ಹುಬ್ಬಳ್ಳಿಯಲ್ಲಿ ಹೆಚ್ಚುತ್ತಿರುವ ಕೊಲೆ ಪ್ರಕರಣಗಳಿಗೆ ಡ್ರಗ್ಸ್ ನಂಟು?

ಹುಬ್ಬಳ್ಳಿ: ಇತ್ತೀಚೆಗೆ ನಡೆದ ಸಾಲು-ಸಾಲು ಕೊಲೆ ಘಟನೆಗಳು ಧಾರವಾಡ ಜಿಲ್ಲೆಯ ಜನರ ನಿದ್ದೆಗೆಡಿಸಿದೆ. ಈ ವರ್ಷದ ಪ್ರಾರಂಭದಿಂದ ಇಲ್ಲಿಯವರೆಗೆ 14 ಕೊಲೆ ಪ್ರಕರಣಗಳು ನಡೆದಿರುವುದಾಗಿ ವರದಿಯಾಗಿದ್ದು, ಯುವಕರು ಮಾದಕ ವಸ್ತುಗಳ ಚಟಕ್ಕೆ ಬಿದ್ದಿರುವುದೇ ಇದಕ್ಕೆ ಪ್ರಮುಖ ಕಾರಣವಾಗಿವೆ ಎಂಬ ಮಾತುಗಳು ಸಾರ್ವಜನಿಕರಿಂದ ಕೇಳಿ ಬರುತ್ತಿವೆ.

ಹುಬ್ಬಳ್ಳಿ-ಧಾರವಾಡ ಅವಳಿನಗರದ ಅದರಲ್ಲೂ 'ಹೂ ಬಳ್ಳಿ' ಎಂದು ಕರೆಯುತ್ತಿದ್ದ ಹುಬ್ಬಳ್ಳಿ ನಗರದ ಮಾರುಕಟ್ಟೆಯಲ್ಲಿ ವಿವಿಧ ಮಾದರಿಯ ಮಾದಕ ವಸ್ತುಗಳು ಅತೀ ಕಡಿಮೆ ದರದಲ್ಲಿ ಯುವ ಸಮುದಾಯದ ಕೈಗೆ ಸರಾಗವಾಗಿ ದೊರೆಯುತ್ತಿದೆ ಎಂಬ ಆರೋಪಗಳು ಕೇಳಿ ಬರುತ್ತಿವೆ. ಎಪ್ರಿಲ್ 18ರಂದು ನಡೆದ ವಿದ್ಯಾರ್ಥಿನಿ ನೇಹಾ ಹಿರೇಮಠ ಮತ್ತು ಮೇ 15ರಂದು ನಡೆದ ಅಂಜಲಿ ಅಂಬಿಗೇರ ಅವರ ಭೀಕರ ಹತ್ಯೆ ಪ್ರಕರಣಗಳಿಗೆ ಕಾರಣ ಬೇರೆ ಬೇರೆ ಆಗಿದರೂ ಆರೋಪಿಗಳು ಮಾದಕ ವಸ್ತುಗಳ ಚಟಕ್ಕೆ ಬಿದ್ದಿರುವ ಅನುಮಾನವನ್ನೂ ಸಾರ್ವಜನಿಕರು ವ್ಯಕ್ತಪಡಿಸುತ್ತಿದ್ದಾರೆ.

ಧಾರವಾಡ ಜಿಲ್ಲೆಯಲ್ಲಿ ಹೆಚ್ಚುತ್ತಿರುವ ಮಾದಕ ವಸ್ತುಗಳ ಸೇವನೆಯಿಂದ ಯುವಕರು ಚಾಕು-ಚೂರಿಗಳನ್ನು ಬಳಸಿ ಕೊಲೆ ಮಾಡುವ ಹಂತಕ್ಕೆ ಬಂದಿದ್ದಾರೆ.

ಈ ಕಾರಣಕ್ಕಾಗಿ ರೌಡಿ ಶೀಟರ್‌ಗಳ ಪಟ್ಟಿ ದೊಡ್ಡದಾಗುತ್ತಾ ಸಾಗುತ್ತಿದೆ ಎಂದು ಸಾರ್ವಜನಿಕರು ಕಳವಳ ವ್ಯಕ್ತಪಡಿಸುತ್ತಿದ್ದಾರೆ. ನಗರಕ್ಕೆ ಮಾದಕ ವಸ್ತುಗಳನ್ನು ಪೂರೈಸುತ್ತಿರುವವರು ಯಾರು? ಎಲ್ಲಿಂದ ಬರುತ್ತಿದೆ? ಎಷ್ಟು ಡ್ರಗ್ ಪೆಡ್ಡರ್‌ಗಳು ಸಕ್ರಿಯರಾಗಿದ್ದಾರೆ? ಈ ಜಾಲ ಎಷ್ಟು ದೂರ ವ್ಯಾಪಿಸಿದೆ? ಇದರ ಹಿಂದಿರುವ ಕುಳಗಳು ಯಾರು?

