ಇ20 ಇಂಧನ ಹೇರಿಕೆ ಎಷ್ಟು ವೈಜ್ಞಾನಿಕ?

ಭಾರತದಲ್ಲಿ ಇ20 (ಶೇ. 20 ಎಥೆನಾಲ್ + ಶೇ. 80 ಪೆಟ್ರೋಲ್) ಇಂಧನವನ್ನು ಹಂತಹಂತವಾಗಿ ಜಾರಿಗೆ ತರಲಾಗುತ್ತಿದೆ. ಈ ನೀತಿಯ ಉದ್ದೇಶ ಇಂಧನ ಕ್ಷೇತ್ರದಲ್ಲಿ ಸ್ವಾವಲಂಬನೆ ಸಾಧಿಸುವುದು, ಕಚ್ಚಾ ತೈಲದ ಆಮದು ಅವಲಂಬನೆಯನ್ನು ಕಡಿಮೆ ಮಾಡುವುದು ಹಾಗೂ ಕೃಷಿ ಉತ್ಪನ್ನಗಳಿಗೆ ಹೊಸ ಮಾರುಕಟ್ಟೆ ಸೃಷ್ಟಿಸುವುದಾಗಿದೆ ಎಂಬುದು ಕೇಂದ್ರ ಸರಕಾರದ ಸಮರ್ಥನೆ. ಈ ಉದ್ದೇಶಗಳು ಮಹತ್ವದ್ದಾಗಿದ್ದರೂ, ಯಾವುದೇ ಹೊಸ ಇಂಧನ ನೀತಿಯ ಯಶಸ್ಸನ್ನು ಅದರ ಘೋಷಿತ ಉದ್ದೇಶಗಳಿಂದ ಮಾತ್ರ ಅಳೆಯಲಾಗುವುದಿಲ್ಲ. ಆ ನೀತಿ ದೇಶದಲ್ಲಿರುವ ಕೋಟ್ಯಂತರ ವಾಹನಗಳೊಂದಿಗೆ ಎಷ್ಟು ವೈಜ್ಞಾನಿಕವಾಗಿ ಹೊಂದಿಕೊಳ್ಳುತ್ತದೆ, ಅದರ ಪರಿಣಾಮಗಳನ್ನು ಎಷ್ಟು ಸಮಗ್ರವಾಗಿ ಅಧ್ಯಯನ ಮಾಡಲಾಗಿದೆ ಹಾಗೂ ವಾಹನ ಮಾಲಕರ ಹಿತಾಸಕ್ತಿಯನ್ನು ಎಷ್ಟು ಪರಿಗಣಿಸಲಾಗಿದೆ ಎಂಬುದೇ ನಿರ್ಣಾಯಕ ಪ್ರಶ್ನೆಯಾಗುತ್ತದೆ. ಇ20 ಕುರಿತು ಇಂದು ದೇಶದಲ್ಲಿ ಇದೇ ಪ್ರಶ್ನೆ ಗಂಭೀರ ಚರ್ಚೆಗೆ ಕಾರಣವಾಗಿದೆ.

ಎಥೆನಾಲ್ ಉತ್ಪಾದನೆಯು ರೈತರಿಗೆ ಹೊಸ ಅವಕಾಶಗಳನ್ನು ಕಲ್ಪಿಸಬಹುದು. ಆದರೆ ಅದೇ ಸಂದರ್ಭದಲ್ಲಿ ಕಬ್ಬು ಮತ್ತು ಧಾನ್ಯ ಬೆಳೆಗಳ ವಿಸ್ತರಣೆ, ನೀರಿನ ಬಳಕೆ, ಭೂಬಳಕೆ ಹಾಗೂ ಆಹಾರ ಕೊರತೆ ಕುರಿತ ಪ್ರಶ್ನೆಗಳೂ ಉದ್ಭವಿಸುತ್ತವೆ. ಅವು ಮಹತ್ವದ ಚರ್ಚೆಗಳೇ ಸರಿ. ಆದರೆ ಈ ಲೇಖನದ ಉದ್ದೇಶ ಆ ವಿಚಾರಗಳನ್ನು ವಿಶ್ಲೇಷಿಸುವುದಲ್ಲ. ಇಲ್ಲಿ ಮುಖ್ಯವಾಗಿ ಇ20 ಇಂಧನವು ಈಗಾಗಲೇ ರಸ್ತೆಗಳಲ್ಲಿ ಸಂಚರಿಸುತ್ತಿರುವ ವಾಹನಗಳ ಮೇಲೆ ಯಾವ ರೀತಿಯ ದುಷ್ಪರಿಣಾಮ ಉಂಟುಮಾಡಬಹುದು ಎಂಬುದನ್ನು ವೈಜ್ಞಾನಿಕ ದೃಷ್ಟಿಯಿಂದ ಪರಿಶೀಲಿಸುವುದಾಗಿದೆ.

