Kuknoor | ಗ್ಯಾಸ್ ದರ ಏರಿಕೆ ನಡುವೆ ಒಟಿಪಿ ಕಿರಿಕಿರಿ

ಕುಕನೂರು: ಗ್ಯಾಸ್ ಸಿಲಿಂಡರ್ ದರ ಏರಿಕೆಯಿಂದ ತತ್ತರಿಸಿರುವ ಸಾರ್ವಜನಿಕರಿಗೆ ಸಿಲಿಂಡರ್ ಪಡೆಯುವಾಗ ಎದುರಾಗುತ್ತಿರುವ ಒಟಿಪಿ ಪ್ರಕ್ರಿಯೆ ಮತ್ತಷ್ಟು ಕಿರಿಕಿರಿ ಉಂಟುಮಾಡುತ್ತಿದೆ.

ಪಟ್ಟಣ ಹಾಗೂ ಸುತ್ತಮುತ್ತಲಿನ ಗ್ರಾಮಗಳಿಗೆ ಭಾರತ ಗ್ಯಾಸ್ ಸಿಲಿಂಡರ್ ವಿತರಿಸುವ ಹೊಸಮನಿ ಭಾರತ ಗ್ಯಾಸ್ ಗ್ರಾಮೀಣ ವಿತರಕರಲ್ಲಿ ಬುಕಿಂಗ್, ಕನ್ಫರ್ಮೇಶನ್ ಹಾಗೂ ಡೆಲಿವರಿ ಹಂತದಲ್ಲಿ ಒಟಿಪಿ ನೀಡಬೇಕಾಗುತ್ತಿದೆ. ಇದರಿಂದ ಗ್ರಾಹಕರು ಏಜೆನ್ಸಿ ಕೇಂದ್ರದಲ್ಲಿ 10ರಿಂದ 20 ನಿಮಿಷ ಕಾಯುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಮನೆಗೆ ಸಿಲಿಂಡರ್ ತಲುಪುವುದು ತಡವಾಗುತ್ತಿರುವುದರಿಂದ ಹಲವರು ನೇರವಾಗಿ ಏಜೆನ್ಸಿಗೆ ತೆರಳಿ ಸಿಲಿಂಡರ್ ಪಡೆಯುತ್ತಿದ್ದಾರೆ. ಅಲ್ಲಿಯೂ ವಿತರಕರ ಮೊಬೈಲ್‌ಗೆ ಒಟಿಪಿ ಬರುವವರೆಗೆ ಕಾಯಬೇಕಾಗಿದೆ. ಮೊಬೈಲ್ ಮನೆಯಲ್ಲಿ ಬಿಟ್ಟು ಬಂದಿದ್ದರೆ ಅಥವಾ ಒಟಿಪಿ ಲಭ್ಯವಾಗದಿದ್ದರೆ ಸಿಲಿಂಡರ್ ಪಡೆಯಲು ಸಾಧ್ಯವಾಗುತ್ತಿಲ್ಲ ಎಂದು ಗ್ರಾಹಕರು ದೂರಿದ್ದಾರೆ.

ಈ ಪ್ರಕ್ರಿಯೆಯಿಂದ ಅಕ್ಷರಸ್ಥರು, ಅನಕ್ಷರಸ್ಥರು ಸೇರಿದಂತೆ ಎಲ್ಲ ವರ್ಗದ ಗ್ರಾಹಕರಿಗೂ ತೊಂದರೆಯಾಗುತ್ತಿದೆ. ಸಿಲಿಂಡರ್ ದರ ಏರಿಕೆಯ ಹೊರೆ ಒಂದೆಡೆಯಾದರೆ, ವಿತರಣೆಗೆ ಸಂಬಂಧಿಸಿದ ಒಟಿಪಿ ಪ್ರಕ್ರಿಯೆ ಮತ್ತೊಂದೆಡೆ ಗಾಯದ ಮೇಲೆ ಬರೆ ಎಳೆದಂತಾಗಿದೆ ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಈ ಕುರಿತು ವಿತರಕರನ್ನು ಪ್ರಶ್ನಿಸಿದಾಗ, ಬುಕಿಂಗ್ ಖಚಿತಪಡಿಸಲು ಕನ್ಫರ್ಮೇಶನ್ ಒಟಿಪಿ ಅಗತ್ಯವಿದೆ. ಡೆಲಿವರಿ ಸಂದರ್ಭದಲ್ಲಿ ಮತ್ತೊಂದು ಒಟಿಪಿ ನೀಡಬೇಕು. ಗ್ರಾಹಕರು ಮತ್ತೆ ಏಜೆನ್ಸಿಗೆ ತೆರಳಬೇಕಾಗದಂತೆ ಹಾಗೂ ವಿತರಣೆಯಲ್ಲಿ ಗೊಂದಲ ಉಂಟಾಗದಂತೆ ಈ ವ್ಯವಸ್ಥೆ ಮಾಡಲಾಗಿದೆ ಎಂದು ತಿಳಿಸಿದ್ದಾರೆ.

ಒಟಿಪಿ ಪ್ರಕ್ರಿಯೆಯನ್ನು ಸರಳಗೊಳಿಸಿ, ಗ್ರಾಹಕರು ಅನಗತ್ಯವಾಗಿ ಕಾಯುವ ಪರಿಸ್ಥಿತಿ ತಪ್ಪಿಸಬೇಕು. ನಿಗದಿತ ದರದಲ್ಲಿ ಸಿಲಿಂಡರ್ ವಿತರಿಸಿ, ಸಾರ್ವಜನಿಕರಿಗೆ ಸುಲಭವಾಗುವ ವ್ಯವಸ್ಥೆ ಕಲ್ಪಿಸಬೇಕು ಎಂದು ಗ್ರಾಹಕರು ಒತ್ತಾಯಿಸಿದ್ದಾರೆ.