ಸಮರ್ಪಕ ಮಳೆಯಿಲ್ಲದೆ ಬೆಳೆ ಕುಸಿತ

ಗದಗ : ಮುಂಗಾರು ಕೈಕೊಟ್ಟ ಪರಿಣಾಮ ಗದಗ ಜಿಲ್ಲೆಯಲ್ಲಿ ಕೃಷಿ ಚಟುವಟಿಕೆಗಳ ಮೇಲೆ ಬರದ ಕರಿನೆರಳು ಆವರಿಸಿದೆ. ಕೆಲವೆಡೆ ಬಿತ್ತನೆ ಬಳಿಕವೂ ಅಗತ್ಯ ಪ್ರಮಾಣದ ಮಳೆ ಸುರಿಯದ ಪರಿಣಾಮ ಬೆಳೆಗಳು ನಿರೀಕ್ಷಿತ ಪ್ರಮಾಣದಲ್ಲಿ ಬೆಳೆಯದೆ ರೈತರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಹೊಲದಲ್ಲಿ ಬೆಳೆ ಕಡಿಮೆಯಾದ ಪರಿಣಾಮ ಅದರ ನೇರ ಪರಿಣಾಮ ಕೃಷಿ ಉತ್ಪನ್ನ ಮಾರುಕಟ್ಟೆ ಮೇಲೂ ಬಿದ್ದಿದ್ದು, ಗದಗ ಎಪಿಎಂಸಿಯಲ್ಲಿ ಪ್ರಮುಖ ಬೆಳೆಗಳ ಆವಕ ಭಾರೀ ಪ್ರಮಾಣದಲ್ಲಿ ಕುಸಿದಿದೆ.

ಮಳೆ ಎನ್ನುವುದು ರೈತನ ಕೃಷಿಯ ಮೂಲ ಆಧಾರ. ಬಿತ್ತನೆ ಸಮಯದಲ್ಲಿ ಮಳೆ ಬಂದರೂ ನಂತರದ ಹಂತಗಳಲ್ಲಿ ಅಗತ್ಯ ಪ್ರಮಾಣದ ಮಳೆ ಬೀಳದಿದ್ದರೆ ಬೆಳೆ ಬೆಳವಣಿಗೆ ಕುಂಠಿತವಾಗುತ್ತದೆ. ಈ ಬಾರಿ ಇದೇ ಪರಿಸ್ಥಿತಿ ಜಿಲ್ಲೆಯ ಹಲವು ಭಾಗಗಳಲ್ಲಿ ಕಂಡುಬಂದಿದೆ. ಮಳೆ ಕೊರತೆಯಿಂದ ಬಿತ್ತನೆ ಮಾಡಿದ ಬೆಳೆಗಳಿಗೆ ಅಗತ್ಯ ತೇವಾಂಶ ಸಿಗದೆ ಇಳುವರಿ ಕುಸಿದಿದೆ. ಕೆಲವೆಡೆ ರೈತರು ಹಾಕಿದ ಬಂಡವಾಳಕ್ಕೆ ತಕ್ಕಷ್ಟು ಬೆಳೆ ಕೂಡ ಕೈಗೆ ಬಂದಿಲ್ಲ.

ಮಳೆಗಾಗಿ ಕಾದ ರೈತ :

ಬಿತ್ತನೆ ಮಾಡಿದ ಬಳಿಕ ಬೆಳೆ ಚಿಗುರಿ ಉತ್ತಮ ಇಳುವರಿ ನೀಡಲಿದೆ ಎಂಬ ನಿರೀಕ್ಷೆಯಲ್ಲಿದ್ದ ರೈತರಿಗೆ ಮಳೆಯ ಕೊರತೆ ಆಘಾತ ನೀಡಿದೆ. ಆರಂಭದಲ್ಲಿ ಮಳೆಯ ನಿರೀಕ್ಷೆಯಲ್ಲಿ ಕೃಷಿ ಚಟುವಟಿಕೆ ಕೈಗೊಂಡಿದ್ದ ರೈತರು, ನಂತರ ಮಳೆ ಕೈಕೊಟ್ಟ ಹಿನ್ನೆಲೆಯಲ್ಲಿ ಬೆಳೆ ಉಳಿಸಿಕೊಳ್ಳಲು ಪರದಾಡುವಂತಾಗಿದೆ.

