ರಾಜ, ಮಹಾರಾಜರ ಕಾಲದ ನಾಣ್ಯಗಳ ಅಪರೂಪದ ಸಂಗ್ರಹ

ಕನಕಗಿರಿ: ಗೂಗಲ್ ಪೇ, ಫೋನ್ ಪೇ ಸೇರಿದಂತೆ ಡಿಜಿಟಲ್ ಪಾವತಿ ವ್ಯವಸ್ಥೆಗಳು ಜನಜೀವನದ ಭಾಗವಾಗಿರುವ ಇಂದಿನ ಕಾಲದಲ್ಲಿ ಹಳೆಯ ನಾಣ್ಯಗಳ ಸಂಗ್ರಹದ ಮೂಲಕ ಇತಿಹಾಸದ ನೆನಪುಗಳನ್ನು ಜೀವಂತವಾಗಿರಿಸಿರುವ ಕನಕಗಿರಿಯ ತಾಜುದ್ದೀನ್ ಸಾಬ ವಟಪರ್ವಿ ಗಮನ ಸೆಳೆಯುತ್ತಿದ್ದಾರೆ.

ಪಟ್ಟಣದ 10ನೇ ವಾರ್ಡ್ ನಿವಾಸಿಯಾಗಿರುವ ತಾಜುದ್ದೀನ್ ಸಾಬ ಅವರ ಬಳಿ ಬ್ರಿಟಿಷರ ಆಡಳಿತದ ಕಾಲದ, ನಿಝಾಮರ ಕಾಲದ ಹಾಗೂ ರಾಜಮಹಾರಾಜರ ಕಾಲದಲ್ಲಿ ಚಲಾವಣೆಯಲ್ಲಿದ್ದ ಅಪರೂಪದ ನಾಣ್ಯಗಳಿವೆ. ಒಂದು ಕಾಲದಲ್ಲಿ ಜನರ ದೈನಂದಿನ ಬದುಕಿನ ಭಾಗವಾಗಿದ್ದ ಈ ನಾಣ್ಯಗಳು ಇಂದು ಇತಿಹಾಸದ ಸಾಕ್ಷಿಗಳಾಗಿ ಉಳಿದಿವೆ.

ಬೆಳ್ಳಿ ನಾಣ್ಯಗಳಿಂದ ವಿದೇಶಿ ಕರೆನ್ಸಿವರೆಗೆ :

ಹಿಂದೆ ಚಲಾವಣೆಯಲ್ಲಿದ್ದ ಬೆಳ್ಳಿ ನಾಣ್ಯಗಳು, ಒಂದು ಪೈಸೆ, ಎರಡಾಣೆ, ಕಾಲಾಣೆ ಸೇರಿದಂತೆ ವಿವಿಧ ಮೌಲ್ಯದ ಹಳೆಯ ನಾಣ್ಯಗಳನ್ನು ಅವರು ಸಂಗ್ರಹಿಸಿದ್ದಾರೆ. ಇದರೊಂದಿಗೆ ವಿವಿಧ ದೇಶಗಳ ನೋಟುಗಳು ಮತ್ತು ನಾಣ್ಯಗಳನ್ನೂ ಜೋಪಾನವಾಗಿ ಕಾಪಾಡಿಕೊಂಡಿದ್ದಾರೆ. ಡಾ. ಬಿ.ಆರ್. ಅಂಬೇಡ್ಕರ್, ಮಹಾತ್ಮ ಗಾಂಧಿ ಸೇರಿದಂತೆ ಮಹನೀಯರ ಸ್ಮರಣಾರ್ಥ ಸರಕಾರ ಹೊರಡಿಸಿರುವ ವಿಶೇಷ ನಾಣ್ಯಗಳೂ ಅವರ ಸಂಗ್ರಹದಲ್ಲಿವೆ.

ಇಂದಿನ ತಲೆಮಾರಿಗೆ ಒಂದು ಪೈಸೆ ಅಥವಾ ಎರಡಾಣೆಯ ನಾಣ್ಯಗಳು ಅಚ್ಚರಿ ಮೂಡಿಸಬಹುದು. ಆದರೆ ಹಿಂದಿನ ಕಾಲದಲ್ಲಿ ಇವು ಜನರ ಆರ್ಥಿಕ ಬದುಕಿನ ಭಾಗವಾಗಿದ್ದವು. ಅಂದಿನ ಖರೀದಿ ಸಾಮರ್ಥ್ಯ, ಹಣದ ಮೌಲ್ಯ ಹಾಗೂ ನಾಣ್ಯಗಳ ವಿನ್ಯಾಸದ ಬದಲಾವಣೆಗಳನ್ನು ಇಂತಹ ಸಂಗ್ರಹಗಳು ಪರಿಚಯಿಸುತ್ತವೆ.

ಹಳೆಯ ನಾಣ್ಯಗಳನ್ನು ಕೇವಲ ಹಣವೆಂದು ಪರಿಗಣಿಸದೆ, ಅವುಗಳನ್ನು ಒಂದು ಕಾಲಘಟ್ಟದ ನೆನಪುಗಳೆಂದು ಭಾವಿಸಿ ಸಂಗ್ರಹಿಸುತ್ತಿರುವುದಾಗಿ ತಾಜುದ್ದೀನ್ ಸಾಬ ಹೇಳುತ್ತಾರೆ. ಮಾರಾಟದ ಉದ್ದೇಶಕ್ಕಿಂತಲೂ ಮುಂದಿನ ಪೀಳಿಗೆಗೆ ನಾಣ್ಯಗಳ ಇತಿಹಾಸ ಮತ್ತು ಆರ್ಥಿಕತೆಯ ಬೆಳವಣಿಗೆಯನ್ನು ಪರಿಚಯಿಸುವುದು ಅವರ ಸಂಗ್ರಹದ ಹಿಂದಿನ ಆಶಯವಾಗಿದೆ.

ಇಂತಹ ಅಪರೂಪದ ಸಂಗ್ರಹಗಳಿಗೆ ತಾಲೂಕು ಆಡಳಿತ ಹಾಗೂ ಶಾಲಾ-ಕಾಲೇಜುಗಳು ಪ್ರದರ್ಶನದ ಅವಕಾಶ ಕಲ್ಪಿಸಿದರೆ ವಿದ್ಯಾರ್ಥಿಗಳಿಗೆ ಇತಿಹಾಸವನ್ನು ಪ್ರತ್ಯಕ್ಷವಾಗಿ ತಿಳಿದುಕೊಳ್ಳಲು ನೆರವಾಗಲಿದೆ. ಡಿಜಿಟಲ್ ಪಾವತಿಯ ಯುಗದಲ್ಲೂ ಹಳೆಯ ನಾಣ್ಯಗಳ ಮೂಲಕ ಗತಕಾಲದ ನೆನಪುಗಳನ್ನು ಉಳಿಸಿಕೊಂಡಿರುವ ತಾಜುದ್ದೀನ್ ಸಾಬ ಅವರ ಹವ್ಯಾಸ ಪ್ರಶಂಸನೀಯವಾಗಿದೆ.