ಕುಂದಾನಗರಿಯ ಸೊಸೆ ಕರ್ನಲ್ ಸೋಫಿಯಾ ಖುರೇಶಿ
ಜಮ್ಮು-ಕಾಶ್ಮೀರದ ಪಹಲ್ಗಾಮ್‌ನಲ್ಲಿ ಭಾರತೀಯರ ಹತ್ಯಾಕಾಂಡಕ್ಕೆ ಪ್ರತೀಕಾರವಾಗಿ ನಡೆದ ‘ಆಪರೇಷನ್ ಸಿಂಧೂರ’ದ ಕುರಿತು ಮಾಹಿತಿ ನೀಡಲು ನಡೆಸಿದ ಸುದ್ದಿಗೋಷ್ಠಿಯ ನೇತೃತ್ವವನ್ನು ಭಾರತೀಯ ಸಶಸ್ತ್ರಪಡೆಗಳ ಇಬ್ಬರು ಹಿರಿಯ ಮಹಿಳಾ ಅಧಿಕಾರಿಗಳೇ ವಹಿಸಿದ್ದು ಗಮನಾರ್ಹವಾಗಿದೆ. ವಾಯು ಪಡೆಯ ವಿಂಗ್ ಕಮಾಂಡರ್ ವ್ಯೋಮಿಕಾ ಸಿಂಗ್ ಮತ್ತು ಭಾರತೀಯ ಸೇನೆಯ ಕರ್ನಲ್ ಸೋಫಿಯಾ ಖುರೇಷಿ ಅವರು ಕಾರ್ಯಾಚರಣೆಯ ಇಂಚಿಂಚು ಮಾಹಿತಿಯನ್ನು ಹಂಚಿಕೊಂಡಿದ್ದಾರೆ. ಭಾರತ ಪಾಕಿಸ್ತಾನದ ಉಗ್ರಗಾಮಿ ನೆಲೆಗಳ ಮೇಲೆ ವೈಮಾನಿಕ ದಾಳಿ ನಡೆಸಿದಾಗ, ಆ ಕಾರ್ಯಾಚರಣೆಗೆ ‘ಆಪರೇಷನ್ ಸಿಂಧೂರ’ ಎಂದು ಕರೆಯಲಾಯಿತು. ಈ ಮಿಷನ್‌ನಲ್ಲಿ ಲೆಫ್ಟಿನೆಂಟ್ ಕರ್ನಲ್ ಸೋಫಿಯಾ ಖುರೇಷಿ ಮುಂಚೂಣಿಯಲ್ಲಿದ್ದರು. ಇವರೇ ಅಂತರ್‌ರಾಷ್ಟ್ರಿಯ ಮಾಧ್ಯಮಗಳಿಗೆ ಮಾಹಿತಿ ನೀಡುತ್ತಿದ್ದರು.
