ಮೈಸೂರು: ಅಮಿತ್ ಶಾ ವಜಾಗೆ ಒತ್ತಾಯಿಸಿ ಪ್ರಗತಿಪರರ ಪ್ರತಿಭಟನೆ

ಮೈಸೂರು: ರಾಜ್ಯಸಭೆಯಲ್ಲಿ ಬಾಬಾಸಾಹೇಬ್ ಅಂಬೇಡ್ಕರ್ ಬಗ್ಗೆ ಅವಹೇಳನಾಕಾರಿಯಾಗಿ ಹೇಳಿಕೆ ನೀಡಿರುವ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರನ್ನು ಸಚಿವ ಸ್ಥಾನದಿಂದ ವಜಾಗೊಳಿಸಬೇಕು ಮತ್ತು ಮಹಿಳೆಯರ ಬಗ್ಗೆ ತುಚ್ಛವಾಗಿ ಮಾತನಾಡಿರುವ ವಿಧಾನರಿಷತ್ ಸದಸ್ಯ ಸಿ.ಟಿ.ರವಿ ಕ್ಷಮೆ ಕೇಳಬೇಕು ಮತ್ತು ಪರಿಷರ್ ಸ್ಥಾನಕ್ಕೆ ರಾಜೀನಾಮೆ ನೀಡಬೇಕು ಎಂದು ಒತ್ತಾಯಿಸಿ ಪ್ರಗತಿಪರ ಸಂಘಟನೆಗಳ ವತಿಯಿಂದ ಪ್ರತಿಭಟನೆ ನಡೆಸಲಾಯಿತು.

ನಗರದ ಚಿಕ್ಕಗಡಿಯಾರದ ಬಳಿ ಶನಿವಾರ ಸಂಜೆ ಜಮಾಯಿಸಿದ ಪ್ರತಿಭಟನಾಕಾರರು, ಅಂಬೇಡ್ಕರ್ ಭಾವಚಿತ್ರಗಳನ್ನು ಪ್ರದರ್ಶಿಸಿ, ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರನ್ನು ಸಚಿವ ಸ್ಥಾನದಿಂದ ವಜಾಗೊಳಿಸಬೇಕು, ಸಿ.ಟಿ.ರವಿ ಕ್ಷಮೆ ಕೇಳಬೇಕು ಮತ್ತು ರಾಜೀನಾಮೆ ನೀಡಬೇಕು ಎಂದು ಒಕ್ಕೋರಲಿನ ಒತ್ತಾಯ ಮಾಡಿದರು.

ವಿಶ್ರಾಂತ ಕುಲಪತಿ ಪ್ರೊ‌ಸಬೀಹ ಭೂಮಿಗೌಡ ಮಾತನಾಡಿ, ನಾಡಿನ ಕೋಟ್ಯಾಂತರ ಜನರ ಬದುಕಿನಲ್ಲಿ ಬೆಳಕನ್ನು ನೀಡಿದ ಬಾಬಾ ಸಾಹೇಬ್ ಅಂಬೇಡ್ಕರ್ ಅವರ ಬಗ್ಗೆ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಹೇಳಿಕೆ ನೀಡಿರುವುದು ಆಘಾತಕಾರಿ. ನಮಗೆ ದೇವರು ಎಂದು ಇರುವುದೇ ಅಂಬೇಡ್ಕರ್, ಯಾರೋ ಪೂಜಿಸುವ ದೇವರನ್ನು ನಾವು ಒಪ್ಪಲು ಸಾಧ್ಯವಿಲ್ಲ ಎಂದು ಹೇಳಿದರು.

ದೇಶದ ಪ್ರತಿ ನಾಗರೀಕರರಿಗೂ ಕಾನೂನು, ಬದುಕುವ ಹಕ್ಕು, ಜೀವನ ಕ್ರಮದಲ್ಲಿ ಸಾಮಾಜಿಕ ನ್ಯಾಯ ತಂದು ಕೊಟ್ಟವರು ಅಂಬೇಡ್ಕರ್, ಹಾಗಾಗಿ ಮತ್ತೆ ಮತ್ತೆ ನಾವು ಅಂಬೇಡ್ಕರ್ ಎನ್ನುತ್ತೇವೆ. ಇದಕ್ಕೆ ನಮಗೆ ಹೆಮ್ಮೆ ಇದೆ. ನೀವು ಹೇಳುವ ಯಾವ ದೇವರುಗಳ ಬಗ್ಗೆಯೂ ನಮಗೆ ವಿಶ್ವಾಸವಿಲ್ಲ. ನಿಮ್ಮ ಹೇಳಿಕೆ ನಿಮ್ಮ ಆಲೋಚನೆಗಳನ್ನು ಬಯಲಿಗೆ ಎಳೆದಿದೆ ಎಂದು ಆಕ್ರೀಶ ವ್ಯಕ್ತಪಡಿಸಿದರು.

