ಆಲಮೇಲ ಪಟ್ಟಣಕ್ಕೆ 100 ಅಡಿ ರಿಂಗ್ ರೋಡ್ ರಸ್ತೆ!

ಆಲಮೇಲ: ತಾಲೂಕು ಕೇಂದ್ರವಾಗಿ ಹೊರಹೊಮ್ಮುತ್ತಿರುವ ಆಲಮೇಲ ಪಟ್ಟಣದ ಸಂಚಾರ ದಟ್ಟಣೆ ಸಮಸ್ಯೆಗೆ ಕೊನೆಗೂ ಶಾಶ್ವತ ಮುಕ್ತಿ ಸಿಗುವ ಕಾಲ ಸನ್ನಿಹಿತವಾಗಿದೆ.

ರಾಜ್ಯ ಸರಕಾರದ ಮಹತ್ವಾಕಾಂಕ್ಷೆಯ ಕರ್ನಾಟಕ ರೋಡ್ ನೆಟ್ವರ್ಕ್ ಗ್ರಿಡ್ ಪ್ಲಾನ್’ ಅಡಿಯಲ್ಲಿ ಆಲಮೇಲ ಪಟ್ಟಣಕ್ಕೆ 100 ಅಡಿ ಅಗಲದ ನೂತನ ವರ್ತುಲ ರಸ್ತೆ (ರಿಂಗ್ ರೋಡ್) ನಿರ್ಮಾಣಕ್ಕೆ ರಾಜ್ಯ ಸಚಿವ ಸಂಪುಟ ಅನುಮೋದನೆ ನೀಡಿದ್ದು, ಪಟ್ಟಣದ ಮೂಲಸೌಕರ್ಯ ವಿಸ್ತರಣೆಗೆ ಹೊಸ ಶಕ್ತಿ ಬಂದಂತಾಗಿದೆ.

ಬೆಂಗಳೂರು, ಮೈಸೂರಿನಂತಹ ಮಹಾನಗರಗಳ ಮೇಲಿನ ವಲಸೆ ಒತ್ತಡವನ್ನು ತಗ್ಗಿಸಲು ಮತ್ತು ರಾಜ್ಯದ ದ್ವಿತೀಯ ಹಾಗೂ ತೃತೀಯ ಹಂತದ ನಗರಗಳಲ್ಲಿ ಆರ್ಥಿಕ ವಿಕೇಂದ್ರೀಕರಣಕ್ಕೆ ವೇಗ ನೀಡಲು ಸರ್ಕಾರ ಈ ಬೃಹತ್ ಯೋಜನೆ ರೂಪಿಸಿದೆ. ವಿಜಯಪುರ ಜಿಲ್ಲೆಯಲ್ಲಿ ಆಯ್ಕೆಯಾದ 9 ಪಟ್ಟಣಗಳ ಸಾಲಿನಲ್ಲಿ ಆಲಮೇಲ ಮುಂಚೂಣಿಯಲ್ಲಿದೆ.

ಆಲಮೇಲ ರಿಂಗ್ ರೋಡ್ ಯೋಜನೆಯ ಪ್ರಮುಖ ರೂಪುರೇಷೆಗಳು :

100 ಅಡಿ ಅಗಲದ ರಸ್ತೆ :

ಪಟ್ಟಣದ ಸುತ್ತಲೂ ಜಿಐಎಸ್ ತಂತ್ರಜ್ಞಾನ ಬಳಸಿ 30 ಮೀಟರ್ (100 ಅಡಿ) ಅಗಲದ ಸುಸಜ್ಜಿತ ವರ್ತುಲ ರಸ್ತೆ ನಿರ್ಮಾಣವಾಗಲಿದೆ.

2 ಕಿ.ಮೀ ಇಂಪ್ಯಾಕ್ಟ್ ರೆನ್ :

ರಸ್ತೆಯ ಎರಡೂ ಬದಿಗಳಲ್ಲಿ ತಲಾ 2 ಕಿ.ಮೀ ವ್ಯಾಪ್ತಿಯನ್ನು ಪ್ರಭಾವ ವಲಯ ಎಂದು ಗುರುತಿಸಲಾಗಿದ್ದು, ನಿಯಂತ್ರಿತ ಹಾಗೂ ಪರಿಸರಸ್ನೇಹಿ ಅಭಿವೃದ್ಧಿಗೆ ಅವಕಾಶ ಕಲ್ಪಿಸಲಾಗುತ್ತದೆ.

