2,459 ಕೋಟಿ ರೂ. ಪೊಂಝಿ ಹಗರಣ: ಶಿವಾನಂದ ನೀಲಣ್ಣವರ್‌ ಗೆ ಸೇರಿದ 427 ಕೋಟಿ ರೂ. ಮೌಲ್ಯದ ಆಸ್ತಿ ಜಪ್ತಿ ಮಾಡಿದ ED

ಬೆಂಗಳೂರು: ತಿಂಗಳಿಗೆ ಶೇ. 3ರಷ್ಟು ಖಚಿತ ಆದಾಯ ನೀಡುವ ಆಮಿಷವೊಡ್ಡಿ 35 ಸಾವಿರಕ್ಕೂ ಅಧಿಕ ಹೂಡಿಕೆದಾರರಿಂದ 2,459.49 ಕೋಟಿ ರೂ. ಸಂಗ್ರಹಿಸಿದ ಬೃಹತ್ ಪೊಂಝಿ ಹಗರಣಕ್ಕೆ ಸಂಬಂಧಿಸಿದಂತೆ ಜಾರಿ ನಿರ್ದೇಶನಾಲಯ (ED) ಶಿವಾನಂದ ನೀಲಣ್ಣವರ್‌ ಗೆ ಸೇರಿದ 427.16 ಕೋಟಿ ರೂ. ಮೌಲ್ಯದ ಚರ ಮತ್ತು ಸ್ಥಿರಾಸ್ತಿಗಳನ್ನು ತಾತ್ಕಾಲಿಕವಾಗಿ ಜಪ್ತಿ ಮಾಡಿದೆ.

ಪ್ರಮುಖ ಆರೋಪಿ ಶಿವಾನಂದ ಸಿದ್ದಪ್ಪ ನೀಲಣ್ಣವರ್ ಮತ್ತು ಆತನೊಂದಿಗೆ ಸಂಬಂಧ ಹೊಂದಿರುವ ವ್ಯಕ್ತಿಗಳು ಹಾಗೂ ಸಂಸ್ಥೆಗಳಿಗೆ ಸೇರಿದ ಆಸ್ತಿಗಳನ್ನು ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆ (PMLA), 2002ರ ಸೆಕ್ಷನ್ 5(1)ರ ಅಡಿಯಲ್ಲಿ ಜಪ್ತಿ ಮಾಡಲಾಗಿದೆ. EDಯ ಮಂಗಳೂರು ಉಪವಲಯ ಕಚೇರಿಯು 2026ರ ಅಕ್ಟೋಬರ್ 30ರಂದು ಈ ಆದೇಶ ಹೊರಡಿಸಿದೆ.

ಜಪ್ತಿಯಾದ ಆಸ್ತಿಗಳಲ್ಲಿ ಸ್ಥಿರ ಠೇವಣಿಗಳು (FD), ಬ್ಯಾಂಕ್ ಖಾತೆಗಳಲ್ಲಿನ ಹಣ, ಷೇರು ಮಾರುಕಟ್ಟೆಯ ಹೂಡಿಕೆಗಳು, ಕೃಷಿ ಜಮೀನುಗಳು, ಬಂಗಲೆಗಳು ಮತ್ತು ಡೆವಲಪರ್‌ ಗಳ ಅಪಾರ್ಟ್‌ಮೆಂಟ್ ಬುಕ್ಕಿಂಗ್‌ಗಳು ಸೇರಿವೆ. 'ಎಂ/ಎಸ್ ಶಿವಂ ಅಸೋಸಿಯೇಟ್ಸ್ ಮತ್ತು ಇತರರು' ಎಂಬ ಸಂಸ್ಥೆಗಳಿಗೆ ಸಂಬಂಧಿಸಿದ ಪ್ರಕರಣದಲ್ಲಿ ಅಪರಾಧದಿಂದ ಗಳಿಸಿದ ಹಣದ ಮೊತ್ತ (Proceeds of Crime) ಸುಮಾರು 2,459 ಕೋಟಿ ರೂ.ಗಳಷ್ಟಿದೆ ಎಂದು ED ತಿಳಿಸಿದೆ.

