ಇಂಗ್ಲಿಷ್ ಮಾಧ್ಯಮದ ಮೌಲ್ಯಮಾಪನ: ಭಾಷಾ ಅಂಕಗಳಾಚೆಗೆ ನೋಡಬೇಕಿದೆ

ಸರಕಾರಿ ಶಾಲೆಗಳಲ್ಲಿ ಇಂಗ್ಲಿಷ್ ಮಾಧ್ಯಮದಲ್ಲಿ ಕಲಿಯುತ್ತಿರುವ ಆರನೇ/ಏಳನೇ ತರಗತಿಯ ವಿದ್ಯಾರ್ಥಿಗಳಿಗೆ ಸರಳ ಇಂಗ್ಲಿಷ್ ಪಠ್ಯವನ್ನು ಅರ್ಥಮಾಡಿಕೊಳ್ಳಲು, ಸ್ವತಂತ್ರವಾಗಿ ವಾಕ್ಯಗಳನ್ನು ರಚಿಸಲು ಹಾಗೂ ತಮ್ಮ ಆಲೋಚನೆಗಳನ್ನು ಇಂಗ್ಲಿಷ್‌ನಲ್ಲಿ ವ್ಯಕ್ತಪಡಿಸಲು ತೊಂದರೆಯಾಗುತ್ತಿದೆ ಎಂಬ ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಯನದ ವರದಿಗೆ (ವಾರ್ತಾಭಾರತಿ - 28.10.2026) ಒಂದು ಪ್ರತಿಕ್ರಿಯೆ. ಮಕ್ಕಳ ಭಾಷಾ ಕಲಿಕೆಯಲ್ಲಿನ ಇಂತಹ ಸಮಸ್ಯೆಗಳನ್ನು ನಿರ್ಲಕ್ಷಿಸಲು ಸಾಧ್ಯವಿಲ್ಲ. ಯಾವುದೇ ಶೈಕ್ಷಣಿಕ ಉಪಕ್ರಮದ ಯಶಸ್ಸನ್ನು ಅದರ ಕಲಿಕಾ ಫಲಿತಾಂಶಗಳ ಆಧಾರದ ಮೇಲೆ ಪರಿಶೀಲಿಸುವುದು ಅಗತ್ಯ.

ಆದರೆ, ಈ ಅಧ್ಯಯನದ ಆಧಾರದ ಮೇಲೆ ಇಂಗ್ಲಿಷ್ ಮಾಧ್ಯಮ ಶಿಕ್ಷಣವೇ ವಿಫಲವಾಗಿದೆ ಎಂಬ ತೀರ್ಮಾನಕ್ಕೆ ಬರುವುದು ಎಷ್ಟು ಸಮಂಜಸ? ಇಲ್ಲಿ ನಾವು ಒಂದು ಪ್ರಮುಖ ವ್ಯತ್ಯಾಸವನ್ನು ಗುರುತಿಸಬೇಕು: ಇಂಗ್ಲಿಷ್ ಮಾಧ್ಯಮ ಶಿಕ್ಷಣದ ಪರಿಣಾಮಕಾರಿತ್ವ ಮತ್ತು ಅದನ್ನು ತರಗತಿಗಳಲ್ಲಿ ಅನುಷ್ಠಾನಗೊಳಿಸುತ್ತಿರುವ ವಿಧಾನಗಳ ಪರಿಣಾಮಕಾರಿತ್ವ ಎರಡೂ ಒಂದೇ ಅಲ್ಲ.

