ದೊಡ್ಡ ಕನಸು ಕಾಣಬೇಕು, ದೇಶವನ್ನು ಅಭಿವೃದ್ಧಿಪಡಿಸಬೇಕು: ಪ್ರಧಾನಿ ಮೋದಿ

ಹೊಸದಿಲ್ಲಿ, ಆ.15: ‘ದೊಡ್ಡದನ್ನು ಸಾಧಿಸಬೇಕಾದರೆ ದೊಡ್ಡ ಕನಸು ಕಾಣಬೇಕು’ ಎಂದು ಪ್ರಧಾನಿ ನರೇಂದ್ರ ಮೋದಿ ಅವರು ಹೇಳಿದರು.

ಶನಿವಾರ 80 ನೇ ಸ್ವಾತಂತ್ರ್ಯ ದಿನಾಚರಣೆಯಂದು ಕೆಂಪುಕೋಟೆಯಿಂದ ರಾಷ್ಟ್ರವನ್ನುದ್ದೇಶಿಸಿ ಮಾತನಾಡಿದ ಅವರು, ದೇಶ ದೊಡ್ಡ ಗುರಿ ಹೊಂದಿದ್ದರೆ ಅದನ್ನು ಸಾಧಿಸಲು ಹೆಚ್ಚಿನ ಪ್ರಯತ್ನ ಮಾಡಬೇಕು ಎಂದರು.

‘ನಾವು ದೊಡ್ಡ ಕನಸು ಕಾಣಬೇಕು. ನಮ್ಮ ಸಂಕಲ್ಪವೂ ದೊಡ್ಡದಾಗಿರಬೇಕು. ಕನಸು ಮತ್ತು ಸಂಕಲ್ಪ ದೊಡ್ಡದಾಗಿದ್ದರೆ, ಗುರಿ ತಲುಪಲು ನಾವು ಇನ್ನಷ್ಟು ಶ್ರಮಿಸುತ್ತೇವೆ’ ಎಂದು ಹೇಳಿದರು.

2047ರ ವೇಳೆಗೆ ಅಭಿವೃದ್ಧಿ ಹೊಂದಿದ ದೇಶ

2047ರ ವೇಳೆಗೆ ಭಾರತ ಅಭಿವೃದ್ಧಿ ಹೊಂದಿದ ದೇಶವಾಗಲಿದೆ ಎಂಬ ವಿಶ್ವಾಸವನ್ನು ಮೋದಿ ವ್ಯಕ್ತಪಡಿಸಿದರು. ‘ಭಾರತ ಈಗ ಹೊಸ ಎತ್ತರಕ್ಕೆ ಏರುವ ಕನಸು ಕಾಣುತ್ತಿದೆ. ನಾವು ‘ವಿಕ್ಷಿತ್ ಭಾರತ’ದ ಕನಸನ್ನು ನನಸಾಗಿಸುತ್ತೇವೆ. ಇದನ್ನು ನಾವು ಸಾಧಿಸಲೇಬೇಕು. ದೇಶದ 140 ಕೋಟಿ ಜನರೂ ಇದಕ್ಕಾಗಿ ಪ್ರಯತ್ನಿಸಬೇಕು’ ಎಂದರು.

‘ಇದು ಜಗತ್ತಿನ ಮುಂದೆ ಭಾರತದ ಧೈರ್ಯವನ್ನು ತೋರಿಸಲಿದೆ. ಜಗತ್ತು ಭಾರತವನ್ನು ವಿಭಿನ್ನ ದೃಷ್ಟಿಯಿಂದ ನೋಡಲು ಆರಂಭಿಸಲಿದೆ’ ಎಂದು ಹೇಳಿದರು.

25 ಕೋಟಿ ಜನರು ಬಡತನದಿಂದ ಹೊರಗೆ

‘ವಿಕ್ಷಿತ್ ಭಾರತ’ದ ಗುರಿ ಸಾಧಿಸುವಲ್ಲಿ ಸಮಾಜದ ಎಲ್ಲ ವರ್ಗಗಳ ಜನರು ನೀಡುತ್ತಿರುವ ಕೊಡುಗೆಯನ್ನು ಪ್ರಧಾನಿ ಶ್ಲಾಘಿಸಿದರು. ‘ಕಳೆದ 12 ವರ್ಷಗಳಲ್ಲಿ ಕೋಟ್ಯಂತರ ಜನರು ದೇಶವನ್ನು ಅಭಿವೃದ್ಧಿಯತ್ತ ಕೊಂಡೊಯ್ಯಲು ಪ್ರಯತ್ನಿಸಿದ್ದಾರೆ. ದಲಿತರು, ತುಳಿತಕ್ಕೊಳಗಾದವರು, ಬಡವರು, ಮಧ್ಯಮ ವರ್ಗದವರು ಮತ್ತು ಯುವಕರು ಇದರಲ್ಲಿ ಭಾಗಿಯಾಗಿದ್ದಾರೆ. ಅವರ ಪ್ರಯತ್ನವನ್ನು ನಾನು ಗೌರವಿಸುತ್ತೇನೆ’ ಎಂದರು.