8 ಸ್ಥಳಗಳಲ್ಲಿ ಶೋಧ; ಮಹತ್ವದ ದಾಖಲೆಗಳು ವಶ

ಬೆಳಗಾವಿ ನಗರದ ಮಲಮಾರುತಿ ಪೊಲೀಸ್ ಠಾಣೆಯಲ್ಲಿ ದಾಖಲಾದ FIR ಆಧರಿಸಿ ED ತನಿಖೆ ಆರಂಭಿಸಿತ್ತು. ಭಾರತೀಯ ನ್ಯಾಯ ಸಂಹಿತೆ (BNS), 2023, ಅನಿಯಂತ್ರಿತ ಠೇವಣಿ ಯೋಜನೆಗಳ ನಿಷೇಧ ಕಾಯ್ದೆ, 2019 ಮತ್ತು ಕರ್ನಾಟಕ ಹಣಕಾಸು ಸಂಸ್ಥೆಗಳಲ್ಲಿನ ಠೇವಣಿದಾರರ ಹಿತಾಸಕ್ತಿ ಸಂರಕ್ಷಣಾ (KPID) ಕಾಯ್ದೆ, 2004ರ ಅಡಿಯಲ್ಲಿ ಪ್ರಕರಣ ದಾಖಲಾಗಿತ್ತು.

ತನಿಖೆಯ ಭಾಗವಾಗಿ 2026ರ ಆಗಸ್ಟ್‌ ನಲ್ಲಿ ಬೆಳಗಾವಿ, ಚಿಕ್ಕೋಡಿ ಮತ್ತು ನಿಪ್ಪಾಣಿಯಲ್ಲಿರುವ ಆರೋಪಿಗಳು ಹಾಗೂ ಅವರ ಸಹಚರರಿಗೆ ಸೇರಿದ ಎಂಟು ಸ್ಥಳಗಳಲ್ಲಿ ED ಶೋಧ ಕಾರ್ಯಾಚರಣೆ ನಡೆಸಿತ್ತು. ಈ ವೇಳೆ ಅಪರಾಧಕ್ಕೆ ಸಂಬಂಧಿಸಿದ ವಿವಿಧ ದಾಖಲೆಗಳು, ಕೈಬರಹದ ಲೆಕ್ಕಪರಿಶೋಧನಾ ಟಿಪ್ಪಣಿಗಳು, ಮೊಬೈಲ್ ಗಳು ಮತ್ತು ಸಾಫ್ಟ್‌ ವೇರ್ ವಹಿವಾಟಿನ ದಾಖಲೆಗಳನ್ನು ವಶಪಡಿಸಿಕೊಳ್ಳಲಾಗಿತ್ತು.

ಅಪರಾಧದಿಂದ ಗಳಿಸಿದ ಹಣವನ್ನು ಅಕ್ರಮವಾಗಿ ಸೃಷ್ಟಿಸಿರುವುದು, ವರ್ಗಾಯಿಸಿರುವುದು ಮತ್ತು ವಿವಿಧ ಕಡೆಗಳಲ್ಲಿ ಇರಿಸಿ ಮರೆಮಾಚಿರುವುದನ್ನು ಈ ದಾಖಲೆಗಳು ದೃಢಪಡಿಸಿವೆ ಎಂದು ED ತಿಳಿಸಿದೆ. ಪ್ರಮುಖ ಅಪರಾಧ ಜಾಲದ ಸದಸ್ಯರು, ಅವರ ಕುಟುಂಬದವರು ಮತ್ತು ಹಲವು ಸಂಸ್ಥೆಗಳ ನಡುವಿನ ಆಳವಾದ ಹಣಕಾಸಿನ ನಂಟು ಕೂಡ ಶೋಧದ ವೇಳೆ ಬಯಲಾಗಿದೆ.

