Nanjanagudu | ಹುಲಿ ದಾಳಿಗೆ ಮಹಿಳೆ ಬಲಿ

ನಂಜನಗೂಡು/ಮೈಸೂರು : ಮೇಕೆ ಮತ್ತು ಕುರಿಗಳನ್ನು ಮೇಯಿಸುತ್ತಿದ್ದ ಮಹಿಳೆ ಮೇಲೆ ಹುಲಿಯೊಂದು ದಾಳಿ ಮಾಡಿ ಕಾಡಿನೊಳಗೆ ಹೊತ್ತೊಯ್ದು ಕೊಂದು ಹಾಕಿರುವ ಭೀಕರ ಘಟನೆ ನಂಜನಗೂಡು ತಾಲ್ಲೂಕಿನಲ್ಲಿ ಬುಧವಾರ ನಡೆದಿದೆ.

ನಂಜನಗೂಡು ತಾಲೂಕಿನ ಡೋರನಕಟ್ಟೆಯ ಮಾರಯ್ಯ ಎಂಬುವರ ಪತ್ನಿ ಮಾಚಮ್ಮ (45) ಮೃತ ಮಹಿಳೆಯಾಗಿದ್ದಾರೆ.

ಬುಧವಾರ ಮಧ್ಯಾಹ್ನ ಡೋರನಕಟ್ಟೆ ಆದಿವಾಸಿ ಕಾಲೋನಿಯಿಂದ ಕೇವಲ ಒಂದೂವರೆ ಕಿಲೋಮೀಟರ್ ದೂರದಲ್ಲಿರುವ ನಂಜದೇವರ ಬೆಟ್ಟದ ತಪ್ಪಲಿನ ಕಾಡಂಚಿನ ಸಮೀಪದಲ್ಲಿ ತನ್ನ 25ಕ್ಕೊ ಅಧಿಕ ಮೇಕೆ ಮತ್ತು ಕುರಿಗಳನ್ನು ತನ್ನ ಸಹವರ್ತಿಗಳಾದ ರಾಧಿಕ ಮತ್ತು ನಾಗಮ್ಮ ಎಂಬುವರ ಜೊತೆಗೂಡಿ ಮೇಯಿಸುತ್ತಿರುವಾಗ ಪೋದೆಯಲ್ಲಿ ಕುಳಿತಿದ್ದ ಭಾರಿ ಗಾತ್ರದ ಹುಲಿ ಮಾಚಮ್ಮನ ಮೇಲೆ ದಾಳಿ ಮಾಡಿದ ಕ್ಷಣಾರ್ಧದಲ್ಲಿಯೇ ಆಕೆಯನ್ನು ಕಾಡಿನೊಳಗೆ ಹೊತ್ತೊಯ್ದಿದೆ ಎನ್ನಲಾಗಿದೆ.

ಇದೇ ವೇಳೆ ಸಮಿಪದಲ್ಲೆ ಕುರಿಗಳನ್ನು ಮೇಯಿಸುತ್ತಿದ್ದ ರಾಧಿಕ ಮತ್ತು ನಾಗಮ್ಮ ಚೀರಾಟ ನಡೆಸಿ, ಕಾಲೋನಿಯ ಅಕ್ಕಪಕ್ಕದವರನ್ನು ಕರೆಸಿ ಸಾಕಷ್ಟು ಶಬ್ದ ಮಾಡಿ ಚೀರಾಡಿದರೂ ಪ್ರಯೋಜನವಾಗಲಿಲ್ಲ. ಹೆಚ್ಚಿನ ರೈತರು ಮತ್ತು ಸಾರ್ವಜನಿಕರು ಸ್ಥಳಕ್ಕೆ ಧಾವಿಸಿ ಹೆಡಿಯಾಲ ಅರಣ್ಯ ಇಲಾಖೆಯ ಅಧಿಕಾರಿಗಳಿಗೆ ವಿಚಾರ ಮುಟ್ಟಿಸಿದ್ದಾರೆ. ಕೂಡಲೆ ಅರಣ್ಯ ಇಲಾಖೆಯ ಸಹಾಯಕ ಅಧಿಕಾರಿ ಪರಮೇಶ್ ನೇತೃತ್ವದಲ್ಲಿ ಹೆಚ್ಚು ಸಿಬಂದಿಗಳನ್ನು ಕರೆಸಿಕೊಂಡು ಡ್ರೋಣ್ ಕ್ಯಾಮರಾ ಮೂಲಕ ಮಹಿಳೆಯ ಹುಡುಕಾಟದಲ್ಲಿ ತೊಡಗಿದ್ದ ವೇಳೆ ಸ್ಥಳದಿಂದ ಅರ್ಧ ಕಿಮೀ ದೂರದಲ್ಲಿ ಮಾಚಮ್ಮನ ಮೃತ ದೇಹ ಪತ್ತೆಯಾಗಿದೆ.

ಘಟನೆ ಸ್ಥಳದಲ್ಲಿ ಹೆಚ್ಚಿನ ಸಾರ್ವಜನಿಕರು ಬೀಡುಬಿಟ್ಟಿದ್ದು, ಅರಣ್ಯ ಇಲಾಖೆಯ ಅಧಿಕಾರಿಗಳ ವಿರುದ್ದ ಆಕ್ರೋಶ ವ್ಯಕ್ತಪಡಿಸಿದರು.