ದೇಶದ ರಸ್ತೆಗಳಲ್ಲಿ ಸಂಚರಿಸುತ್ತಿರುವ ಒಟ್ಟು ವಾಹನಗಳಲ್ಲಿ 2023 ಮತ್ತು ಅದಕ್ಕೂ ಮೊದಲು ತಯಾರಾದ ವಾಹನಗಳು ಸುಮಾರು ಶೇ. 80-85 ಇರಬಹುದು ಎಂಬ ಅಂದಾಜುಗಳು ವ್ಯಾಪಕವಾಗಿ ಕೇಳಿಬರುತ್ತಿವೆ. ಆದರೆ ಈ ಅಂದಾಜನ್ನು ದೃಢೀಕರಿಸುವ ಅಥವಾ ನಿರಾಕರಿಸುವ ಯಾವುದೇ ಅಧಿಕೃತ ಅಂಕಿಅಂಶವನ್ನು ಕೇಂದ್ರ ಸರಕಾರ ಪ್ರಕಟಿಸಿಲ್ಲ. ಇನ್ನೂ ಗಂಭೀರವಾದ ಸಂಗತಿಯೆಂದರೆ, ಸಂಸತ್ತಿನಲ್ಲಿ ಕೇಳಲಾದ ಪ್ರಶ್ನೆಗೆ ನೀಡಿದ ಉತ್ತರದಲ್ಲಿ, ದೇಶದಲ್ಲಿ ಎಷ್ಟು ವಾಹನಗಳು ಇ20ಗೆ ಸಂಪೂರ್ಣವಾಗಿ ಹೊಂದಾಣಿಕೆಯಾಗುವುದಿಲ್ಲ ಅಥವಾ ಈ ಹೊಸ ಇಂಧನ ನೀತಿಯಿಂದ ಎಷ್ಟು ವಾಹನಗಳ ಮೇಲೆ ಪರಿಣಾಮ ಉಂಟಾಗಬಹುದು ಎಂಬ ಕುರಿತು ಯಾವುದೇ ಅಧಿಕೃತ ಮೌಲ್ಯಮಾಪನ ನಡೆಸಿಲ್ಲ ಎಂದು ಕೇಂದ್ರ ಸರಕಾರ ಸ್ಪಷ್ಟಪಡಿಸಿದೆ.

ಇದು ಕೇವಲ ಆಡಳಿತಾತ್ಮಕ ಕೊರತೆಯಲ್ಲ; ವೈಜ್ಞಾನಿಕ ನೀತಿ ರೂಪಿಸುವ ಪ್ರಕ್ರಿಯೆಯಲ್ಲಿನ ಮೂಲಭೂತ ಪ್ರಶ್ನೆಯಾಗಿದೆ. ಕೋಟ್ಯಂತರ ವಾಹನಗಳ ಮೇಲೆ ಪರಿಣಾಮ ಬೀರುವ ಇಂಧನ ನೀತಿಯನ್ನು ಜಾರಿಗೊಳಿಸುವ ಮೊದಲು, ಪರಿಣಾಮಕ್ಕೊಳಗಾಗುವ ವಾಹನಗಳ ಸಂಖ್ಯೆ, ಅವುಗಳ ತಾಂತ್ರಿಕ ಸ್ಥಿತಿ, ವಾಹನ ಮಾಲಕರಿಗೆ ಉಂಟಾಗಬಹುದಾದ ಆರ್ಥಿಕ ಹೊರೆ, ನಿರ್ವಹಣಾ ವೆಚ್ಚ ಹಾಗೂ ಮಾರುಕಟ್ಟೆಯ ಮೇಲಿನ ಪರಿಣಾಮಗಳನ್ನು ಸಮಗ್ರವಾಗಿ ಅಧ್ಯಯನ ಮಾಡುವುದು ಸಹಜ ನಿರೀಕ್ಷೆಯಾಗಿತ್ತು. ಆದರೆ ಅಂತಹ ಅಧ್ಯಯನದ ಮಾಹಿತಿ ಸಾರ್ವಜನಿಕವಾಗಿ ಲಭ್ಯವಿಲ್ಲ.

