ರಸಗೊಬ್ಬರ ಹೊತ್ತ ನಾಲ್ಕು ಹಡಗುಗಳು ಹಾರ್ಮುಝ್ ದಾಟಿ ಭಾರತಕ್ಕೆ ಆಗಮನ

ಹೊಸದಿಲ್ಲಿ: ಸುಮಾರು 1.8 ಲಕ್ಷ ಟನ್ ಯೂರಿಯಾ, ಡೈ-ಅಮೋನಿಯಂ ಫಾಸ್ಪೇಟ್ (ಡಿಎಪಿ) ಮತ್ತು ಗಂಧಕವನ್ನು ಭಾರತಕ್ಕೆ ಹೊತ್ತು ತರುತ್ತಿರುವ ನಾಲ್ಕು ಹಡಗುಗಳು ಹಾರ್ಮುಝ್ ಜಲಸಂಧಿಯನ್ನು ದಾಟಿ ಸೋಮವಾರ ಭಾರತದ ಬಂದರುಗಳತ್ತ ಪ್ರಯಾಣ ಬೆಳೆಸಿವೆ ಎಂದು ರಸಗೊಬ್ಬರ ಇಲಾಖೆ ಪ್ರಕಟಿಸಿದೆ.

ಸಂಘರ್ಷಪೀಡಿತ ಪ್ರದೇಶದ ಕಾಲುವೆಯನ್ನು ಈ ಹಡಗುಗಳು ಕಳೆದ ವಾರ ದಾಟಿವೆ. ಮೂರು ತೈಲ ಟ್ಯಾಂಕರ್ ಗಳು ಕೂಡಾ ಈ ಆಯಕಟ್ಟಿನ ಸಾಗರ ಮಾರ್ಗವನ್ನು ಶನಿವಾರ ದಾಟಿವೆ. ಇರಾನ್ ಈ ಜಲಸಂಧಿಯನ್ನು ಮುಚ್ಚುವುದಾಗಿ ಘೋಷಿಸುವ ಮುನ್ನ ಭಾರತಕ್ಕೆ ಆಗಮಿಸುತ್ತಿರುವ ಏಳು ಹಡಗುಗಳು ಈ ಕಾಲುವೆಯನ್ನು ದಾಟಿವೆ ಎಂದು ತಿಳಿದುಬಂದಿದೆ.

ಕಾಲುವೆ ದಾಟಿರುವ ಎರಡು ಹಡಗುಗಳು 91750 ಟನ್ ಯೂರಿಯಾ ಹೊಂದಿದ್ದು, ಮತ್ತೊಂದು ಹಡಗು 55 ಸಾವಿರ ಟನ್ ಡಿಎಪಿಯನ್ನು ಸಾಗಿಸುತ್ತಿದೆ. ನಾಲ್ಕನೇ ಹಡಗು 33251 ಟನ್ ಗಂಧಕವನ್ನು ಹೊತ್ತು ತರುತ್ತಿದೆ. ಈ ಹಡಗುಗಳು ಶೀಘ್ರವೇ ಕೃಷ್ಣಪಟ್ಟಣಂ, ಕಾಕಿನಾಡ (ಆಂಧ್ರ), ಪಾರಾದೀಪ್ (ಒಡಿಶಾ) ಮತ್ತು ಮುಂದ್ರಾ (ಗುಜರಾತ್) ಬಂದರುಗಳನ್ನು ತಲುಪಲಿವೆ ಎಂದು ಇಲಾಖೆ ಸ್ಪಷ್ಟಪಡಿಸಿದೆ.