ರಾಜ್ಯದ 2,529 ಹಳ್ಳಿಗಳಿಗೆ ಸಾರಿಗೆ 'ಶಕ್ತಿ'ಯೇ ಇಲ್ಲ

ಬೆಂಗಳೂರು, ಜೂ.20: ‘ಹಳ್ಳಿಗಳ ಅಭಿವೃದ್ಧಿಯಲ್ಲಿ ದೇಶದ ಅಭಿವೃದ್ಧಿ ಅಡಗಿದೆ’ ಎಂಬ ಗಾಂಧೀಜಿಯವರ ನಂಬಿಕೆ ಇಂದಿಗೂ ಕನಸಾಗಿಯೇ ಉಳಿದಿರುವುದು ವಿಪರ್ಯಾಸ. ಅಭಿವೃದ್ಧಿಯ ಪ್ರಮುಖ ಭಾಗವಾಗಿರುವ ಸುರಕ್ಷಿತ ರಸ್ತೆ ಮತ್ತು ಸಾರಿಗೆ ಸಂಪರ್ಕವನ್ನು ಹಳ್ಳಿಗಳಿಗೆ ಪರಿಪೂರ್ಣ ಮಟ್ಟದಲ್ಲಿ ಕಲ್ಪಿಸುವಲ್ಲಿ ಈವರೆಗಿನ ಎಲ್ಲ ಸರಕಾರಗಳು ವಿಫಲಗೊಂಡಿವೆ ಎಂಬುದು ಗ್ರಾಮೀಣ ಭಾಗದ ಜನರ ಒಕ್ಕೊರಲಿನ ಮಾತಾಗಿದೆ.

ಮೂಲಗಳ ಪ್ರಕಾರ, 2025ರ ಮೇ ತಿಂಗಳ ಅಂತ್ಯಕ್ಕೆ ಕರ್ನಾಟಕದಲ್ಲಿ 2,529 ಹಳ್ಳಿಗಳಿಗೆ ಬಸ್ ಸೌಲಭ್ಯವಿಲ್ಲ ಎಂದು ಅಂಕಿ-ಅಂಶಗಳು ಹೇಳುತ್ತಿದೆ. 17 ಜಿಲ್ಲೆಗಳಿಗೆ ಸೇವೆ ಸಲ್ಲಿಸುವ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮದಲ್ಲಿ(ಕೆಎಸ್ಸಾರ್ಟಿಸಿ) 2,364 ಹಳ್ಳಿಗಳಿಗೆ ಸರಕಾರಿ ಬಸ್ ಸೌಲಭ್ಯವಿಲ್ಲ. ಈ ಹಳ್ಳಿಗಳಲ್ಲಿ 1,322 ಹಳ್ಳಿಗಳು ಖಾಸಗಿ ಬಸ್ ಸೇವೆಗಳನ್ನು ಹೊಂದಿದ್ದರೆ, 306 ಹಳ್ಳಿಗಳಿಗೆ ವಾಹನ ಸಂಚಾರಕ್ಕೆ ಯೋಗ್ಯವಾದ ರಸ್ತೆಗಳ ಕೊರತೆಯಿಂದಾಗಿ ಯಾವುದೇ ಬಸ್ ಸಂಪರ್ಕವಿಲ್ಲ. ಉಳಿದ 819 ಹಳ್ಳಿಗಳು ವಿವಿಧ ಕಾರಣಗಳಿಂದ ಸಂಪರ್ಕ ಜಾಲದಿಂದ ಹೊರಗುಳಿದಿವೆ ಎಂದು ವರದಿಯಾಗಿದೆ.

