Fact Check | ವಿಜಯ್ ಸರ್ಕಾರ ‘ಹಿಂದೂ ವಿರೋಧಿ’ ಎಂದು ಬಿಂಬಿಸಲು ಹಲವು ಯತ್ನ; ವೈರಲ್ ಆರೋಪಗಳ ಸತ್ಯಾಸತ್ಯತೆ ಏನು?

ಚೆನ್ನೈ: ತಮಿಳುನಾಡು ಮುಖ್ಯಮಂತ್ರಿ ವಿಜಯ್ ನೇತೃತ್ವದ ಸರ್ಕಾರ ಹಿಂದೂ ಅಥವಾ ಸನಾತನ ವಿರೋಧಿ ನಿಲುವು ತಾಳಿದೆ ಎಂದು ಬಿಂಬಿಸುವ ಹಲವು ಹೇಳಿಕೆಗಳು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡುತ್ತಿವೆ. ಇವುಗಳಲ್ಲಿ ಹಲವು ಹೇಳಿಕೆಗಳು ಸರ್ಕಾರವನ್ನು ಹಿಂದೂ ವಿರೋಧಿ ಅಥವಾ ಸನಾತನ ವಿರೋಧಿ ಎಂದು ಬಿಂಬಿಸುವ ರೀತಿಯಲ್ಲಿ ರೂಪುಗೊಂಡಿರುವುದು ಕಂಡುಬಂದಿದೆ.

ಉತ್ತರ ಭಾರತಕ್ಕೆ ಸೇರಿದ ಅಥವಾ ಹಿಂದಿ ಭಾಷೆಯಲ್ಲಿ ಕಂಟೆಂಟ್ ಪ್ರಕಟಿಸುವ ಸಾಮಾಜಿಕ ಮಾಧ್ಯಮ ಖಾತೆಗಳು ಪ್ರಮುಖವಾಗಿ ಕಾಣಿಸಿಕೊಂಡಿವೆ. ತಮಿಳುನಾಡಿನ ರಾಜಕೀಯ ಹಾಗೂ ವಿಜಯ್ ಸರ್ಕಾರಕ್ಕೆ ಸಂಬಂಧಿಸಿದ ಘಟನೆಗಳು, ನಿರ್ಧಾರಗಳು ಮತ್ತು ಹೇಳಿಕೆಗಳನ್ನು ತಿರುಚಿ, ಅವುಗಳಿಗೆ ಧಾರ್ಮಿಕ ಆಯಾಮ ನೀಡುವ ಮೂಲಕ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿರುವ ಹಲವು ಉದಾಹರಣೆಗಳು ಪತ್ತೆಯಾಗಿವೆ.

ವಿಜಯ್ ಅವರ ‘ಜೋಸೆಫ್’ ಎಂಬ ಹೆಸರನ್ನು ಉಲ್ಲೇಖಿಸಿ ಅವರ ಧಾರ್ಮಿಕ ಹಿನ್ನೆಲೆಯನ್ನು ರಾಜಕೀಯ ಆರೋಪಗಳೊಂದಿಗೆ ಜೋಡಿಸುವ ಪ್ರಯತ್ನವೂ ಕೆಲವು ಸಾಮಾಜಿಕ ಮಾಧ್ಯಮ ಪೋಸ್ಟ್ಗಳಲ್ಲಿ ಕಂಡುಬಂದಿದೆ. ನೈಜ ಘಟನೆಗಳಿಗೆ ಸಂಬಂಧಿಸದ ವಿಡಿಯೋಗಳು, ಹಳೆಯ ದೃಶ್ಯಗಳು ಹಾಗೂ ಆಧಾರರಹಿತ ಹೇಳಿಕೆಗಳನ್ನು ವಿಜಯ್ ಸರ್ಕಾರದ ನಿರ್ಧಾರಗಳೆಂದು ಬಿಂಬಿಸುವ ಮೂಲಕ ಅವರ ವಿರುದ್ಧ ನಿರ್ದಿಷ್ಟ ಧಾರ್ಮಿಕ ಪೂರ್ವಾಗ್ರಹದ ನಿರೂಪಣೆ ರೂಪಿಸುವ ಪ್ರಯತ್ನವೂ ನಡೆದಿದೆ.

ದೇವಸ್ಥಾನಗಳ ಕಾಣಿಕೆ ಹುಂಡಿ ತೆರವು ಆರೋಪ!