ಒಬ್ಬ ಮಹಿಳೆಯ ಬಗ್ಗೆ ಅಸಹ್ಯವಾಗಿ ಮಾತನಾಡಿರುವ ವಿಧಾನಪರಿಷತ್ ಸದಸ್ಯ ಸಿ.ಟಿ.ರವಿ ಯೋಗ್ಯತೆ ಏನು ಎಂಬುದು ಗೊತ್ತಾಗಿದೆ. ಹೆಣ್ಣನ್ನು ಭಾರತೀಯ ನಾರಿ ಎಂದೆಲ್ಲಾ ಬೊಗಳೆ ಬಿಡುವ ಬಿಜೆಪಿ ನಾಯಕರುಗಳು ಹೆಣ್ಣಿನ ಬಗ್ಗೆ ಇಟ್ಟಿರುವ ಗೌರವವೂ ಗೊತ್ತಾಗುತ್ತಿದೆ. ನಾನು ಅಧಿಕಾರದಲ್ಲಿರುವುದರಿಂದ ಯಾವ ಪದವನ್ನು ಮಾತನಾಡಬಹುದು ಎಂಬ ಗಂಡಾಳಿಕೆಯ ದಬ್ಬಾಳಿಕೆಯನ್ನು ಸಹಿಸುವುದಿಲ್ಲ ಎಂದು ಹೇಳಿದರು.

ಹಿರಿಯ ರಂಗಕರ್ಮಿ ಸಿ.ಬಸವಲಿಂಗಯ್ಯ ಮಾತನಾಡಿ, ಇಂದಿರಾ ಗಾಂಧಿ ಒಂದುವರೆ ವರ್ಷ ತುರ್ತು ಪರಿಸ್ಥಿತಿ ಹೇರಿದ್ದರು. ಆದರೆ ನರೇಂದ್ರ ಮೋದಿ ಕಳೆದ ಹತ್ತು ವರ್ಷಗಳಿಂದ ಅಘೋಷಿತ ತುರ್ತು ಪರಿಸ್ಥಿತಿಯನ್ನು ನಮ್ಮ ಮೇಲೆ ಹೇರಿದ್ದಾರೆ. ಮೋದಿ, ಅಮಿತ್ ಶಾ ಅವರನ್ನು ಈ ದೇಶದ ರೈತರು, ವಿದ್ಯಾರ್ಥಿಗಳು, ದಲಿತರು, ಮಹಿಳೆಯರು ಹೋರಾಟಗಾರರು ಪ್ರಶ್ನೆ ಮಾಡಿದರೆ ದೇಶ ದ್ರೋಹದ ಪ್ರಕರಣ ದಾಖಲಿಸುತ್ತಾರೆ. ಇಂತಹ ಕೆಟ್ಟ ವ್ಯವಸ್ಥೆಯನ್ನು ತೊಲಗಿಸುವವರೆಗೂ ನಮ್ಮ ಹೋರಾಟ ಮುಂದುವರೆಯಬೇಕು ಎಂದು ಹೇಳಿದರು.

ಗಡಿಪಾರು ಆಗಿದ್ದ ವ್ಯಕ್ತಿ ದೇಶದ ಗೃಹ ಮಂತ್ರಿ ಆಗಿರುವುದು ನಮ್ಮ ದುರಂತ. ಹಾಗಾಗಿಯೇ ಇಂತೆಲ್ಲಾ ಪರಿಸ್ಥಿತಿಯನ್ನು ಎದುರಿಸುತ್ತಿದ್ದೇವೆ. ಮಣಿಪುರದ ಚುನಾವಣೆ ಹತ್ತಿರ ಬರುತ್ತಿರುವುದರಿಂದ ಮೋದಿ ನಾನು ಮನುಷ್ಯ ಎಂದು ಹೇಳುತ್ತಿದ್ದಾರೆ. ಇವರು ಜನರ ಹಕ್ಕುಗಳನ್ನು ಕದಿಯುವ ಮೂಲಕ ಪ್ರಜಾಪ್ರಭುತ್ವಕ್ಕೆ ಗಂಡಾಂತರ ತರುತ್ತಿದ್ದಾರೆ ಎಂದು ಹೇಳಿದರು.

ಕೂಡಲೇ ಅಮಿತ್ ಶಾ ಅವರನ್ನು ಸಚಿವ ಸ್ಥಾನದಿಂದ ವಜಾಗೊಳಿಸಬೇಕು ಎಂದು ಒತ್ತಾಯಿಸಿದರು.

