ವಾತಾವರಣ ವೈಪರೀತ್ಯ: ಆತಂಕದಲ್ಲಿ ಮಾವು ಬೆಳೆಗಾರರು

ಹೊಸಕೋಟೆ: ವಾತಾವರಣದ ವೈಪರೀತ್ಯದಿಂದಾಗಿ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಮಾವು ಫಸಲಿನ ಮೇಲೆ ಪರಿಣಾಮ ಬೀರುತ್ತಿದೆ. ಜಿಲ್ಲಾದ್ಯಂತ ತಡವಾಗಿ ಹೂವು ಬಿಡುತ್ತಿದ್ದು, ಹಲವೆಡೆ ಇನ್ನೂ ಮಾವಿನ ಮರದಲ್ಲಿ ಹೂ ಬಿಟ್ಟಿಲ್ಲ. ಇದು ಮುಂದುವರಿದರೆ ಮಾವಿನ ಇಳುವರಿಯಲ್ಲಿ ಹಿನ್ನಡೆಯಾಗುವ ಸಾಧ್ಯತೆ ಇದೆ.

ಜಿಲ್ಲೆಯ 4 ತಾಲೂಕಿನಲ್ಲೂ ಮಾವು ಬೆಳೆಯಲಾಗುತ್ತದೆ. ಒಟ್ಟಾರೆ ಜಿಲ್ಲಾದ್ಯಂತ 6 ಸಾವಿರಕ್ಕೂ ಹೆಚ್ಚು ಹೆಕ್ಟೇರ್ ಪ್ರದೇಶದಲ್ಲಿ ಮಾವು ಬೆಳೆಯಲಾಗುತ್ತದೆ. ಸಾಮಾನ್ಯವಾಗಿ ಜಿಲ್ಲೆಯಲ್ಲಿ ಡಿಸೆಂಬರ್ ತಿಂಗಳಲ್ಲಿ ಹೂವು ಕಟ್ಟಿಕೊಂಡು ಮಿಂಚುತ್ತಿದ್ದ ಮಾವಿನ ಮರಗಳು ಈವರೆಗೂ ಹೆಚ್ಚಿನ ಕಡೆಗಳಲ್ಲಿ ಹೂವು ಕಟ್ಟಿಲ್ಲ. ಬರದ ಪ್ರಭಾವದ ಜತೆಗೆ ಮಾವು ಕೂಡ ಕೈಕೊಟ್ಟರೆ ರೈತರಿಗೆ ನುಂಗಲಾರದ ತುತ್ತಾಗಲಿದೆ ಎಂದು ರೈತರು ಅಭಿಪ್ರಾಯಪಡುತ್ತಿದ್ದಾರೆ.

► ವಾತಾವರಣ ವೈಪರೀತ್ಯ: ಜಿಲ್ಲೆಯ 4 ತಾಲೂಕುಗಳಲ್ಲಿ ಈ ಬಾರಿ ಮಳೆ ಕೊರತೆ ಉಂಟಾಗಿ ರಾಗಿ, ಜೋಳ ಸಹಿತ ಬಹುತೇಕ ಬೆಳೆಗಳು ನಷ್ಟ ಉಂಟಾಗಿದ್ದವು. ಇದೀಗ ಮಾವಿನ ಸರದಿ; ಜಿಲ್ಲೆಯಲ್ಲಿ ಕಳೆದ ತಿಂಗಳಲ್ಲಿ ತುಂತುರು ಮಳೆ, ಮೋಡ ಕವಿದ ವಾತಾವರಣ ಇದ್ದ ಹಿನ್ನೆಲೆ ಮಾವು ಹೂವು ಕಟ್ಟುವ ಸೀಸನ್ ತಡವಾಗಿದೆ. ಹೆಚ್ಚು ಮಾವು ಬೆಳೆಯುವ ರಾಮನಗರ, ಕೋಲಾರ ಜಿಲ್ಲೆಗಳಲ್ಲೂ ಇದೇ ಪರಿಸ್ಥಿತಿ ಇದೆ. ಒಟ್ಟಾರೆ ಈ ಬಾರಿ ಮಾವಿಗೂ ಕೂಡ ವಾತಾವರಣ ವೈಪರೀತ್ಯದ ಬಿಸಿ ತಟ್ಟಿದ್ದು, ಇನ್ನೆಷ್ಟು ಪ್ರಭಾವ ಬೀರಲಿದೆ ಎಂಬುದನ್ನು ಕಾದುನೋಡಬೇಕಿದೆ.

ರೈತರ ಆದಾಯ ಮೂಲ: ಜಿಲ್ಲೆಯ ಅನೇಕ ರೈತರ ಆದಾಯ ಮೂಲ ಮಾವು. ರೈತರ ಇತರ ಬೆಳೆಗಳು ಕೈಕೊಟ್ಟಾಗ ಮಾವು ಕೈಹಿಡಿಯುತ್ತದೆ. ರೈತರು ಮಾವುಗಳ ಮಾರುಕಟ್ಟೆಗಳನ್ನು, ದರಗಳನ್ನು ವರ್ಷದಿಂದ ವರ್ಷಕ್ಕೆ ಹೆಚ್ಚಿಸಿಕೊಳ್ಳುತ್ತಾರೆ. ಮಾವುಗಳ ಮಾರಾಟಕ್ಕೆ ತೋಟದಲ್ಲಿ ಮಾವು ಕಾಯಿ ಕಟ್ಟಿದ ನಂತರ ಪೂರ್ತಿ ತೋಟವನ್ನು ತೋಟದ ಮಾವಿನ ಮರ ಹಾಗೂ ಕಾಯಿಗಳಿಗೆ ಅನುಸಾರವಾಗಿ ಮಾರಲಾಗುತ್ತದೆ. ಇದರಿಂದ ಬೆಳೆಗಾರರಿಗೆ ಮಾವಿನ ಹಣ್ಣಿನಿಂದ ವಾರ್ಷಿಕ ಉತ್ತಮ ದರ ಕೂಡ ಸಿಗುತ್ತದೆ.