ತಮಿಳುನಾಡು ಮುಖ್ಯಮಂತ್ರಿ ವಿಜಯ್ ಅವರು ದೇವಸ್ಥಾನಗಳ ಕಾಣಿಕೆ ಹುಂಡಿಗಳನ್ನು ತೆರವುಗೊಳಿಸಿ, ಅವುಗಳಿಂದ ಸಂಗ್ರಹವಾಗುವ ಹಣವನ್ನು ಸರ್ಕಾರಿ ಶಾಲೆಗಳು ಮತ್ತು ಆಸ್ಪತ್ರೆಗಳಿಗೆ ಬಳಸುವಂತೆ ಆದೇಶಿಸಿದ್ದಾರೆ ಎಂಬ ಹೇಳಿಕೆಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಹಿಂದಿ ಭಾಷೆಯಲ್ಲಿ ಕಂಟೆಂಟ್ ಪ್ರಕಟಿಸುವ ಹಲವು ಸಾಮಾಜಿಕ ಮಾಧ್ಯಮ ಖಾತೆಗಳು ಈ ಹೇಳಿಕೆಯನ್ನು ಹಂಚಿಕೊಂಡಿವೆ. Fact Check ಮಾಡಿದ ಕನಿಷ್ಠ ಎರಡು ವಿಡಿಯೋಗಳಿಗೆ ಕೋಟ್ಯಂತರ ವೀಕ್ಷಣೆಗಳು ಲಭಿಸಿರುವುದು ಕಂಡುಬಂದಿದೆ.

womeninblack24 ಮತ್ತು subhhi_blogger ಹೆಸರಿನ ಇನ್ಸ್ಟಾಗ್ರಾಂ ಖಾತೆಗಳಲ್ಲಿ ಹಂಚಿಕೊಳ್ಳಲಾದ ವಿಡಿಯೋಗಳಲ್ಲಿ, ತಮಿಳುನಾಡಿನ ವಿಜಯ್ ಸರ್ಕಾರ ದೇವಸ್ಥಾನಗಳ ಕಾಣಿಕೆ ಹುಂಡಿಗಳನ್ನು ತೆಗೆದುಹಾಕಲು ಆದೇಶಿಸಿದೆ ಎಂದು ಪ್ರತಿಪಾದಿಸಲಾಗಿದೆ. ಈ ವಿಡಿಯೋಗಳಿಗೆ ಕ್ರಮವಾಗಿ ಆ. 19ರ ವೇಳೆಗೆ 23.2 ಮಿಲಿಯನ್ ಮತ್ತು 76.3 ಮಿಲಿಯನ್ ವೀಕ್ಷಣೆಗಳು ಲಭಿಸಿರುವುದಾಗಿ ಪೋಸ್ಟ್ಗಳಲ್ಲಿ ಕಾಣಿಸಿಕೊಂಡಿದೆ.

Screengrab from YouTube video by Polimer News

ವೈರಲ್ ವಿಡಿಯೋಗಳಲ್ಲಿ, “ವಿಜಯ್ ದೇವಸ್ಥಾನಗಳ ದಾನಪೆಟ್ಟಿಗೆಗಳನ್ನು ತೆಗೆದು, ಅವುಗಳಿಂದ ಬರುವ ಹಣವನ್ನು ಸರ್ಕಾರಿ ಶಾಲೆಗಳು ಮತ್ತು ಆಸ್ಪತ್ರೆಗಳಿಗೆ ಮರುನಿರ್ದೇಶಿಸಲು ಆದೇಶಿಸಿದ್ದಾರೆ” ಎಂದು ಪ್ರತಿಪಾದಿಸಲಾಗಿದೆ.