ಈ ಚರ್ಚೆಯಲ್ಲಿ ಮೊದಲಿಗೆ ಒಂದು ಪ್ರಮುಖ ಸಂಗತಿಯನ್ನು ಸ್ಪಷ್ಟಪಡಿಸಬೇಕಿದೆ. ಕರ್ನಾಟಕ ಸರಕಾರವು ಸರಕಾರಿ ಶಾಲೆಗಳಲ್ಲಿ ಕನ್ನಡ ಮತ್ತು ಇಂಗ್ಲಿಷ್ ಎರಡೂ ಭಾಷೆಗಳನ್ನು ಬೋಧನಾ-ಕಲಿಕೆಯ ಮಾಧ್ಯಮಗಳಾಗಿ ಬಳಸುವ ದ್ವಿಭಾಷಾ ಶಿಕ್ಷಣವನ್ನು (ಇಂಗ್ಲಿಷ್ ಮಾಧ್ಯಮವಲ್ಲ) ಜಾರಿಗೆ ತಂದಿದೆ. ಇಲ್ಲಿ ಕನ್ನಡವನ್ನು ಪ್ರಥಮ ಭಾಷೆಯಾಗಿ ಕಲಿಸಲಾಗುತ್ತದೆ. ಗಣಿತ ಮತ್ತು ಪರಿಸರ ವಿಜ್ಞಾನ ವಿಷಯಗಳನ್ನು ಕನ್ನಡ ಮತ್ತು ಇಂಗ್ಲಿಷ್ ಎರಡೂ ಭಾಷೆಗಳಲ್ಲಿ ಬೋಧಿಸಲಾಗುತ್ತದೆ.

ಇಲ್ಲಿ ಕನ್ನಡವನ್ನು ಕಡೆಗಣಿಸಿ ಇಂಗ್ಲಿಷ್‌ನಲ್ಲಿ ಮಾತ್ರ ಕಲಿಸುವುದು ಉದ್ದೇಶವಲ್ಲ. ಮಕ್ಕಳಿಗೆ ಕನ್ನಡದ ಮೂಲಕ ವಿಷಯವನ್ನು ಅರ್ಥಮಾಡಿಕೊಳ್ಳಲು ಅವಕಾಶ ನೀಡುತ್ತಾ, ಇಂಗ್ಲಿಷ್ ಭಾಷೆಯಲ್ಲಿಯೂ ಅರ್ಥಪೂರ್ಣವಾಗಿ ಕಲಿಯಲು ಮತ್ತು ಸಂವಹನ ನಡೆಸಲು ನೆರವಾಗುವುದು ಈ ಉಪಕ್ರಮದ ಆಶಯವಾಗಿದೆ.

ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಯನದ ವ್ಯಾಪ್ತಿಯನ್ನೂ ಗಮನಿಸಬೇಕಾಗಿದೆ. ಕರ್ನಾಟಕದ ಒಟ್ಟು 35 ಜಿಲ್ಲೆಗಳ ಪೈಕಿ ಕೇವಲ ಒಂದು ಜಿಲ್ಲೆಯಲ್ಲಿ, ಕೇವಲ 20 ಶಾಲೆಗಳಲ್ಲಿ ಈ ಅಧ್ಯಯನ ನಡೆಸಲಾಗಿದೆ ಎಂಬ ಅಂಶವು ಅದರ ಫಲಿತಾಂಶಗಳನ್ನು ಇಡೀ ರಾಜ್ಯದ ದ್ವಿಭಾಷಾ ಶಿಕ್ಷಣದ ಸ್ಥಿತಿಗತಿಗಳಿಗೆ ಅನ್ವಯಿಸುವಾಗ ಎಚ್ಚರಿಕೆ ವಹಿಸುವ ಅಗತ್ಯವನ್ನು ಸೂಚಿಸುತ್ತದೆ.

ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಯನದ ಉದ್ದೇಶ ಇಂಗ್ಲಿಷ್/ ದ್ವಿಭಾಷಾ ಮಾಧ್ಯಮ ಶಿಕ್ಷಣದ ಪರಿಣಾಮಕಾರಿತ್ವವನ್ನು ಮೌಲ್ಯಮಾಪನ ಮಾಡುವುದಾ ಗಿದ್ದರೆ, ಕನ್ನಡ ಮಾಧ್ಯಮದಲ್ಲಿ ಕಲಿಯುತ್ತಿರುವ ಸಮಾನ ಹಿನ್ನೆಲೆಯ ವಿದ್ಯಾರ್ಥಿ ಗಳನ್ನೂ ಹೋಲಿಕೆಗಾಗಿ ಒಳಗೊಳ್ಳುವುದು ಸೂಕ್ತವಾಗಿತ್ತು. ಇಂತಹ ಹೋಲಿಕೆಯು ವಿದ್ಯಾರ್ಥಿಗಳ ಹಿಂದಿನ ಕಲಿಕಾ ಅನುಭವ, ಸಾಮಾಜಿಕ-ಆರ್ಥಿಕ ಹಿನ್ನೆಲೆ, ಶಿಕ್ಷಕರ ಸಿದ್ಧತೆ ಮತ್ತು ಭಾಷಾ ಪರಿಸರದಂತಹ ಅಂಶಗಳನ್ನು ಪರಿಗಣಿಸಲು ನೆರವಾಗುತ್ತದೆ.

ಈ ಅಂಶಗಳನ್ನು ಪರಿಶೀಲಿಸದೆ, ಮಕ್ಕಳ ಇಂಗ್ಲಿಷ್ ಭಾಷಾ ಸಾಮರ್ಥ್ಯದಲ್ಲಿನ ಕೊರತೆಗಳಿಗೆ ಬೋಧನಾ ಮಾಧ್ಯಮವೇ ಕಾರಣ ಎಂದು ನಿರ್ಧರಿಸುವುದು ಕಷ್ಟ.

ಶಿಕ್ಷಣವೆಂದರೆ ಕೇವಲ ಭಾಷಾ ಸಾಮರ್ಥ್ಯವಲ್ಲ

ಇಂಗ್ಲಿಷ್/ದ್ವಿಭಾಷಾ ಮಾಧ್ಯಮ ಶಿಕ್ಷಣದ ಯಶಸ್ಸು ಅಥವಾ ವೈಫಲ್ಯವನ್ನು ಕೇವಲ ವಿದ್ಯಾರ್ಥಿಗಳ ಇಂಗ್ಲಿಷ್ ಭಾಷಾ ಅಂಕಗಳ ಆಧಾರದ ಮೇಲೆ ನಿರ್ಧರಿಸುವುದು ಸಮಗ್ರ ಶೈಕ್ಷಣಿಕ ದೃಷ್ಟಿಕೋನವಲ್ಲ. ಶಿಕ್ಷಣವು ಕೇವಲ ಪದಸಂಪತ್ತು, ಓದು, ಬರವಣಿಗೆ ಅಥವಾ ವ್ಯಾಕರಣದ ಜ್ಞಾನವನ್ನು ಬೆಳೆಸುವುದಕ್ಕೆ ಸೀಮಿತವಾಗಿಲ್ಲ. ಅದು ಮಕ್ಕಳ ಆತ್ಮವಿಶ್ವಾಸ, ತರಗತಿಯಲ್ಲಿನ ಭಾಗವಹಿಸುವಿಕೆ, ಸಂವಹನ ಸಾಮರ್ಥ್ಯ, ಸ್ವತಂತ್ರ ಚಿಂತನೆ ಮತ್ತು ತಮ್ಮ ಆಲೋಚನೆಗಳನ್ನು ವ್ಯಕ್ತಪಡಿಸುವ ಸಾಮರ್ಥ್ಯವನ್ನೂ ಬೆಳೆಸಬೇಕು. ಈ ಸಾಮರ್ಥ್ಯಗಳನ್ನು ಮಕ್ಕಳು ಕನ್ನಡ, ಇಂಗ್ಲಿಷ್ ಅಥವಾ ತಮ್ಮ ಮನೆಭಾಷೆ ಸೇರಿದಂತೆ ಯಾವುದೇ ಭಾಷೆಯಲ್ಲಿ ಅಥವಾ ಬಹುಭಾಷಾ ಸಂವಹನದ ಮೂಲಕವೂ ಪ್ರದರ್ಶಿಸಬಹುದು. ದ್ವಿಭಾಷಾ ಶಿಕ್ಷಣದ ಉದ್ದೇಶ ಮಕ್ಕಳ ಸಾಮರ್ಥ್ಯಗಳನ್ನು ಇಂಗ್ಲಿಷ್‌ನಲ್ಲಿಯೇ ಅಥವಾ ಯಾವುದಾದರೂ ಒಂದೇ ಭಾಷೆಯಲ್ಲಿ ಪ್ರದರ್ಶಿಸುವಂತೆ ಒತ್ತಾಯಿಸುವುದಲ್ಲ; ಬದಲಾಗಿ, ಅವರಿಗೆ ಲಭ್ಯವಿರುವ ಭಾಷಾ ಸಂಪನ್ಮೂಲಗಳನ್ನು ಬಳಸಿಕೊಂಡು ಕಲಿಯಲು, ಆಲೋಚಿಸಲು ಮತ್ತು ತಮ್ಮ ಅರಿವು ಹಾಗೂ ಸಾಮರ್ಥ್ಯಗಳನ್ನು ವ್ಯಕ್ತಪಡಿಸಲು ಅವಕಾಶ ಕಲ್ಪಿಸುವುದಾಗಿದೆ.