ಆಪರೇಷನ್ ಸಿಂಧೂರ ಕಾರ್ಯಾಚರಣೆ ಬಗ್ಗೆ ಜಗತ್ತಿಗೆ ಎಳೆ ಎಳೆಯಾಗಿ ಬಿಚ್ಚಿಟ್ಟ ಕರ್ನಲ್ ಸೋಫಿಯಾ ಖುರೇಶಿಯವರು ಕರ್ನಾಟಕದ ಕುಂದಾನಗರಿ ಬೆಳಗಾವಿಯ ಹೆಮ್ಮೆಯ ಸೊಸೆಯಾಗಿದ್ದಾರೆ. ಅವರ ಪತಿ ಕರ್ನಲ್ ತಾಜುದ್ದೀನ್ ರವರು ಗೋಕಾಕ್ ತಾಲೂಕಿನ ಕೊಣ್ಣೂರಿನವರು. ಕರ್ನಲ್ ತಾಜುದ್ದೀನ್‌ಅವರು ಸಹ ಸೇನೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ಕರ್ನಲ್ ಸೋಫಿಯಾ ಖುರೇಶಿಯವರು ಮೂಲತಃ ಗುಜರಾತ್ ರಾಜ್ಯದ ಬರೋಡಾದಲ್ಲಿ 1981ರಲ್ಲಿ ಜನಿಸಿದವರು. ಇವರು ಸೇನಾ ಹಿನ್ನೆಲೆಯಿಂದ ಬಂದವರಾಗಿದ್ದಾರೆ. ಖುರೇಷಿಯವರ ತಾತನವರು ಸಹ ಭಾರತೀಯ ಸೇನೆಯಲ್ಲಿ ಕರ್ತವ್ಯ ನಿರ್ವಹಿಸಿದ್ದಾರೆ. ಇವರ ತಂದೆಯವರು ಸಹ ಸೈನ್ಯದಲ್ಲಿ ಕಾರ್ಯ ನಿರ್ವಹಿಸಿದ್ದಾರೆ. ಅವರು ಹುಟ್ಟಿದ್ದು, ಬೆಳೆದಿದ್ದು ಎಲ್ಲವೂ ಗುಜರಾತಿನಲ್ಲಿ. ಅವರು ಜೀವ ರಸಾಯನ ಶಾಸ್ತ್ರದಲ್ಲಿ ಸ್ನಾತಕೋತ್ತರ ಪದವಿಯನ್ನು 1977ರಲ್ಲಿ ಮಹಾರಾಜ ಸಯ್ಯಾಜಿರಾವ್ ಯುನಿವರ್ಸಿಟಿಯಿಂದ ಪಡೆದಿರುವರು. 1999ರಲ್ಲಿ ಚೆನ್ನೈನ ಅಧಿಕಾರಿಗಳ ತರಬೇತಿ ಅಕಾಡಮಿಗೆ ಸೇರಿದರು. ಆಫೀಸರ್ಸ್‌ ಟ್ರೈನಿಂಗ್ ಅಕಾಡಮಿ ಮೂಲಕ ಲೆಪ್ಟಿನೆಂಟ್ ಆಗಿ ನಿಯೋಚಿತಗೊಂಡರು, ಭಾರತೀಯ ಸೇನೆಯ ಪ್ರಮುಖ ಶಾಖೆಯಾದ ಕೋರ್ ಆಫ್ ಸಿಗ್ನಲ್ಸ್ ನಲ್ಲಿದ್ದ ಸೋಫಿಯಾರವರು ತಾಜುದ್ದೀನ್‌ರವರನ್ನು ಪರಸ್ಪರ ಪ್ರೀತಿಸಿ 2015ರಲ್ಲಿ ಮದುವೆಯಾದರು. ಈಗ ಸೋಫಿಯಾ ಜಮ್ಮುವಿನಲ್ಲಿ ಕರ್ನಲ್ ಆಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಅವರ ಪತಿ ತಾಜುದ್ದೀನ್ ಅವರು ಝಾನ್ಸಿಯಲ್ಲಿ ಕರ್ನಲ್ ಆಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಸೋಫಿಯಾ ಆಕಸ್ಮಿಕವಾಗಿ ಸೈನ್ಯಕ್ಕೆ ಸೇರಿದವರಲ್ಲ. ಅದು ಕಾಕತಾಳೀಯವೂ ಅಲ್ಲ. ಸೇನೆಯಲ್ಲಿರುವ ಪತಿಯನ್ನೇ ಅವರು ಆಯ್ಕೆ ಮಾಡಿಕೊಂಡಿರುವುದೂ ಆಕಸ್ಮಿಕವಲ್ಲ ಹಾಗೆಯೇ ಒಬ್ಬ ಮುಸ್ಲಿಮ್ ಹೆಣ್ಣುಮಗಳಿಗೆ ಇಂತಹ ಸಂದರ್ಭವೊಂದು ಒದಗಿ ಬಂದದ್ದೂ ಕಾಕತಾಳೀಯವಲ್ಲ.