ಆದರೆ, ಈ ಹೇಳಿಕೆಗೆ ಬೆಂಬಲ ನೀಡುವ ಯಾವುದೇ ಅಧಿಕೃತ ಸರ್ಕಾರಿ ಆದೇಶ ಅಥವಾ ವಿಜಯ್ ಅವರ ಕಚೇರಿಯಿಂದ ಹೊರಬಂದ ಪ್ರಕಟಣೆ ಲಭ್ಯವಾಗಿಲ್ಲ. ದೇವಸ್ಥಾನಗಳ ಕಾಣಿಕೆ ಹುಂಡಿಗಳನ್ನು ತೆರವುಗೊಳಿಸುವುದು, ಅವುಗಳ ಹಣವನ್ನು ಸರ್ಕಾರಿ ಶಾಲೆಗಳು ಅಥವಾ ಆಸ್ಪತ್ರೆಗಳಿಗೆ ವರ್ಗಾಯಿಸುವಂತೆ ಸೂಚಿಸುವುದು ಅಥವಾ ಈ ಕುರಿತು ಯಾವುದೇ ಹೊಸ ನೀತಿ ಜಾರಿಗೆ ತರುವ ಬಗ್ಗೆ ಅಧಿಕೃತ ದಾಖಲೆ ಪತ್ತೆಯಾಗಿಲ್ಲ.

ಹೀಗಾಗಿ, “ವಿಜಯ್ ದೇವಸ್ಥಾನಗಳ ಕಾಣಿಕೆ ಹುಂಡಿಗಳನ್ನು ತೆರವುಗೊಳಿಸಲು ಆದೇಶಿಸಿದ್ದಾರೆ” ಎಂಬ ವೈರಲ್ ಹೇಳಿಕೆಗೆ ಸದ್ಯಕ್ಕೆ ಯಾವುದೇ ಅಧಿಕೃತ ದಾಖಲೆ ಅಥವಾ ಸರ್ಕಾರದ ಪ್ರಕಟಣೆಯಿಂದ ದೃಢೀಕರಣ ದೊರೆತಿಲ್ಲ.

ಈ ಪ್ರಕರಣವನ್ನು ಪ್ರತ್ಯೇಕವಾಗಿ ನೋಡಿದಾಗಲೂ, ವಿಜಯ್ ಸರ್ಕಾರದ ವಿರುದ್ಧ ಹರಿದಾಡುತ್ತಿರುವ ಕೆಲವು ಸಾಮಾಜಿಕ ಮಾಧ್ಯಮ ಹೇಳಿಕೆಗಳಲ್ಲಿ ಹಳೆಯ ವಿಡಿಯೋಗಳನ್ನು ಹೊಸ ಘಟನೆಗಳಿಗೆ ಜೋಡಿಸುವುದು, ಬೇರೆ ರಾಜ್ಯಗಳ ದೃಶ್ಯಗಳನ್ನು ತಮಿಳುನಾಡಿನ ಘಟನೆಗಳೆಂದು ಬಿಂಬಿಸುವುದು ಹಾಗೂ ಯಾವುದೇ ಅಧಿಕೃತ ಆಧಾರವಿಲ್ಲದ ಹೇಳಿಕೆಗಳನ್ನು ಸರ್ಕಾರಿ ನಿರ್ಧಾರಗಳಂತೆ ಪ್ರಸ್ತುತಪಡಿಸುವ ಮಾದರಿ ಕಂಡುಬರುತ್ತದೆ.

ಸಚಿವ ಮುಸ್ತಫಾ ಅವರಿಗೆ ಹಿಂದೂ ಧಾರ್ಮಿಕ ಮತ್ತು ದತ್ತಿ ಇಲಾಖೆ?

ಇದು ಇದೇ ರೀತಿಯ ಮತ್ತೊಂದು ಪ್ರಕರಣ. ಮೇ 2026ರಲ್ಲಿ ತಮಿಳುನಾಡು ಸರ್ಕಾರದ ಹಿಂದೂ ಧಾರ್ಮಿಕ ಮತ್ತು ದತ್ತಿ ಇಲಾಖೆಗೆ ಮುಸ್ಲಿಂ ಸಚಿವರನ್ನು ನೇಮಿಸಲಾಗಿದೆ ಎಂಬ ಮಾಹಿತಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿತ್ತು. ಮದುರೈ ಸೆಂಟ್ರಲ್ ಕ್ಷೇತ್ರದ ಟಿವಿಕೆ ಅಭ್ಯರ್ಥಿ ಮುಸ್ತಫಾ ಅವರನ್ನು ಸಚಿವ ಸಂಪುಟಕ್ಕೆ ಸೇರಿಸಲಾಗುತ್ತದೆ ಎಂಬ ಸುದ್ದಿಯ ಬೆನ್ನಲ್ಲೇ, ಅವರಿಗೆ ಹಿಂದೂ ಧಾರ್ಮಿಕ ಮತ್ತು ದತ್ತಿ ಇಲಾಖೆ ನೀಡಲಾಗುತ್ತದೆ ಎಂಬ ವದಂತಿಯೂ ಹರಡಿತ್ತು.

