ಮಂಗಳೂರು ನೈಋತ್ಯ ರೈಲ್ವೆ ವ್ಯಾಪ್ತಿಗೆ: ಕೇರಳಂ ಆಕ್ಷೇಪ ಸಲ್ಲದು

ಲಾಭ ಕಳೆದುಕೊಳ್ಳುವ ಭಯವೇ ವಿರೋಧಕ್ಕೆ ಕಾರಣವೇ

ಇಂದು ಮಂಗಳೂರನ್ನು ಪಾಲಕ್ಕಾಡ್ ವಿಭಾಗದಿಂದ ಬೇರ್ಪಡಿಸುವ ಕ್ರಮಕ್ಕೆ ವಿರೋಧ ವ್ಯಕ್ತವಾಗುತ್ತಿರುವುದರ ಹಿಂದೆ ಮಂಗಳೂರಿನ ಮೇಲಿನ ಕಾಳಜಿಗಿಂತ, ಮಂಗಳೂರಿನಿಂದ ದೊರೆಯುತ್ತಿದ್ದ ಆದಾಯದ ಪಾಲು ಕಳೆದುಕೊಳ್ಳುವ ಆತಂಕವೇ ಹೆಚ್ಚಿದೆಯೇ ಎಂಬ ಪ್ರಶ್ನೆ ಸಹಜವಾಗಿ ಮೂಡುತ್ತದೆ.

ಮಂಗಳೂರು ಪಾಲಕ್ಕಾಡ್ ವಿಭಾಗದಿಂದ ಬೇರ್ಪಟ್ಟು ನೈಋತ್ಯ ರೈಲ್ವೆಯ ಭಾಗವಾದರೆ, ರೈಲ್ವೆ ಆಡಳಿತ ಕರ್ನಾಟಕದ ಅಗತ್ಯಗಳಿಗೆ ಹೆಚ್ಚು ನಿಕಟವಾಗಲಿದೆ. ಇದರಿಂದ ಮಂಗಳೂರಿನ ಪ್ರಯಾಣಿಕರಿಗೆ ಉತ್ತಮ ರೈಲು ಸಂಪರ್ಕ, ಮೂಲಸೌಕರ್ಯ ಅಭಿವೃದ್ಧಿ ಮತ್ತು ಆಡಳಿತಾತ್ಮಕ ಸ್ಪಂದನ ದೊರೆಯುವ ಸಾಧ್ಯತೆ ಹೆಚ್ಚಲಿದೆ.

ಮಂಗಳೂರು ರೈಲ್ವೆ ಭಾಗವನ್ನು ಕೇರಳದ ಪಾಲಕ್ಕಾಡ್ ವಿಭಾಗದಲ್ಲೇ ಮುಂದುವರಿಸಬೇಕು ಎಂದು ಆಗ್ರಹಿಸಿ ಕೇರಳದ ಸಂಸದರು ನಿರಶನಕ್ಕೆ ಮುಂದಾಗುತ್ತಿರುವುದು ಈಗ ಹೊಸ ಚರ್ಚೆಗೆ ಕಾರಣವಾಗಿದೆ. ಆದರೆ, ಕರ್ನಾಟಕದ ಅತ್ಯಂತ ಪ್ರಮುಖ ನಗರಗಳಲ್ಲಿ ಒಂದಾದ ಮಂಗಳೂರಿನ ರೈಲ್ವೆ ಆಡಳಿತ ಇಷ್ಟು ವರ್ಷಗಳ ಕಾಲ ಕರ್ನಾಟಕದ ಹೊರಗಿನ ಪಾಲಕ್ಕಾಡ್ ವಿಭಾಗದ ಅಧೀನದಲ್ಲಿದ್ದದ್ದು ರಾಜ್ಯಕ್ಕೆ ಎಷ್ಟು ನಷ್ಟ ತಂದಿದೆ ಎಂಬ ಪ್ರಶ್ನೆಯನ್ನು ಮೊದಲು ಕೇಳಬೇಕಾಗಿದೆ.