ದ್ವಿಭಾಷಾ ತರಗತಿಗಳಲ್ಲಿ ನಮ್ಮ ಅನುಭವದ ಪ್ರಕಾರ, ಮಕ್ಕಳಲ್ಲಿ ಆತ್ಮವಿಶ್ವಾಸ, ತರಗತಿಯಲ್ಲಿನ ಭಾಗವಹಿಸುವಿಕೆ ಮತ್ತು ಸಂವಹನಕ್ಕೆ ಮುಂದಾಗುವ ಮನೋಭಾವದಲ್ಲಿ ಗಮನಾರ್ಹ ಬದಲಾವಣೆಗಳನ್ನು ಕಾಣಬಹುದು. ಆರಂಭದಲ್ಲಿ ಮಾತನಾಡಲು ಹಿಂಜರಿಯುತ್ತಿದ್ದ ಮಕ್ಕಳು ಕ್ರಮೇಣ ಶಿಕ್ಷಕರ ಪ್ರಶ್ನೆಗಳಿಗೆ ಉತ್ತರಿಸುವುದು, ತಮ್ಮ ಅನುಭವಗಳನ್ನು ಹಂಚಿಕೊಳ್ಳುವುದು, ಸಹಪಾಠಿಗಳೊಂದಿಗೆ ಸಂವಹನ ನಡೆಸುವುದು ಮತ್ತು ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸುವುದು ಕಂಡುಬರುತ್ತದೆ.

ಗ್ರಾಮೀಣ ಮತ್ತು ಆರ್ಥಿಕವಾಗಿ ಹಿಂದುಳಿದ ಹಿನ್ನೆಲೆ ಯಿಂದ ಬರುವ ಮಕ್ಕಳಿಗೆ ಇಂತಹ ಅವಕಾಶಗಳು ವಿಶೇಷವಾಗಿ ಮಹತ್ವದ್ದಾಗಿವೆ. ತಮ್ಮನ್ನು ತಾವು ವ್ಯಕ್ತಪಡಿಸಿಕೊಳ್ಳುವ ಮತ್ತು ಇತರರೊಂದಿಗೆ ಸಂವಹನ ನಡೆಸುವ ಸಾಮರ್ಥ್ಯವು ಅವರ ಶೈಕ್ಷಣಿಕ ಹಾಗೂ ಸಾಮಾಜಿಕ ಬೆಳವಣಿಗೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.

ಈ ಬದಲಾವಣೆಗಳನ್ನು ವೈಜ್ಞಾನಿಕವಾಗಿ ಅಧ್ಯಯನ ಮಾಡುವುದು ಅಗತ್ಯ. ಆದರೆ, ಅವುಗಳನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಿ ಕೇವಲ ಭಾಷಾ ಸಾಮರ್ಥ್ಯವನ್ನೇ ಯಶಸ್ಸಿನ ಮಾನದಂಡವನ್ನಾಗಿ ಮಾಡುವುದು ಸರಿಯಲ್ಲ.

