ಬೀಳು, ಬೀಳು, ಬೀಳು
ಬೀಳುವುದಕ್ಕೆ ಧಾರಾಳ ಅವಕಾಶ ಇನ್ನೂ ಉಳಿದಿದೆ, ಬೀಳು,
ವಿಜ್ಞಾನದ ಸೂತ್ರಗಳೆಲ್ಲಾ ನಾಚಿ ತಲೆ ತಗ್ಗಿಸಿ ಬಿದ್ದು ಬಿಡಬೇಕು, ಬೀಳು.
ಇದು ಬೀಳುವ ಆರಂಭ ಮಾತ್ರ, ವಿರಮಿಸದೇ ಬೀಳು,
ಬೀಳುವುದಕ್ಕೆ ನಿನಗಿರುವ ಸಾಮರ್ಥ್ಯದ ಮೇಲೆ ಭರವಸೆ ಇಟ್ಟಿರು,
ಅದನ್ನು ಬೀಳಿಸದಿರು, ನೀನು ಬೀಳು, ಬೀಳು, ಬೀಳುತ್ತಿರು,
ನೀನು ಬೀಳುತ್ತಿರುವುದನ್ನು ಜಗತ್ತೆಲ್ಲಾ ಕಾಣುತ್ತಿದೆ,
ನಿನ್ನಂತೆ ಬೀಳಲಾಗುತ್ತಿಲ್ಲವಲ್ಲಾ! ಎಂದು ಕೊರಗುತ್ತಿದೆ, ಬೀಳು,
ಒಬ್ಬನೇ ಬೀಳದಿರು ನೀನು, ರೂಪಾಯಿಯ ಜೊತೆ ಬೀಳು,
ಅಭಿಮಾನದೊಂದಿಗೆ ಬೀಳು, ಗರ್ವದೊಂದಿಗೆ ಬೀಳು,
ಬೀಳುವ ಮಟ್ಟಿಗೆ ನಿನ್ನ ಸಾಹಸ ಇನ್ನಾರಲ್ಲಿದೆ? ಬೀಳು,
ಪೌರುಷ ಮೆರೆಯುತ್ತಾ ಬೀಳು, ನಿರ್ಲಜ್ಜನಾಗಿ ಬೀಳು,
ನಿರಾತಂಕವಾಗಿ ಬೀಳು, ಆಳಕ್ಕೆ ಬೀಳು, ಬೀಳು, ಬೀಳುತ್ತಿರು,
ಜಗತ್ತು ನಿನ್ನಿಂದ ಕಲಿಯಬಯಸುತ್ತಿದೆ, ಬೀಳುವ ಕಲೆಯನ್ನು
ಬೀಳುವ ಕಲೆಯಲ್ಲಿ ನೀನೊಬ್ಬನೇ ವಿಶ್ವಗುರು, ಬೀಳು,
ಈ ರಂಗದಲ್ಲಿ ನಿನ್ನ ಮಹಿಮೆ ಪ್ರಶ್ನಾತೀತ, ಬೀಳು,
ನಿನ್ನ ಬೀಳಿನಲಿ ಹುಡುಕಲಿವೆ, ಮುಂದಿನ ಪೀಳಿಗೆಗಳು
ತಾವು ಬೀಳುವ ಸಾಧ್ಯತೆಗಳನ್ನು- ಬೀಳು, ಆದರ್ಶವಾಗಿ ಬೀಳು,
ನಿನಗಿಂತ ಆಳಕ್ಕೆ ಬೀಳ ಬಯಸುವ ಸಾಹಸಿಗಳಿಗೆ ಪ್ರೇರಣೆಯಾಗು,
ಬೀಳುವವರಿಗೆಲ್ಲಾ ನೀನೇ ಸಾರ್ವಕಾಲಿಕ ಸ್ಫೂರ್ತಿಯಾಗು, ಬೀಳು,
ಎಲ್ಲರಿಗೆ ಪ್ರೇರಣೆ ನೀಡಲು ಬೀಳು, ಬಿರುಸಾಗಿ ಬೀಳು,
ಬೀಳು, ಸದ್ದು ಗದ್ದಲದೊಂದಿಗೆ ಬೀಳು, ಎಲ್ಲ ದಿಕ್ಕಿಂದ ಬೀಳು,
ರಭಸದೊಂದಿಗೆ ಬೀಳು, ಬೀಳು, ನೀನು ಬೀಳುತ್ತಲೇ ಇರು,
ಹಿಂದೆಂದೂ ಯಾರೊಬ್ಬರೂ ಬಿದ್ದಿಲ್ಲ, ನೀನು ಬಿದ್ದಂತೆ,
ನೀ ಬಿದ್ದ ಆಳಕ್ಕೆ ಬಿದ್ದ ಇನ್ನೊಬ್ಬನಿಲ್ಲ, ಬೀಳು, ಬೀಳುತ್ತಿರು,
