ಈ ಬಾರಿ ಮೂರು ಜಿಲ್ಲೆಗಳೂ ಬರ ಪೀಡಿತವೇ?

ಉಡುಪಿ : ರಾಜ್ಯದ ಕರಾವಳಿ ಜಿಲ್ಲೆಗಳು ಮಳೆ-ಬೆಳೆಯ ವಿಷಯದಲ್ಲಿ ಸಮೃದ್ಧ ಭೂಪ್ರದೇಶವೆಂಬ ನಾಡಿನ ಸಾಮಾನ್ಯ ನಂಬಿಕೆ ಈ ಬಾರಿ ಹುಸಿಯಾಗುತ್ತಿದೆ. ರಾಜ್ಯದಲ್ಲಿ ಈ ಬಾರಿ ಬರ ಪರಿಸ್ಥಿತಿ ಅತ್ಯಂತ ಗಂಭೀರವಾಗಿದ್ದು, ಈವರೆಗೆ ರಾಜ್ಯದ 177 ತಾಲೂಕುಗಳನ್ನು ಬರ ಪೀಡಿತ ತಾಲೂಕು ಪಟ್ಟಿಗೆ ಸೇರಿಸಲಾಗಿದೆ. ಈಗಿನ ಪರಿಸ್ಥಿತಿ ಮುಂದುವರಿದರೆ ಕರಾವಳಿ ಜಿಲ್ಲೆಗಳ ಬಹುತೇಕ ತಾಲೂಕುಗಳನ್ನು ಸಹ ಬರ ಪೀಡಿತ ತಾಲೂಕುಗಳ ಪಟ್ಟಿಗೆ ಸೇರಿಸುವ ಪರಿಸ್ಥಿತಿ ಎದುರಾಗುವ ಸಾಧ್ಯತೆ ಕಂಡುಬರುತ್ತಿದೆ.

2026ನೇ ಸಾಲಿನ ಮಳೆಗಾಲದ ನಾಲ್ಕು ತಿಂಗಳು ಇದೀಗ ಮುಗಿಯುವ ಹಂತದಲ್ಲಿದ್ದು, ಬೆಳಗಾವಿ ಜಿಲ್ಲೆಯೊಂದನ್ನು ಹೊರತು ಪಡಿಸಿದರೆ ರಾಜ್ಯದ ಉಳಿದೆಲ್ಲಾ 30 ಜಿಲ್ಲೆಗಳಲ್ಲಿ ಮಳೆಯ ತೀವ್ರ ಕೊರತೆ ಕಂಡುಬಂದಿದೆ. ಕೊರತೆಯ ಪ್ರಮಾಣ ಶೇ.22ರಿಂದ ಶೇ.61ರಷ್ಟಿದೆ. ಇದು ಅತ್ಯಂತ ಗಂಭೀರ ಸ್ಥಿತಿಗೆ ಕಾರಣವಾಗಿದೆ. ಬೆಳಗಾವಿ ಜಿಲ್ಲೆಯಲ್ಲಿ ಮಳೆ ಕೊರತೆ ಶೇ.17ಕ್ಕೆ ಸೀಮಿತಗೊಂಡು ಅದನ್ನು ಸಾಮಾನ್ಯ ಎಂದು ಪರಿಗಣಿಸಲಾಗಿದೆ.

ಉಡುಪಿ, ದಕ್ಷಿಣ ಕನ್ನಡ ಹಾಗೂ ಉತ್ತರ ಕನ್ನಡ ಜಿಲ್ಲೆಗಳನ್ನೊಳಗೊಂಡ ಕರಾವಳಿ ಜಿಲ್ಲೆಗಳಲ್ಲಿ ಮಲೆನಾಡು ಭಾಗದಂತೆ ಯಾವತ್ತೂ ಸಮೃದ್ಧ ಮಳೆಯಾಗುತ್ತಿತ್ತು.ಆದರೆ ಸುಮಾರು ಐದು ವರ್ಷಗಳಿಂದ ಪರಿಸ್ಥಿತಿ ಸಂಪೂರ್ಣ ಬದಲಾಗುತ್ತಿದೆ. 3-4 ವರ್ಷಗಳ ಹಿಂದೆ ಉಡುಪಿ ಜಿಲ್ಲೆಯಲ್ಲಿ ಅತ್ಯಧಿಕ ಮಳೆ ಬೀಳುವ ತಾಲೂಕುಗಳಾದ ಹೆಬ್ರಿ, ಕಾರ್ಕಳ ಹಾಗೂ ಬ್ರಹ್ಮಾವರವನ್ನು ರಾಜ್ಯದ ಉಳಿದ ತಾಲೂಕುಗಳೊಂದಿಗೆ ಮೊದಲ ಬಾರಿ ಬರ ಪೀಡಿತ ತಾಲೂಕುಗಳಾಗಿ ಹೆಸರಿಸಲಾಗಿತ್ತು.