ಈ ಕುರಿತು ತಮಿಳುನಾಡು ಸರ್ಕಾರದ ಮಾಹಿತಿ ಪರಿಶೀಲನಾ ಘಟಕ ಸ್ಪಷ್ಟನೆ ನೀಡಿದ್ದು, ಹಿಂದೂ ಧಾರ್ಮಿಕ ಮತ್ತು ದತ್ತಿ ಇಲಾಖೆಗೆ ಯಾವುದೇ ಸಚಿವರನ್ನು ಅಧಿಕೃತವಾಗಿ ನೇಮಿಸಿಲ್ಲ ಎಂದು ತಿಳಿಸಿತ್ತು. ಮುಸ್ತಫಾ ಅವರನ್ನು ಆ ಇಲಾಖೆಯ ಸಚಿವರನ್ನಾಗಿ ನೇಮಿಸಲಾಗಿದೆ ಎಂಬ ಸಾಮಾಜಿಕ ಮಾಧ್ಯಮದ ಮಾಹಿತಿ ಸುಳ್ಳು ಹಾಗೂ ವದಂತಿ ಎಂದು ಸರ್ಕಾರ ಸ್ಪಷ್ಟಪಡಿಸಿತ್ತು.

ವಿಜಯ್ ಹೆಸರಿನಲ್ಲಿ ‘ನಕಲಿ ಆದೇಶ’ಗಳ ಸರಣಿ:

ಜುಲೈನಲ್ಲಿ ಉತ್ತರ ಭಾರತದ ಹಲವು ಹಿಂದಿ ಭಾಷೆಯ ಕಂಟೆಂಟ್ ಕ್ರಿಯೇಟರ್ಗಳು ವಿಜಯ್ ಅವರ ಹೆಸರಿನಲ್ಲಿ ಅವರು ತೆಗೆದುಕೊಳ್ಳದ ನಿರ್ಧಾರಗಳನ್ನು ಘೋಷಿಸಿದಂತೆ ವಿಡಿಯೋಗಳನ್ನು ಹಂಚಿಕೊಂಡಿರುವುದನ್ನು India Today ಸತ್ಯಪರಿಶೀಲಿಸಿತ್ತು.

ಅತ್ಯಾಚಾರ ಪ್ರಕರಣಗಳ ಆರೋಪಿಗಳಿಗೆ ಗಲ್ಲು ಶಿಕ್ಷೆ ಅಥವಾ ಎನ್ಕೌಂಟರ್ ಗೆ ಆದೇಶಿಸಲಾಗಿದೆ, ಖಾಸಗಿ ಆಸ್ಪತ್ರೆಯಲ್ಲಿ ರೋಗಿ ಮೃತಪಟ್ಟರೆ ಕುಟುಂಬವು ಆಸ್ಪತ್ರೆಯ ಬಿಲ್ ಪಾವತಿಸಬೇಕಾಗಿಲ್ಲ ಎಂಬಂತಹ ಹೇಳಿಕೆಗಳನ್ನು ಯಾವುದೇ ಅಧಿಕೃತ ಆದೇಶದ ಆಧಾರವಿಲ್ಲದೆ ವಿಜಯ್ ಅವರ ನಿರ್ಧಾರಗಳೆಂದು ಬಿಂಬಿಸಲಾಗಿತ್ತು.

ಇಂತಹ ಪ್ರಕರಣಗಳು, ಯಾವುದೇ ಸರ್ಕಾರಿ ಆದೇಶ ಅಥವಾ ಅಧಿಕೃತ ಪ್ರಕಟಣೆಯಿಲ್ಲದ ಹೇಳಿಕೆಗಳನ್ನು ವಿಜಯ್ ಸರ್ಕಾರದ ನಿರ್ಧಾರಗಳೆಂದು ಸಾಮಾಜಿಕ ಜಾಲತಾಣಗಳಲ್ಲಿ ಪ್ರಸ್ತುತಪಡಿಸಲಾಗುತ್ತಿರುವುದನ್ನು ತೋರಿಸುತ್ತವೆ.

