́ʼಹೆಮ್ಮೆಯಿಂದ ಹೇಳುತ್ತೇನೆ, ನಾನು ಬೌದ್ಧಿಕ ನಕ್ಸಲ್’: ನಟ ನಾಸಿರುದ್ದೀನ್ ಶಾ
ಸರಕಾರ, ಬಿಜೆಪಿ ಐಟಿ ಸೆಲ್ ವಿರುದ್ಧ ವಾಗ್ದಾಳಿ

ನಟ ನಾಸಿರುದ್ದೀನ್ ಶಾ (Photo: PTI)
ಮುಂಬೈ: ನಟ ನಾಸಿರುದ್ದೀನ್ ಶಾ ಅವರು ಕೇಂದ್ರ ಸರಕಾರದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ್ದು, ಸರಕಾರವನ್ನು ಟೀಕಿಸುವವರನ್ನು ‘ದೇಶವಿರೋಧಿ’ ಮತ್ತು ‘ಟುಕಡೆ-ಟುಕಡೆ ಗ್ಯಾಂಗ್’ ಎಂದು ಕರೆಯುವವರಿಗೆ ತಿರುಗೇಟು ನೀಡಿದ್ದಾರೆ. ‘ನಾನು ಹೆಮ್ಮೆಯಿಂದ ಹೇಳುತ್ತೇನೆ, ನಾನು ಬೌದ್ಧಿಕ ನಕ್ಸಲ್’ ಎಂದು ಹೇಳಿರುವ ಅವರು, ಜವಾಹರಲಾಲ್ ನೆಹರೂ ವಿಶ್ವವಿದ್ಯಾಲಯ (ಜೆಎನ್ಯು), ಸತ್ಯಜಿತ್ ರೇ ಫಿಲ್ಮ್ ಆ್ಯಂಡ್ ಟೆಲಿವಿಷನ್ ಇನ್ಸ್ಟಿಟ್ಯೂಟ್ (ಎಸ್ಆರ್ಎಫ್ಟಿಐ) ಮತ್ತು ಜಾಮಿಯಾ ಮಿಲಿಯಾ ಇಸ್ಲಾಮಿಯಾ ವಿಶ್ವವಿದ್ಯಾಲಯಗಳ ವಿದ್ಯಾರ್ಥಿಗಳ ಮೇಲಿನ ದಮನದ ಕುರಿತು ಪ್ರಶ್ನಿಸಿದ್ದಾರೆ.
ಸರಕಾರ, ಮಾಧ್ಯಮದ ಕೆಲವು ವಿಭಾಗಗಳು ಮತ್ತು ಬಿಜೆಪಿ ಐಟಿ ಸೆಲ್ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿರುವ ಅವರು, ಎಷ್ಟೇ ಒತ್ತಡ ಹೇರಿದರೂ ದೇಶದ ಯುವಜನರ ಹೋರಾಟದ ಮನೋಭಾವವನ್ನು ಕುಗ್ಗಿಸಲು ಸಾಧ್ಯವಿಲ್ಲ ಎಂದು ಹೇಳಿದ್ದಾರೆ.
ಸರಕಾರದ ಸ್ವಯಂಘೋಷಿತ ರಕ್ಷಕರು ತಮ್ಮಂತಹವರ ಮೇಲೆ ಹಲವು ಹಣೆಪಟ್ಟಿಗಳನ್ನು ಹಚ್ಚುತ್ತಿದ್ದಾರೆ ಎಂದು ಟೀಕಿಸಿದ ಶಾ, ‘ನಮ್ಮಂತಹವರಿಗೆ ದೇಶವಿರೋಧಿ, ಟುಕಡೆ-ಟುಕಡೆ ಗ್ಯಾಂಗ್ ಎಂಬ ಹಣೆಪಟ್ಟಿಗಳನ್ನು ಹಚ್ಚಲಾಗಿದೆ. ಇನ್ನು ಏನೇನು ಹಣೆಪಟ್ಟಿಗಳನ್ನು ಹಚ್ಚಿದ್ದಾರೋ ನನಗೆ ಗೊತ್ತಿಲ್ಲ’ ಎಂದು ಹೇಳಿದ್ದಾರೆ.
