ರಾಯಚೂರು: ಕಸ ಸುರಿಯುವ ಜಾಗದಲ್ಲಿ ಮಿಯಾವಾಕಿ ಅರಣ್ಯ

ರಾಯಚೂರು: ಬಿಸಿಲಿನ ತಾಪಮಾನಕ್ಕೆ ಹೆಸರಾದ ರಾಯಚೂರು ನಗರದಲ್ಲಿ ಹಸಿರು ಪ್ರದೇಶ ಹೆಚ್ಚಿಸುವ ಉದ್ದೇಶದಿಂದ ಮಹಾನಗರ ಪಾಲಿಕೆ ವಿನೂತನ ಪ್ರಯತ್ನಕ್ಕೆ ಮುಂದಾಗಿದೆ. ನಗರದ ಹೊರವಲಯದ ಯಕ್ಲಾಸಪೂರು ಬಡಾವಣೆಯ ಘನತ್ಯಾಜ್ಯ ನಿರ್ವಹಣಾ ಘಟಕದಲ್ಲಿ ಜಪಾನ್ ಮಾದರಿಯ ಮಿಯಾವಾಕಿ ಅರಣ್ಯ ನಿರ್ಮಿಸಲಾಗುತ್ತಿದ್ದು, ಈಗಾಗಲೇ 58 ಸಾವಿರಕ್ಕೂ ಅಧಿಕ ವಿವಿಧ ಜಾತಿಯ ಸಸಿಗಳನ್ನು ನೆಡಲಾಗಿದೆ.

ರಾಯಚೂರು ಮಹಾನಗರ ಪಾಲಿಕೆಯ ಘನತ್ಯಾಜ್ಯ ನಿರ್ವಹಣಾ ಘಟಕದ 3.5 ಎಕರೆ ಪ್ರದೇಶವನ್ನು ದಟ್ಟ ನಗರ ಅರಣ್ಯವನ್ನಾಗಿ ಪರಿವರ್ತಿಸುವ ಉದ್ದೇಶದಿಂದ ‘ಭಾರತ್ ವನ್-ಮಿಯಾವಾಕಿ ಫಾರೆಸ್ಟ್ ಪ್ಲಾಂಟೇಶನ್’ ಯೋಜನೆ ಕೈಗೆತ್ತಿಕೊಳ್ಳಲಾಗಿದೆ. ಯೋಜನೆಯಡಿ 69 ವಿವಿಧ ಜಾತಿಯ ಒಟ್ಟು 58,002 ಸಸಿಗಳನ್ನು ನೆಡಲಾಗಿದೆ. ಕೇಂದ್ರ ಸರಕಾರದ ಅಧೀನದಲ್ಲಿರುವ ಭಾರತ ಭದ್ರತಾ ಮುದ್ರಣ ಹಾಗೂ ನಾಣ್ಯ ತಯಾರಿಕಾ ನಿಗಮ ಲಿಮಿಟೆಡ್‌ನ 1.5 ಕೋಟಿ ರೂ. ಸಿಎಸ್‌ಆರ್ ಅನುದಾನದಲ್ಲಿ ಯೋಜನೆ ಅನುಷ್ಠಾನಗೊಳ್ಳುತ್ತಿದೆ.

ಕಸ ಸುರಿಯುತ್ತಿದ್ದ ಜಾಗದಲ್ಲಿ ಅರಣ್ಯದ ಕನಸು

ಯಕ್ಲಾಸಪೂರು ತ್ಯಾಜ್ಯ ನಿರ್ವಹಣಾ ಘಟಕದಲ್ಲಿ ಈ ಹಿಂದೆ ನಗರದ ತ್ಯಾಜ್ಯವನ್ನು ನಿರಂತರವಾಗಿ ಸುರಿಯಲಾಗುತ್ತಿತ್ತು. ತ್ಯಾಜ್ಯಕ್ಕೆ ಬೆಂಕಿ ಹಚ್ಚುವುದು, ಕಾಲಕಾಲಕ್ಕೆ ವಿಲೇವಾರಿ ಮಾಡದಿರುವುದು ಹಾಗೂ ಅವೈಜ್ಞಾನಿಕ ನಿರ್ವಹಣೆಯಿಂದ ಸುತ್ತಮುತ್ತಲಿನ ನಿವಾಸಿಗಳಿಗೆ ತೊಂದರೆಯಾಗುತ್ತಿತ್ತು.