ಪ್ರತ್ಯೇಕ ರೈಲ್ವೆ ವಿಭಾಗದ ಬೇಡಿಕೆ ಹಳೆಯದು

ಮಂಗಳೂರನ್ನು ಪಾಲಕ್ಕಾಡ್ ವಿಭಾಗದಿಂದ ಬೇರ್ಪಡಿಸಿ ಪ್ರತ್ಯೇಕ ರೈಲ್ವೆ ವಿಭಾಗವನ್ನಾಗಿ ಮಾಡಬೇಕು ಅಥವಾ ನೈಋತ್ಯ ರೈಲ್ವೆಯ ವ್ಯಾಪ್ತಿಗೆ ತರಬೇಕು ಎಂಬ ಬೇಡಿಕೆ ಇಂದು ನಿನ್ನೆಯದಲ್ಲ. ಈ ಬಹುಮುಖ್ಯ ಬೇಡಿಕೆಗೆ ಕೇಂದ್ರ ಸರಕಾರ ಈಗ ಸ್ಪಂದಿಸಿರುವುದು ಸ್ವಾಗತಾರ್ಹ. ರೈಲ್ವೆ ಸಚಿವರಾದ ಅಶ್ವಿನಿ ವೈಷ್ಣವ್ ಹಾಗೂ ವಿ. ಸೋಮಣ್ಣ ಅವರು ಸೂಕ್ತ ನಿರ್ಧಾರ ಕೈಗೊಂಡಿರುವುದು ಮಂಗಳೂರಿನ ರೈಲ್ವೆ ಅಭಿವೃದ್ಧಿಗೆ ಹೊಸ ದಿಕ್ಕು ನೀಡುವ ನಿರೀಕ್ಷೆ ಮೂಡಿಸಿದೆ.

ಮಂಗಳೂರಿನ ಆದಾಯ,

ಅಭಿವೃದ್ಧಿ ಮಾತ್ರ ಪಾಲಕ್ಕಾಡ್‌ಗೆ?

ಇಷ್ಟು ದೀರ್ಘಕಾಲ ಮಂಗಳೂರು ಪಾಲಕ್ಕಾಡ್ ವಿಭಾಗದ ಆಡಳಿತದಲ್ಲಿದ್ದರೂ, ಮಂಗಳೂರಿನ ರೈಲ್ವೆ ಮೂಲಸೌಕರ್ಯಕ್ಕೆ ತಕ್ಕಮಟ್ಟಿನ ಅಭಿವೃದ್ಧಿ ಏಕೆ ಆಗಲಿಲ್ಲ ಎಂಬುದಕ್ಕೆ ಕೇರಳದ ನಾಯಕರು ಉತ್ತರಿಸಬೇಕು.

ಮಂಗಳೂರಿನಿಂದ ಅಪಾರ ಪ್ರಮಾಣದ ಸರಕು ಸಾಗಣೆಯಾಗುತ್ತಿದ್ದು, ಇದರಿಂದ ಪಾಲಕ್ಕಾಡ್ ವಿಭಾಗಕ್ಕೆ ಗಣನೀಯ ಆದಾಯ ಬರುತ್ತಿತ್ತು. ಮಂಗಳೂರನ್ನು ‘ಚಿನ್ನದ ಮೊಟ್ಟೆ ಇಡುವ ಕೋಳಿ’ಯಂತೆ ಬಳಸಿಕೊಂಡು, ಮಂಗಳೂರಿಗೆ ಬರುವ ರೈಲುಗಳನ್ನು ಕೇರಳದ ವಿವಿಧ ಭಾಗಗಳಿಗೆ ವಿಸ್ತರಿಸುವ ಪ್ರವೃತ್ತಿ ಇತ್ತು ಎಂಬ ಆರೋಪವೂ ಕೇಳಿಬರುತ್ತಿತ್ತು. ಆದರೆ, ಮಂಗಳೂರು ರೈಲು ನಿಲ್ದಾಣ ಹಾಗೂ ಸಂಬಂಧಿತ ಮೂಲಸೌಕರ್ಯಗಳ ಅಭಿವೃದ್ಧಿಗೆ ಅದೇ ಪ್ರಮಾಣದ ಆದ್ಯತೆ ದೊರೆಯಲಿಲ್ಲ ಎಂಬುದು ವಾಸ್ತವ.

ಸಂಸದರ ಪ್ರಯತ್ನ ಶ್ಲಾಘನೀಯ

ಮಂಗಳೂರಿನ ರೈಲ್ವೇ ಹಿತಾಸಕ್ತಿಗಾಗಿ ದಕ್ಷಿಣ ಕನ್ನಡದ ಹಾಗೂ ಉಡುಪಿ-ಚಿಕ್ಕಮಗಳೂರು ಸಂಸದರು ನಡೆಸುತ್ತಿರುವ ಪ್ರಯತ್ನಗಳು ಅಭಿನಂದನಾರ್ಹ. ಮಂಗಳೂರಿನ ರೈಲ್ವೆ ಅಭಿವೃದ್ಧಿಯನ್ನು ಕರ್ನಾಟಕದ ಹಿತಾಸಕ್ತಿಯೊಂದಿಗೆ ಜೋಡಿಸಿ ನೋಡುವ ಅಗತ್ಯ ಈಗ ಹಿಂದೆಂದಿಗಿಂತಲೂ ಹೆಚ್ಚಾಗಿದೆ.