ಕಿತ್ತೂರು ಕರ್ನಾಟಕ ಭಾಗದ ಆರು ಜಿಲ್ಲೆಗಳಿಗೆ ಸಾರಿಗೆ ಸೇವೆಯನ್ನು ಒದಗಿಸುವ ವಾಯುವ್ಯ ಕರ್ನಾಟಕ ರಸ್ತೆ ಸಾರಿಗೆ ನಿಗಮದಲ್ಲಿ 45 ಹಳ್ಳಿಗಳಿಗೆ ಬಸ್ ಸೇವೆ ಇಲ್ಲವಾಗಿದೆ. ಉಳಿದ ಕಲ್ಯಾಣ ಕರ್ನಾಟಕ ರಸ್ತೆ ಸಾರಿಗೆ ನಿಗಮ ವ್ಯಾಪ್ತಿಯಲ್ಲಿ ಬರುವ 40 ಹಳ್ಳಿಗಳಿಗೆ ಬಸ್ ಸಂಪರ್ಕವಿಲ್ಲ ಎಂದು ವರದಿಗಳು ತಿಳಿಸಿವೆ.

ಕರ್ನಾಟಕದ ಜನಸಂಖ್ಯೆಯ ಪ್ರಕಾರ ಶೇ.61.33ರಷ್ಟು ಜನರು ಹಳ್ಳಿಗಳಲ್ಲಿ ವಾಸಿಸುತ್ತಿದ್ದು, ಬಹುತೇಕ ಹಳ್ಳಿಗಳು ಇನ್ನೂ ಮೂಲಸೌಕರ್ಯಗಳ ಕೊರತೆಯಿಂದಾಗಿ ಬಳಲುತ್ತಿರುವುದು ವಿಪರ್ಯಾಸದ ಸಂಗತಿಯಾಗಿದೆ. ಮೂರು ಸಾರಿಗೆ ನಿಗಮಗಳ ವ್ಯಾಪ್ತಿಯಲ್ಲಿ ಬರುವ ಬಸ್ ಸಂಪರ್ಕವಿಲ್ಲದ ತಾಂಡಾಗಳು ಮತ್ತು ಹಳ್ಳಿಗಳಲ್ಲಿ ಸರಿಯಾದ ರಸ್ತೆಗಳೇ ಇಲ್ಲದಿರುವುದು ಸಮಸ್ಯೆಗೆ ಪ್ರಮುಖ ಕಾರಣವಾಗಿದೆ.

ಇನ್ನು, ವರದಿಗಳ ಪ್ರಕಾರವಾಗಿ ಚಿತ್ರದುರ್ಗ ಜಿಲ್ಲೆಯು ಸುಮಾರು 530 ಬಸ್ ಸಂಪರ್ಕವಿಲ್ಲದ ಹಳ್ಳಿಗಳೊಂದಿಗೆ ಮೊದಲನೇ ಸ್ಥಾನದಲ್ಲಿದ್ದರೆ, ತುಮಕೂರು 503 ಹಳ್ಳಿಗಳೊಂದಿಗೆ ಎರಡನೇ ಸ್ಥಾನದಲ್ಲಿದೆ. ನಂತರದಲ್ಲಿ ಶಿವಮೊಗ್ಗ ಜಿಲ್ಲೆಯಲ್ಲಿ 421 ಹಳ್ಳಿಗಳು, ಚಿಕ್ಕಮಗಳೂರು ಜಿಲ್ಲೆಯಲ್ಲಿ 390 ಹಳ್ಳಿಗಳು, ದಾವಣಗೆರೆ ಜಿಲ್ಲೆಯಲ್ಲಿ 196 ಹಳ್ಳಿಗಳಿಗೆ ಸರಕಾರಿ ಬಸ್ ಸಂಪರ್ಕವಿಲ್ಲ ಎಂದು ಅಂದಾಜಿಸಲಾಗಿದೆ.