ರಾಜಕಾರಣಿಗಳ ಸಹಕಾರವೂ ಉಂಟಾ? ಪೊಲೀಸ್ ಅಧಿಕಾರಿಗಳು ಯಾರಾದರೂ ಶಾಮೀಲಾಗಿದ್ದಾರಾ? ಮಾದಕ ವಸ್ತುಗಳು ಅವ್ಯಾಹತವಾಗಿ ಮಾರಾಟವಾಗುತ್ತಿರುವ ಬಗ್ಗೆ ಪೊಲೀಸರಿಗೆ ಸುಳಿವು ಏಕೆ ಸಿಗಲಿಲ್ಲ? ಎಂಬುದರ ಬಗ್ಗೆಯೂ ಸಂಪೂರ್ಣವಾಗಿ ತನಿಖೆ ನಡೆಯಬೇಕೆಂಬ ಒತ್ತಾಯಗಳು ಸಾರ್ವಜನಿಕರಿಂದ ಕೇಳಿ ಬರುತ್ತಿವೆ.

'ಕಾಲೇಜು ವಿದ್ಯಾರ್ಥಿಗಳು, ಯುವಕರೇ ಪ್ರಮುಖ ಗುರಿ'

ಗಾಂಜಾ ಅತ್ಯಂತ ಕಡಿಮೆ ಹುಬ್ಬಳ್ಳಿಯಲ್ಲಿ ಗಾಂಜಾ ಆತ ಂತ ಕಡಿಮೆ ಲಭಿಸುತ್ತಿದೆ. ಕಾಲೇಜು ವಿದ್ಯಾರ್ಥಿಗಳು ಹಾಗೂ ಯುವಕರೇ ಗಾಂಜಾ ಮಾರಾಟಗಾರರ ಪ್ರಮುಖ ಗುರಿಯಾಗಿದ್ದಾರೆ. ಬಹುಪಾಲು ಕಾಲೇಜುಗಳು ಇರುವ ರಸ್ತೆಗಳೇ ಡ್ರಗ್ಸ್‌ ದಂಧೆಕೋರರ ಅಡ್ಡೆಯಾಗಿದೆ. ಆದರೆ, ಚರಸ್, ಅಫೀಮು ಹಾಗೂ ಹೆರಾಯಿನ್ ಬೇರೆ ಬೇರೆ ರಾಜ್ಯಗಳಿಂದ ಧಾರವಾಡ ಜಿಲ್ಲೆಗೆ ಸರಬರಾಜಾಗುತ್ತಿದ್ದು, ಇದರ ಮೂಲವನ್ನು ಪತ್ತೆ ಹಚ್ಚಬೇಕಿದೆ ಎಂಬ ಒತ್ತಾಯಗಳು ಸಾರ್ವಜನಿಕರಿಂದ ಕೇಳಿ ಬರುತ್ತಿವೆ.

ಮಾದಕ ವಸ್ತುಗಳ ಚಟಕ್ಕೆ ಬಿದ್ದ ವ್ಯಕ್ತಿಗಳು ಕೊಲೆ

ಮತ್ತು ಸುಲಿಗೆಯಂತಹ ಹೇಯ ಕೃತ್ಯವನ್ನು ಸರಳವಾಗಿ ಮಾಡುತ್ತಾನೆ. ಡ್ರಗ್ಸ್ ಮನುಷ್ಯನ ವಿವೇಚನಾ ಶಕ್ತಿ ಕಳೆಯುವುದರ ಜೊತೆ ಸಾರ್ವಜನಿಕವಾಗಿ ನಾವು ಯಾವುದನ್ನು ಮಾಡಬೇಕು, ಯಾವುದನ್ನು ಮಾಡಬಾರದು ಎನ್ನುವ ವಿಚಾರವನ್ನು ಮೊದಲು ಕೊಲ್ಲುತ್ತದೆ. ಇನ್ನು ಕೆಲವರಲ್ಲಿ ಹುಟ್ಟುತ್ತಲೇ ಸಮಾಜ ವಿಧ್ವಂಸಕ ಗುಣಗಳು ಬೆಳೆದಿರುತ್ತವೆ. ಅಂತಹವರಿಗೆ ಇದು ಮತ್ತಷ್ಟು ಉತ್ತೇಜನ ನೀಡುತ್ತದೆ. ಮಜಾ ಮಾಡುತ್ತಾ ಆರಂಭಿಸುವ ಡ್ರಗ್ಸ್ ಚಟ ಕೊನೆಗೆ ಕೊಲೆ ಮಾಡುವ ಹಂತಕ್ಕೆ ಬರುತ್ತದೆ. ಇಂತಹ ವ್ಯಕ್ತಿಗಳನ್ನು ಮಾದಕ ವ್ಯಸನ ಪರಿಹಾರ ಕೇಂದ್ರಕ್ಕೆ ಕರೆದೊಯ್ದು ನುರಿತ ವೈದ್ಯರ ಸಲಹೆ ಪಡೆದು ಪರಿಹಾರ ಕಂಡುಕೊಂಡರೆ ವಿದ್ವಂಸಕ ಕೃತ್ಯದಲ್ಲಿ ಭಾಗಿಯಾಗುವುದನ್ನು ತಡೆಗಟ್ಟಬಹುದು.