ಸಂಚಾರ ದಟ್ಟಣೆಗೆ ಮುಕ್ತಿ :

ರಾಜ್ಯ ಹಾಗೂ ರಾಷ್ಟ್ರೀಯ ಹೆದ್ದಾರಿಗಳಿಂದ ಪಟ್ಟಣ ಪ್ರವೇಶಿಸುವ ಭಾರಿ ವಾಹನಗಳು ಇನ್ಮುಂದೆ ಪಟ್ಟಣದ ಒಳಗಿನ ಮುಖ್ಯರಸ್ತೆಗೆ ಪ್ರವೇಶಿಸದೆ, ಹೊರಭಾಗದಿಂದಲೇ ಸರಾಗವಾಗಿ ಸಾಗಬಹುದು.

ಬದಲಾಗಲಿದೆ ಆಲಮೇಲದ ಆರ್ಥಿಕ ಚಿತ್ರಣ :

ನೂತನ ತಾಲೂಕಾದ ನಂತರ ಆಲಮೇಲದಲ್ಲಿ ವಾಣಿಜ್ಯ ಚಟುವಟಿಕೆಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಿವೆ. ಈ ರಿಂಗ್ ರೋಡ್ ಯೋಜನೆಯಿಂದ ಪಟ್ಟಣದಲ್ಲಿ ರಿಯಲ್ ಎಸ್ಟೇಟ್, ಸ್ಥಳೀಯ ಉದ್ಯೋಗ ಮತ್ತು ವ್ಯಾಪಾರ-ವಹಿವಾಟಿಗೆ ಹೊಸ ಚೈತನ್ಯ ಸಿಗಲಿದೆ. ಪ್ರಭಾವ ವಲಯದ ವ್ಯಾಪ್ತಿಯಲ್ಲಿ ಹೊಸ ವಾಣಿಜ್ಯ ಸಂಕೀರ್ಣಗಳು, ದಾಸ್ತಾನು ಮಳಿಗೆಗಳು ಮತ್ತು ವಸತಿ ಬಡಾವಣೆಗಳು ತಲೆಎತ್ತಲಿವೆ.

ವಿಜಯಪುರ ಜಿಲ್ಲೆಯ 9 ಪಟ್ಟಣಗಳಿಗೆ ಭಾಗ್ಯ :

ಜಿಲ್ಲೆಯ ಆಲಮೇಲ ಸೇರಿದಂತೆ ಬಬಲೇಶ್ವರ, ಚಡಚಣ, ದೇವರ ಹಿಪ್ಪರಗಿ, ಕೊಲ್ಹಾರ, ಮನಗೂಳಿ, ನಾಲತವಾಡ, ನಿಡಗುಂದಿ ಹಾಗೂ ತಿಕೋಟಾ ಪಟ್ಟಣಗಳು ಈ ಗ್ರಿಡ್ ಪ್ಲಾನ್ ಅಡಿಯಲ್ಲಿ ಆಯ್ಕೆಯಾಗಿವೆ.

ಸ್ಥಳೀಯ ಯೋಜನಾ ಪ್ರದೇಶದ ಮಹಾಯೋಜನೆ (ಮಾಸ್ಟರ್ ಪ್ಲಾನ್) ಆಧಾರದಲ್ಲಿ ಮೊದಲ ಹಂತದ ಕಾಮಗಾರಿಗಳು ಪ್ರಾರಂಭವಾಗಲಿದ್ದು, ಶೀಘ್ರದಲ್ಲೇ ಭೂಸ್ವಾಧೀನ ಪ್ರಕ್ರಿಯೆ ಮತ್ತು ಯೋಜನಾ ವೆಚ್ಚದ ವಿವರಗಳನ್ನು ಸರಕಾರ ಪ್ರಕಟಿಸಲಿದೆ. ಈ ಯೋಜನೆಯು ಆಲಮೇಲ ಪಟ್ಟಣದ ಅಭಿವೃದ್ಧಿಗೆ ಹೊಸ ದಿಕ್ಸೂಚಿಯಾಗಲಿದೆ ಎಂದು ಸ್ಥಳೀಯರು ಸಂತಸ ವ್ಯಕ್ತಪಡಿಸಿದ್ದಾರೆ.