ಇದೇ ವೇಳೆ, ಹೂಡಿಕೆದಾರರಿಂದ ಅಕ್ರಮವಾಗಿ ವರ್ಗಾಯಿಸಿದ ಹಣದಿಂದಲೇ ಸೃಷ್ಟಿಸಲಾಗಿದ್ದ 2.02 ಕೋಟಿ ರೂ. ಮೌಲ್ಯದ ಸ್ಥಿರ ಠೇವಣಿಗಳು ಹಾಗೂ ಪ್ರಮುಖ ಸಹಚರರ ಬ್ಯಾಂಕ್ ಖಾತೆಗಳನ್ನು ED ಸ್ಥಗಿತಗೊಳಿಸಿತ್ತು.

2026ರ ಆಗಸ್ಟ್ 13ರಂದು ಶಿವಾನಂದ ಸಿದ್ದಪ್ಪ ನೀಲಣ್ಣವರ್ ನನ್ನು ಬಂಧಿಸಲಾಗಿತ್ತು. ಬಳಿಕ ಅಕ್ಟೋಬರ್ 9ರಂದು ಮಂಗಳೂರಿನ PMLA ನ್ಯಾಯಾಲಯದಲ್ಲಿ ನೀಲಣ್ಣವರ್ ಸೇರಿದಂತೆ ಐವರು ಆರೋಪಿಗಳು ಮತ್ತು ಸಂಸ್ಥೆಗಳ ವಿರುದ್ಧ ಶಿಕ್ಷೆ ವಿಧಿಸುವಂತೆ ಕೋರಿ ಪ್ರಾಸಿಕ್ಯೂಷನ್ ದೂರು (PC) ದಾಖಲಿಸಲಾಗಿತ್ತು.

ತಿಂಗಳಿಗೆ ಶೇ. 3ರಷ್ಟು ಆದಾಯದ ಆಮಿಷ

ಶಿವಾನಂದ ನೀಲಣ್ಣವರ್ ಮತ್ತು ಅವರ ಸಹಚರರು ಸಂಘಟಿತ ಹೂಡಿಕೆ ವಂಚನೆ ಜಾಲ ನಡೆಸುತ್ತಿದ್ದರು ಎಂಬುದು ತನಿಖೆಯಲ್ಲಿ ಬಹಿರಂಗವಾಗಿದೆ. ಹೂಡಿಕೆ ಮಾಡಿದ ಹಣಕ್ಕೆ ತಿಂಗಳಿಗೆ ಶೇ. 3ರಷ್ಟು ಖಚಿತ ಆದಾಯ ನೀಡುವುದಾಗಿ 35 ಸಾವಿರಕ್ಕೂ ಅಧಿಕ ಹೂಡಿಕೆದಾರರಿಗೆ ಸುಳ್ಳು ಭರವಸೆ ನೀಡಲಾಗಿತ್ತು ಎಂದು ED ಹೇಳಿದೆ.

ಹೊಸ ಹೂಡಿಕೆದಾರರನ್ನು ಕರೆತರುವವರಿಗೆ ಶೇ. 0.5ರಷ್ಟು ಕಮಿಷನ್ ನೀಡುವ ಆಮಿಷವನ್ನೂ ಒಡ್ಡಲಾಗಿತ್ತು. ಈ ಮೂಲಕ ಒಟ್ಟು 2,459.49 ಕೋಟಿ ರೂ. ಸಂಗ್ರಹಿಸಲಾಗಿತ್ತು. ಹೂಡಿಕೆದಾರರನ್ನು ಕರೆತರುತ್ತಿದ್ದ ನೆಟ್‌ವರ್ಕ್ ಏಜೆಂಟರನ್ನು ನೀಲಣ್ಣವರ್ 'ಲೀಡರ್ಗಳು' ಎಂದು ಪರಿಚಯಿಸುತ್ತಿದ್ದ ಎಂದು ED ತಿಳಿಸಿದೆ.