2023ಕ್ಕೂ ಮೊದಲು ಮಾರಾಟವಾದ ಬಹುತೇಕ ಪೆಟ್ರೋಲ್ ವಾಹನಗಳನ್ನು ಇ10 ಇಂಧನವನ್ನು ಗಮನದಲ್ಲಿಟ್ಟುಕೊಂಡು ವಿನ್ಯಾಸಗೊಳಿಸಲಾಗಿತ್ತು. 2023ರ ಎಪ್ರಿಲ್ ನಂತರ ಜಾರಿಯಾದ ಹೊಸ ವಾಹನ ನಿಯಮಾವಳಿಗಳ ಹಿನ್ನೆಲೆಯಲ್ಲಿ ಕೆಲವು ಹೊಸ ವಾಹನ ಮಾದರಿಗಳನ್ನು ಮಾತ್ರ ಇ20 ಬಳಕೆಗೆ ಹೊಂದುವಂತೆ ಪ್ರಮಾಣೀಕರಿಸಲಾಗಿದೆ.

ಎಥೆನಾಲ್ ಸಮಸ್ಯೆಗಳ ಬಗ್ಗೆ ಗಮನ ಹರಿಸುವುದಾದರೆ,

ಮೊದಲನೆಯದಾಗಿ ಇದರ ಶಕ್ತಿಮೌಲ್ಯ ಪೆಟ್ರೋಲ್‌ಗಿಂತ ಕಡಿಮೆ. ಇದರಿಂದ ಇ20 ಬಳಸುವ ಕೆಲವು ವಾಹನಗಳಲ್ಲಿ ಸುಮಾರು 3ರಿಂದ 7 ಶೇಕಡಾವರೆಗೆ ಮೈಲೇಜ್ ಕಡಿಮೆಯಾಗುವ ಸಾಧ್ಯತೆ ಇದೆ. ಪ್ರತಿದಿನ ವಾಹನ ಬಳಸುವ ಸಾಮಾನ್ಯ ನಾಗರಿಕರಿಗೆ ಇದು ದೀರ್ಘಾವಧಿಯಲ್ಲಿ ಹೆಚ್ಚುವರಿ ಇಂಧನ ವೆಚ್ಚವಾಗಿ ಪರಿಣಮಿಸಬಹುದು.

ಎರಡನೆಯದಾಗಿ, ಎಥೆನಾಲ್ ನೀರನ್ನು ಸುಲಭವಾಗಿ ಹೀರಿಕೊಳ್ಳುವ ಗುಣ ಹೊಂದಿದೆ. ಇಂಧನದಲ್ಲಿ ನೀರಿನ ಪ್ರಮಾಣ ಹೆಚ್ಚಾದರೆ ಲೋಹದ ಭಾಗಗಳಲ್ಲಿ ತುಕ್ಕು ಉಂಟಾಗುವ ಸಾಧ್ಯತೆ ಹೆಚ್ಚುತ್ತದೆ. ಇದರಿಂದ ಇಂಧನ ವ್ಯವಸ್ಥೆಯ ಬಾಳಿಕೆ ಮತ್ತು ವಿಶ್ವಾಸಾರ್ಹತೆ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯನ್ನು ತಳ್ಳಿಹಾಕಲು ಸಾಧ್ಯವಿಲ್ಲ.