ಕರ್ನಾಟಕದ ಕಾಂಗ್ರೆಸ್ ನಾಯಕರು ಮೌನವಾಗಿರುವುದೇಕೆ?

ಕೇರಳದ ಸಂಸದರು ತಮ್ಮ ರಾಜ್ಯದ ಹಿತಾಸಕ್ತಿಗಾಗಿ ನಿರಶನದಂತಹ ಹೋರಾಟಕ್ಕೆ ಮುಂದಾಗುತ್ತಿರುವಾಗ, ಕರ್ನಾಟಕದ ಕಾಂಗ್ರೆಸ್ ನಾಯಕರು ಮಾತ್ರ ಈ ವಿಚಾರದಲ್ಲಿ ರಾಜ್ಯದ ಹಿತಾಸಕ್ತಿಯ ಪರವಾಗಿ ಧ್ವನಿ ಎತ್ತದಿರುವುದು ವಿಪರ್ಯಾಸಕರ.

ರಾಜ್ಯಗಳ ಹಿತಾಸಕ್ತಿಯ ಪ್ರಶ್ನೆಯಲ್ಲಿ ಪಕ್ಷಕ್ಕಿಂತ ನಾಡಿನ ಹಿತವೇ ಮುಖ್ಯವಾಗಬೇಕು. ಕೇರಳದ ನಾಯಕರು ಪಕ್ಷಭೇದ ಮರೆತು ತಮ್ಮ ರಾಜ್ಯದ ಪರ ನಿಲ್ಲುತ್ತಿರುವಾಗ, ಕರ್ನಾಟಕದ ಸಂಸದರೂ ಪಕ್ಷಭೇದ ಮರೆತು ಒಂದಾಗಿ ನಿಲ್ಲಬೇಕಾಗಿದೆ.

ಮಂಗಳೂರಿನ ಹಕ್ಕಿಗಾಗಿ ಒಗ್ಗಟ್ಟಿನ ಹೋರಾಟ ಅಗತ್ಯ

ಮಂಗಳೂರು ಕರ್ನಾಟಕದ ಅವಿಭಾಜ್ಯ ಭಾಗ. ಅದರ ರೈಲ್ವೆ ಆಡಳಿತ, ಆದಾಯ ಮತ್ತು ಅಭಿವೃದ್ಧಿಯ ಪ್ರಶ್ನೆಯೂ ಕರ್ನಾಟಕದ ಹಿತಾಸಕ್ತಿಗೆ ನೇರವಾಗಿ ಸಂಬಂಧಿಸಿದೆ. ಆದ್ದರಿಂದ, ಮಂಗಳೂರನ್ನು ಪಾಲಕ್ಕಾಡ್ ವಿಭಾಗದಿಂದ ಬೇರ್ಪಡಿಸುವ ಕೇಂದ್ರದ ನಿರ್ಧಾರವನ್ನು ಹಿಂಪಡೆಯದಂತೆ ನೋಡಿಕೊಳ್ಳುವುದು ಮಾತ್ರವಲ್ಲ, ಮಂಗಳೂರಿನ ರೈಲ್ವೆ ಅಭಿವೃದ್ಧಿಗೆ ದೀರ್ಘಕಾಲೀನ ಯೋಜನೆ ರೂಪಿಸುವಂತೆ ಕೇಂದ್ರವನ್ನು ಒತ್ತಾಯಿಸುವ ಜವಾಬ್ದಾರಿಯೂ ಕರ್ನಾಟಕದ ಎಲ್ಲ ಸಂಸದರ ಮೇಲಿದೆ.

ಕೇರಳದ ನಾಯಕರ ರಾಜಕೀಯ ಒತ್ತಡಕ್ಕೆ ಮಣಿಯದೆ, ಕರ್ನಾಟಕದ ನಾಯಕರು ಒಗ್ಗಟ್ಟಿನಿಂದ ರಾಜ್ಯದ ಹಿತಾಸಕ್ತಿಯನ್ನು ರಕ್ಷಿಸಬೇಕು. ಕೇರಳದ ರಾಜಕೀಯ ನಾಯಕರನ್ನು ಮೆಚ್ಚಿಸುವ ಭರದಲ್ಲಿ ಕರ್ನಾಟಕದ ಹಿತಾಸಕ್ತಿಗೆ ಧಕ್ಕೆ ತರುವಂತಹ ನಿಲುವು ಯಾರಿಂದಲೂ ಬರಬಾರದು.

ಮಂಗಳೂರು ರೈಲ್ವೆ ಕರ್ನಾಟಕದ ಹಕ್ಕು ಅದರ ಆಡಳಿತವೂ ಅಭಿವೃದ್ಧಿಯೂ ಕರ್ನಾಟಕದ ಹಿತಾಸಕ್ತಿಗೆ ಅನುಗುಣವಾಗಿರಬೇಕು.