ಇನ್ನು, ರಾಜ್ಯ ಸರಕಾರ ಜಾರಿಗೆ ತಂದ ‘ಶಕ್ತಿ’ ಯೋಜನೆಯಡಿ ಮಹಿಳೆಯರಿಗೆ ಉಚಿತ ಬಸ್ ಪ್ರಯಾಣದ ಸೌಲಭ್ಯಕ್ಕೆ ಎರಡು ವರ್ಷಗಳು ತುಂಬಿವೆ. ಆದರೆ, ಇದು ರಾಜ್ಯದ ಹಳ್ಳಿಗಳಲ್ಲಿ ಪೂರ್ಣಮಟ್ಟದಲ್ಲಿ ಮಹಿಳೆಯರಿಗೆ ಪ್ರಯೋಜನವಾಗುತ್ತಿಲ್ಲ. ಆಧುನಿಕ ಕಾಲದಲ್ಲೂ ಹಳ್ಳಿಗಳ ರಸ್ತೆಗಳು ಸರಕಾರಿ ಬಸ್ ಮುಖವನ್ನೇ ನೋಡಿಲ್ಲ. ಇನ್ನೂ ಎಷ್ಟೋ ಹಳ್ಳಿಗಳಲ್ಲಿ ಬಸ್ ನಿಲ್ದಾಣಗಳೇ ಇಲ್ಲ. ಮಳೆಗಾಲದಲ್ಲಿ ಹಳ್ಳಿಗಳಲ್ಲಿ ಜನರು ನಿತ್ಯ ಪರದಾಡುವ ಸ್ಥಿತಿ ಇದೆ. ಶಾಲಾ, ಕಾಲೇಜು ಮತ್ತು ಕಚೇರಿಗಳಿಗೆ ತೆರಳುವವರು ಅನಿವಾರ್ಯವಾಗಿ ಖಾಸಗಿ ಬಸ್ ಅಥವಾ ಸ್ವಂತ ವಾಹನವನ್ನೇ ಅವಲಂಬಿಸುವ ಅನಿವಾರ್ಯತೆ ಇದೆ ಎನ್ನುತ್ತಾರೆ ಸಾಮಾಜಿಕ ಹೋರಾಟಗಾರ ಚಂದ್ರಶೇಖರ್.

5,800 ಹೊಸ ಬಸ್‌ಗಳ ಸೇರ್ಪಡೆಗೆ ಅನುಮೋದನೆ

ನಮ್ಮ ಸರಕಾರ ಬಂದ ನಂತರ ಈಗಾಗಲೇ ಮೂರು ನಿಗಮಗಳ ಅಡಿಯಲ್ಲಿ 5,009 ಬಸ್‌ಗಳು ಸೇರ್ಪಡೆಗೊಂಡಿವೆ. ಮುಂದುವರಿದು 5,800 ಹೊಸ ಬಸ್‌ಗಳ ಸೇರ್ಪಡೆಗೆ ಅನುಮೋದನೆ ದೊರಕಿದೆ. ಅಲ್ಲದೆ, ನಿಗಮಗಳಲ್ಲಿ 10,000 ಹುದ್ದೆಗಳ ನೇಮಕಾತಿಗೆ ಚಾಲನೆ ನೀಡಿದ್ದು, ಅದರಲ್ಲಿ 4,700 ಹೊಸ ನೇಮಕಾತಿ ಮತ್ತು 1000 ಅನುಕಂಪದ ನೇಮಕಾತಿ ಪೂರ್ಣಗೊಂಡಿದೆ. ರಾಜ್ಯದ ಮೂಲೆ ಮೂಲೆಗೂ ಬಸ್ ಸಂಪರ್ಕ ಕೊಡುವುದು ನಮ್ಮ ಉದ್ದೇಶ. ಕೆಲವೇ ಹಳ್ಳಿಗಳಿಗೆ ಮಾತ್ರ ಸಂಚಾರ ಕೊರತೆಯಿದೆ ಅದನ್ನು ಪೂರೈಸುತ್ತೇವೆ ಎಂದು ಕೆಎಸ್ಸಾರ್ಟಿಸಿ ನಿಗಮದ ಅಧಿಕಾರಿಗಳು ಹೇಳುತ್ತಾರೆ.