ಮೂರನೆಯದಾಗಿ, ಹೆಚ್ಚಿನ ಪ್ರಮಾಣದ ಎಥೆನಾಲ್ ಹಳೆಯ ವಾಹನಗಳಲ್ಲಿರುವ ರಬ್ಬರ್ ಪೈಪ್‌ಗಳು, ಸೀಲುಗಳು, ಗ್ಯಾಸ್ಕೆಟ್‌ಗಳು ಹಾಗೂ ಕೆಲವು ಪ್ಲಾಸ್ಟಿಕ್ ಭಾಗಗಳ ರಾಸಾಯನಿಕ ಗುಣಲಕ್ಷಣಗಳ ಮೇಲೆ ಪರಿಣಾಮ ಬೀರಬಹುದು. ಅವು ಬೇಗ ಸವೆದುಹೋಗುವುದು, ಗಟ್ಟಿಯಾಗುವುದು ಅಥವಾ ಬಿರುಕು ಬಿಡುವುದು ಸಂಭವಿಸಬಹುದು. ಪರಿಣಾಮವಾಗಿ ಇಂಧನ ಸೋರಿಕೆ ಹಾಗೂ ನಿರ್ವಹಣಾ ವೆಚ್ಚ ಹೆಚ್ಚಾಗುವ ಸಾಧ್ಯತೆಯಿದೆ.

ನಾಲ್ಕನೆಯದಾಗಿ, ಇ20ಗೆ ಅನುಗುಣವಾಗಿ ವಿನ್ಯಾಸಗೊಳಿಸದ ಇಂಧನ ಪಂಪ್, ಫ್ಯೂಯೆಲ್ ಇಂಜೆಕ್ಟರ್ ಹಾಗೂ ಇಂಧನ ಪೂರೈಕೆ ವ್ಯವಸ್ಥೆಯ ಇತರ ಘಟಕಗಳ ಕಾರ್ಯಕ್ಷಮತೆಯ ಮೇಲೂ ದೀರ್ಘಾವಧಿಯಲ್ಲಿ ಪರಿಣಾಮ ಉಂಟಾಗುವ ಸಾಧ್ಯತೆಯನ್ನು ವಿವಿಧ ತಾಂತ್ರಿಕ ಅಧ್ಯಯನಗಳು ಮತ್ತು ವಾಹನ ತಯಾರಕರ ಮಾರ್ಗಸೂಚಿಗಳು ಸೂಚಿಸುತ್ತವೆ.

ಐದನೆಯದಾಗಿ, ಇ20ಗೆ ಹೊಂದಾಣಿಕೆಯಾಗದ ವಾಹನಗಳಲ್ಲಿ ದೀರ್ಘಕಾಲ ಈ ಇಂಧನ ಬಳಸಿದರೆ ಇಂಜಿನ್‌ನ ಬಾಳಿಕೆ ಮೇಲೂ ಪರಿಣಾಮ ಬೀರುವ ಸಾಧ್ಯತೆಯನ್ನು ನಿರಾಕರಿಸಲಾಗುವುದಿಲ್ಲ. ಈ ಕಾರಣಕ್ಕಾಗಿಯೇ ವಾಹನ ತಯಾರಕರು ಯಾವ ಮಾದರಿಗೆ ಎಷ್ಟು ಪ್ರಮಾಣದ ಎಥೆನಾಲ್ ಮಿಶ್ರಿತ ಇಂಧನ ಬಳಸಬಹುದು ಎಂಬುದನ್ನು ಪ್ರತ್ಯೇಕವಾಗಿ ಸೂಚಿಸುತ್ತಾರೆ.

ಆರನೆಯದಾಗಿ, ಎಥೆನಾಲ್ ಉತ್ತಮ ದ್ರಾವಕ ಗುಣ ಹೊಂದಿದೆ. ಹಳೆಯ ವಾಹನಗಳ ಇಂಧನ ಟ್ಯಾಂಕ್ ಹಾಗೂ ಪೈಪ್‌ಗಳಲ್ಲಿ ವರ್ಷಗಳಿಂದ ಸಂಗ್ರಹವಾಗಿರುವ ಕೊಳಕು, ವಾರ್ನಿಷ್ ಮತ್ತು ಇತರ ಅವಶೇಷಗಳನ್ನು ಇದು ಕರಗಿಸಬಹುದು. ಆ ಕಣಗಳು ಫ್ಯೂಯೆಲ್ ಫಿಲ್ಟರ್ ಅಥವಾ ಇಂಜೆಕ್ಟರ್‌ಗೆ ಸೇರಿ ಅವುಗಳನ್ನು ಮುಚ್ಚಿದರೆ ಇಂಜಿನ್ ಸರಾಗವಾಗಿ ಕಾರ್ಯನಿರ್ವಹಿಸದಿರುವುದು, ಸ್ಟಾರ್ಟ್ ಸಮಸ್ಯೆ ಕಾಣಿಸಿಕೊಳ್ಳುವುದು ಹಾಗೂ ಹೆಚ್ಚುವರಿ ನಿರ್ವಹಣೆಯ ಅಗತ್ಯ ಉಂಟಾಗುವ ಸಾಧ್ಯತೆಯಿದೆ.