ಆದಾಯ ಇಳಿಮುಖ ಸಾಧ್ಯತೆ

ಸದ್ಯ ಜಿಲ್ಲೆಯಲ್ಲಿ ವಾತಾವರಣದ ಬದಲಾವಣೆ ಹಿನ್ನೆಲೆ ಹೂವು ಕಟ್ಟುವುದು ತಡವಾಗಿದೆ. ಇದರಿಂದ ಫಸಲು ಕೈಸೇರುವುದು ಕೂಡ ತಡವಾಗುವ ಸಾಧ್ಯತೆ ಇದ್ದು, ಆ ಸಮಯದಲ್ಲಿ ಉತ್ತಮ ದರ ಸಿಗುವುದು ಕೂಡ ಅನುಮಾನ ಎಂಬಂತಾಗಿದೆ. ಇದಲ್ಲದೆ ಒಂದು ವೇಳೆ ಉತ್ತಮ ದರ ಇದ್ದರೂ ಕಾಯಿ ಕಟ್ಟಿ ಬೆಳೆ ಕೈಸೇರುವ ವೇಳೆಗೆ ಅಥವಾ ಹೂಗಳು ಕಟ್ಟಿ ಬೆಳವಣಿಗೆ ಆಗುವ ಸಮಯದಲ್ಲಿ ವಾತಾವರಣ ಮತ್ತೆ ಬದಲಾವಣೆಯನ್ನು ಕಂಡರೆ ಹೂವು ಉದುರುವ ಮೂಲಕ ಇಳುವರಿಗೆ ಹೊಡೆತ ಬೀಳಲಿದೆ. ಹಣ್ಣಾಗುವ ಸಮಯದಲ್ಲಿ ಮಳೆ ಅಥವಾ ಹೆಚ್ಚಿನ ಶೀತ ವಾತಾವರಣ ಕಂಡುಬಂದಲ್ಲಿ ಗುಣಮಟ್ಟದ ಕಾಯಿ ಸಿಗುವುದೂ ಕಷ್ಟ. ಇದರಿಂದ ವರ್ಷಕ್ಕೊಮ್ಮೆ ರೈತರಿಗೆ ಸಿಗುವ ಮಾವಿನ ಆದಾಯದಲ್ಲೂ ಇಳಿಮುಖವಾಗುವ ಸಾಧ್ಯತೆ ಹೆಚ್ಚಿದೆ.

ಜನವರಿ ತಿಂಗಳು ಪೂರ್ಣಗೊಳ್ಳುತ್ತಿದ್ದರೂ ಮಾವಿನ ಮರದಲ್ಲಿ ಹೂವು ಸರಿಯಾಗಿ ಬಿಟ್ಟಿಲ್ಲ, ಇದರಿಂದ ಈ ಬಾರಿ ಎಷ್ಟು ಫಸಲು ಕೈಸೇರಲಿದೆ ಎಂಬುದನ್ನು ಕಾದು ನೋಡಬೇಕಿದೆ. ಕಳೆದ ಬಾರಿಯೂ ಉತ್ತಮ ಫಸಲು ಬಂದಿಲ್ಲ. ಹೀಗೆ ಮುಂದುವರಿದರೆ ಸಮಸ್ಯೆಯಾಗುತ್ತದೆ.

► ಅಶ್ವತ್ಥಪ್ಪ, ಮಾವು ಬೆಳೆಗಾರರು, ಹೊಸಕೋಟೆ

ಜನವರಿಯಲ್ಲಿ ಮಳೆ ಬರುವ ವಾತಾವರಣವಿದ್ದು, ಬಿಸಿಲ ಪ್ರಭಾವ ಕಡಿಮೆ ಇದ್ದ ಹಿನ್ನೆಲೆ ಮಾವು ಹೂವು ಕಟ್ಟುವುದು ತಡವಾಗಿದೆ. ಹಾಗಾಗಿ ಇಳುವರಿ ಕೂಡ ತಡವಾಗಲಿದೆ. ಮುಂದಿನ ದಿನಗಳಲ್ಲಿ ಮಾವಿಗೆ ಪೂರಕ ವಾತಾವರಣ ಸಿಕ್ಕರೆ ಉತ್ತಮ ಫಸಲು ಕೈಸೇರಲಿದೆ.

► ಗುಣವಂತ್, ತೋಟಗಾರಿಕೆ ಇಲಾಖೆಯ ಉಪ ನಿರ್ದೇಶಕ, ಬೆಂಗಳೂರು ಗ್ರಾಮಾಂತರ