ಸಹಸ್ರಮಾನಗಳಿಂದ ನೇರ ನಿಂತಿದ್ದ ಸ್ವಾಭಿಮಾನಿ ಸಮಾಜಕ್ಕೆ
ಬೀಳಲು ಕಲಿಸಿದ ಗುರು ನೀನು, ಬೀಳು, ಗುರುವಾಗಿ ಬೀಳು,
ನಿಂತಲ್ಲೇ ನಿಂತು ಜಡವಾಗಿದ್ದವರಿಗೆ, ಸ್ಥಿರವಾಗಿದ್ದವರಿಗೆ,
ಬುಡಸಹಿತ ಉರುಳಿ ಬೀಳಲು ಕಲಿಸಿದ ಮಹಾನುಭಾವ ನೀನು,
ಬೀಳುವುದೇ ನಿನ್ನ ಪರಮ ಸಾಧನೆ, ಅಸಾಮಾನ್ಯ ಸಾಧನೆ, ಬೀಳು,
ಜಗತ್ತಿಗೆಲ್ಲಾ ನೀನು ಕಲಿಸಿದ ಬೀಳುವ ಕಲೆ ಸುಲಭದ ಕಲೆಯಲ್ಲ,
ಬೀಳುವ ಪ್ರತಿಭೆ ಇಲ್ಲದವರ ಟೀಕೆಗಳಿಗೆ ಹೆದರದಿರು, ಬೀಳು,
ಅಂಜದೆ, ಅಳುಕದೆ, ನಿರಾತಂಕವಾಗಿ ಬೀಳು, ಬೀಳುತ್ತಲೇ ಇರು
ಬೀಳುವುದಿಲ್ಲ ಎಂದು ಪಣತೊಟ್ಟವರನ್ನೆಲ್ಲಾ ಬೀಳಿಸುತ್ತಾ ಬೀಳು,
ನೀನು ಬೀಳು, ಧರ್ಮ-ಕರ್ಮಗಳನ್ನೆಲ್ಲಾ ಬೀಳಿಸುತ್ತಾ ಬೀಳು,
ದೇಶವನ್ನು, ದೇಶವಾಸಿಗಳನ್ನು ಬೀಳಿಸುತ್ತಾ ಬೀಳು,
ವಾಯು, ನೀರು, ಕಾಡು, ಪರ್ವತ, ಪರಿಸರ, ಪ್ರಕೃತಿ
ಎಲ್ಲವನ್ನೂ ಬೀಳಿಸುತ್ತಾ ಬೀಳು, ಬೀಳು, ನೀನು ಬೀಳುತ್ತಿರು,
ಆಚಾರ, ಸಂಸ್ಕಾರಗಳನ್ನೆಲ್ಲಾ ಬೀಳಿಸುತ್ತಾ ಬೀಳು,
ಶೀಲ, ಮಾನಗಳನ್ನೆಲ್ಲಾ ಬೀಳಿಸುತ್ತಾ ಬೀಳು,
ಈ ಯುಗದ ಓ ಮಹಾಪುರುಷ! ಓ ನಮ್ಮ ವಿಶ್ವ ಗುರು!
ವಿಶ್ವವೆಲ್ಲಾ ನೋಡಲಿ, ನಿನ್ನ ಬೀಳುವ ಪ್ರತಿಭೆಯನ್ನು,
ನೀನು ಬೀಳಬಲ್ಲ ಆಳವನ್ನು ಕಣ್ಣಾರೆ ಕಾಣಲಿ ಜಗತ್ತು.
ನಿನ್ನ ಕಂಡಾದರೂ ನಮ್ಮ ಹೊಸ ಪೀಳಿಗೆ ಪಾಠ ಕಲಿಯಲಿ,
ನಿನ್ನ ಬೀಳನ್ನು ಕಂಡು, ಯಾಕೆ ಬೀಳಬಾರದೆಂಬುದನ್ನು ಅರಿಯಲಿ,
ಬೀಳುವ ದುರಂತ ಕಂಡು ಮೇಲಕ್ಕೇರುವ ಮಹಿಮೆಯನ್ನು ತಿಳಿಯಲಿ,
ಮೇಲಕ್ಕೇರುವ ಸಾಹಸಕ್ಕೆ ಹೊರಡಲಿ, ಎತ್ತರಕ್ಕೇರಲಿ, ಸಾಫಲ್ಯ ಪಡೆಯಲಿ,
ನೀಮಾತ್ರ ಬೀಳು, ಬೀಳುತ್ತಿರು, ನಿಶ್ಚಿಂತನಾಗಿ ಪಾತಾಳಕ್ಕೆ ಬೀಳು,
ಬೀಳುವುದಕ್ಕಿನ್ನು ಯಾವ ಆಳವೂ ಉಳಿದಿರಬಾರದು,
ಆ ಮಟ್ಟಕ್ಕೆ ಬೀಳು, ಬೀಳು, ಬೀಳುತ್ತಿರು.
