ದಿಲ್ಲಿಯಲ್ಲಿ ವಾಯುಮಾಲಿನ್ಯಕ್ಕೆ ಪಟಾಕಿಗಳೇ ಶೇ.71ರಷ್ಟು ಕಾರಣ: ವರದಿ

ಸಾಂದರ್ಭಿಕ ಚಿತ್ರ (Photo: Reuters)
ಹೊಸದಿಲ್ಲಿ: ನವೆಂಬರ್ 8ರಂದು ದೀಪಾವಳಿ ಆಚರಣೆಯ ಸಂದರ್ಭದಲ್ಲಿ ದಿಲ್ಲಿಯ ಜನರು ಪಟಾಕಿ ಸಿಡಿಸಿದ ಬಳಿಕ ನಗರವನ್ನು ದಟ್ಟ ಹೊಗೆ ಆವರಿಸಿತ್ತು. ಮಧ್ಯರಾತ್ರಿಯ ನಂತರ ವಾಯುಮಾಲಿನ್ಯ ತೀವ್ರವಾಗಿ ಹೆಚ್ಚಾಗಲು ಪಟಾಕಿಗಳೇ ಪ್ರಮುಖ ಕಾರಣ ಎಂದು ಅಧ್ಯಯನವೊಂದು ತಿಳಿಸಿದೆ.
ಪುಣೆಯ ಭಾರತೀಯ ಉಷ್ಣವಲಯ ಹವಾಮಾನ ಸಂಸ್ಥೆ (IITM) ನಡೆಸಿದ ವೈಜ್ಞಾನಿಕ ದತ್ತಾಂಶಗಳ ವಿಶ್ಲೇಷಣೆಯ ಪ್ರಕಾರ, ನವೆಂಬರ್ 9ರಂದು ಬೆಳಗಿನ ಜಾವ 1 ಗಂಟೆಯಿಂದ 9 ಗಂಟೆಯವರೆಗೆ ವಾಯುವಿನಲ್ಲಿದ್ದ PM2.5 ಮಾಲಿನ್ಯದಲ್ಲಿ ಪಟಾಕಿಗಳ ಪಾಲು ಶೇ.71.1ರಷ್ಟಿತ್ತು.
PM2.5 ಎಂದರೆ 2.5 ಮೈಕ್ರೋಮೀಟರ್ ಅಥವಾ ಅದಕ್ಕಿಂತ ಕಡಿಮೆ ಗಾತ್ರದ ಅತಿ ಸೂಕ್ಷ್ಮ ಧೂಳಿನ ಕಣಗಳು. ಇವು ಉಸಿರಾಟದ ಮೂಲಕ ಶ್ವಾಸಕೋಶದ ಆಳದವರೆಗೆ ತಲುಪಬಲ್ಲವು.
ವಾಹನಗಳ ಹೊಗೆ, ಜೈವಿಕ ಇಂಧನ ದಹನ, ಕಟ್ಟಿಗೆ ಸುಡುವುದು ಮತ್ತು ಖನಿಜ ಧೂಳು ಕೂಡ ವಾಯುಮಾಲಿನ್ಯಕ್ಕೆ ಕಾರಣವಾಗಿದ್ದವು. ಆದರೆ ಪಟಾಕಿಗಳಿಗೆ ಹೋಲಿಸಿದರೆ ಇವುಗಳ ಪಾಲು ಗಣನೀಯ ಕಡಿಮೆಯಾಗಿತ್ತು ಎಂದು ವರದಿ ತಿಳಿಸಿದೆ.
IITM ಅಧ್ಯಯನದ ಪ್ರಕಾರ, ದೀಪಾವಳಿಗೆ ಹಿಂದಿನ ದಿನ ಪಟಾಕಿಗಳಿಂದ ಉಂಟಾದ PM2.5 ಮಾಲಿನ್ಯದ ಪ್ರಮಾಣ ಶೇ.43.4ರಷ್ಟಿತ್ತು. ನವೆಂಬರ್ 7ರಂದು ಬೆಳಗಿನ ಜಾವ 1ರಿಂದ 9 ಗಂಟೆಯವರೆಗೆ ಇದು ಕೇವಲ ಶೇ.5.6ರಷ್ಟಿತ್ತು.
ಆದರೆ ದೀಪಾವಳಿ ಮರುದಿನ ಇದೇ ಅವಧಿಯಲ್ಲಿ ಪಟಾಕಿಗಳ ಪಾಲು ಶೇ.29ಕ್ಕಿಂತ ಹೆಚ್ಚಾಗಿತ್ತು. ದೀಪಾವಳಿ ರಾತ್ರಿ ಪಟಾಕಿಗಳಿಂದ ಮಾಲಿನ್ಯ ಗಣನೀಯವಾಗಿ ಹೆಚ್ಚಾಗಿರುವುದನ್ನು ಅಧ್ಯಯನ ತೋರಿಸಿದೆ.






