ಅಂಗನವಾಡಿ ಶಿಕ್ಷಕಿಯರ ಹೆಸರಿನಲ್ಲಿ ಬಾಣಂತಿಯರಿಗೆ ಸೈಬರ್ ವಂಚನೆ; ಆರೋಪ

ಕಲಬುರಗಿ,: ಸರ್ಕಾರದ ಕಲ್ಯಾಣ ಯೋಜನೆಗಳ ಫಲಾನುಭವಿಗಳನ್ನೇ ಗುರಿಯಾಗಿಸಿಕೊಂಡಿರುವ ಸೈಬರ್ ವಂಚಕರು, ಇದೀಗ ಗರ್ಭಿಣಿಯರು ಮತ್ತು ಬಾಣಂತಿಯರನ್ನು ವಂಚಿಸುವ ಹೊಸ ತಂತ್ರಕ್ಕೆ ಮೊರೆ ಹೋಗಿದ್ದಾರೆ. ಅಂಗನವಾಡಿ ಶಿಕ್ಷಕಿಯರು ಹಾಗೂ ಸರ್ಕಾರಿ ಇಲಾಖೆಯ ಸಿಬ್ಬಂದಿಯ ಹೆಸರಿನಲ್ಲಿ ಕರೆ ಮಾಡಿ, ಸರ್ಕಾರದಿಂದ ಹಣ ಬಿಡುಗಡೆಯಾಗಿದೆ ಎಂದು ನಂಬಿಸಿ ಬ್ಯಾಂಕ್ ಖಾತೆಗಳಿಂದ ಹಣ ಲಪಟಾಯಿಸುತ್ತಿರುವ ದೂರುಗಳು ಆತಂಕ ಮೂಡಿಸಿವೆ. ವಿಶೇಷವಾಗಿ ಗ್ರಾಮೀಣ ಭಾಗದ ಮಹಿಳೆಯರು ಮತ್ತು ಡಿಜಿಟಲ್ ಪಾವತಿ ವ್ಯವಸ್ಥೆಯ ಬಗ್ಗೆ ಹೆಚ್ಚಿನ ಅರಿವಿಲ್ಲದ ಫಲಾನುಭವಿಗಳು ಇಂತಹ ವಂಚಕರ ಜಾಲಕ್ಕೆ ಸಿಲುಕುವ ಅಪಾಯ ಎದುರಾಗಿದೆ.

ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯ ಮೂಲಕ ಅಂಗನವಾಡಿ ಕೇಂದ್ರಗಳಲ್ಲಿ ನೋಂದಣಿಯಾಗಿರುವ ಗರ್ಭಿಣಿಯರು ಹಾಗೂ ಬಾಣಂತಿಯರ ವೈಯಕ್ತಿಕ ವಿವರಗಳನ್ನು ಬಳಸಿಕೊಂಡು ವಂಚಕರು ವಿಶ್ವಾಸ ಗಳಿಸಲು ಯತ್ನಿಸುತ್ತಿದ್ದಾರೆ. ಫಲಾನುಭವಿಯ ಹೆಸರು, ಪತಿಯ ಹೆಸರು, ಪ್ರಸೂತಿ ದಿನಾಂಕ, ಆಧಾರ್ ಕಾರ್ಡ್ ಹಾಗೂ ಆಭಾ ಕಾರ್ಡ್ಗೆ ಸಂಬಂಧಿಸಿದ ವಿವರಗಳನ್ನು ಉಲ್ಲೇಖಿಸಿ ಮಾತನಾಡುವುದರಿಂದ, ಕರೆ ಮಾಡುತ್ತಿರುವವರು ನಿಜವಾಗಿಯೂ ಸರ್ಕಾರಿ ಸಿಬ್ಬಂದಿಯೇ ಇರಬಹುದು ಎಂದು ಮಹಿಳೆಯರು ನಂಬಿಸಿ ವಂಚನೆಗೆ ಮಾಡಲಾಗುತ್ತಿದೆ.