‘TVK ವಿರುದ್ಧ ಹಿಂದೂಗಳ ಪ್ರತಿಭಟನೆ’

ಇದೇ ರೀತಿಯ ಮತ್ತೊಂದು ವಿಡಿಯೋದಲ್ಲಿ, ತಮಿಳುನಾಡಿನಲ್ಲಿ ಹಿಂದೂಗಳು TVK ವಿರುದ್ಧ ಪ್ರತಿಭಟನೆ ನಡೆಸುತ್ತಿದ್ದಾರೆ ಎಂದು ಹೇಳಿ ದೃಶ್ಯವೊಂದನ್ನು ಹಂಚಿಕೊಳ್ಳಲಾಗಿತ್ತು.

ಆದರೆ Newschecker ನಡೆಸಿದ ಪರಿಶೀಲನೆಯಲ್ಲಿ ಆ ವಿಡಿಯೋ ಆ ಸಂದರ್ಭಕ್ಕೆ ಸಂಬಂಧಿಸಿದ್ದಲ್ಲ ಎಂಬುದು ಪತ್ತೆಯಾಯಿತು. ಆ ದೃಶ್ಯವು ಟಿವಿಕೆ ವಿಧಾನಸಭಾ ಟಿಕೆಟ್ ನಿರಾಕರಿಸಿದ ಹಿನ್ನೆಲೆಯಲ್ಲಿ ಅಜಿತಾ ಏಂಜೆಲ್ ಅವರ ಬೆಂಬಲಿಗರು ನಡೆಸಿದ ಪ್ರತಿಭಟನೆಗೆ ಸಂಬಂಧಿಸಿದ್ದು, ಸನಾತನ ಧರ್ಮದ ವಿಚಾರಕ್ಕೆ ಸಂಬಂಧಿಸಿದ ಪ್ರತಿಭಟನೆಯದ್ದಲ್ಲ ಎಂದು ಪರಿಶೀಲನೆಯಲ್ಲಿ ತಿಳಿದುಬಂದಿತ್ತು.

ಚರ್ಚ್ ಧ್ವಂಸದ ವಿಡಿಯೋಕ್ಕೂ ತಪ್ಪು ಹಿನ್ನೆಲೆ:

“ವಿಜಯ್ ಸರ್ಕಾರ ಕ್ರಿಶ್ಚಿಯನ್ ಚರ್ಚ್ ಅನ್ನು ಧ್ವಂಸ ಮಾಡಿದೆ” ಎಂಬ ಹೇಳಿಕೆಯೊಂದಿಗೆ ವಿಡಿಯೋವೊಂದನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳಲಾಗಿತ್ತು.

ಆದರೆ ಪರಿಶೀಲನೆಯಲ್ಲಿ ಆ ದೃಶ್ಯ ತಮಿಳುನಾಡಿನದ್ದಲ್ಲ ಎಂಬುದು ಪತ್ತೆಯಾಗಿತ್ತು. ಕೇರಳದ ಇಡುಕ್ಕಿ ಜಿಲ್ಲೆಯ ಪೂಪ್ಪಾರ ಪ್ರದೇಶದಲ್ಲಿನ ಚರ್ಚ್ ಧ್ವಂಸಕ್ಕೆ ಸಂಬಂಧಿಸಿದ ಹಳೆಯ ದೃಶ್ಯವನ್ನು ತಮಿಳುನಾಡಿನ ವಿಜಯ್ ಸರ್ಕಾರಕ್ಕೆ ಸಂಬಂಧಿಸಿದಂತೆ ಹಂಚಿಕೊಳ್ಳಲಾಗಿತ್ತು.

ಉಚಿತ ವಿದ್ಯುತ್ ಯೋಜನೆ ಕುರಿತು ವದಂತಿ

“ವಿಜಯ್ ಸರ್ಕಾರ 100 ಯೂನಿಟ್ ಉಚಿತ ವಿದ್ಯುತ್ ಯೋಜನೆಯನ್ನು ರದ್ದುಪಡಿಸಿದೆ” ಎಂಬ ಹೇಳಿಕೆಯೂ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿತ್ತು. ಆದರೆ ಈ ಹೇಳಿಕೆಯನ್ನು ಸರ್ಕಾರ ನಿರಾಕರಿಸಿತ್ತು.

ಲಭ್ಯವಿರುವ ವರದಿಗಳ ಪ್ರಕಾರ, ವೈರಲ್ ಆಗಿದ್ದಂತೆ ಉಚಿತ ವಿದ್ಯುತ್ ಯೋಜನೆಯನ್ನು ಸಂಪೂರ್ಣವಾಗಿ ರದ್ದುಪಡಿಸಿರುವುದಕ್ಕೆ ಆಧಾರವಿಲ್ಲ.