ಆದರೆ ಈ ಬಾರಿ ಪರಿಸ್ಥಿತಿ ಇನ್ನಷ್ಟು ಭೀಕರವಾಗಿದೆ. ಮಳೆಗಾಲದ ನಾಲ್ಕು ತಿಂಗಳು -ಜೂನ್ 1ರಿಂದ ಸೆಪ್ಟಂಬರ್ 21ರವರೆಗೆ- ಉಡುಪಿ ಜಿಲ್ಲೆಯಲ್ಲಿ ಶೇ.33ರಷ್ಟು ಮಳೆಯ ಕೊರತೆ ಕಾಣಿಸಿಕೊಂಡರೆ, ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಶೇ.29 ಹಾಗೂ ಉತ್ತರ ಕನ್ನಡ ಜಿಲ್ಲೆಯಲ್ಲಿ ಶೇ.25ರಷ್ಟು ಮಳೆ ಕೊರತೆ ಕಂಡುಬಂದಿದೆ.

ರಾಜ್ಯದಲ್ಲಿ ಬರ ಪರಿಸ್ಥಿತಿಯ ಕುರಿತಂತೆ ಇಂದು ವಿಧಾನಸಭೆಯಲ್ಲಿ ಮಾತನಾಡಿದ ಉಪಮುಖ್ಯಮಂತ್ರಿ ಡಾ.ಜಿ.ಪರಮೇಶ್ವರ್, ಫೆಸಿಪಿಕ್ ಸಾಗರದ ಮೇಲ್ಮೈ ನೀರಿನ ತಾಪಮಾನ ಹೆಚ್ಚಳದಿಂದ ಉಂಟಾಗುವ ಎಲ್‌ನಿನೊ ಪ್ರಕ್ರಿಯೆಯ ಕಾರಣದಿಂದ ಈ ಬಾರಿ ಮಳೆಯಲ್ಲಿ ತೀವ್ರ ಕೊರತೆಯುಂಟಾಗಿದ್ದು, ರಾಜ್ಯದಲ್ಲಿ ವಾಡಿಕೆಯ 852ಮಿ.ಮೀ. ಮಳೆಯಾಗಬೇಕಿದ್ದಲ್ಲಿ 642 ಮಿ.ಮೀ. ಮಾತ್ರ ಮಳೆಯಾಗಿ ಶೇ.36ರಷ್ಟು ಕೊರತೆ ಕಂಡುಬಂದಿದೆ ಎಂದು ತಿಳಿಸಿದ್ದಾರೆ.

ಡಾ.ಪರಮೇಶ್ವರ್ ನೀಡಿದ ಮಾಹಿತಿಯಂತೆ ಈ ಬಾರಿ ರಾಜ್ಯದ ಕರಾವಳಿ ಭಾಗದಲ್ಲಿ ಶೇ.28ರಷ್ಟು ಮಳೆ ಕೊರತೆಯಾಗಿದ್ದರೆ, ದಕ್ಷಿಣ ಒಳನಾಡಿನಲ್ಲಿ ಶೇ.46, ಉತ್ತರ ಒಳನಾಡಿನಲ್ಲಿ ಶೇ.44 ಹಾಗೂ ಮಲೆನಾಡಿನ ಪ್ರದೇಶಗಳಲ್ಲಿ ಶೇ.38ರಷ್ಟು ಮಳೆ ಕೊರತೆ ದಾಖಲಾಗಿದೆ.