ಪ್ರಾದೇಶಿಕ ಭಾಷೆ ಮತ್ತು ಮಕ್ಕಳ ಮನೆಭಾಷೆಗಳು ಕಲಿಕೆಯ ಅಮೂಲ್ಯ ಸಂಪನ್ಮೂಲಗಳು. ಮಕ್ಕಳಿಗೆ ತಮ್ಮ ಪರಿಚಿತ ಭಾಷೆಗಳ ಮೂಲಕ ವಿಷಯವನ್ನು ಅರ್ಥಮಾಡಿಕೊಳ್ಳಲು ಅವಕಾಶ ನೀಡುತ್ತಾ, ಕ್ರಮೇಣ ಇಂಗ್ಲಿಷ್‌ನಲ್ಲಿ ಸಂವಹನ ನಡೆಸುವ ಸಾಮರ್ಥ್ಯವನ್ನು ಬೆಳೆಸುವುದು ಪರಿಣಾಮಕಾರಿ ದ್ವಿಭಾಷಾ ಶಿಕ್ಷಣದ ಉದ್ದೇಶವಾಗಿರಬೇಕು.

ಪ್ರಶ್ನೆ ಕನ್ನಡ ಅಥವಾ ಇಂಗ್ಲಿಷ್ ಎಂಬುದಲ್ಲ. ಕನ್ನಡದಲ್ಲಿ ಗಟ್ಟಿಯಾದ ನೆಲೆಯನ್ನು ನಿರ್ಮಿಸಿಕೊಳ್ಳುತ್ತಾ, ಮಕ್ಕಳಿಗೆ ಇಂಗ್ಲಿಷ್ ಕಲಿಕೆಯಲ್ಲಿ ಪರಿಣಾಮಕಾರಿಯಾಗಿ ಮುಂದುವರಿಯಲು ಹೇಗೆ ನೆರವಾಗಬೇಕು ಎಂಬುದೇ ನಿಜವಾದ ಪ್ರಶ್ನೆ.

ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ವರದಿಯಲ್ಲಿಯೂ ಮಕ್ಕಳಿಗೆ ಶಾಲೆಯ ಹೊರಗೆ ಇಂಗ್ಲಿಷ್ ಭಾಷೆಯ ಸಂಪರ್ಕ ಕಡಿಮೆ ಇರುವುದನ್ನು, ಶಿಕ್ಷಕರ ಭಾಷಾ ಸಾಮರ್ಥ್ಯ ಮತ್ತು ತರಗತಿಯ ಬೋಧನಾ ವಿಧಾನಗಳಲ್ಲಿನ ಸಮಸ್ಯೆಗಳನ್ನು ಉಲ್ಲೇಖಿಸಲಾಗಿದೆ. ಇವು ಅತ್ಯಂತ ಮಹತ್ವದ ಅಂಶಗಳು.

ಆದರೆ, ಇವು ಇಂಗ್ಲಿಷ್/ದ್ವಿಭಾಷಾ ಮಾಧ್ಯಮ ಶಿಕ್ಷಣವೇ ಪರಿಣಾಮಕಾರಿಯಲ್ಲ ಎಂಬುದನ್ನು ಸಾಬೀತುಪಡಿಸುವುದಿಲ್ಲ. ಬದಲಾಗಿ, ಶಿಕ್ಷಕರ ಸಿದ್ಧತೆ, ಬೋಧನಾ ವಿಧಾನಗಳು, ಭಾಷಾ ಪರಿಸರ ಮತ್ತು ಕಲಿಕಾ ಸಂಪನ್ಮೂಲಗಳನ್ನು ಸುಧಾರಿಸುವ ಅಗತ್ಯವನ್ನು ಸೂಚಿಸುತ್ತವೆ.