ಸದ್ಯ ಪಾಲಿಕೆಯಿಂದ ತ್ಯಾಜ್ಯವನ್ನು ವೈಜ್ಞಾನಿಕವಾಗಿ ವಿಲೇವಾರಿ ಮಾಡುವ ಕ್ರಮ ಕೈಗೊಳ್ಳಲಾಗಿದ್ದು, ತ್ಯಾಜ್ಯದಿಂದ ಗೊಬ್ಬರ ತಯಾರಿಸಿ ಸಾರ್ವಜನಿಕ ಉದ್ಯಾನಗಳಿಗೂ ಬಳಸಲಾಗುತ್ತಿದೆ. ಇದೇ ಪ್ರದೇಶದ ಒಂದು ಭಾಗದಲ್ಲಿ ಮಿಯಾವಾಕಿ ಅರಣ್ಯ ನಿರ್ಮಾಣಕ್ಕೆ ಚಾಲನೆ ನೀಡಲಾಗಿದೆ.

ಈಗಾಗಲೇ ಸಸಿಗಳನ್ನು ನೆಡಲಾಗಿದ್ದು, ಹನಿ ನೀರಾವರಿ ವ್ಯವಸ್ಥೆ ಮೂಲಕ ನೀರುಣಿಸಲಾಗುತ್ತಿದೆ. ರಾಯಚೂರಿನ ಹವಾಮಾನ ಮತ್ತು ಮಣ್ಣಿನ ಪರಿಸ್ಥಿತಿಯಲ್ಲಿ ಸಸಿಗಳನ್ನು ಪೋಷಿಸಿ ಬೆಳೆಸುವ ಮೂಲಕ ಹಸಿರು ಪ್ರದೇಶ ಹೆಚ್ಚಿಸುವ ಪ್ರಯತ್ನ ಇದಾಗಿದೆ.

ಒಂದೇ ಜಾಗದಲ್ಲಿ 58 ಸಾವಿರ ಸಸಿಗಳು

ಯೋಜನೆಯಡಿ 3.5 ಎಕರೆ ಪ್ರದೇಶದಲ್ಲಿ 58,002 ಸಸಿಗಳನ್ನು ನೆಡಲಾಗಿದೆ. ಲಭ್ಯವಿರುವ ಒಟ್ಟು ವಿಸ್ತೀರ್ಣದ ಆಧಾರದ ಮೇಲೆ ಪ್ರತಿ ಎಕರೆಗೆ ಸರಾಸರಿ 16,572 ಸಸಿಗಳು ಹಾಗೂ ಪ್ರತಿ ಚದರ ಮೀಟರ್‌ಗೆ ಸುಮಾರು 4.1 ಸಸಿಗಳು ಬರುತ್ತವೆ. ಮಿಯಾವಾಕಿ ಮಾದರಿಯಲ್ಲಿ ಸಾಮಾನ್ಯವಾಗಿ ಪ್ರತಿ ಚದರ ಮೀಟರ್‌ಗೆ 3ರಿಂದ 4 ಸಸಿಗಳನ್ನು ನೆಡುವ ಪದ್ಧತಿ ಇದೆ. ಆದರೆ, ಯೋಜನೆಯಲ್ಲಿನ ದಾರಿಗಳು ಹಾಗೂ ನಿರ್ವಹಣಾ ಸ್ಥಳಗಳ ವಿಸ್ತೀರ್ಣವನ್ನು ಪ್ರತ್ಯೇಕವಾಗಿ ಪರಿಗಣಿಸಿದರೆ ನಿಜವಾದ ನೆಡುವಿಕೆಯ ಸಾಂದ್ರತೆಯಲ್ಲಿ ವ್ಯತ್ಯಾಸವಾಗಬಹುದು.