ದೇವಸ್ಥಾನದ ಆಸ್ತಿ, ಗೋಹತ್ಯೆ ಮತ್ತು ಮದರಸಾಗಳ ಕುರಿತು ಹಲವು ಹೇಳಿಕೆಗಳು

ದೇವಾಲಯಗಳ ಆಸ್ತಿ ಅಥವಾ ಹಣವನ್ನು ಸರ್ಕಾರ ವಶಪಡಿಸಿಕೊಂಡಿದೆ, ಗೋಹತ್ಯೆ ನಿಷೇಧಿಸಲಾಗಿದೆ, ತಮಿಳುನಾಡಿನ ಪ್ರತಿಯೊಂದು ಮದರಸಾಗೆ ಸರ್ಕಾರ ಅನುದಾನ ನೀಡುತ್ತಿದೆ ಹಾಗೂ ಧಾರ್ಮಿಕ ಬೋಧನೆ ಮಾಡುವ ಎಲ್ಲರಿಗೂ ಸರ್ಕಾರದ ಬೊಕ್ಕಸದಿಂದ ಸಂಬಳ ನೀಡಲಾಗುತ್ತಿದೆ ಎಂಬಂತಹ ಹಲವು ಹೇಳಿಕೆಗಳೂ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿವೆ.

ಇವುಗಳಲ್ಲಿ ಕೆಲವು ಹೇಳಿಕೆಗಳಿಗೆ ಅಧಿಕೃತ ದಾಖಲೆಗಳ ಬೆಂಬಲವಿಲ್ಲದಿರುವುದು ಹಾಗೂ ಕೆಲವು ಹೇಳಿಕೆಗಳು ಅಸ್ತಿತ್ವದಲ್ಲಿರುವ ನೀತಿಗಳು ಅಥವಾ ಘಟನೆಗಳನ್ನು ತಪ್ಪಾಗಿ ಅರ್ಥೈಸಿಕೊಂಡಿರುವುದು ಪರಿಶೀಲನೆ ವೇಳೆ ಕಂಡುಬಂದಿದೆ.

ಧಾರ್ಮಿಕ ಗುರುತಿನ ಆಧಾರದ ನಿರೂಪಣೆ?

ವಿಜಯ್ ಅವರು ನಟನಾಗಿ ತಮಿಳುನಾಡಿನ ಹೊರಗೂ ದೊಡ್ಡ ಅಭಿಮಾನಿ ಬಳಗ ಹೊಂದಿರುವುದರಿಂದ, ಅವರ ಕುರಿತು ಕಂಟೆಂಟ್ಗಳು ವೇಗವಾಗಿ ಹೆಚ್ಚು ಜನರನ್ನು ತಲುಪುತ್ತವೆ. ಇದೇ ಕಾರಣದಿಂದಾಗಿ ಅವರ ಸರ್ಕಾರಕ್ಕೆ ಸಂಬಂಧಿಸಿದ ತಪ್ಪು ಅಥವಾ ದಾರಿ ತಪ್ಪಿಸುವ ಮಾಹಿತಿಯೂ ವ್ಯಾಪಕವಾಗಿ ಹರಡುತ್ತಿರುವ ಸಾಧ್ಯತೆಯಿದೆ.

ಇದರ ಜೊತೆಗೆ, ನಾವು ಪರಿಶೀಲಿಸಿದ ಕೆಲವು ಪೋಸ್ಟ್ಗಳಲ್ಲಿ ವಿಜಯ್ ಅವರ ‘ಜೋಸೆಫ್’ ಎಂಬ ಹೆಸರನ್ನು ಉಲ್ಲೇಖಿಸಿ, ಅವರ ಧಾರ್ಮಿಕ ಹಿನ್ನೆಲೆಯನ್ನು ಸರ್ಕಾರದ ನಿರ್ಧಾರಗಳು ಮತ್ತು ಹಿಂದೂ ಧರ್ಮಕ್ಕೆ ಸಂಬಂಧಿಸಿದ ಆರೋಪಗಳೊಂದಿಗೆ ಜೋಡಿಸುವ ಪ್ರಯತ್ನವೂ ಕಂಡುಬಂದಿದೆ.