ಏಳನೆಯದಾಗಿ, ಎಥೆನಾಲ್ ಪೆಟ್ರೋಲ್‌ಗಿಂತ ಹೆಚ್ಚಿನ ಆಮ್ಲಜನಕ ಅಂಶ ಹೊಂದಿರುವ ಇಂಧನವಾಗಿದೆ. ಆದ್ದರಿಂದ ಇ20ಗೆ ಹೊಂದುವಂತೆ ಇಂಜಿನ್‌ನ ಇಂಧನ ಪೂರೈಕೆ ವ್ಯವಸ್ಥೆ ಮತ್ತು ಇಲೆಕ್ಟ್ರಾನಿಕ್ ನಿಯಂತ್ರಣ ವ್ಯವಸ್ಥೆ ಸರಿಹೊಂದಿಸದಿದ್ದರೆ ಕೆಲವು ವಾಹನಗಳಲ್ಲಿ ಕಾರ್ಯಕ್ಷಮತೆಯ ವ್ಯತ್ಯಾಸ ಉಂಟಾಗುವ ಸಾಧ್ಯತೆಯಿದೆ.

ಎಂಟನೆಯದಾಗಿ, ವಾಹನದ ವಾರಂಟಿ ವಿಷಯವೂ ಗಮನಾರ್ಹವಾಗಿದೆ. ಇ20ಗೆ ಅನುಮೋದಿಸದ ವಾಹನಗಳಲ್ಲಿ ಈ ಇಂಧನವನ್ನು ಬಳಸಿದರೆ ನಂತರ ಉಂಟಾಗುವ ಕೆಲವು ಯಾಂತ್ರಿಕ ಸಮಸ್ಯೆಗಳ ವಾರಂಟಿ ವ್ಯಾಪ್ತಿಯ ಕುರಿತು ವಿವಾದಗಳು ಎದುರಾಗುವ ಸಾಧ್ಯತೆಯನ್ನು ಸಂಪೂರ್ಣವಾಗಿ ನಿರಾಕರಿಸಲಾಗುವುದಿಲ್ಲ. ಆದ್ದರಿಂದ ವಾಹನದ ಅಧಿಕೃತ ಮಾರ್ಗಸೂಚಿಯನ್ನು ಪರಿಶೀಲಿಸುವುದು ಅಗತ್ಯವಾಗಿದೆ.

ಒಂಭತ್ತನೆಯದಾಗಿ, ವಾಹನ ಮಾಲಕರಲ್ಲಿ ಅತ್ಯಂತ ದೊಡ್ಡ ಸಮಸ್ಯೆ ಮಾಹಿತಿ ಕೊರತೆ. ಯಾವ ವಾಹನಕ್ಕೆ ಇ20 ಸುರಕ್ಷಿತ, ಯಾವ ವಾಹನಕ್ಕೆ ಸುರಕ್ಷಿತವಲ್ಲ, ಯಾವ ವಾಹನದಲ್ಲಿ ಯಾವ ಮುನ್ನೆಚ್ಚರಿಕೆ ಅಗತ್ಯ ಎಂಬ ಕುರಿತು ಎಲ್ಲರಿಗೂ ಸುಲಭವಾಗಿ ಅರ್ಥವಾಗುವ ರಾಷ್ಟ್ರೀಯ ಮಟ್ಟದ ಮಾಹಿತಿ ವ್ಯವಸ್ಥೆ ಇನ್ನೂ ಕಾಣಿಸುತ್ತಿಲ್ಲ. ಪರಿಣಾಮವಾಗಿ ಅನೇಕ ವಾಹನ ಮಾಲಕರು ಅನುಮಾನದಲ್ಲಿಯೇ ಇಂಧನ ಬಳಸುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಹತ್ತನೆಯದಾಗಿ, ದೇಶಾದ್ಯಂತ ಇ20 ಬಳಕೆ ಹೆಚ್ಚಾಗುತ್ತಿದ್ದಂತೆ ಇ10 ಪೆಟ್ರೋಲ್ ಲಭ್ಯತೆ ಕ್ರಮೇಣ ಕಡಿಮೆಯಾದರೆ, ಹಳೆಯ ವಾಹನಗಳ ಮಾಲಕರಿಗೆ ತಮ್ಮ ವಾಹನಕ್ಕೆ ಸೂಕ್ತವಾದ ಇಂಧನವನ್ನು ಆಯ್ಕೆ ಮಾಡುವ ಅವಕಾಶವೇ ಸೀಮಿತವಾಗುವ ಸಾಧ್ಯತೆಯಿದೆ. ಇದರಿಂದ ಹೊಸ ಇಂಧನ ನೀತಿಯ ಸಂಪೂರ್ಣ ಪರಿಣಾಮವನ್ನು ಸಾಮಾನ್ಯ ಗ್ರಾಹಕರೇ ಭರಿಸಬೇಕಾಗಬಹುದು.