ಕರಾವಳಿಯಲ್ಲಿ ನಿರಂತರ ಕೊರತೆ: ಎಲ್‌ನಿನೊ ಪರಿಣಾಮದಿಂದ ಈ ಬಾರಿ ದೇಶದಲ್ಲಿ ಮಳೆಯ ಕೊರತೆ ಉಂಟಾಗಲಿದೆ ಎಂದು ವಿಜ್ಞಾನಿಗಳು ಹಾಗೂ ಹವಾಮಾನ ತಜ್ಞರು ಈ ಮೊದಲೇ ಎಚ್ಚರಿಸಿದ್ದರೂ, ಇದೀಗ ಅದರ ನಿಜವಾದ ಪರಿಣಾಮ ಊಹಾತೀತವಾಗಿರುವ ಸಾಧ್ಯತೆ ದಟ್ಟವಾಗಿ ಕಾಣಿಸುತ್ತಿದೆ. ಈ ಬಾರಿ ನವೆಂಬರ್-ಡಿಸೆಂಬರ್ ತಿಂಗಳಿನಲ್ಲೇ ಕರಾವಳಿ ಭಾಗದಲ್ಲಿ ಕುಡಿಯುವ ನೀರಿಗೆ ಕೊರತೆ ಕಂಡುಬಂದರೂ ಆಶ್ಚರ್ಯ ಪಡಬೇಕಿಲ್ಲ.

ಈ ಬಾರಿ ಮಳೆಗಾಲದ ನಾಲ್ಕು ತಿಂಗಳಲ್ಲಿ ಕರಾವಳಿಯ ಮೂರು ಜಿಲ್ಲೆಗಳಲ್ಲಿ ಎಲ್ಲೂ ಅಧಿಕ ಮಳೆ ದಾಖಲಾಗಿಲ್ಲ. ಆಗಸ್ಟ್ ತಿಂಗಳಿನಲ್ಲಿ ದಕ್ಷಿಣ ಕನ್ನಡದಲ್ಲಿ ಮಾತ್ರ ನಗಣ್ಯವೆನ್ನಬಹುದಾದ ಶೇ.1ರಷ್ಟು ಅಧಿಕ ಮಳೆ ದಾಖಲಾಗಿದೆ. ಉಳಿದಂತೆ ನಾಲ್ಕೂ ತಿಂಗಳಲ್ಲಿ ಕಂಡಿದ್ದು ಕೊರತೆಯನ್ನು ಮಾತ್ರ. ಇದರ ನೇರ ಪರಿಣಾಮ ಈಗ ಜಿಲ್ಲೆಯ ಭತ್ತದ ಬೆಳೆಯ ಮೇಲೆ ಉಂಟಾಗಿರುವುದು ಎಲ್ಲಾ ಕಡೆಗಳಲ್ಲೂ ಗೋಚರಿಸುತ್ತಿದೆ. ಫಲಬರುವ ಹೊತ್ತಿನಲ್ಲೇ ಭತ್ತದ ತೆನೆಗಳು ಬಿಸಿಲಿನ ಝಳಕ್ಕೆ ಒಣಗುತ್ತಿರುವುದು ರೈತರ ಹೊಟ್ಟೆಯ ಮೇಲೆ ಬರೆ ಎಳೆದಂತಿದೆ.

ಉಡುಪಿ: ಮಳೆ ಕೊರತೆಯ ಅತಿ ಹೆಚ್ಚಿನ ಪರಿಣಾಮ ಉಂಟಾಗಿರುವುದು ಈ ಬಾರಿ ಉಡುಪಿ ಜಿಲ್ಲೆಯಲ್ಲಿ. ಜೂನ್ ತಿಂಗಳಲ್ಲಿ ಇಲ್ಲಿ ಶೇ.57ರಷ್ಟು ಮಳೆ ಕೊರತೆ (ವಾಡಿಕೆ ಮಳೆ 1,106ಮಿ.ಮೀ.- ಬಿದ್ದ ಮಳೆ 558ಮಿ.ಮೀ.) ಯಾದರೆ, ಜುಲೈ ತಿಂಗಳಲ್ಲಿ ಶೇ.27 ಕೊರತೆ (1,448-1,058) ಉಂಟಾಗಿತ್ತು. ಆಗಸ್ಟ್ ತಿಂಗಳಲ್ಲಿ ಶೇ.10ರಷ್ಟು ಮಳೆ ಕೊರತೆ (1,064-953) ಕಂಡುಬಂದಿದ್ದರೆ, ಪ್ರಸ್ತುತ ಸೆಪ್ಟಂಬರ್ ತಿಂಗಳಲ್ಲಿ ಕೊರತೆ (296-50) ಇಂದಿನವರೆಗೆ ಶೇ.83ಕ್ಕೇರಿದೆ. ಮಳೆಗಾಲದ ನಾಲ್ಕು ತಿಂಗಳನ್ನು ಲೆಕ್ಕಕ್ಕೆ ತೆಗೆದುಕೊಂಡಾಗ ಕೊರತೆ (ಇಂದಿನವರೆಗೆ) ಶೇ.33 (3,913-2,619) ಆಗಿದೆ ಎಂದು ರಾಜ್ಯದ ವಿಕೋಪ ನಿರ್ವಹಣಾ ಕೇಂದ್ರದ ಮಾಹಿತಿ ತಿಳಿಸಿದೆ.