ಸೋಫಿಯಾ ಖುರೇಷಿ ಯವರು ಈಶಾನ್ಯದಲ್ಲಿ ಪ್ರವಾಹ ಪರಿಹಾರ ಕಾರ್ಯಗಳು ಮತ್ತು ಯು.ಎನ್. ಶಾಂತಿ ಪಾಲನಾ ಕಾರ್ಯಾಚರಣೆಗಳಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಅವರು ಬಹುರಾಷ್ಟ್ರೀಯ ಸೇನಾ ತುಕಡಿಯನ್ನು ಮುನ್ನಡೆಸಿದ ಮೊದಲ ಭಾರತೀಯ ಮಹಿಳಾ ಅಧಿಕಾರಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಅವರ ಮುತ್ತಜ್ಜಿ ರಾಣಿ ಲಕ್ಷ್ಮೀಬಾಯಿಯ ಸಂಗಡ ಇದ್ದು ಬ್ರಿಟಿಷರಿಗೆ ಸಿಂಹ ಸ್ವಪ್ನವಾಗಿದ್ದರಂತೆ. ಅಂತಹ ಮನೆತನದ ಕುಡಿ ಸೋಫಿಯಾ ಆಗಿದ್ದಾರೆ. ಸೋಫಿಯಾ ಈಗ ಭಾರತದ ಕಣ್ಮಣಿಯಾಗಿದ್ದಾರೆ.
ಇವರು 2006ರಲ್ಲಿ ಕಾಂಗೋದಲ್ಲಿ ನಡೆದ ವಿಶ್ವಸಂಸ್ಥೆಯ ಶಾಂತಿಪಾಲನಾ ಕಾರ್ಯಾಚರಣೆಯಲ್ಲಿ ಸೇವೆ ಸಲ್ಲಿಸಿದ್ದಾರೆ. 2016ರಲ್ಲಿ ಇಕ್ಸಸ್ಯೆರ್ಸ್ ಫೋರ್ಸ್ 18 ಎಂಬ ಬಹುರಾಷ್ಟ್ರೀಯ ಮಿಲಿಟರಿ ಸಮರಾಭ್ಯಾಸದಲ್ಲಿ ಭಾರತೀಯ ಸೇನಾ ತುಕಡಿಯನ್ನು ಮುನ್ನಡೆಸಿದ ಮೊದಲ ಮಹಿಳಾ ಅಧಿಕಾರಿಯಾಗಿದ್ದಾರೆ. ಇವರು ಪಂಜಾಬ್ ಗಡಿಯಲ್ಲಿ ನಡೆದ ಆಪರೇಷನ್ ಪರಾಕ್ರಮ್‌ನಲ್ಲಿ ಭಾಗವಹಿಸಿದ್ದರು. 2010ರಿಂದ ಹೊಸದಿಲ್ಲಿಯಲ್ಲಿರುವ ವಿಶ್ವಸಂಸ್ಥೆಯ ಶಾಂತಿಪಾಲನಾ ಕಾರ್ಯಾಚರಣೆಗಳ ಕೇಂದ್ರದೊಂದಿಗೆ ಕೆಲಸ ಮಾಡುತ್ತಿದ್ದಾರೆ.
