ಪಿಂಚಣಿ ಯೋಜನೆಗೆ ಮೀಸಲಿರಿಸಿದ 2.83 ಕೋ.ರೂ.ವನ್ನು ಇತರ ಉಪಕ್ರಮಗಳ ಪ್ರಚಾರಕ್ಕೆ ಬಳಸಿದ ಕೇಂದ್ರ: ಸಿಎಜಿ ವರದಿ

ಇಂಫಾಲ್: ಹಲವು ಪಿಂಚಣಿ ಯೋಜನೆಗಳಿಗೆ ಮಂಜೂರು ಮಾಡಲಾದ 2.83 ಕೋ.ರೂ. ನಿಧಿಯನ್ನು ಕೇಂದ್ರ ಸರಕಾರ ಇತರ ಉಪಕ್ರಮಗಳನ್ನು ಪ್ರಚಾರ ಮಾಡಲು ಬಳಸಿರುವುದನ್ನು ಭಾರತದ ಮಹಾಲೇಖಪಾಲರು ಲೆಕ್ಕಪರಿಶೋಧನೆಯಲ್ಲಿ ಪತ್ತೆ ಮಾಡಿದ್ದಾರೆ. ವಿತ್ತ ವರ್ಷ 2017-18ರಿಂದ 2020-21ರ ವರೆಗಿನ ರಾಷ್ಟ್ರೀಯ ಸಾಮಾಜಿಕ ನೆರವು ಕಾರ್ಯಕ್ರಮದ ಕಾರ್ಯ ನಿರ್ವಹಣಾ ಲೆಕ್ಕಪತ್ರವನ್ನು ಮಂಗಳವಾರ ಲೋಕಸಭೆಯಲ್ಲಿ ಮಂಡಿಸಲಾಯಿತು. ರಾಷ್ಟ್ರೀಯ ಸಾಮಾಜಿಕ ನೆರವು ಕಾರ್ಯಕ್ರಮ ಹಿರಿಯ ನಾಗರಿಕರಿಗೆ, ಅಂಗವಿಕಲರಿಗೆ, ವಿಧವೆಯರಿಗೆ 3 ಪಿಂಚಣಿ ಯೋಜನೆಗಳನ್ನು ಒಳಗೊಂಡಿದೆ.

ಇದಲ್ಲದೆ ಇನ್ನೆರೆಡು ಯೋಜನೆಗಳನ್ನು ಒಳಗೊಂಡಿದೆ. ಒಂದು ಹಿರಿಯ ನಾಗರಿಕರಿಗೆ ಆಹಾರ ಭದ್ರತೆ ಒದಗಿಸುವುದು ಹಾಗೂ ಇನ್ನೊಂದು ಕುಟುಂಬದ ಆಧಾರ ಸ್ತಂಭವಾಗಿರುವವರು ಮೃತಪಟ್ಟಾಗ ಅವರ ಕುಟುಂಬಕ್ಕೆ ನೆರವು ನೀಡುವುದು. ‘‘ರಾಜ್ಯ/ಕೇಂದ್ರಾಡಳಿತ ಪ್ರದೇಶಗಳ ಒಟ್ಟು ಮಂಜೂರಾತಿಯಲ್ಲಿ ಶೇ. 3 ನಿಧಿಯನ್ನು ಆಡಳಿತಾಕ್ಮಕ ವೆಚ್ಚಕ್ಕಾಗಿ ಮೀಸಲಿರಿಸಲಾಗಿದೆ’’ ಎಂದು ಮಹಾ ಲೇಖಪಾಲರ ವರದಿ ಹೇಳಿದೆ.

ಲೆಕ್ಕಪರಿಶೋಧನೆಯ ಸಂದರ್ಭ ರಾಷ್ಟ್ರೀಯ ಸಾಮಾಜಿಕ ನೆರವು ಯೋಜನೆಗಾಗಿ ಮೀಸಲಿಟ್ಟ ನಿಧಿಯನ್ನು ಸಚಿವಾಲಯ ಮತ್ತು ರಾಜ್ಯಗಳು/ಕೇಂದ್ರಾಡಳಿತ ಪ್ರದೇಶಗಳು ಬೇರೆಡೆಗೆ ತಿರುಗಿಸಿದ ನಿದರ್ಶನಗಳು ಗಮನಕ್ಕೆ ಬಂದಿವೆ. 2017ರ ಜೂನ್ ನಲ್ಲಿ ಕೇಂದ್ರ ಗ್ರಾಮೀಣ ಅಭಿವೃದ್ಧಿ ಸಚಿವಾಲಯ ಪಿಂಚಣಿ ಯೋಜನೆಗಳಿಗೆ ಹಂಚಿಕೆ ಮಾಡಲಾದ 39.15 ಲಕ್ಷ ರೂ.ವನ್ನು ಸಚಿವಾಲಯದ ಎಲ್ಲಾ ಉಪಕ್ರಮಗಳ ಪ್ರಚಾರ ಅಭಿಯಾನಕ್ಕೆ ಮಂಜೂರು ಮಾಡಿದೆ ಎಂದು ಮಹಾಲೇಖಪಾಲರು ತನ್ನ ವರದಿಯಲ್ಲಿ ಹೇಳಿದ್ದಾರೆ. 2017ರ ಆಗಸ್ಟ್ ನಲ್ಲಿ ‘ಗ್ರಾಮ ಸಮೃದ್ಧಿ’, ‘ಸ್ವಚ್ಛ ಭಾರತ ಪಖವಾಡ’ದ ಪ್ರಚಾರಕ್ಕಾಗಿ ಹಾಗೂ 19 ರಾಜ್ಯಗಳ ಪ್ರತಿ ಜಿಲ್ಲೆಯಲ್ಲಿ ಐದು ಹೋರ್ಡಿಂಗ್ಗಳ ಮೂಲಕ ಸಚಿವಾಲಯದ ಹಲವು ಯೋಜನೆಗಳ ಪ್ರಚಾರ ಸಾಮಗ್ರಿಗಳಿಗಾಗಿ ಇನ್ನೂ 2.44 ಕೋ.ರೂ. ಬಳಸಲಾಯಿತು ಎಂದು ವರದಿ ಹೇಳಿದೆ.

ಜಾಹೀರಾತು ಹಾಗೂ ವಿಶುವಲ್ ಪ್ರಚಾರ ನಿರ್ದೇಶನಾಲಯಕ್ಕೆ ನೀಡಲಾದ ಪ್ರಚಾರ ಅಭಿಯಾನದ ಕಾರ್ಯಾದೇಶವನ್ನು ರಾಷ್ಟ್ರೀಯ ಸಾಮಾಜಿಕ ನೆರವು ಕಾರ್ಯಕ್ರಮದ ಅಡಿಯ ಯಾವುದೇ ಯೋಜನೆಯಲ್ಲಿ ಉಲ್ಲೇಖಿಸಿಲ್ಲ. ಇದಕ್ಕೆ ಬದಲಾಗಿ ಪ್ರಧಾನ ಮಂತ್ರಿ ಗ್ರಾಮೀಣ ಆವಾಸ್ ಯೋಜನೆ ಹಾಗೂ ದೀನ್ ದಯಾಳ್ ಉಪಾಧ್ಯಾಯ ಗ್ರಾಮೀಣ ಕೌಶಲ್ಯ ಯೋಜನೆಗಳ ಜಾಹೀರಾತುಗಳಿಗಾಗಿ ಬಳಸಲಾಗಿದೆ ಎಂದು ವರದಿ ಹೇಳಿದೆ.