12 ಸಾವಿರದ ಆಮಿಷ ತೋರಿಸಿ ಖಾತೆಗೆ ಕನ್ನ; ಬಾಣಂತಿ ಮಹಿಳೆಯ ಮೊಬೈಲ್ಗೆ ವಂಚಕರು ಕರೆ ಮಾಡಿ, ನಿಮ್ಮ ಡಿಲೆವರಿ ಆಗಿದೆ ಅಲ್ವ. ನಿಮ್ಮಗೆ 12 ಸಾವಿರ ಬಿಡುಗಡೆಯಾಗಿದೆ. ನಿಮ್ಮ ಖಾತೆಗೆ ಹಣ ಜಮೆ ಮಾಡಬೇಕು. ಬ್ಯಾಂಕ್ ನಲ್ಲಿ ಎಷ್ಟು ಹಣ ಇಟ್ಟಿದ್ದಿರಿ ಎಂದು ಕೇಳಿ, ಹಣ ಹಾಕಲು ವಾಟ್ಸಾಪ್ಗೆ ಕ್ಯೂಆರ್ ಕೋಡ್ ಕಳುಹಿಸಿದೇವೆ. 2000 ರೂ. ಕ್ಯೂಆರ್ ಕೋಡ್ ಹಾಕಿ, ಅಥವಾ ನಿರ್ದಿಷ್ಟ ಮೊತ್ತವನ್ನು ಪಾವತಿಸಿದ ಬಳಿಕ. ಮರುದಿನ ಅಂಗನವಾಡಿ ಕೇಂದ್ರಕ್ಕೆ ತೆರಳಿ ರಿಜಿಸ್ಟರ್ನಲ್ಲಿ ಸಹಿ ಮಾಡಿ ಎಂದು ಹೇಳಿದರು. ಇದನ್ನು ನಂಬಿ 499 ಹಣ ಪಾವತಿ ಮಾಡಿದಿದೆ. ನಂತರ ಅಂಗನವಾಡಿ ಟೀಚರ್ ಗೆ ವಿಚಾರಿಸಿದಾಗ ಇದಕ್ಕೆ ನಮಗೆ ಯಾವುದೇ ಸಂಬಂಧವಿಲ್ಲ. ನಮ್ಮ ಕಡೆಯಿಂದ ಕರೆ ಮಾಡಿಲ್ಲ. ನಿಮ್ಮ ಮಾಹಿತಿ ಇಲಾಖೆಗೆ ಮಾತ್ರ ಸಲ್ಲಿಸಿದ್ದೇವೆ ಈ ಮಾಹಿತಿ ಅವರಿಗೆ ಹೇಗೆ ಸಿಕ್ತು ಎಂಬುದು ನಮಗೆ ಗೊತ್ತಿಲ್ಲ ಎಂದಾಗ ವಂಚನೆ ನಡೆದಿರುವುದು ಗೊತ್ತಾಗಿದೆ ಎಂದಿದ್ದಾರೆ.

ಬಾಣಂತಿಯರು ಯುಪಿಐ ಬಳಸುತ್ತಿಲ್ಲ ಎಂದರು, ಸಂಬಂಧಿಕರ, ನೇರೆ ಹೊರೆಯವರ ಯುಪಿಐಯಿಂದ 2,000, 1,000, 500, 200 ಹೀಗೆ ವಿವಿಧ ಮೊತ್ತಗಳಲ್ಲಿ ಹಣ ಕಳೆದುಕೊಳ್ಳುವವರ ಸಂಖ್ಯೆ ಹೆಚ್ಚಾಗುತ್ತಿದೆ ಎಂದು ವಂಚನೆಗೆ ಒಳಗಾದ ಕಲಬುರಗಿ ನಿವಾಸಿ ಪೂಜಾ ಸಿಂಗೆ ವಾರ್ತಾಭಾರತಿ ಜೊತೆ ಮಾತನಾಡಿ ಅತ.ಕ ವ್ಯಕ್ತಪಡಿಸಿದ್ದಾರೆ.

