್ ವರೆಗೆ ಏಕಮುಖ ಸಂಚಾರ ಮಾಡಿದ್ದು ಫೋಟೊ ತೆಗಿಸಿಕೊಳ್ಳಲು ಅನುಕೂಲವಾಯಿತು.