ಮಳೆ ಕೊರತೆಯಿಂದ ಹೊಲದ ತೇವಾಂಶ ಕಡಿಮೆಯಾಗಿ ಬೆಳೆಗಳ ಬೆಳವಣಿಗೆ ಕುಂಠಿತವಾಗಿದೆ. ನೀರಾವರಿ ಸೌಲಭ್ಯವಿರುವ ಪ್ರದೇಶಗಳಲ್ಲಿ ರೈತರು ಹೇಗೋ ಬೆಳೆ ಉಳಿಸಿಕೊಳ್ಳುವ ಪ್ರಯತ್ನ ನಡೆಸಿದರೂ, ಮಳೆಯನ್ನೇ ಅವಲಂಬಿಸಿರುವ ಒಣಭೂಮಿ ರೈತರ ಪರಿಸ್ಥಿತಿ ಮತ್ತಷ್ಟು ಸಂಕಷ್ಟಕರವಾಗಿದೆ.

ಹೊಲದಲ್ಲಿ ಬೆಳೆ ಇಲ್ಲ.. ಮಾರುಕಟ್ಟೆಗೆ ಆವಕ ಇಲ್ಲ :

ಮಳೆಯ ಕೊರತೆಯ ಪರಿಣಾಮ ಕೇವಲ ರೈತರ ಹೊಲಕ್ಕೆ ಸೀಮಿತವಾಗಿಲ್ಲ. ಅದರ ಪ್ರತಿಫಲ ಗದಗ ಎಪಿಎಂಸಿಯಲ್ಲೂ ಕಾಣಿಸುತ್ತಿದೆ. ರೈತರು ಬೆಳೆಯುವ ಪ್ರಮಾಣ ಕಡಿಮೆಯಾದರೆ ಮಾರುಕಟ್ಟೆಗೆ ಬರುವ ಉತ್ಪನ್ನದ ಪ್ರಮಾಣವೂ ಸಹಜವಾಗಿಯೇ ಕಡಿಮೆಯಾಗುತ್ತದೆ. ಈ ಬಾರಿ ಗದಗ ಎಪಿಎಂಸಿಗೆ ಬರುತ್ತಿದ್ದ ಪ್ರಮುಖ ಬೆಳೆಗಳ ಆವಕದಲ್ಲೇ ಭಾರೀ ಕುಸಿತ ಕಂಡುಬಂದಿದೆ.

ಕಳೆದ ಅವಧಿಗೆ ಹೋಲಿಸಿದರೆ ಕಡಲೆ ಆವಕ ಶೇ.75.71ರಷ್ಟು ಕುಸಿದಿದೆ. ಕಳೆದ ಬಾರಿ 7 ಲಕ್ಷಕ್ಕೂ ಅಧಿಕ ಕ್ವಿಂಟಾಲ್ ಇದ್ದ ಕಡಲೆ ಆವಕ, ಈ ಬಾರಿ ಸುಮಾರು 1.70 ಲಕ್ಷ ಕ್ವಿಂಟಾಲ್‌ಗೆ ಇಳಿಕೆಯಾಗಿದೆ.

ಮೆಕ್ಕೆಜೋಳದ ಆವಕದಲ್ಲಿ ಬರೋಬ್ಬರಿ ಶೇ.92ರಷ್ಟು ಕುಸಿತ ದಾಖಲಾಗಿದೆ. ಕಳೆದ ಬಾರಿ ಸುಮಾರು 3 ಲಕ್ಷ ಕ್ವಿಂಟಾಲ್ ಇದ್ದ ಆವಕ, ಈ ಬಾರಿ ಕೇವಲ 30 ಸಾವಿರ ಕ್ವಿಂಟಾಲ್‌ಗೆ ಇಳಿಕೆಯಾಗಿದೆ.

ಗದಗದ ಪ್ರಮುಖ ವಾಣಿಜ್ಯ ಬೆಳೆಗಳಲ್ಲಿ ಒಂದಾದ ಒಣಮೆಣಸಿನಕಾಯಿ ಆವಕವೂ 23 ಸಾವಿರ ಕ್ವಿಂಟಾಲ್‌ನಿಂದ ಕೇವಲ 3 ಸಾವಿರ ಕ್ವಿಂಟಾಲ್‌ಗೆ ಕುಸಿದಿದೆ. ಇನ್ನು ಶೇಂಗಾ ಆವಕ ಶೇ.62, ಜೋಳ ಶೇ.9 ಹಾಗೂ ಗೋಧಿ ಶೇ.13ರಷ್ಟು ಕುಸಿತ ಕಂಡಿದೆ.

