ರಾಜ್ಯದಲ್ಲಿ ‘ಪೋಕ್ಸೋ ಪ್ರಕರಣ’ಗಳ ಸಂಖ್ಯೆಯಲ್ಲಿ ಹೆಚ್ಚಳ

ಬೆಂಗಳೂರು : ರಾಜ್ಯದಲ್ಲಿ ವರ್ಷದಿಂದ ವರ್ಷಕ್ಕೆ ಪೋಕ್ಸೋ(ಲೈಂಗಿಕ ಅಪರಾಧಗಳಿಂದ ಮಕ್ಕಳ ರಕ್ಷಣೆ ಕಾಯ್ದೆ) ಪ್ರಕರಣಗಳು ಹೆಚ್ಚಾಗುತ್ತಿದ್ದು, ಕೇವಲ ಮೂರುವರೆ ವರ್ಷದಲ್ಲೇ ರಾಜ್ಯದ ಎಲ್ಲ ಜಿಲ್ಲೆಗಳಲ್ಲಿ 15 ಸಾವಿರಕ್ಕೂ ಅಧಿಕ ಪೋಕ್ಸೋ ಪ್ರಕರಣಗಳು ದಾಖಲಾಗಿವೆ. ಅದರಲ್ಲಿ ಶೇ.73.09ರಷ್ಟು ಪ್ರಕರಣಗಳು ಬಾಲಕಿಯರ ಮೇಲೆ ನಡೆದಿರುವ ಅತ್ಯಾಚಾರ ಪ್ರಕರಣಗಳೇ ಆಗಿದ್ದು, ಉಳಿದ ಶೇ.26.91ರಷ್ಟು ಪೋಕ್ಸೋ ಕಾಯ್ದೆಯ ಇತರ ಪ್ರಕರಣಗಳೆಂದು ದಾಖಲಾಗಿವೆ.

2023ರಿಂದ 2026ರ ಜುಲೈ ಅಂತ್ಯದವರೆಗೆ ರಾಜ್ಯಾದ್ಯಂತ 15,185 ಪೋಕ್ಸೋ ಪ್ರಕರಣಗಳು ದಾಖಲಾಗಿವೆ. ಈ ಪೈಕಿ 11,100 ಪೋಕ್ಸೋ ಅತ್ಯಾಚಾರ ಪ್ರಕರಣಗಳಾಗಿದ್ದು, 4,081 ಪೋಕ್ಸೋ ಇತರ ಪ್ರಕರಣಗಳು ಅಂದರೆ ಲೈಂಗಿಕ ದೌರ್ಜನ್ಯ, ಲೈಂಗಿಕ ಕಿರುಕುಳ, ಅಶ್ಲೀಲ ಚಿತ್ರಗಳಿಗಾಗಿ ಮಕ್ಕಳನ್ನು ಬಳಕೆ ಮಾಡಿಕೊಂಡಿರುವ ಪ್ರಕರಣಗಳಾಗಿವೆ.

2023ರಲ್ಲಿ ಒಟ್ಟು 3,759 ಪೋಕ್ಸೋ ಪ್ರಕರಣಗಳು ದಾಖಲಾಗಿದ್ದು, ಅದರಲ್ಲಿ 2,712 ಪೋಕ್ಸೋ ಅತ್ಯಾಚಾರ ಪ್ರಕರಣ, 1,047 ಪೋಕ್ಸೋ ಇತರ ಪ್ರಕರಣಗಳಾಗಿವೆ. 2024ರಲ್ಲಿ ಒಟ್ಟು 3,954 ಪೋಕ್ಸೋ ಪ್ರಕರಣಗಳು ದಾಖಲಾಗಿದ್ದು, ಅದರಲ್ಲಿ 2,960 ಪೋಕ್ಸೋ ಅತ್ಯಾಚಾರ ಪ್ರಕರಣ, 994 ಪೊಕ್ಸೊ ಇತರೆ ಪ್ರಕರಣಗಳಾಗಿವೆ. 2025ರಲ್ಲಿ ಒಟ್ಟು 4,561 ಪೊಕ್ಸೊ ಪ್ರಕರಣಗಳು ದಾಖಲಾಗಿದ್ದು, ಅದರಲ್ಲಿ 3,309 ಪೋಕ್ಸೋ ಅತ್ಯಾಚಾರ ಪ್ರಕರಣ, 1,248 ಪೋಕ್ಸೋ ಇತರೆ ಪ್ರಕರಣಗಳಾಗಿವೆ. 2026ರ ಜುಲೈ ಅಂತ್ಯದ ವೇಳೆಗೆ ಒಟ್ಟು 2,911 ಪ್ರಕರಣಗಳು ದಾಖಲಾಗಿದ್ದು, ಅದರಲ್ಲಿ 2,119 ಪೋಕ್ಸೋ ಅತ್ಯಾಚಾರ ಪ್ರಕರಣ, 792 ಪೊಕ್ಸೊ ಇತರ ಪ್ರಕರಣಗಳಾಗಿವೆ.