ಸೈನ್ಯದಲ್ಲಿದ್ದ ಸೋಫಿಯಾ ಅವರ ತಂದೆ ತಾಜ್ ಮುಹಮ್ಮದ್ ಖುರೇಷಿಯವರು ಕೂಡ ಬಾಂಗ್ಲಾದೇಶದ ಯುದ್ಧದಲ್ಲಿ ಹೋರಾಡಿದ್ದಾರೆ. ಸರಕಾರ ತನಗೆ ಅವಕಾಶ ನೀಡಿದರೆ ತಾನೇ ಹೋಗಿ ಪಾಕಿಸ್ತಾನವನ್ನು ನಾಶ ಮಾಡುತ್ತೇನೆ. ಪಾಕ್ ವಿಶ್ವ ಭೂಪಟದಲ್ಲಿ ಸ್ಥಾನ ಪಡೆಯಲು ಅರ್ಹವಲ್ಲ ಎಂದು ಹೇಳುತ್ತಾರೆ. ‘‘ಸೋಫಿಯಾ ಸೈನ್ಯದಲ್ಲಿದ್ದ ತನ್ನ ತಂದೆ ಮತ್ತು ಅಜ್ಜನ ಹೆಜ್ಜೆಗಳನ್ನು ಅನುಸರಿಸಲು ಬಯಸಿದ್ದಳು. ದೊಡ್ಡವಳಾಗಿ ಸೈನ್ಯಕ್ಕೆ ಸೇರುತ್ತೇನೆಂದು ಬಾಲ್ಯದಲ್ಲಿ ಹೇಳುತ್ತಿದ್ದಳು. ನಮ್ಮ ಮಗಳು ದೇಶಕ್ಕಾಗಿ ಮಾಡಿದ ಕೆಲಸದಿಂದ ನಮಗೆ ತುಂಬಾ ಸಂತೋಷವಾಗಿದೆ. ಆಕೆಯ ಇಂದಿನ ಸಾಧನೆ ದೇಶದ ಜನತೆ ತಮ್ಮ ಹೆಣ್ಣು ಮಕ್ಕಳಿಗೆ ಶಿಕ್ಷಣ ನೀಡಲು ಪ್ರೇರಣೆ ನೀಡುತ್ತದೆ’’ ಎಂದು ಕರ್ನಲ್ ಸೋಫಿಯಾ ಖುರೇಷಿ ಅವರ ತಾಯಿ ಹಲೀಮಾ ಖುರೇಷಿಯವರು ಹೇಳುತ್ತಾರೆ. ಇಂತಹ ದಿಟ್ಟ ಮಹಿಳೆ ಸೋಫಿಯಾರವರು ಕರ್ನಾಟಕದ ಸೊಸೆಯಾಗಿರುವುದು ಕನ್ನಡಿಗರಲ್ಲಿ ಹೆಮ್ಮೆ ಮೂಡಿಸಿರುವುದಂತೂ ನಿಜ.
‘‘ಸೊಸೆಯನ್ನು ಟಿ.ವಿ.ಯಲ್ಲಿ ನೋಡಿದ ಮೇಲೆ ಹೆಮ್ಮೆ ಮತ್ತು ಖುಷಿಯಾಗಿದೆ. ಅವರು ನಮ್ಮ ಕರ್ನಾಟಕದ ಗೌರವ ಹೆಚ್ಚಿಸಿದ್ದಾರೆ. ದೇಶಕ್ಕಾಗಿ ದುಡಿಯಿರಿ ಎಂದು ಮಕ್ಕಳಿಗೆ ಹೇಳಿದ್ದೆ. ಮಕ್ಕಳು ದೇಶ ಸೇವೆ ಸಲ್ಲಿಸುತ್ತಿದ್ದಾರೆ. ಇಬ್ಬರಿಗೂ ಗುಜರಾತ್‌ನಲ್ಲಿ ಮದುವೆ ಮಾಡಿದ್ದೇವೆ. ಇಬ್ಬರೂ ಕರ್ನಲ್ ಆಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಸೊಸೆ ಜತೆಗೆ ಮಾತನಾಡಿಲ್ಲ. ಮಗನ ಜೊತೆಗೆ ಮಾತನಾಡಿದ್ದು ಹಬ್ಬದ ಸಂಭ್ರಮದಂತೆ ಆಗಿದೆ. ಸ್ವಾಮೀಜಿಗಳು, ಸ್ಥಳೀಯ ಜನರು ಎಲ್ಲರೂ ನನಗೆ ಗೌರವ ಸಲ್ಲಿಸುತ್ತಿದ್ದಾರೆ’’ ಎಂದು ಸೋಫಿಯಾ ಮಾವ ಗೌಸ್ ಸಾಬ್ ಹೇಳುತ್ತಾರೆ. ‘‘ಸೊಸೆ ಬೆಳಗಾವಿಗೆ ಬಂದಾಗ ‘ನಿಮ್ಮೂರು ಚಲೋ ಐತಿ, ನಿಮ್ಮೂರು ನ್ಯಾಚುರಲ್ ಆಗಿದೆ’ ಅಂತ ಹೇಳ್ತಾಳೆ’’ ಎನ್ನುತ್ತಾರೆ ಅವರು. ಗೌಸ್‌ಸಾಬ್ ಜಮೀನಿನಲ್ಲಿ ಕೆಲಸ ಮಾಡಿ ಮಕ್ಕಳನ್ನು ಓದಿಸಿದ್ದಾರೆ. ಅವರ ಇಬ್ಬರು ಮಕ್ಕಳು ಕರ್ನಲ್ ಸೇವೆಯಲ್ಲಿದ್ದಾರೆ. ಒಬ್ಬ ಮಗ ಅಗ್ನಿ ಶಾಮಕದಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ.