ವೈಯಕ್ತಿಕ ಮಾಹಿತಿ ವಂಚಕರ ಕೈಗೆ ಹೇಗೆ?; ಫಲಾನುಭವಿಗಳ ಹೆಸರು, ಮೊಬೈಲ್ ಸಂಖ್ಯೆ, ಪ್ರಸೂತಿ ವಿವರಗಳು ಸೇರಿದಂತೆ ಸರ್ಕಾರಿ ದಾಖಲೆಗಳಲ್ಲಿ ಲಭ್ಯವಿರುವ ಮಾಹಿತಿಯನ್ನು ವಂಚಕರು ಬಳಸುತ್ತಿರುವುದು ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಪೋಷಣಾ ಟ್ರಾಕರ್ ಸೇರಿದಂತೆ ಇಲಾಖೆಯ ದಾಖಲೆಗಳಲ್ಲಿರುವ ಮಾಹಿತಿಯ ದುರ್ಬಳಕೆ ನಡೆಯುತ್ತಿದೆಯೇ ಎಂಬ ಅನುಮಾನವೂ ಮೂಡಿದೆ. ಈ ಮಾಹಿತಿ ನಿಜವಾಗಿಯೂ ಇಲಾಖೆಯ ವ್ಯವಸ್ಥೆಯಿಂದ ಸೋರಿಕೆಯಾಗಿದೆಯೇ ಅಥವಾ ಬೇರೆ ಮೂಲಗಳಿಂದ ವಂಚಕರಿಗೆ ಲಭ್ಯವಾಗಿದೆಯೇ ಎಂಬುದು ತನಿಖೆಯಿಂದಲೇ ದೃಢಪಡಬೇಕಿದೆ. ಮಾಹಿತಿ ಸೋರಿಕೆಯಾಗಿದೆ ಎಂದು ಸದ್ಯಕ್ಕೆ ಖಚಿತವಾಗಿ ಹೇಳಲು ಸಾಧ್ಯವಿಲ್ಲದಾದ್ದರು, ಫಲಾನುಭವಿಗಳ ವೈಯಕ್ತಿಕ ವಿವರಗಳನ್ನು ಉಲ್ಲೇಖಿಸಿ ವಂಚಕರು ಕರೆ ಮಾಡುತ್ತಿರುವುದು ಮಾಹಿತಿ ಸುರಕ್ಷತೆಯ ಬಗ್ಗೆ ಗಂಭೀರ ಆತಂಕಕ್ಕೆ ಕಾರಣವಾಗಿದೆ.

ತುರ್ತು ಜಾಗೃತಿ ಅಗತ್ಯ: ಗರ್ಭಿಣಿಯರು ಮತ್ತು ಬಾಣಂತಿಯರು ಪೌಷ್ಟಿಕ ಆಹಾರ, ಆರೋಗ್ಯ ತಪಾಸಣೆ ಹಾಗೂ ಸರ್ಕಾರದ ಸೌಲಭ್ಯಗಳಿಗಾಗಿ ಅಂಗನವಾಡಿ ಕೇಂದ್ರಗಳೊಂದಿಗೆ ನಿರಂತರ ಸಂಪರ್ಕದಲ್ಲಿರುತ್ತಾರೆ. ಈ ನಂಬಿಕೆಯನ್ನೇ ದುರುಪಯೋಗಪಡಿಸಿಕೊಂಡು ವಂಚಕರು ಹಣ ಲಪಟಾಯಿಸಲು ಯತ್ನಿಸಿದರೆ, ಅದು ಕೇವಲ ಆರ್ಥಿಕ ಅಪರಾಧವಲ್ಲ; ಸರ್ಕಾರದ ಕಲ್ಯಾಣ ವ್ಯವಸ್ಥೆಯ ಮೇಲಿನ ಜನರ ವಿಶ್ವಾಸಕ್ಕೂ ಧಕ್ಕೆಯುಂಟುಮಾಡುತ್ತದೆ. ಆದ್ದರಿಂದ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ, ಅಂಗನವಾಡಿ ಕಾರ್ಯಕರ್ತೆಯರು ಹಾಗೂ ಪೊಲೀಸ್ ಇಲಾಖೆಯ ಸೈಬರ್ ಅಪರಾಧ ವಿಭಾಗವು ಜಂಟಿಯಾಗಿ ಫಲಾನುಭವಿಗಳಲ್ಲಿ ಜಾಗೃತಿ ಮೂಡಿಸುವ ಅಗತ್ಯವಿದೆ. ವಂಚನೆಯ ದೂರುಗಳನ್ನು ಗಂಭೀರವಾಗಿ ಪರಿಗಣಿಸಿ, ಫಲಾನುಭವಿಗಳ ಮಾಹಿತಿ ಸುರಕ್ಷಿತವಾಗಿರುವುದನ್ನು ಖಚಿತಪಡಿಸಿಕೊಳ್ಳುವುದರ ಜೊತೆಗೆ, ಇಂತಹ ಕರೆಗಳ ಹಿಂದೆ ಇರುವವರನ್ನು ಪತ್ತೆಹಚ್ಚಲು ಕ್ರಮ ಕೈಗೊಳ್ಳಬೇಕಾಗಿದೆ.