69 ಜಾತಿಯ ಸಸಿಗಳ ನೆಡುವಿಕೆ

ಯೋಜನೆಯಲ್ಲಿ ವಿವಿಧ ಜಾತಿಯ ಮರಗಳು ಮತ್ತು ಸಸ್ಯಗಳನ್ನು ನೆಡಲಾಗಿದೆ. ಬೇವು, ಪಲಾಶ, ಖಿರ್ನಿ, ಅರ್ಜುನ, ಸ್ಪಾಥೋಡಿಯಾ, ಚೀನಾ ಬಾದಾಮ್, ಉಂಬರ, ಕಪ್ಪು ನೇರಳೆ, ಹಲಸು, ಅಶೋಕ, ರೋಸಿ ಟ್ರಂಪೆಟ್ ಟ್ರೀ, ಕರಂಜ, ಬಕುಳ, ಮಹುವಾ, ಶೆಮಲ್, ಬರ್ಡ್‌ಚೆರಿ, ಪೀಕಾಕ್ ಫ್ಲವರ್, ಟೆಕೋಮಾ, ಮಹಾಗನಿ, ಸಿಂಧೂರ, ಹಳದಿ ಕಣೇರು, ಗಂಗಾವರಿ ಹಾಗೂ ಬ್ರೆಡ್ ಫ್ರೂಟ್ ಸೇರಿದಂತೆ 69 ಜಾತಿಯ ಸಸಿಗಳನ್ನು ಬೆಳೆಸಲಾಗುತ್ತಿದೆ.

ಹಣ್ಣಿನ, ನೆರಳು ನೀಡುವ ಹಾಗೂ ಹೂ ಬಿಡುವ ವಿವಿಧ ಜಾತಿಗಳ ಸಸಿಗಳನ್ನು ನೆಡುವ ಮೂಲಕ ಜೀವವೈವಿಧ್ಯಕ್ಕೆ ಅನುಕೂಲವಾಗುವ ಪರಿಸರ ನಿರ್ಮಿಸುವ ಉದ್ದೇಶ ಹೊಂದಲಾಗಿದೆ. ನಗರ ಪ್ರದೇಶಗಳಲ್ಲಿ ಹಸಿರು ಪ್ರದೇಶ ಹೆಚ್ಚಿಸುವುದು ಸ್ಥಳೀಯ ಮಟ್ಟದಲ್ಲಿ ನೆರಳು, ತಾಪಮಾನ ನಿಯಂತ್ರಣ ಮತ್ತು ಜೀವವೈವಿಧ್ಯಕ್ಕೆ ನೆರವಾಗುವ ಸಾಧ್ಯತೆಯಿದೆ.

ಇತ್ತೀಚೆಗೆ ನಗರಾಭಿವೃದ್ಧಿ ಸಚಿವ ಯತೀಂದ್ರ ಸಿದ್ದರಾಮಯ್ಯ ಅವರು ಮಾಜಿ ಸಚಿವ ಹಾಗೂ ವಿಧಾನ ಪರಿಷತ್ ಸದಸ್ಯ ಎನ್.ಎಸ್. ಬೋಸರಾಜು ಅವರೊಂದಿಗೆ ಯಕ್ಲಾಸಪೂರು ಘನತ್ಯಾಜ್ಯ ನಿರ್ವಹಣಾ ಘಟಕಕ್ಕೆ ಭೇಟಿ ನೀಡಿ ಮಿಯಾವಾಕಿ ಅರಣ್ಯ ಪ್ರದೇಶವನ್ನು ವೀಕ್ಷಿಸಿದರು. ಯೋಜನೆಯ ಕುರಿತು ಮಾಹಿತಿ ಪಡೆದ ಅವರು ನಗರದ ಸಮಗ್ರ ಅಭಿವೃದ್ಧಿಗೆ ಸರಕಾರದಿಂದ ಸಹಕಾರ ನೀಡುವುದಾಗಿ ತಿಳಿಸಿದರು.