- ಮಹೇಶ್ ದೇಸಾಯಿ, ಖ್ಯಾತ ಮನೋವೈದ್ಯ, ಹುಬ್ಬಳ್ಳಿ

ಹಿಂದೆ ಹುಬ್ಬಳ್ಳಿ-ಧಾರವಾಡ ಪೊಲೀಸ್ ಕಮಿಷನರ್‌ಗಳಾಗಿದ್ದ ಆರ್. ದಿಲೀಪ್ ಹಾಗೂ ಲಾಬುರಾಮ್ ಇದ್ದ ಅವಧಿಯಿಂದ ಇಲ್ಲಿಯವರೆಗೂ ಈ ದಂಧೆಗಳು ಸರಾಗವಾಗಿ ನಡೆಯುತ್ತಿದೆ. ಇದಕ್ಕೆ ಕಡಿವಾಣ ಹಾಕಿ ಕಠಿಣ ಶಿಕ್ಷೆ ನೀಡುವ ಕಾನೂನು ಜಾರಿಗೆ ಬರಬೇಕು. ಅವಳಿ ನಗರಕ್ಕೆ ಹುಕ್ಕಾ ಬಾರ್ ತೆರೆಯಲು ಪರವಾನಿಗೆ ನೀಡಲಾಗಿದೆ ಅನ್ನುವ ಮಾತುಗಳು ಕೇಳಿ ಬರುತ್ತಾ ಇದೆ . ಇದರ ಜೊತೆ ಅವಳಿ ನಗರದಲ್ಲಿ ಕ್ಯಾಸಿನೋ ಆರಂಭಿಸಲು ದೊಡ್ಡ ಕುಳಗಳು ಲಾಬಿ ನಡೆಸುತ್ತಿದೆ. ಇವುಗಳು ನಮ್ಮ ಸಂಸ್ಕೃತಿ ಅಲ್ಲ. ಇದರಿಂದ ಗಾಂಜಾ, ಚರಸ್, ಅಫೀಮು, ಹೆರಾಯಿನ್, ಎಂಡಿಎಂಎ, ಎಲ್‌ಎಸ್‌ಡಿ ಫ್ಲವರ್ ಜಿಲ್‌ನಂತಹ ಮಾದಕ ವಸ್ತುಗಳು ಯುವಕರ ಕೈಗೆ ಸಿಗುತ್ತವೆ. ಇದಕ್ಕೆ ಸರಕಾರ ಕಡಿವಾಣ ಹಾಕಬೇಕಿದೆ.

-ಗುರುನಾಥ್ ಉಳ್ಳಿಕಾಶಿ, ದಲಿತ ಮುಖಂಡ

ಅವಳಿ ನಗರದ ಪೊಲೀಸ್ ಅಧಿಕಾರಿಗಳು ಮಾದಕ ವಸ್ತು ಮಾರಾಟ ಮಾಡುವ ಸಣ್ಣ ಸಣ್ಣ ಗಿರಾಕಿಗಳನ್ನು ಹಿಡಿಯುತ್ತಿದ್ದಾರೆ. ಆದರೆ, ಇದರ ಹಿಂದಿರುವ ಜಾಲವನ್ನು ಹಿಡಿಯುವ ಮನೋಧೈರ್ಯ ಮಾಡದಿರುವುದು ದುರ್ದೈವದ ಸಂಗತಿಯಾಗಿದೆ. ದೊಡ್ಡ ತಿಮಿಂಗಿಲಗಳನ್ನು ಹಿಡಿದಾಗ ಮಾತ್ರ ಡ್ರಗ್ಸ್ ವಿಷ ವರ್ತುಲದಿಂದ ಯುವಕರನ್ನು ರಕ್ಷಿಸಲು ಸಾಧ್ಯವಾಗುತ್ತದೆ. ಭವಿಷ್ಯದ ಬಗ್ಗೆ ಕಿಂಚಿತ್ತೂ ಚಿಂತಿಸದೆ ಯುವ ಸಮುದಾಯ ಮಾದಕ ದ್ರವ್ಯಕ್ಕೆ ಸೋಲುತ್ತಿದೆ. ಇದೇ ರೀತಿ ಮುಂದುವರಿದರೆ ಅವಳಿ ನಗರ ಅಪರಾಧದ ಕೇಂದ್ರ ಸ್ಥಾನವಾಗುವುದರ ಜೊತೆಗೆ ‘ಛೋಟಾ ಬಾಂಬೆ’ ಎನ್ನುವ ಕುಖ್ಯಾತಿ ಪಡೆಯಲಿದೆ.

-ಲೊಚನೇಶ್ ಹೂಗಾರ, ಹಿರಿಯ ಪತ್ರಕರ್ತ