ಷೇರು ವಹಿವಾಟಿನಲ್ಲಿ 185.95 ಕೋಟಿ ರೂ. ನಷ್ಟ

ಹೂಡಿಕೆದಾರರಿಂದ ಸಂಗ್ರಹಿಸಿದ ಹಣವನ್ನು ವಿವಿಧ ಅಕ್ರಮ ಮಾರ್ಗಗಳ ಮೂಲಕ ಬೇರೆಡೆಗೆ ವರ್ಗಾಯಿಸಿ, ಹಲವು ಹಂತಗಳ ವಹಿವಾಟುಗಳ ಮೂಲಕ ಅದರ ಮೂಲವನ್ನು ಮರೆಮಾಚಲಾಗಿತ್ತು ಎಂದು ತನಿಖೆಯಲ್ಲಿ ತಿಳಿದುಬಂದಿದೆ.

ಸಂಗ್ರಹಿಸಿದ ದೊಡ್ಡ ಮೊತ್ತವನ್ನು ಹೆಚ್ಚಿನ ಅಪಾಯದ ಷೇರು ಮಾರುಕಟ್ಟೆ ವಹಿವಾಟಿನಲ್ಲಿ ತೊಡಗಿಸಲಾಗಿತ್ತು. ಇದರಿಂದ 185.95 ಕೋಟಿ ರೂ. ನಿವ್ವಳ ನಷ್ಟ ಉಂಟಾಗಿತ್ತು.

ಇದಲ್ಲದೆ, ಸುಮಾರು 25 ಕೋಟಿ ರೂ. ಹಣವನ್ನು 'ಶ್ರೀಮತಾ ಕೋ-ಆಪರೇಟಿವ್ ಕ್ರೆಡಿಟ್ ಸೊಸೈಟಿ ಲಿಮಿಟೆಡ್' ಮತ್ತು 'ಧನಶ್ರೀ ಮಲ್ಟಿಪರ್ಪಸ್ ಕೋ-ಆಪರೇಟಿವ್ ಸೊಸೈಟಿ ಲಿಮಿಟೆಡ್' ಮೂಲಕ ವರ್ಗಾಯಿಸಲಾಗಿತ್ತು. ಈ ಹಣವನ್ನು ಸ್ಥಿರ ಠೇವಣಿಯಾಗಿ ಇರಿಸಿ, ಅದರ ಆಧಾರದ ಮೇಲೆ ಸಹಚರರ ಹೆಸರಿನಲ್ಲಿ ಸಾಲ ಪಡೆಯಲಾಗಿತ್ತು. ಸಾಲದ ಹಣವನ್ನು ಭೂಮಿ ಖರೀದಿಸಲು ಬಳಸಲಾಗಿತ್ತು.

ನೀಲಣ್ಣವರ್ ಅವರ ಪತ್ನಿ ಸಂಗೀತಾ ಮತ್ತು ಅಪ್ರಾಪ್ತ ಪುತ್ರ ಸಿದ್ಧಾಂತ್ ಅವರ ಬ್ಯಾಂಕ್ ಖಾತೆಗಳಿಗೂ ಹಣ ವರ್ಗಾಯಿಸಲಾಗಿತ್ತು. ಅಲ್ಲದೆ, ಅವರಿಗೆ ಸಂಬಂಧಿಸಿದ 'ಶಿವಂ ಸೇವಾ (ಒಪಿಸಿ) ಪ್ರೈವೇಟ್ ಲಿಮಿಟೆಡ್'ಗೆ 19 ಕೋಟಿ ರೂ. ಸೇರಿದಂತೆ 'ಶಿವಂ ಲೈಫ್‌ಲೈನ್ ಪ್ರೈವೇಟ್ ಲಿಮಿಟೆಡ್' ಮತ್ತು 'ಶಿವಂ ಫುಡ್ಸ್' ಸಂಸ್ಥೆಗಳಿಗೂ ಹಣ ವರ್ಗಾಯಿಸಲಾಗಿತ್ತು.

ಹೀಗೆ ಬೇರೆಡೆಗೆ ವರ್ಗಾಯಿಸಿದ ಹಣವನ್ನು ಚರ ಮತ್ತು ಸ್ಥಿರಾಸ್ತಿಗಳ ಖರೀದಿ ಹಾಗೂ ಇತರ ವ್ಯಾಪಾರ ಚಟುವಟಿಕೆಗಳಿಗೆ ಬಳಸಿಕೊಳ್ಳಲಾಗಿತ್ತು ಎಂದು ತನಿಖೆಯಲ್ಲಿ ತಿಳಿದುಬಂದಿದೆ.