ಹಿರಿಯ ಅಧಿಕಾರಿಯ ಊರಿಗೆ ಬಸ್ ಇಲ್ಲ

ಬಸ್ ಸಮಸ್ಯೆಯ ಬಗ್ಗೆ ಸಾರಿಗೆ ನಿಗಮಗಳಲ್ಲಿರುವ ಅಧಿಕಾರಿಯನ್ನು ಪ್ರಶ್ನಿಸಿದರೆ, ‘ನನ್ನ ಹುಟ್ಟೂರುಗಳಲ್ಲೇ ಇಂದಿಗೂ ಬಸ್ ಸೌಲಭ್ಯವಿಲ್ಲ’ ಎನ್ನುತ್ತಾ ಅಸಹಾಯಕ ನಗೆ ಬೀರುತ್ತಾರೆ ಹೆಸರು ಹೇಳಲಿಚ್ಛಿಸದ ಹಿರಿಯ ಅಧಿಕಾರಿ.

ರಾಜ್ಯದಲ್ಲಿ ಶೇ.8ರಷ್ಟು ಹಳ್ಳಿಗಳಿಗೆ ಬಸ್ ಸಂಪರ್ಕವಿಲ್ಲ. ಸಂಪೂರ್ಣವಾಗಿ ಸಂಪರ್ಕ ನೀಡಲು ರಸ್ತೆ ಸಮಸ್ಯೆ, ಬಸ್‌ಗೆ ತಿರುವುಗಳ ತೊಂದರೆ, ಕಡಿಮೆ ಜನರ ಪ್ರಯಾಣ ಹೀಗೆ ನಾನಾ ಸಮಸ್ಯೆಗಳಿವೆ. ಅವುಗಳನ್ನು ಒಂದೊಂದಾಗಿ ಬಗೆಹರಿಸಿ ಎಲ್ಲ ಹಳ್ಳಿಗಳಿಗೂ ಸರಕಾರಿ ಬಸ್ ಸೇವೆ ತಲುಪಿಸುವುದು ನಮ್ಮ ಕರ್ತವ್ಯ. ಸದ್ಯ ಮುಂದಿನ ಜುಲೈ ತಿಂಗಳಲ್ಲಿ ಹೊಸದಾಗಿ 100 ಹೊಸ ಬಸ್‌ಗಳನ್ನು ಖರೀದಿಸಿ ಹಳ್ಳಿಗಳ ಸಂಚಾರಕ್ಕೆ ಚಾಲನೆ ಕೊಡಲು ಸಿದ್ಧತೆ ನಡೆದಿದೆ.

-ಅಕ್ರಂ ಪಾಷಾ, ಕೆಎಸ್ಸಾರ್ಟಿಸಿ ವ್ಯವಸ್ಥಾಪಕ ನಿರ್ದೇಶಕ

ಜನರಿಗಾಗುತ್ತಿರುವ ತೊಂದರೆ

►ಕೆಲವೆಡೆ ಖಾಸಗಿ ಬಸ್‌ಗಳ ಮೇಲೆಯೇ ಅವಲಂಬನೆ

►ಶಾಲಾ-ಕಾಲೇಜು ವಿದ್ಯಾರ್ಥಿಗಳು ನಡೆದುಕೊಂಡೇ ಹೋಗುವ ದುಃಸ್ಥಿತಿ

►ಸ್ವಂತ ವಾಹನಗಳ ಮೇಲೆ ಅತೀ ಅವಲಂಬನೆಯಿಂದಾಗಿ ವಾಹನಗಳ ಸಂಖ್ಯೆ ಹೆಚ್ಚಳ

►ರೈತರು, ಮಹಿಳೆಯರು, ನಾಗರಿಕರು ನಗರಕ್ಕೆ ಬರಲು ಇಡೀ ದಿನವ್ಯಯ

►ಜನರ ವ್ಯಾಪಾರಕ್ಕೆ ಹೊಡೆತ

►ಹಬ್ಬ-ಹರಿದಿನಗಳಲ್ಲಿ ಆಟೊ, ಕಾರುಗಳಿಗೆ ದುಪ್ಪಟ್ಟು ದರ