ಜಪಾನ್ ಮಾದರಿಯ ಮಿಯಾವಾಕಿ ಅರಣ್ಯ ಅನೇಕ ಕಡೆಗಳಲ್ಲಿ ಪ್ರಚಲಿತದಲ್ಲಿದೆ. ನಮ್ಮ ಭಾಗದಲ್ಲಿಯೂ ಅರಣ್ಯ ಬೆಳೆಸುವ ಮೂಲಕ ಪರಿಸರದ ಬಗ್ಗೆ ಜಾಗೃತಿ ಮೂಡಿಸುತ್ತಿದ್ದೇವೆ. ಇದರಿಂದ ಸುತ್ತಮುತ್ತಲಿನ ತಾಪಮಾನ ಕಡಿಮೆಯಾಗಲು ಸಹಕಾರಿಯಾಗಬಹುದು.

-ಜುಬೀನ್ ಮೊಹಪಾತ್ರ,

ಮಹಾನಗರ ಪಾಲಿಕೆ ಆಯುಕ್ತ, ರಾಯಚೂರು

ಮಿಯಾವಾಕಿ ವಿಧಾನವು ಕಡಿಮೆ ಜಾಗದಲ್ಲಿ ಸ್ಥಳೀಯ ಜಾತಿಯ ಮರಗಳನ್ನು ದಟ್ಟವಾಗಿ ಬೆಳೆಸಿ, ವೇಗವಾಗಿ ಸಣ್ಣ ಅರಣ್ಯವನ್ನು ನಿರ್ಮಿಸುವ ಪರಿಸರ ಸ್ನೇಹಿ ವಿಧಾನವಾಗಿದೆ. ಗಾಳಿಯ ಗುಣಮಟ್ಟ ಸುಧಾರಣೆಗೆ, ನಗರದ ಉಷ್ಣತೆ ಕಡಿಮೆ ಮಾಡಲು, ವೇಗವಾಗಿ ಅರಣ್ಯ ನಿರ್ಮಾಣವಾಗಲು, ಜೀವವೈವಿಧ್ಯ ಹೆಚ್ಚಳವಾಗಲು ಸಹಾಯಕವಾಗುತ್ತದೆ. ಮಹಾನಗರ ಪಾಲಿಕೆ ಕಾರ್ಯ ಶ್ಲಾಘನೀಯ.ಮೂರು ವರ್ಷಗಳ ಕಾಲ ನಿರಂತರವಾಗಿ ನೀರುಣಿಸಿ ಪಾಲನೆ ಪೋಷಣೆ ಮಾಡಿದಾಗ ಮಾತ್ರ ಮಿಯಾವಾಕಿ ಅರಣ್ಯ ನಿರ್ಮಾಣವಾಗಲು ಸಾಧ್ಯ.

-ರಾಜೇಂದ್ರ ಶಿವಾಳೆ,

ಗ್ರೀನ್ ರಾಯಚೂರು ಸಂಸ್ಥೆ ಸಂಚಾಲಕ,

ನಮ್ಮ ನಗರದಲ್ಲಿ ಮಿಯಾವಾಕಿ ಅರಣ್ಯ ನಿರ್ಮಿಸುತ್ತಿರುವುದು ಸಂತೋಷದ ವಿಷಯ. ಕಲಬುರಗಿ ಜಿಲ್ಲೆಯಲ್ಲಿ ಈಗಾಗಲೇ ಇದನ್ನು ಮಾಡಿರುವುದನ್ನು ನೋಡಿದ್ದೇನೆ. ಇದು ಉಪಯುಕ್ತ ಯೋಜನೆಯಾಗಿದೆ. ಇದೇ ಮಾದರಿಯಲ್ಲಿ ನಗರದ ಹಲವೆಡೆ ಅರಣ್ಯ ನಿರ್ಮಾಣವಾದರೆ ಮತ್ತಷ್ಟು ಅನುಕೂಲವಾಗಲಿದೆ.

-ಮಸ್ರೂರ್ ಅಹ್ಮದ್,

ರಾಯಚೂರು ನಗರ ನಿವಾಸಿ