ವಂಚನೆಗೆ ಒಳಗಾದರೆ ಏನು ಮಾಡಬೇಕು? ತಕ್ಷಣ ಬ್ಯಾಂಕ್ಗೆ ಮಾಹಿತಿ ನೀಡಿ ಖಾತೆ ಅಥವಾ ಯುಪಿಐ ಪಾವತಿ ವ್ಯವಸ್ಥೆಯನ್ನು ಸುರಕ್ಷಿತಗೊಳಿಸಬೇಕು. ಸೈಬರ್ ವಂಚನೆಯ ದೂರು ಸಲ್ಲಿಸಲು ರಾಷ್ಟ್ರೀಯ ಸೈಬರ್ ಅಪರಾಧ ಸಹಾಯವಾಣಿ 1930ಕ್ಕೆ ಕರೆ ಮಾಡಬೇಕು. ಹಣ ವರ್ಗಾವಣೆಯಾದ ತಕ್ಷಣ ದೂರು ನೀಡುವುದು ಹಣವನ್ನು ತಡೆಹಿಡಿಯುವ ಸಾಧ್ಯತೆಯನ್ನು ಹೆಚ್ಚಿಸಬಹುದು.

ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಯಡಿ ಭಾರತ ಸರಕಾರದ ಮಹತ್ವಕಾಂಕ್ಷಿ ಯೋಜನೆಯಾದ ಪ್ರಧಾನ ಮಂತ್ರಿ ಮಾತ್ರವಂದನ ಯೋಜನೆ ಅಡಿ ಮೊದಲ ಗರ್ಭಿಣಿ ಅಥವಾ ಮಗುವಿನ ತಾಯಿಗೆ ರೂಪಾಯಿ 5,000 ಹಾಗೂ ಎರಡನೇ ಹೆಣ್ಣು ಮಗುವಿನ ತಾಯಿಗೆ ರುಪಾಯಿ 6,000 ಪ್ರೋತ್ಸಾಹ ಧನವನ್ನು ಅಂಗನವಾಡಿ ಕಾರ್ಯಕರ್ತೆರ ಲಾಗಿನ್ ಮೂಲಕ ನೋಂದಣಿ ಮಾಡಿ ನೇರ ನಗದು ವರ್ಗಾವಣೆ ಮೂಲಕ ಸಂಬಂಧಪಟ್ಟ ಫಲಾನುಭವಿಗಳ ಆಧಾರ್ ಸೀಡಿಂಗ್ ಇರುವ ಬ್ಯಾಂಕ್ ಖಾತೆಗೆ ಪಾವತಿಸಲಾಗುತ್ತದೆ. ಸದರಿ ಪ್ರೋತ್ಸಾಹ ಧನ ಪಾವತಿ ಗಾಗಿ ಇಲಾಖೆಯಿಂದ ಯಾವುದೇ ಅಧಿಕಾರಿ ಅಥವಾ ಸಿಬ್ಬಂದಿಗಳು ಫಲಾನುಭವಿಗಳಿಗೆ ದೂರವಾಣಿ ಕರೆ ಮಾಡಿ ಪ್ರೋತ್ಸಾಹ ಧನ ಪಾವತಿಸಲು ಓಟಿಪಿ ಕೇಳುವುದಿಲ್ಲ. ಆನ್ಲೈನ್ ವಂಚಕರು ಈ ರೀತಿ ಪ್ರೋತ್ಸಾಹಧನ ಕೂಡಲೆ ಪಾವತಿಸಲಾಗುತ್ತದೆ ಎಂದು ಓಟಿಪಿ ಕೇಳಿ ಬ್ಯಾಂಕ್ ಖಾತೆಯಿಂದ ಹಣ ದೋಚಿಕೊಳ್ಳುತ್ತಿರುವುದು ಗಮನಕ್ಕೆ ಬಂದಿರುವ ಕಾರಣ, ಸಾರ್ವಜನಿಕರು ಯಾವುದೇ ಕಾರಣಕ್ಕೂ ಓಟಿಪಿಗಳನ್ನು ನೀಡದೆ ಸಂಬಂಧಪಟ್ಟ ಅಂಗನವಾಡಿ ಕೇಂದ್ರಕ್ಕೆ ನೇರವಾಗಿ ಭೇಟಿ ನೀಡಿ ಮಾಹಿತಿ ಖಚಿತಪಡಿಸಿಕೊಳ್ಳಬೇಕು. ಅಪರಿಚಿತರಿಗೆ ಒಟಿಪಿ, ಯುಪಿಐ ಪಿನ್, ಬ್ಯಾಂಕ್ ವಿವರಗಳು ಅಥವಾ ಇತರೆ ಗೌಪ್ಯ ಮಾಹಿತಿಯನ್ನು ನೀಡಬಾರದು.

-ರಾಜಕುಮಾರ್ ರಾಠೋಡ್, ಉಪ ನಿರ್ದೇಶಕರು. ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ ಕಲಬುರಗಿ.