ಮೈಸೂರು ಜಿಲ್ಲೆಯಲ್ಲಿ ಶೇ.20 ಕ್ಕೂ ಹೆಚ್ಚು ಮತದಾರರು ಎ.ಎಸ್.ಡಿ.ಡಿ.ಒ ಪಟ್ಟಿಗೆ ಸೇರಿದ್ದು ಹೇಗೆ: ಅಬ್ದುಲ್ ಮಜೀದ್ ಪ್ರಶ್ನೆ

ಮೈಸೂರು: ಮೈಸೂರು ಜಿಲ್ಲೆಯಲ್ಲಿ ಶೇ.94 ಮತದಾರರ ಮ್ಯಾಪಿಂಗ್ ಪೂರ್ಣಗೊಂಡಿದ್ದರೆ, ಶೇ.20 ಕ್ಕೂ ಹೆಚ್ಚು ಮತದಾರರು ಎ.ಎಸ್.ಡಿ.ಡಿ.ಒ ಪಟ್ಟಿಗೆ ಸೇರಿದ್ದು ಹೇಗೆ? ಚುನಾವಣಾ ಆಯೋಗದ ವಿರುದ್ಧ ಗಂಭೀರ ಅನುಮಾನಗಳು ಮೂಡುತ್ತಿವೆ ಎಂದು ಎಸ್.ಡಿ.ಪಿ.ಐ ರಾಜ್ಯಾಧ್ಯಕ್ಷ ಅಬ್ದುಲ್ ಮಜೀದ್ ತಿಳಿಸಿದರು.

ನಗರದ ಜಿಲ್ಲಾ ಪತ್ರಕರ್ತರ ಭವನದಲ್ಲಿ ಶುಕ್ರವಾರ ಸುದ್ದಿಗೋಷ್ಠಿ ನಡೆಸಿ ಮಾತನಾಡಿದ ಅವರು, 2026 ರ ಜೂನ್ 15 ರ ಎಲೆಕ್ಟ್ರೋ ಮ್ಯಾಪಿಂಗ್ ರಿಪೋರ್ಟ್ ಪ್ರಕಾರ, ಮೈಸೂರು ಜಿಲ್ಲೆಯಲ್ಲಿ ಶೇ.96.45 ರಷ್ಟು ಮತದರಾರರ ಮ್ಯಾಪಿಂಗ್ ಪೂರ್ಣಗೊಂಡಿದ್ದು, ಕೇವಲ 99.337 ಮತದಾರರ ಮ್ಯಾಪಿಂಗ್ ಮಾತ್ರ ಬಾಕಿ ಇತ್ತು. ನರಸಿಂಹ ವಿಧಾನಸಭಾ ಕ್ಷೇತ್ರದಲ್ಲಿಯೂ ಶೇ.94.06 ರಷ್ಟು ಮತದಾರರ ಮ್ಯಾಪಿಂಗ್ ಪೂರ್ಣಗೊಂಡಿದೆ. ಆದರೆ 2026 ರ ಆಗಸ್ಟ್ 4 ರ ಎನ್ಯೂಮರೇಷನ್ ದಾಖಲೆ ಪ್ರಕಾರ ಮೈಸೂರು ಜಿಲ್ಲೆಯಲ್ಲಿ 5,78,142 ಮತದಾರರನ್ನು ಎ.ಎಸ್.ಡಿ.ಡಿ.ಒ ಪಟ್ಟಿಗೆ ಸೇರಿಸಲಾಗಿದೆ. ಇದರಲ್ಲಿ ನರಸಿಂಹ ವಿಧಾನಸಭಾ ಕ್ಷೇತ್ರದಲ್ಲಿಯೇ 1,09,134 (33.03%)ಮತದಾರರನ್ನು ಎ.ಎಸ್.ಡಿ.ಡಿ.ಓ ಪಟ್ಟಿಗೆ ಸೇರಿಸಲಾಗಿದೆ. ಮೈಸೂರು ನಗರದ ನಾಲ್ಕು ವಿಧಾನಸಭಾ ಕ್ಷೇತ್ರದ ಒಟ್ಟು 3.66 ಲಕ್ಷ ಮತದರಾರರನ್ನು ಎ.ಎಸ್.ಡಿ.ಡಿ.ಒ ಪಟ್ಟಿಗೆ ಸೇರಿಸಲಾಗಿದೆ ಎಂದು ಆರೋಪಿಸಿದರು.