ದಕ್ಷಿಣ ಕನ್ನಡ: ದಕ್ಷಿಣ ಕನ್ನಡದಲ್ಲಿ ಜೂನ್ ತಿಂಗಳಲ್ಲಿ ಶೇ.57ರಷ್ಟು ಮಳೆ ಕೊರತೆ (928-395) ಕಂಡುಬಂದರೆ, ಜುಲೈನಲ್ಲಿ ಇದು ಶೇ.18 (1,232- 1,005), ಆಗಸ್ಟ್‌ನಲ್ಲಿ +1 (892-900) ಹಾಗೂ ಸೆಪ್ಟಂಬರ್‌ನಲ್ಲಿ ಇಂದಿನವರೆಗೆ ಶೇ.85 ಕೊರತೆ (243-37)ಕಂಡುಬಂದಿದೆ. ಮಳೆಗಾಲದ ನಾಲ್ಕು ತಿಂಗಳಲ್ಲಿ ಒಟ್ಟಾರೆಯಾಗಿ ಜಿಲ್ಲೆಯಲ್ಲಿ ಶೇ.29ರಷ್ಟು ಮಳೆ ಕೊರತೆ (3,295-2,336) ದಾಖಲಾಗಿದೆ.

ಉತ್ತರ ಕನ್ನಡ: ಉತ್ತರ ಕನ್ನಡ ಜಿಲ್ಲೆಯಲ್ಲಿ ಜೂನ್ ತಿಂಗಳಲ್ಲಿ ಶೇ.44ರಷ್ಟು ಮಳೆ ಕೊರತೆ (691-384) ಕಂಡುಬಂದರೆ, ಜುಲೈನಲ್ಲಿ ಇದು ಶೇ.9 (993- 906), ಆಗಸ್ಟ್‌ನಲ್ಲಿ ಶೇ.15 (707-602) ಕೊರತೆ ಹಾಗೂ ಸೆಪ್ಟಂಬರ್‌ನಲ್ಲಿ ಇಂದಿನವರೆಗೆ ಶೇ.76 ಕೊರತೆ (186-45) ಕಂಡುಬಂದಿದೆ. ಜಿಲ್ಲೆಯಲ್ಲಿ ಮಳೆಗಾಲದ ನಾಲ್ಕು ತಿಂಗಳಲ್ಲಿ ಒಟ್ಟಾರೆಯಾಗಿ ಶೇ.25ರಷ್ಟು ಮಳೆ ಕೊರತೆ (2,578-1,936) ದಾಖಲಾಗಿದೆ.

ಮಳೆ ಕೊರತೆಯ ಮೊದಲ ಪರಿಣಾಮ ಕಾಣಿಸಿಕೊಳ್ಳುವುದು ಇದೀಗ ಬೆಳೆದು ನಿಂತ ಭತ್ತದ ಬೆಳೆಯಲ್ಲಾದರೆ, ನಂತರ ಇಡೀ ಜಿಲ್ಲೆಯನ್ನು ಭೀಕರವಾಗಿ ಕಾಡುವುದು ಕುಡಿಯುವ ನೀರಿನ ಕೊರತೆ. ಕರಾವಳಿಯನ್ನೂ ಬರ ಪೀಡಿತ ಜಿಲ್ಲೆಯಾಗಿ ಘೋಷಿಸಿದರೆ ಇದಕ್ಕಾಗಿ ವಿಶೇಷ ಅನುದಾನ ದೊರೆತು, ಈಗಿನಿಂದಲೇ ಕುಡಿಯುವ ನೀರಿಗೆ ಕೊರತೆಯನ್ನು ತಪ್ಪಿಸಲು ಸೂಕ್ತ ಮುಂಜಾಗ್ರತೆಯನ್ನು ಕೈಗೊಳ್ಳಲು ಸಾಧ್ಯವಾಗಬಹುದು.