2023ರಿಂದ ಇಲ್ಲಿಯವರೆಗೆ ಬೆಂಗಳೂರು ನಗರವನ್ನು ಹೊರತುಪಡಿಸಿ ಬೆಂಗಳೂರು ಜಿಲ್ಲಾ ವ್ಯಾಪ್ತಿಯಲ್ಲಿ 428, ಬೆಂಗಳೂರು ದಕ್ಷಿಣ(ರಾಮನಗರ) ಜಿಲ್ಲೆಯಲ್ಲಿ 398, ತುಮಕೂರು ಜಿಲ್ಲೆಯಲ್ಲಿ 671, ಕೆಜಿಎಫ್ ಹೊರತುಪಡಿಸಿ ಕೋಲಾರ ಜಿಲ್ಲೆಯಲ್ಲಿ 407, ಚಿಕ್ಕಬಳ್ಳಾಪುರ 658, ಚಿತ್ರದುರ್ಗ 525, ದಾವಣಗೆರೆ 392, ಶಿವಮೊಗ್ಗ 816, ಹಾವೇರಿ 437, ಮಂಗಳೂರು ಹೊರತುಪಡಿಸಿ ದಕ್ಷಿಣ ಕನ್ನಡ 282, ಉಡುಪಿ 199, ಚಿಕ್ಕಮಗಳೂರು 475, ಉತ್ತರ ಕನ್ನಡ 280 ಪೋಕ್ಸೋ ಪ್ರಕರಣಗಳು ದಾಖಲಾಗಿವೆ.

ಬೆಳಗಾವಿ ನಗರ ಹೊರತುಪಡಿಸಿ ಬೆಳಗಾವಿ ಜಿಲ್ಲೆಯಲ್ಲಿ 550, ಬಾಗಲಕೋಟೆ 260, ವಿಜಯಪುರ 378, ಹುಬ್ಬಳ್ಳಿ-ಧಾರವಾಡ ಅವಳಿ ನಗರ ಹೊರತುಪಡಿಸಿ ಧಾರವಾಡ ಜಿಲ್ಲೆಯಲ್ಲಿ 147, ಗದಗ 173, ಮೈಸೂರು ನಗರ ಹೊರತುಪಡಿಸಿ ಮೈಸೂರು ಜಿಲ್ಲೆಯಲ್ಲಿ 573, ಮಂಡ್ಯ 548, ಚಾಮರಾಜನಗರ 304, ಹಾಸನ 604, ಕೊಡಗು 314, ಕರ್ನಾಟಕ ರೈಲ್ವೇಸ್‌ನಲ್ಲಿ 12 ಪೋಕ್ಸೋ ಪ್ರಕರಣಗಳು ದಾಖಲಾಗಿವೆ.

ಬೆಂಗಳೂರು ನಗರದಲ್ಲಿ 2,201 ಪ್ರಕರಣ ದಾಖಲು

ಬೆಂಗಳೂರು ನಗರವೊಂದರಲ್ಲೇ 2,201 ಪೋಕ್ಸೋ ಪ್ರಕರಣ ದಾಖಲಾಗಿದ್ದು, ಅದರಲ್ಲಿ 1,505 ಬಾಲಕಿಯರ ಮೇಲಿನ ಅತ್ಯಾಚಾರ ಪ್ರಕರಣಗಳಾಗಿವೆ, ಉಳಿದ 696 ಬಾಲಕಿಯರ ಮೇಲಿನ ಇತರ ಲೈಂಗಿಕ ಕಿರುಕುಳ ಪ್ರಕರಣಗಳಾಗಿವೆ. ಇನ್ನು ಮೈಸೂರು ನಗರದಲ್ಲಿ 247, ಹುಬ್ಬಳ್ಳಿ-ಧಾರವಾಡ ಅವಳಿ ನಗರದಲ್ಲಿ 209, ಮಂಗಳೂರಿನಲ್ಲಿ 230, ಬೆಳಗಾವಿ ನಗರದಲ್ಲಿ 120, ಕಲಬುರಗಿ ನಗರದಲ್ಲಿ 123, ಕೆಜಿಎಫ್‌ನಲ್ಲಿ 150 ಪೊಕ್ಸೊ ಪ್ರಕರಣಗಳು ದಾಖಲಾಗಿವೆ.

ಕಲ್ಯಾಣ ಕರ್ನಾಟಕ ಜಿಲ್ಲೆಗಳಲ್ಲಿ 2,197 ಪೋಕ್ಸೋ ಪ್ರಕರಣ ದಾಖಲು

ನಾಲ್ಕು ವರ್ಷದಲ್ಲಿ ಕಲಬುರಗಿ ನಗರ ಒಳಗೊಂಡಂತೆ ಕಲಬುರಗಿಯಲ್ಲಿ 405, ಬೀದರ್ 203, ಯಾದಗಿರಿ 346, ಬಳ್ಳಾರಿ 322, ಕೊಪ್ಪಳ 257, ರಾಯಚೂರು 315, ವಿಜಯನಗರ 349 ಪೊಕ್ಸೊ ಪ್ರಕರಣಗಳು ದಾಖಲಾಗಿವೆ.