ಸೈನ್ಯದಲ್ಲಿ, ಪೊಲೀಸ್ ಇಲಾಖೆಗಳಲ್ಲಿ ಮುಸ್ಲಿಮರನ್ನು ಸಂಶಯದ ದೃಷ್ಟಿಯಿಂದ ನೋಡುತ್ತಿರುವ ಪ್ರಸಕ್ತ ಸಂದರ್ಭದಲ್ಲಿ ಭಾರತದ ಜನಸಂಖ್ಯೆಯಲ್ಲಿ ಶೇ. 14ರಷ್ಟು ಮುಸ್ಲಿಮರಿದ್ದರೆ, ಸೈನ್ಯದಲ್ಲಿ ಮಾತ್ರ ಅವರ ಪ್ರಾತಿನಿಧ್ಯ ಕೇವಲ ಶೇ. 2 ಮಾತ್ರ ಇದೆ. ಕಾರ್ಗಿಲ್ ಯುದ್ಧದಲ್ಲಿ ಮಡಿದ ಸೈನಿಕರಲ್ಲಿ ಶೇ. 30ರಷ್ಟು ಮುಸ್ಲಿಮರಾಗಿದ್ದರು. ಮುಸ್ಲಿಮ್ ದ್ವೇಷ ಬೆಳೆಸುತ್ತಿರುವ ಕೋಮುವಾದಿಗಳು ಈ ಹೆಣ್ಣುಮಗಳನ್ನು ನೋಡಿ ಪಾಠ ಕಲಿಯಬೇಕಿದೆ.
ಆಪರೇಷನ್ ಸಿಂಧೂರಗೆ ಕೇವಲ ಕರ್ನಾಟಕದ ಸೊಸೆಯ ಸಂಬಂಧ ಮಾತ್ರ ಇರುವುದಲ್ಲ. ಉಗ್ರರ ನೆಲೆಗಳನ್ನು ಧ್ವಂಸ ಮಾಡಿದ ಡ್ರೋನ್ ಕೂಡ ಕರ್ನಾಟಕದ್ದು ಎಂಬುದು ಕೂಡಾ ವಿಶೇಷವಾಗಿದೆ. ಪಾಕಿಸ್ತಾನಿ ಉಗ್ರರನ್ನು ಉಡಾಯಿಸಿದ್ದು ಬೆಂಗಳೂರಿನ ಡ್ರೋನ್. ಸಿಂಧೂರದ ಸಿಂಹಿಣಿಯರು ಉಗ್ರರ 9 ನೆಲೆಗಳನ್ನು ಧ್ವಂಸ ಮಾಡುವುದರ ಮೂಲಕ ನಾರಿ ಶಕ್ತಿಯ ಪರಿಚಯವನ್ನು ಶತ್ರು ರಾಷ್ಟ್ರಕ್ಕೆ ಮಾಡಿ ಕೊಟ್ಟಿದ್ದಾರೆ. ಇದನ್ನು ಹಬ್ಬದಂತೆ ಗೋಕಾಕ್‌ನ ಜನರು ಪಟಾಕಿ ಸಿಡಿಸಿ ಸಂಭ್ರಮಿಸಿದ್ದಾರೆ.