ರೈತನ ಆದಾಯಕ್ಕೆ ಹೊಡೆತ :

ಬೆಳೆ ಇಳುವರಿ ಕುಸಿದ ಪರಿಣಾಮ ರೈತನ ಆದಾಯದ ಮೇಲೂ ನೇರ ಪರಿಣಾಮ ಬಿದ್ದಿದೆ. ಸಾಮಾನ್ಯವಾಗಿ ಒಂದು ಎಕರೆಗೆ ಇಷ್ಟು ಪ್ರಮಾಣದ ಬೆಳೆ ಸಿಗಬಹುದು ಎಂಬ ನಿರೀಕ್ಷೆಯೊಂದಿಗೆ ರೈತರು ಬಿತ್ತನೆ, ಗೊಬ್ಬರ, ಕೀಟನಾಶಕ, ಕಾರ್ಮಿಕರು ಸೇರಿದಂತೆ ಹಲವು ಖರ್ಚು ಮಾಡಿರುತ್ತಾರೆ. ಆದರೆ ಮಳೆ ಕೊರತೆಯಿಂದ ಇಳುವರಿ ಕಡಿಮೆಯಾದರೆ ಉತ್ಪಾದನಾ ವೆಚ್ಚವನ್ನೇ ಸರಿದೂಗಿಸಲು ಕಷ್ಟವಾಗುವ ಪರಿಸ್ಥಿತಿ ಎದುರಾಗುತ್ತದೆ.

ಹೀಗಾಗಿ ಮಳೆ ಕೊರತೆ, ಬೆಳೆ ಇಳುವರಿ ಕುಸಿತ, ಮಾರುಕಟ್ಟೆಗೆ ಆವಕ ಇಳಿಕೆ, ವಹಿವಾಟು ಕುಸಿತ ಎಂಬ ಸರಪಳಿ ಪರಿಣಾಮ ಇದೀಗ ಗದಗದಲ್ಲಿ ಗೋಚರಿಸುತ್ತಿದೆ.

ವರ್ತಕರಿಗೂ ವಹಿವಾಟು ಕುಸಿತ :

ಎಪಿಎಂಸಿಗೆ ಬೆಳೆಗಳ ಆವಕ ಕಡಿಮೆಯಾದ ಹಿನ್ನೆಲೆಯಲ್ಲಿ ರೈತರ ಜೊತೆಗೆ ಬೆಳೆ ಖರೀದಿ-ಮಾರಾಟವನ್ನೇ ಅವಲಂಬಿಸಿರುವ ವರ್ತಕರಿಗೂ ವಹಿವಾಟಿನ ಕೊರತೆ ಎದುರಾಗಿದೆ. ಹಮಾಲರು ಸೇರಿದಂತೆ ಮಾರುಕಟ್ಟೆಯ ವಿವಿಧ ವೃತ್ತಿಗಳ ಮೇಲೂ ಇದರ ಪರೋಕ್ಷ ಪರಿಣಾಮ ಬೀರುತ್ತಿದೆ.

ಎಲ್ಲ ಬೆಳೆಗಳ ಆವಕವೂ ಕುಸಿದಿಲ್ಲ. ಹೆಸರುಕಾಳು ಹಾಗೂ ಸೂರ್ಯಕಾಂತಿ ಬೆಳೆಗಳ ಆವಕದಲ್ಲಿ ಹೆಚ್ಚಳ ಕಂಡುಬಂದಿದೆ. ಆದರೆ ಪ್ರಮುಖ ವಾಣಿಜ್ಯ ಬೆಳೆಗಳಾದ ಕಡಲೆ, ಮೆಕ್ಕೆಜೋಳ, ಒಣಮೆಣಸಿನಕಾಯಿ ಹಾಗೂ ಶೇಂಗಾ ಆವಕದಲ್ಲಿ ಕಂಡುಬಂದಿರುವ ಭಾರೀ ಕುಸಿತ ಒಟ್ಟಾರೆ ಕೃಷಿ ಉತ್ಪಾದನೆಯ ಮೇಲಿನ ಪರಿಣಾಮವನ್ನು ಎತ್ತಿ ತೋರಿಸುತ್ತಿದೆ.

ಒಟ್ಟಿನಲ್ಲಿ, ಮಳೆ ಕೈಕೊಟ್ಟಿದ್ದರಿಂದ ಹೊಲದಲ್ಲಿ ಬೆಳೆ ಕಡಿಮೆಯಾಗಿದೆ. ಬೆಳೆ ಕಡಿಮೆಯಾದ್ದರಿಂದ ರೈತನ ಆದಾಯಕ್ಕೆ ಹೊಡೆತ ಬಿದ್ದಿದೆ. ಇದೇ ಕೊರತೆ ಈಗ ಎಪಿಎಂಸಿಯ ಆವಕದಲ್ಲೂ ಪ್ರತಿಫಲಿಸಿದೆ. ಅನ್ನದಾತನ ಹೊಲದಲ್ಲಿನ ಬರದ ಪರಿಸ್ಥಿತಿ ಕೃಷಿ ಮಾರುಕಟ್ಟೆಯ ವಹಿವಾಟಿನ ಮೇಲೂ ಪರಿಣಾಮ ಬೀರುತ್ತಿರುವುದು ಜಿಲ್ಲೆಯ ಕೃಷಿ ಆಧಾರಿತ ಆರ್ಥಿಕತೆಯ ಮೇಲೆ ಆತಂಕ ಮೂಡಿಸಿದೆ.