ಸಿದ್ದರಾಜು ಕೈ ಹಿಡಿದ ಸಮಗ್ರ ಕೃಷಿ

ಮಂಡ್ಯ: ಸುಮಾರು 15 ವರ್ಷಗಳ ಹಿಂದೆ ರೇಷ್ಮೆ ಬೆಳೆಯುವ ಸಂದರ್ಭದಲ್ಲಿ ಬೆಳೆ ನಷ್ಟವಾಗಿ ಕೃಷಿಯೇ ಬೇಡವೆಂದು ಮಾಗಡಿಗೆ ಹೋಗಿ ಹೋಟೆಲ್ ಉದ್ಯಮ ಆರಂಭಿಸಿದ್ದ, ಮಂಡ್ಯ ಜಿಲ್ಲೆ ಮದ್ದೂರು ತಾಲೂಕಿನ ಹುಲಿಕೆರೆ ಗ್ರಾಮದ ದಿವಂಗತ ಸಿದ್ದಪ್ಪಅವರ ಪುತ್ರ ಎಚ್.ಎಸ್.ಸಿದ್ದರಾಜು, ಮತ್ತೆ ಗ್ರಾಮಕ್ಕೆ ಬಂದು ಸಮಗ್ರ ಕೃಷಿ ಕೈಗೊಂಡು ಮಾದರಿ ಕೃಷಿಕರಾಗಿ ಗಮನ ಸೆಳೆದಿದ್ದಾರೆ.

ರೇಷ್ಮೆ, ಕಬ್ಬು, ಬಾಳೆಯಂತಹ ಸಾಂಪ್ರದಾಯಿಕ ಬೇಸಾಯದ ಜತೆಗೆ ಶ್ರೀಗಂಧಂತಹ, ಅರಣ್ಯ, ತೋಟಗಾರಿಕೆ ಬೆಳೆಗೆ ಆದ್ಯತೆ ನೀಡುವ ಮೂಲಕ ನಾನಾ ಬಗೆಯ ಬೆಳೆಗಳನ್ನು ಬೆಳೆದು ಸಿದ್ದರಾಜು ವಾರ್ಷಿಕ ಸುಮಾರು 15 ಲಕ್ಷ ರೂ. ಆದಾಯ ಪಡೆಯುತ್ತಿದ್ದಾರೆ.

ಒಟ್ಟು 6 ಎಕರೆ ಜಮೀನಿನಲ್ಲಿ ಒಂದೇ ಬೆಳೆ ಅವಲಂಬಿಸದೆ, ಲಭ್ಯವಿರುವ ಜಮೀನಿನ ಪ್ರತಿಯೊಂದು ಭಾಗವನ್ನೂ ಸಮರ್ಪಕವಾಗಿ ಬಳಸಿಕೊಂಡು ವಿವಿಧ ಬೆಳೆಗಳನ್ನು ಸಂಯೋಜಿಸಿದರೆ ಆದಾಯದ ಜತೆಗೆ ಭವಿಷ್ಯದ ಆಸ್ತಿಯನ್ನೂ ಸೃಷ್ಟಿಸಬಹುದು ಎಂಬುದನ್ನು ಸಿದ್ದರಾಜು ಸಾಧಿಸಿ ಇತರರಿಗೆ ಮಾದರಿಯಾಗಿದ್ದಾರೆ.

ಮೂರು ಎಕರೆ ಜಮೀನಿನಲ್ಲಿ ಬಹುಬೆಳೆ ಪದ್ಧತಿ, ದ್ವಿದಳ ಧಾನ್ಯಗಳ ಸಂಯೋಜನೆ, ಶ್ರೀಗಂಧ, ಮಹಾಗನಿಯಂತಹ ದೀರ್ಘಾವಧಿ ಮರಗಳು ಹಾಗೂ ಹಣ್ಣಿನ ಬೆಳೆಗಳನ್ನು ಒಟ್ಟಿಗೆ ನಿರ್ವಹಿಸುತ್ತಿದ್ದಾರೆ. ಇದರಿಂದ ಕೃಷಿ ಭೂಮಿಯ ಸಮರ್ಪಕ ಬಳಕೆಯೊಂದಿಗೆ ವಿಭಿನ್ನ ಮೂಲಗಳಿಂದ ಆದಾಯ ಗಳಿಸುತ್ತಿದ್ದಾರೆ. ಇನ್ನು ಮೂರು ಎಕರೆ ಪ್ರದೇಶದಲ್ಲಿ ರೇಷ್ಮೆ, ಕಬ್ಬು, ಬಾಳೆ, ಸೊಪ್ಪು, ತರಕಾರಿ ಸೇರಿದಂತೆ ಇತರ ಬೆಳೆಗಳನ್ನು ಬೆಳೆಯಲಾಗಿದೆ.