ಪ್ರತಿಭಟನೆಯಲ್ಲಿ, ಪಿಯುಸಿಎಲ್ ಜಿಲ್ಲಾಧ್ಯಕ್ಷ ಕಮಲ್ ಗೋಪಿನಾಥ್, ಸಾಹಿತಿ ರತಿರಾವ್, ದಸಂಸ ಮುಖಂಡ ಹರಿಹರ ಆನಂದಸ್ವಾಮಿ, ಪತ್ರಕರ್ತ ಟಿ.ಗುರುರಾಜ್, ರಂಗಕರ್ಮಿಗಳಾದ ಜನಾರ್ಧನ್ (ಜನ್ನಿ), ಸಿ.ಬಸವಲಿಂಗಯ್ಯ, ಪತ್ರಕರ್ತ ಜಿ.ಪಿ.ಬಸವರಾಜು, ಹೋರಾಟಗಾರ್ತಿ ಸವಿತಾ ಪ.ಮಲ್ಲೇಶ್, ಅಹಿಂದ ಜವರಪ್ಪ, ಬಾಬುರಾಜ್, ಮಾಜಿ ಮೇಯರ್ ಪುರುಷೋತ್ತಮ್, ಪಿ.ಮರಂಕಯ್ಯ, ಕೆ.ಎಸ್.ಶಿವರಾಮ್, ನಾ.ದಿವಾಕರ, ಹೊಸಕೋಟೆ ಬಸವರಾಜ್, ಪಂಡಿತಾರಾಧ್ಯ, ಮೋಹನ್‌ಕುಮಾರ್ ಗೌಡ, ಸಿ.ಹರಕುಮಾರ್,ನೆಲೆ ಹಿನ್ನಲೆ ಗೋಪಾಲ್, ಬಾಲಕೃಷ್ಣ, ದಸಂಸ ದೇವಗಳ್ಳಿ ಸೋಮಶೇಖರ್, ಎಂ.ಎಫ್.ಕಲೀಂ, ಉಗ್ರನರಸಿಂಹೇಗೌಡ ಸೇರಿದಂತೆ ಹಲವರು ಭಾಗವಹಿಸಿದ್ದರು.

ಬಿಜೆಪಿ, ಸಂಘಪರಿವಾರದ ಚಿತಾವಣೆಯಿಂದ ಇಂತಹ ಹೇಳಿಕೆಗಳು ಹೊರಬರುತ್ತಿವೆ. ಸಂವಿಧಾನವನ್ನು ಬಳಸಿಕೊಂಡೆ ಸಂವಿಧಾನ ವಿರೋಧಿ ಹೇಳಿಕೆಗಳನ್ನು ನೀಡಿ ಭಯದ ವಾತಾವರಣ ಸೃಷ್ಟಿ ಮಾಡುತ್ತಿದ್ದಾರೆ. ಇವರ ತಂತ್ರಕ್ಕೆ ಪ್ರತಿತಂತ್ರ ರೂಪಿಸಿ ನಾವು ಗಟ್ಟಿಯಾಗಿ ನಿಲ್ಲಬೇಕಿದೆ‌.

-ಅಹಿಂದ ಜವರಪ್ಪ, ಹೋರಾಟಗಾರ.

ಪಾರ್ಲಿಮೆಂಟ್ ನಲ್ಲಿ ನಿಂತು ಅಸ್ಪೃಶ್ಯತೆ ಆಚರಣೆ ಮಾಡಿರುವ ಕೇಂದ್ರ ಗೃಹ ಸಚಿವ ಅಮಿತ್ ಶಾ ವಿರುದ್ಧ ಸಮಾನ ಮನಸ್ಕ ವಕೀಲರುಗಳು ಸುಪ್ರೀಂ ಕೋಟ್೯ನಲ್ಲಿ ದೂರು ದಾಖಲು ಮಾಡಬೇಕು ಮತ್ತು ಅಮಿತ್ ಶಾ ನನ್ನು ಕೂಡಲೇ ಬಂಧಿಸಬೇಕು. ಸಿ‌.ಟಿ.ರವಿ ಅವಿವೇಕತನದಿಂದ ತನ್ನ ತಾಯಿ, ಹೆಂಡತಿ ಹೆಣ್ಣು ಎಂಬ ಪರಿಜ್ಞಾನವಿಲ್ಲದೆ ಹೇಳಿಕೆ ನೀಡಿದ್ದಾರೆ. ಇದು ಮನುಸ್ಮೃತಿಯ ಒಂದು ಭಾಗ. ಇವರನ್ನು ಬಗ್ಗು ಬಡಿಯಬೇಕು.

-ಪುರುಷೋತ್ತಮ್, ಮಾಜಿ ಮೇಯರ್