47 ಬ್ಯಾಂಕ್ ಖಾತೆಗಳು, 42 ಸ್ಥಿರಾಸ್ತಿಗಳು

ನೀಲಣ್ಣವರ್ ಮತ್ತು ಆತನೊಂದಿಗೆ ಸಂಬಂಧ ಹೊಂದಿರುವ ವ್ಯಕ್ತಿಗಳು ಹಾಗೂ ಸಂಸ್ಥೆಗಳಿಗೆ ಸೇರಿದ ಒಟ್ಟು 427,16,37,165 ರೂ. ಮೌಲ್ಯದ ಆಸ್ತಿಗಳನ್ನು ED ಗುರುತಿಸಿದೆ. ಅಪರಾಧದಿಂದ ಗಳಿಸಿದ ಹಣ ಬಳಸಿ ನೇರವಾಗಿ ಅಥವಾ ಪರೋಕ್ಷವಾಗಿ ಈ ಆಸ್ತಿಗಳನ್ನು ಸಂಪಾದಿಸಲಾಗಿದೆ ಎಂದು ಕಂಡುಬಂದ ಹಿನ್ನೆಲೆಯಲ್ಲಿ ತಾತ್ಕಾಲಿಕವಾಗಿ ಜಪ್ತಿ ಮಾಡಲಾಗಿದೆ.

ಜಪ್ತಿಯಾದ ಆಸ್ತಿಗಳ ವಿವರ ಹೀಗಿದೆ:

* ಸ್ಥಿರ ಠೇವಣಿಗಳು: HDFC, ICICI, IDFC First, Kotak Mahindra, Ujjivan Small Finance ಮತ್ತು ಸ್ಥಳೀಯ ಸಹಕಾರಿ ಸಂಘಗಳಲ್ಲಿ ಇರಿಸಿರುವ ಠೇವಣಿಗಳು.

* ಬ್ಯಾಂಕ್ ಖಾತೆಗಳು: ಪ್ರಮುಖ ನಿರ್ವಾಹಕರು, ಕುಟುಂಬದ ಸದಸ್ಯರು ಮತ್ತು ಸಹಚರರಿಗೆ ಸೇರಿದ 47 ವೈಯಕ್ತಿಕ ಹಾಗೂ ಕಾರ್ಪೊರೇಟ್ ಬ್ಯಾಂಕ್ ಖಾತೆಗಳಲ್ಲಿನ ಹಣ.

* ಸ್ಥಿರಾಸ್ತಿಗಳು: ಕೃಷಿ ಜಮೀನುಗಳು, ಕುಟುಂಬದ ಬಂಗಲೆಗಳು ಮತ್ತು ಡೆವಲಪರ್‌ಗಳ ಅಪಾರ್ಟ್‌ಮೆಂಟ್ ಬುಕ್ಕಿಂಗ್‌ಗಳು ಸೇರಿದಂತೆ 42 ನಿರ್ದಿಷ್ಟ ಆಸ್ತಿಗಳು.

* ಷೇರು ಮಾರುಕಟ್ಟೆ ಹೂಡಿಕೆಗಳು: CDSL ಡಿಪಾಸಿಟರಿ ಖಾತೆಗಳಲ್ಲಿರುವ ಷೇರು ಬಂಡವಾಳದ ಮೌಲ್ಯವನ್ನು ತಡೆಹಿಡಿಯಲಾಗಿದೆ.

ಈ ಎಲ್ಲ ಆಸ್ತಿಗಳ ಒಟ್ಟು ಮೌಲ್ಯ 427,16,37,165 ರೂ. ಎಂದು ED ತಿಳಿಸಿದೆ. ಪ್ರಕರಣದ ಮುಂದಿನ ತನಿಖೆ ಪ್ರಗತಿಯಲ್ಲಿದೆ.