ಹನ್ನೊಂದನೆಯದಾಗಿ, ಇ20 ನೀತಿಯು ವಾಹನ ಮಾರುಕಟ್ಟೆಯ ಮೇಲೂ ಪರೋಕ್ಷ ಪರಿಣಾಮ ಬೀರುವ ಸಾಧ್ಯತೆಯನ್ನು ನಿರ್ಲಕ್ಷಿಸಲು ಸಾಧ್ಯವಿಲ್ಲ. 2023ಕ್ಕೂ ಮೊದಲು ತಯಾರಾದ ವಾಹನಗಳ ಬಗ್ಗೆ ಗ್ರಾಹಕರಲ್ಲಿ ಇ20 ಹೊಂದಾಣಿಕೆಯ ಅನುಮಾನಗಳು ಹೆಚ್ಚಾದರೆ, ಅವುಗಳ ಮರುಮಾರಾಟ ಮೌಲ್ಯ ಮತ್ತು ಬೇಡಿಕೆಯ ಮೇಲೆ ಪರಿಣಾಮ ಉಂಟಾಗಬಹುದು. ಅದೇ ಸಂದರ್ಭದಲ್ಲಿ ಇ20ಗೆ ಹೊಂದುವಂತೆ ಪ್ರಮಾಣೀಕರಿಸಲಾದ ಹೊಸ ವಾಹನಗಳತ್ತ ಬೇಡಿಕೆ ಹೆಚ್ಚಾಗುವ ಸಾಧ್ಯತೆಯೂ ಇದೆ. ಇಂತಹ ಮಾರುಕಟ್ಟೆ ಅಸಮತೋಲನವು ಅನಗತ್ಯ ಬೆಲೆ ಏರಿಳಿತ, ಊಹಾಪೋಹ ಹಾಗೂ ಅಸಂಘಟಿತ ವಹಿವಾಟಿಗೆ ಕಾರಣವಾಗುವ ಸಾಧ್ಯತೆಯನ್ನು ಸಂಪೂರ್ಣವಾಗಿ ತಳ್ಳಿಹಾಕಲು ಸಾಧ್ಯವಿಲ್ಲ. ಆದ್ದರಿಂದ ವಾಹನ ಮಾರುಕಟ್ಟೆಯ ಮೇಲಿನ ಈ ಪರೋಕ್ಷ ಪರಿಣಾಮಗಳ ಕುರಿತೂ ಸಮಗ್ರ ಅಧ್ಯಯನ ಅಗತ್ಯವಾಗಿದೆ.

ಈ ಎಲ್ಲ ಅಂಶಗಳನ್ನು ಒಟ್ಟಾಗಿ ಪರಿಗಣಿಸಿದಾಗ, ಇ20 ಕುರಿತು ನಡೆಯುತ್ತಿರುವ ಚರ್ಚೆ ಕೇವಲ ಇಂಧನ ಅಥವಾ ಪರಿಸರ ನೀತಿಯ ಚರ್ಚೆಯಾಗಿ ಉಳಿಯುವುದಿಲ್ಲ. ಇದು ಕೋಟ್ಯಂತರ ವಾಹನ ಮಾಲಕರ ಆರ್ಥಿಕ ಹಿತಾಸಕ್ತಿ, ವಾಹನಗಳ ಸುರಕ್ಷತೆ, ನಿರ್ವಹಣಾ ವೆಚ್ಚ, ಮರುಮಾರಾಟ ಮೌಲ್ಯ, ಇಂಜಿನ್‌ನ ದೀರ್ಘಾವಧಿಯ ಕಾರ್ಯಕ್ಷಮತೆ ಹಾಗೂ ಸಾರ್ವಜನಿಕ ನೀತಿಗಳನ್ನು ವೈಜ್ಞಾನಿಕ ಆಧಾರದ ಮೇಲೆ ರೂಪಿಸುವ ಅಗತ್ಯದ ಕುರಿತ ಚರ್ಚೆಯಾಗಿದೆ.