ಸಿದ್ದರಾಜು ಅವರ ಕೃಷಿಯ ಪ್ರಮುಖ ಆಕರ್ಷಣೆ, ಸುಮಾರು 1.20 ಎಕರೆ ಪ್ರದೇಶದಲ್ಲಿ ಐದು ವರ್ಷಗಳ ಪ್ರಾಯದ ಪ್ರಾಯದ ಸೊಗಸಾಗಿ ಬೆಳೆಯುತ್ತಿರುವ 400 ಶ್ರೀಗಂಧದ ಮರಗಳು. ಇದಲ್ಲದೆ, ಇತ್ತೀಚೆಗೆ 100 ಮಹಾಗನಿ ಮರಗಳನ್ನೂ ನಾಟಿ ಮಾಡಿದ್ದಾರೆ. ಈ ಮರಗಳ ನಡುವಿನ ಜಾಗದಲ್ಲಿ ತೊಗರಿ ಸೇರಿದಂತೆ ಇತರ ದ್ವಿದಳ ಧಾನ್ಯ ಬೆಳೆಗಳನ್ನು ಪೋಷಕ ಬೆಳೆಯಾಗಿ ಬೆಳೆಯುತ್ತಿದ್ದಾರೆ. ಉಳಿದ ಸುಮಾರು 1.20 ಎಕರೆ ಜಮೀನಿನಲ್ಲಿ ವೀಳ್ಯದೆಲೆ, ಸುಮಾರು 500 ಬೆಣ್ಣೆ ಹಣ್ಣಿನ ಗಿಡಗಳು, ಚಕ್ಕೆ, ಲವಂಗ, ಜಾಯಿಕಾಯಿ, ಸೀಬೆ, ನೇರಳೆ, ಮಾವಿನಂತಹ ಬಹು ಬೇಡಿಕೆ ಇರುವ ವಿವಿಧ ಹಣ್ಣಿನ ಮರಗಳನ್ನು ಬೆಳೆಸಿದ್ದಾರೆ.

ಸಾವಯವ ಗೊಬ್ಬರ ಬಳಕೆ :

ಸಿದ್ದರಾಜು ಅವರು ಬೆಳೆಗಳಿಗೆ ರಾಸಾಯನಿಕ ಬಳಕೆ ಮಾಡದೆ ಸಂಪೂರ್ಣ ಸಾವಯವ ಗೊಬ್ಬರ ಬಳಸುತ್ತಿದ್ದಾರೆ. ಬೋರ್‌ವೆಲ್ ಕೊರೆಸಿದ್ದು, ಹನಿ ನೀರಾವರಿ ಪದ್ಧತಿ ಅಳವಡಿಸಿದ್ದಾರೆ. ಅವಶ್ಯವಿದ್ದಾಗ ಕೃಷಿ ಕೂಲಿ-ಕಾರ್ಮಿಕರನ್ನು ಬಳಕೆ ಮಾಡಿಕೊಳ್ಳುತ್ತಿದ್ದಾರೆ. ಉಳಿದಂತೆ ಸಿದ್ದರಾಜು ಅವರೇ ಸ್ವತಃ ಕೃಷಿ ಕೆಲಸದಲ್ಲಿ ತೊಡಗಿಕೊಳ್ಳುತ್ತಾರೆ. ಈ ಕೃಷಿ ಕಾಯಕಕ್ಕೆ ಪತ್ನಿ ಕಾಂತಮ್ಮ, ಮಕ್ಕಳಾದ ಎಸ್.ಎಸ್.ಸಿದ್ದಪ್ಪ, ಎಸ್.ಎಸ್.ಸುನೀಲ್‌ಕುಮಾರ್, ಎಸ್.ಎಸ್.ಶಾರದಾ ಇಡೀ ಕುಟುಂಬ ಸಾಥ್ ನೀಡುತ್ತಿದೆ.