ಈ ಪ್ರಯತ್ನಗಳ ಪರಿಣಾಮವಾಗಿ 25 ಕೋಟಿಗೂ ಹೆಚ್ಚು ಜನರು ಬಡತನದಿಂದ ಹೊರಬಂದಿದ್ದಾರೆ ಎಂದು ಮೋದಿ ಹೇಳಿದರು. ‘ಪ್ರತಿಯೊಬ್ಬ ಭಾರತೀಯನೂ ದೇಶವನ್ನು ಮುನ್ನಡೆಸಲು ತನ್ನದೇ ಆದ ರೀತಿಯಲ್ಲಿ ಪ್ರಯತ್ನಿಸುತ್ತಿದ್ದಾನೆ. ಪ್ರತಿಯೊಬ್ಬರ ಪ್ರಯತ್ನವನ್ನೂ ನಾನು ಶ್ಲಾಘಿಸುತ್ತೇನೆ’ ಎಂದರು.

ದೊಡ್ಡ ಸಾಧನೆ ಮಾಡುವ ಧೈರ್ಯ

ದೊಡ್ಡ ಕನಸು ಕಾಣುವುದು ಮತ್ತು ಅದನ್ನು ಸಾಧಿಸುವ ಧೈರ್ಯವೇ ನವ ಭಾರತದ ವಿಶೇಷತೆ ಎಂದು ಮೋದಿ ಹೇಳಿದರು. ‘ಜಗತ್ತು ಭಾರತದ ಪ್ರಯತ್ನಗಳನ್ನು ಗಮನಿಸುತ್ತಿದೆ. ನಮ್ಮ ಸಂಕಲ್ಪ ಬಲವಾಗಿರಬೇಕು. ಸಂಕಲ್ಪ ಬಲವಾಗಿದ್ದರೆ, ಎಷ್ಟೇ ಸವಾಲುಗಳು ಎದುರಾದರೂ ಅವುಗಳನ್ನು ಎದುರಿಸುವ ಮಾರ್ಗವನ್ನು ಕಂಡುಕೊಳ್ಳುತ್ತೇವೆ. ಕೊನೆಗೆ ಗೆಲುವು ಸಾಧಿಸುತ್ತೇವೆ’ ಎಂದರು.

ಭಾರತ ಇತರ ದೇಶಗಳ ಮೇಲೆ ಅವಲಂಬಿತವಾಗಬಾರದು. ‘ನಾವು ಸ್ವಾವಲಂಬಿಗಳಾಗಬೇಕು. ದೇಶದಲ್ಲಿಯೇ ನಮಗೆ ಬೇಕಾದ ಎಲ್ಲವೂ ಸಿಗುವಂತಾಗಬೇಕು. ನಮ್ಮನ್ನು ನಾವು ಸುಧಾರಿಸಿಕೊಳ್ಳಬೇಕು ಮತ್ತು ದೇಶವನ್ನು ರಕ್ಷಿಸಿಕೊಳ್ಳಬೇಕು. ಸ್ವದೇಶಿ ಉತ್ಪನ್ನಗಳನ್ನು ಬಳಸಬೇಕು. ಸ್ವಾವಲಂಬನೆ ಸಾಧಿಸಬೇಕು. ಸ್ಥಳೀಯ ಉತ್ಪನ್ನಗಳಿಗೆ ಆದ್ಯತೆ ನೀಡುವ ಸಂಕಲ್ಪ ಮಾಡಬೇಕು’ ಎಂದರು.

ಸ್ವಾತಂತ್ರ್ಯ ದಿನಾಚರಣೆಯ ಕಾರ್ಯಕ್ರಮಕ್ಕಾಗಿ ಕೆಂಪುಕೋಟೆಗೆ ತೆರಳುವ ಮೊದಲು ಪ್ರಧಾನಿ ಮೋದಿ ಅವರು ರಾಜ್‌ಘಾಟ್‌ಗೆ ಭೇಟಿ ನೀಡಿ ರಾಷ್ಟ್ರಪಿತ ಮಹಾತ್ಮ ಗಾಂಧಿಯವರಿಗೆ ಗೌರವ ಸಲ್ಲಿಸಿದರು.

ಕೆಂಪುಕೋಟೆಯಲ್ಲಿ ಮೊದಲ ಬಾರಿ ‘ವಂದೇ ಮಾತರಂ’

ಸ್ವಾತಂತ್ರ್ಯಾನಂತರ ಇದೇ ಮೊದಲ ಬಾರಿಗೆ ಈ ಸ್ವಾತಂತ್ರ್ಯ ದಿನಾಚರಣೆಯಂದು ಕೆಂಪುಕೋಟೆಯಲ್ಲಿ ರಾಷ್ಟ್ರೀಯ ಗೀತೆ ‘ವಂದೇ ಮಾತರಂ’ ನುಡಿಸಲಾಯಿತು.