ಶೇ.94 ರಿಂದ ಶೇ.96 ರಷ್ಟು ಮತದಾರರ ಮ್ಯಾಪಿಂಗ್ ಯಶಸ್ವಿಯಾಗಿ ಪೂರ್ಣಗೊಂಡಿದ್ದರೆ ನಂತರ ಹೇಗೆ ಲಕ್ಷಾಂತರ ಮತದಾರರನ್ನು ಎ.ಎಸ್.ಡಿ.ಡಿ.ಒ ಗೆ ವರ್ಗಾಯಿಸಲಾಯಿತು ಎಂದು ಪ್ರಶ್ನಿಸಿದರು.

ಮ್ಯಾಪಿಂಗ್ ಸಂದರ್ಭದಲ್ಲಿ ಮತದಾರರು ಗುರುತಾಗಿದ್ದರೆ,ಕೇವಲ ಒಂದೂವರೆ ತಿಂಗಳೊಳಗೆ ಗೈರು, ಶಾಶ್ವತ ಸ್ಥಳಾಂತರ, ಅಥವಾ ಇತರೆ ವರ್ಗಕ್ಕೆ ಸೇರಿದರು. ಇದು ಆಡಳಿತಾತ್ಮಕ ವೈಫಲ್ಯವೆ?ಅಥವಾ ಮತದಾರರ ಪಟ್ಟಿಯಲ್ಲಿ ಅನಗತ್ಯವಾಗಿ ಮತದಾರರನ್ನು ಕೈ ಬಿಡುವ ಪ್ರಯತ್ನವೇ? ಎಂದರು.

ಮತದಾರರ ಗಣತಿ ಮತ್ತು ಪರಿಶೀಲನಾ ಪ್ರಕ್ರಿಯೆಯನ್ನು ತಕ್ಷಣವೇ ಕನಿಷ್ಠ ಒಂದು ತಿಂಗಳ ಕಾಲ ವಿಸ್ತರಿಸಬೇಕು, ಎ.ಎಸ್.ಡಿ.ಡಿ.ಒ ಪಟ್ಟಿಗೆ ಸೇರಿಸಿರುವ ಎಲ್ಲಾ ಮತದಾರರ ಮರುಪರಿಶೀಲನೆ ನಡೆಸಬೇಕು, ಶಾಶ್ವತ ಶಿಫ್ಟಿಂಗ್ ಮತ್ತು ಇತರೆ ವರ್ಗೀಕರಣದ ಸಂಪೂರ್ಣ ಮಾನದಂಡಗಳನ್ನು ಸಾರ್ವಜನಿಕಗೊಳಿಸಬೇಕು. ಯಾವುದೇ ಮತದಾರರ ಹೆಸರನ್ನು ಅಂತಿಮ ಮತದಾರರ ಪಟ್ಟಿಯಿಂದ ಕೈ ಬಿಡುವ ಮೊದಲು ಭೌತಿಕ ಪರಿಶೀಲನೆ ಹಾಗೂ ನೈಸರ್ಗಿಕ ನ್ಯಾಯದ ತತ್ವಗಳನ್ನು ಕಡ್ಡಾಯವಾಗಿ ಪಾಲಿಸಬೇಕು. ಈ ಸಂಪೂರ್ಣ ಪ್ರಕ್ರಿಯೆಯ ಬಗ್ಗೆ ಸ್ವತಂತ್ರ ತನಿಖೆ ನಡೆಸಬೇಕು ಎಂದು ಒತ್ತಾಯಿಸಿದರು.

ಸುದ್ದಿಗೋಷ್ಠಿಯಲ್ಲಿ ಎಸ್.ಡಿ.ಪಿ.ಐ ರಾಜ್ಯ ಉಪಾಧ್ಯಕ್ಷ ದೇವನೂರು ಪುಟ್ಟನಂಜಯ್ಯ, ರಾಜ್ಯ ಕೋಶಾಧಿಕಾರಿ ಅಮ್ಜದ್ ಖಾನ್, ಜಿಲ್ಲಾಧ್ಯಕ್ಷ ರಫತ್ ಖಾನ್, ಜಿಲ್ಲಾ ಉಪಾಧ್ಯಕ್ಷ ಎಸ್.ಸ್ವಾಮಿ, ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಎಂ.ಎನ್.ಫಿರ್ದೋಸ್ ಉಪಸ್ಥಿತರಿದ್ದರು.