ಕೇವಲ ಪಠ್ಯಪುಸ್ತಕದ ಭಾಷೆಯನ್ನು ಬದಲಾಯಿಸುವುದರಿಂದ ಪರಿಣಾಮಕಾರಿ ಕಲಿಕೆ ಸಾಧ್ಯವಿಲ್ಲ. ಮಕ್ಕಳಿಗೆ ಅರ್ಥಪೂರ್ಣ ಭಾಷಾ ಅನುಭವಗಳು, ಸಂವಹನದ ಅವಕಾಶಗಳು, ವಿಷಯವನ್ನು ಅರ್ಥಮಾಡಿಕೊಳ್ಳಲು ಅಗತ್ಯವಾದ ಬೆಂಬಲ ಮತ್ತು ನಿರಂತರ ಅಭ್ಯಾಸ ಬೇಕು.

ಶಿಕ್ಷಕರಿಗೂ ನಿರಂತರ ವೃತ್ತಿಪರ ಅಭಿವೃದ್ಧಿ, ತರಗತಿಯಲ್ಲಿನ ಮಾರ್ಗದರ್ಶನ, ಸೂಕ್ತ ಕಲಿಕಾ ಸಾಮಗ್ರಿಗಳು ಮತ್ತು ಕನ್ನಡ ಹಾಗೂ ಇಂಗ್ಲಿಷ್ ಭಾಷೆಗಳನ್ನು ಪರಿಣಾಮಕಾರಿಯಾಗಿ ಬಳಸುವ ಬೋಧನಾ ತಂತ್ರಗಳು ಅಗತ್ಯ.

ಸಮಗ್ರ ಮೌಲ್ಯಮಾಪನದ ಅಗತ್ಯ

ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಯನವು ಕರ್ನಾಟಕದ ಸರಕಾರಿ ಶಾಲೆಗಳಲ್ಲಿ ಇಂಗ್ಲಿಷ್/ದ್ವಿಭಾಷಾ ಮಾಧ್ಯಮ ಶಿಕ್ಷಣದ ಕುರಿತು ಹೆಚ್ಚಿನ ಸಂಶೋಧನೆಗೆ ಒಂದು ಆರಂಭಿಕ ಹಂತವಾಗಬಹುದು. ಆದರೆ, ಇಂತಹ ಮೌಲ್ಯಮಾಪನವು ಇಂಗ್ಲಿಷ್ ಭಾಷಾ ಸಾಮರ್ಥ್ಯಕ್ಕೆ ಮಾತ್ರ ಸೀಮಿತವಾಗಬಾರದು.

ಅಧ್ಯಯನವು ಕೆಳಗಿನ ಅಂಶಗಳನ್ನೂ ಪರಿಗಣಿಸಬೇಕು:

* ವಿದ್ಯಾರ್ಥಿಗಳ ಕನ್ನಡ ಮತ್ತು ಇಂಗ್ಲಿಷ್ ಭಾಷಾ ಸಾಮರ್ಥ್ಯ.

* ಗಣಿತ, ಪರಿಸರ ಅಧ್ಯಯನ ಮತ್ತು ಇತರ ವಿಷಯಗಳ ಕಲಿಕಾ ಫಲಿತಾಂಶಗಳು.

* ಶಿಕ್ಷಕರ ಭಾಷಾ ಸಾಮರ್ಥ್ಯ ಮತ್ತು ಬೋಧನಾ ಸಿದ್ಧತೆ.

* ದ್ವಿಭಾಷಾ ಬೋಧನಾ ವಿಧಾನಗಳ ಗುಣಮಟ್ಟ.

* ಬೋಧನಾ-ಕಲಿಕಾ ಸಾಮಗ್ರಿಗಳ ಲಭ್ಯತೆ ಮತ್ತು ಪರಿಣಾಮಕಾರಿತ್ವ.

* ವಿದ್ಯಾರ್ಥಿಗಳ ಹಾಜರಾತಿ, ಶಾಲೆಯಲ್ಲಿ ಮುಂದುವರಿಯುವಿಕೆ ಮತ್ತು ಶೈಕ್ಷಣಿಕ ಪ್ರಗತಿ.