ವೈಜ್ಞಾನಿಕ ನೀತಿ ಎಂದರೆ ಹೊಸ ತಂತ್ರಜ್ಞಾನವನ್ನು ಪರಿಚಯಿಸುವುದಷ್ಟೇ ಅಲ್ಲ. ಅದರ ಪರಿಣಾಮಗಳನ್ನು ಮುಂಚಿತವಾಗಿ ಅಧ್ಯಯನ ಮಾಡುವುದು, ಅಪಾಯಗಳನ್ನು ಅಳೆಯುವುದು, ಸಾರ್ವಜನಿಕರಿಗೆ ಪಾರದರ್ಶಕ ಮಾಹಿತಿ ನೀಡುವುದು, ಪರಿವರ್ತನಾ ಅವಧಿಗೆ ಸೂಕ್ತ ಮಾರ್ಗಸೂಚಿಗಳನ್ನು ರೂಪಿಸುವುದು ಹಾಗೂ ಪರಿಣಾಮಕ್ಕೊಳಗಾಗುವ ನಾಗರಿಕರ ಹಿತಾಸಕ್ತಿಯನ್ನು ರಕ್ಷಿಸುವುದೂ ಅದರ ಅವಿಭಾಜ್ಯ ಭಾಗವಾಗಿದೆ.

ಇಂಧನ ಸ್ವಾವಲಂಬನೆ ದೇಶಕ್ಕೆ ಅಗತ್ಯವಾದ ರಾಷ್ಟ್ರೀಯ ಗುರಿಯಾಗಿದೆ. ಆದರೆ ಆ ಗುರಿಯನ್ನು ಸಾಧಿಸುವ ಹೆಸರಿನಲ್ಲಿ ಕೋಟ್ಯಂತರ ವಾಹನ ಮಾಲಕರ ಮೇಲೆ ಪರಿಣಾಮ ಬೀರುವ ಯಾವುದೇ ನೀತಿಯನ್ನು ಜಾರಿಗೊಳಿಸುವ ಮೊದಲು ಅದರ ತಾಂತ್ರಿಕ, ಆರ್ಥಿಕ ಮತ್ತು ಸಾಮಾಜಿಕ ಪರಿಣಾಮಗಳ ಕುರಿತು ಸಮಗ್ರ ವೈಜ್ಞಾನಿಕ ಅಧ್ಯಯನ ನಡೆಸುವುದು, ಅದರ ಫಲಿತಾಂಶಗಳನ್ನು ಸಾರ್ವಜನಿಕರ ಮುಂದಿಡುವುದು ಮತ್ತು ಅಗತ್ಯವಿದ್ದಲ್ಲಿ ಸೂಕ್ತ ಪರಿವರ್ತನಾ ಕ್ರಮಗಳನ್ನು ರೂಪಿಸುವುದು ಉತ್ತಮ ಆಡಳಿತದ ಮೂಲಭೂತ ಕರ್ತವ್ಯವಾಗಿದೆ. ಇಲ್ಲವಾದರೆ ಉದ್ಭವಿಸುವ ಪ್ರಶ್ನೆ ಒಂದೇ.. ಇ20 ನೀತಿಯು ವೈಜ್ಞಾನಿಕ ಅಧ್ಯಯನ ಮತ್ತು ಸಮಗ್ರ ಮೌಲ್ಯಮಾಪನದ ಫಲವೇ ಅಥವಾ ಸಮರ್ಪಕ ಅಧ್ಯಯನವಿಲ್ಲದೆ ಕೋಟ್ಯಂತರ ವಾಹನ ಮಾಲಕರ ಮೇಲೆ ನಡೆಯುತ್ತಿರುವ ಒಂದು ದೊಡ್ಡ ಪ್ರಯೋಗವೇ?