ಬಳಿಕ ಸರಕಾರದ ವಿರುದ್ಧವೇ ತಿರುಗೇಟು ನೀಡಿದ ಅವರು, ‘ನಿಜವಾದ ಟುಕಡೆ-ಟುಕಡೆ ಗ್ಯಾಂಗ್ ನೀವೇ’ ಎಂಬರ್ಥದಲ್ಲಿ ಟೀಕಿಸಿದ್ದಾರೆ. ದೇಶದ ಯುವಜನರ ಮನೋಸ್ಥೈರ್ಯ ಕುಗ್ಗಿಸಲು, ಶಿಕ್ಷಣ ಸಂಸ್ಥೆಗಳನ್ನು ನಾಶಪಡಿಸಲು ಮತ್ತು ಪ್ರಜಾಪ್ರಭುತ್ವವನ್ನು ಅಪಾಯಕ್ಕೆ ಸಿಲುಕಿಸಲು ಸರಕಾರ ಇನ್ನೆಷ್ಟು ದೂರ ಹೋಗಲಿದೆ ಎಂದು ಪ್ರಶ್ನಿಸಿದ ಅವರು, ಸರಕಾರದ ಸುತ್ತಮುತ್ತ ಇರುವವರನ್ನು ‘ಮೂರ್ಖ ಮತ್ತು ಅಪ್ರಾಮಾಣಿಕ ವ್ಯಕ್ತಿಗಳ ಗುಂಪು’ ಎಂದು ಟೀಕಿಸಿದ್ದಾರೆ.
‘ಮೊದಲು ಜವಾಹರಲಾಲ್ ನೆಹರೂ ವಿಶ್ವವಿದ್ಯಾಲಯ, ನಂತರ ಸತ್ಯಜಿತ್ ರೇ ಫಿಲ್ಮ್ ಇನ್ಸ್ಟಿಟ್ಯೂಟ್, ಈಗ ಜಾಮಿಯಾ ಮಿಲಿಯಾ ಇಸ್ಲಾಮಿಯಾದ ವಿದ್ಯಾರ್ಥಿಗಳು ದಮನಕ್ಕೆ ಒಳಗಾಗುತ್ತಿದ್ದಾರೆ. ಇದನ್ನು ನೆನಪಿಟ್ಟುಕೊಳ್ಳಲಾಗುತ್ತದೆ’ ಎಂದು ಅವರು ಹೇಳಿದ್ದಾರೆ.
ಕ್ರಾಂತಿಕಾರಿ ಕವಿ ಬಿಸ್ಮಿಲ್ ಅಜೀಮಾಬಾದಿ ಅವರ ‘ಸರ್ಫರೋಶಿ ಕಿ ತಮನ್ನಾ’ ಕವಿತೆಯ ಸಾಲುಗಳನ್ನು ಉಲ್ಲೇಖಿಸಿ ‘ಕೊಲೆಗಡುಕನ ತೋಳಿನಲ್ಲಿ ಎಷ್ಟು ಶಕ್ತಿ ಇದೆ ಎಂದು ನೋಡೋಣ’ ಎಂಬ ಅರ್ಥದ ಸಾಲಿನ ಮೂಲಕ ತಮ್ಮ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಸರಕಾರವನ್ನು ಟೀಕಿಸುವವರ ವಿರುದ್ಧ ಅಪಪ್ರಚಾರ ನಡೆಸಲಾಗುತ್ತಿದೆ ಎಂದು ಆರೋಪಿಸಿದ ಶಾ, ಗೋದಿ ಮಾಧ್ಯಮದ ಕೆಲವು ವಿಭಾಗಗಳನ್ನು ‘ಸಾಕು ನಾಯಿಗಳು’ ಎಂದು ಟೀಕಿಸಿದ್ದಾರೆ.






