ಮಹಿಳಾ ಮೀಸಲಾತಿ ಮಸೂದೆ | ಚರ್ಚೆಯ ವೇಳೆ ಪ್ರಿಯಾಂಕಾ ಗಾಂಧಿಯ ʼಚಾಣಕ್ಯʼ ಹೋಲಿಕೆಗೆ ಸದನದಲ್ಲಿ ಗಹಗಹಿಸಿ ನಕ್ಕ ಅಮಿತ್ ಶಾ

ಹೊಸದಿಲ್ಲಿ, ಎ.16: ಲೋಕಸಭೆಯಲ್ಲಿ ಮಹಿಳಾ ಮೀಸಲಾತಿ ಮಸೂದೆ ಕುರಿತು ನಡೆದ ಚರ್ಚೆ ವೇಳೆ ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ಹಾಗೂ ವಯನಾಡ್ ಸಂಸದೆ ಪ್ರಿಯಾಂಕಾ ಗಾಂಧಿ ವಾದ್ರಾ ಮಾಡಿದ ‘ಚಾಣಕ್ಯ’ ಹೋಲಿಕೆ ಸದನದಲ್ಲಿ ನಗೆಗೆ ಕಾರಣವಾಯಿತು. ಕೇಂದ್ರ ಗೃಹ ಸಚಿವ ಅಮಿತ್ ಶಾ ಸೇರಿದಂತೆ ಆಡಳಿತಾರೂಢ ಪಕ್ಷದ ಸದಸ್ಯರೂ ನಕ್ಕರು.

ಚರ್ಚೆಯಲ್ಲಿ ಮಾತನಾಡಿದ ಪ್ರಿಯಾಂಕಾ ಗಾಂಧಿ, ಬಿಜೆಪಿ ರಾಜಕೀಯ ಕಾರ್ಯತಂತ್ರವನ್ನು ಟೀಕಿಸಿ, “ಇಂದೇನಾದರೂ ಚಾಣಕ್ಯ ಬದುಕಿದ್ದರೆ, ಇಂತಹ ರಾಜಕೀಯ ತಂತ್ರಗಳನ್ನು ಕಂಡು ಆಶ್ಚರ್ಯಪಡುತ್ತಿದ್ದರು” ಎಂದು ಹೇಳಿದರು. ಈ ಹೇಳಿಕೆಗೆ ಆಡಳಿತ ಪಕ್ಷದ ಸದಸ್ಯರ ಮುಖದಲ್ಲಿ ನಗು ಮೂಡಿತು.

“ಚುನಾವಣೆಯಲ್ಲಿ ಗೆಲುವು ಸಾಧಿಸಲು ಬಿಜೆಪಿ ಅನುಸರಿಸುವ ವಿಧಾನಗಳು ಚಾಣಕ್ಯನನ್ನೂ ನಿಬ್ಬೆರಗಾಗಿಸುವಂತಿವೆ” ಎಂದು ಪ್ರಿಯಾಂಕಾ ಗಾಂಧಿ ಹೇಳಿದರು.

ಮಹಿಳಾ ಮೀಸಲಾತಿ ಕುರಿತು ತಮ್ಮ ಪಕ್ಷದ ನಿಲುವನ್ನು ಸ್ಪಷ್ಟಪಡಿಸಿದ ಅವರು, “ಮಹಿಳಾ ಪ್ರಾತಿನಿಧ್ಯಕ್ಕೆ ನಾವು ವಿರೋಧಿಗಳಲ್ಲ. ಆದರೆ, ಮಸೂದೆ ಮಂಡನೆಯ ಸಮಯ ಹಾಗೂ ಅದರ ಹಿಂದಿನ ಉದ್ದೇಶ ಪ್ರಶ್ನಾರ್ಹವಾಗಿದೆ. ಇದನ್ನು NDA ಚುನಾವಣಾ ಕಾರ್ಯತಂತ್ರವಾಗಿ ಬಳಸಲಾಗುತ್ತಿದೆ,” ಎಂದು ಹೇಳಿದರು.

ಇದೇ ವೇಳೆ, ಮಹಿಳಾ ಸಬಲೀಕರಣದ ಪರವಾಗಿ ಕೇಂದ್ರ ಸರ್ಕಾರ ತಾನು ನಿಂತಿದೆ ಎಂದು ಹೇಳಿಕೊಂಡರೂ, ಸಾಂವಿಧಾನಿಕ ಮೌಲ್ಯಗಳನ್ನು ದುರ್ಬಲಗೊಳಿಸುತ್ತಿದೆ ಎಂದು ಸಂಸದೆ ಪ್ರಿಯಾಂಕಾ ಗಾಂಧಿ ಆರೋಪಿಸಿದರು.