* ಸಾಮಾಜಿಕ-ಆರ್ಥಿಕ ಹಿನ್ನೆಲೆ ಮತ್ತು ಭಾಷಾ ಪರಿಸರದ ಪ್ರಭಾವ.

ರಾಜ್ಯದ ವಿವಿಧ ಜಿಲ್ಲೆಗಳ ಶಾಲೆಗಳನ್ನು ಒಳಗೊಂಡ, ದೀರ್ಘಕಾಲೀನ ಮತ್ತು ವೈಜ್ಞಾನಿಕ ಅಧ್ಯಯನವು ಇಂಗ್ಲಿಷ್/ದ್ವಿಭಾಷಾ ಮಾಧ್ಯಮ ಹಾಗೂ ಕನ್ನಡ ಮಾಧ್ಯಮದಲ್ಲಿ ಕಲಿಯುತ್ತಿರುವ ಸಮಾನ ಹಿನ್ನೆಲೆಯ ಮಕ್ಕಳ ಕಲಿಕಾ ಫಲಿತಾಂಶಗಳನ್ನು ಹೋಲಿಕೆ ಮಾಡಲು ನೆರವಾಗುತ್ತದೆ.

ಇದರಿಂದ ಯಾವ ರೀತಿಯ ದ್ವಿಭಾಷಾ ಶಿಕ್ಷಣ ಪರಿಣಾಮಕಾರಿಯಾಗಿದೆ, ಯಾವ ಪರಿಸ್ಥಿತಿಗಳಲ್ಲಿ ಅದು ಉತ್ತಮವಾಗಿ ಕಾರ್ಯನಿರ್ವಹಿಸುತ್ತದೆ ಮತ್ತು ಶಿಕ್ಷಕರು ಹಾಗೂ ಮಕ್ಕಳಿಗೆ ಯಾವ ರೀತಿಯ ಬೆಂಬಲ ಅಗತ್ಯ ಎಂಬುದನ್ನು ಗುರುತಿಸಬಹುದು.

ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಯನದಲ್ಲಿ ವ್ಯಕ್ತವಾಗಿರುವ ಕಳವಳಗಳನ್ನು ನಿರ್ಲಕ್ಷಿಸಬಾರದು. ಮಕ್ಕಳು ಇಂಗ್ಲಿಷ್ ಕಲಿಕೆಯಲ್ಲಿ ಹಿಂದುಳಿದಿದ್ದರೆ, ಅದರ ಕಾರಣಗಳನ್ನು ಅರ್ಥಮಾಡಿಕೊಂಡು ಸೂಕ್ತ ಕ್ರಮಗಳನ್ನು ಕೈಗೊಳ್ಳಬೇಕು.

ಅದೇ ಸಮಯದಲ್ಲಿ, ಒಂದು ಅಧ್ಯಯನದ ಆಧಾರದ ಮೇಲೆ ಇಂಗ್ಲಿಷ್/ ದ್ವಿಭಾಷಾ ಮಾಧ್ಯಮ ಶಿಕ್ಷಣದ ಕುರಿತು ವ್ಯಾಪಕವಾದ ತೀರ್ಮಾನಕ್ಕೆ ಬರುವುದೂ ಸರಿಯಲ್ಲ. ಈ ಚರ್ಚೆಯನ್ನು ಕನ್ನಡ ಮತ್ತು ಇಂಗ್ಲಿಷ್ ನಡುವಿನ ಸಂಘರ್ಷವಾಗಿ ನೋಡುವ ಬದಲು, ಮಕ್ಕಳಿಗೆ ಎರಡೂ ಭಾಷೆಗಳಲ್ಲಿ ಉತ್ತಮ ಕಲಿಕಾ ಅವಕಾಶಗಳನ್ನು ಒದಗಿಸುವ ಸವಾಲಾಗಿ ನೋಡಬೇಕು.