ರಾಜ್ಯದಲ್ಲಿ ಪ್ರತೀ ವರ್ಷ ಸುಮಾರು 2 ಸಾವಿರಕ್ಕೂ ಅಧಿಕ ದಲಿತರ ಮೇಲಿನ ದೌರ್ಜನ್ಯ ಪ್ರಕರಣ ದಾಖಲು

ಬೆಂಗಳೂರು : ರಾಜ್ಯದಲ್ಲಿ ವರ್ಷದಿಂದ ವರ್ಷಕ್ಕೆ ದಲಿತರ ಮೇಲಿನ ದೌರ್ಜನ್ಯ ಪ್ರಕರಣಗಳು ಹೆಚ್ಚಾಗುತ್ತಿದ್ದು, ಪ್ರತೀ ವರ್ಷ ರಾಜ್ಯದಲ್ಲಿ ಸುಮಾರು ಎರಡು ಸಾವಿರಕ್ಕೂ ಅಧಿಕ ದಲಿತರ ಮೇಲಿನ ದೌರ್ಜನ್ಯ ಪ್ರಕರಣಗಳು ದಾಖಲಾಗುತ್ತಿರುವುದು ಬೆಳಕಿಗೆ ಬಂದಿದೆ. ಮೂರು ವರ್ಷಗಳಿಂದ ರಾಜ್ಯಾದ್ಯಂತ ಸುಮಾರು 8 ಸಾವಿರಕ್ಕೂ ಅಧಿಕ ದಲಿತರ ಮೇಲಿನ ದೌರ್ಜನ್ಯ ಪ್ರಕರಣಗಳು ದಾಖಲಾಗಿದ್ದು, ಈ ಪೈಕಿ 327 ದಲಿತರ ಹತ್ಯೆ ಹಾಗೂ 620 ದಲಿತ ಮಹಿಳೆಯ ಮೇಲಿನ ಅತ್ಯಾಚಾರ ಪ್ರಕರಣಗಳಾಗಿವೆ.

2023ರಲ್ಲಿ ಒಟ್ಟು 2,142 ದಲಿತರ ಮೇಲಿನ ದೌರ್ಜನ್ಯ ಪ್ರಕರಣ ದಾಖಲಾಗಿದ್ದು, ಈ ಪೈಕಿ 88 ದಲಿತರ ಹತ್ಯೆ ಪ್ರಕರಣ, 275 ಅತ್ಯಾಚಾರ ಪ್ರಕರಣ, 39 ಅಪಹರಣ, 6 ನಾಗರಿಕ ಹಕ್ಕುಗಳ ರಕ್ಷಣೆ ಕಾಯ್ದೆಯಡಿ ದಾಖಲಾದ ಪ್ರಕರಣ ಹಾಗೂ 1,734 ಎಸ್‌ಸಿ/ಎಸ್‌ಟಿ ದೌರ್ಜನ್ಯ ತಡೆ ಕಾಯ್ದೆಯಡಿಯಲ್ಲಿ ದಾಖಲಾದ ಪ್ರಕರಣಗಳಾಗಿವೆ. 2024ರಲ್ಲಿ ಒಟ್ಟು 2,121 ಪ್ರಕರಣಗಳು ದಾಖಲಾಗಿದ್ದು, ಈ ಪೈಕಿ 99 ಹತ್ಯೆ ಪ್ರಕರಣ, 186 ಅತ್ಯಾಚಾರ ಪ್ರಕರಣ, 124 ಅಪಹರಣ ಹಾಗೂ 2,092 ಎಸ್‌ಸಿ/ಎಸ್‌ಟಿ ದೌರ್ಜನ್ಯ ತಡೆ ಕಾಯ್ದೆಯಡಿಯ ಪ್ರಕರಣಗಳಾಗಿವೆ.

2025ರಲ್ಲಿ 2,411 ದಲಿತರ ಮೇಲಿನ ದೌರ್ಜನ್ಯ ಪ್ರಕರಣಗಳು ದಾಖಲಾಗಿದ್ದು, ಈ ಪೈಕಿ 94 ಹತ್ಯೆ ಪ್ರಕರಣ, 113 ಅತ್ಯಾಚಾರ ಪ್ರಕರಣ, 182 ಅಪಹರಣ, 9 ನಾಗರಿಕ ಹಕ್ಕುಗಳ ರಕ್ಷಣೆ ಕಾಯ್ದೆಯಡಿ ದಾಖಲಾದ ಪ್ರಕರಣ ಹಾಗೂ 2,013 ಎಸ್‌ಸಿ/ಎಸ್‌ಟಿ ದೌರ್ಜನ್ಯ ತಡೆ ಕಾಯ್ದೆಯಡಿಯಲ್ಲಿ ದಾಖಲಾದ ಪ್ರಕರಣಗಳಾಗಿವೆ. 2026ರಲ್ಲಿ ಜೂನ್ ಅಂತ್ಯದ ವೇಳೆಗೆ ಒಟ್ಟು 1,395 ಪ್ರಕರಣಗಳು ದಾಖಲಾಗಿದ್ದು, ಈ ಪೈಕಿ 46 ದಲಿತರ ಹತ್ಯೆ ಪ್ರಕರಣ, 46 ಅತ್ಯಾಚಾರ ಪ್ರಕರಣ, 119 ಅಪಹರಣ ಹಾಗೂ 1,148 ಎಸ್‌ಸಿ/ಎಸ್‌ಟಿ ದೌರ್ಜನ್ಯ ತಡೆ ಕಾಯ್ದೆಯಡಿಯ ಪ್ರಕರಣಗಳಾಗಿವೆ. ರಾಜ್ಯದ ಎಲ್ಲ ಜಿಲ್ಲೆಗಳಲ್ಲಿ ಒಟ್ಟು 8,069 ದಲಿತರ ಮೇಲಿನ ದೌರ್ಜನ್ಯ ಪ್ರಕರಣಗಳು ದಾಖಲಾಗಿವೆ.

2023ರಿಂದ 2026ರ ಜೂನ್ ಅಂತ್ಯದ ವೇಳೆಗೆ ಬೆಂಗಳೂರು ನಗರ 867, ಮೈಸೂರು ನಗರ 71, ಹುಬ್ಬಳ್ಳಿ-ಧಾರವಾಡ ನಗರ 156, ಮಂಗಳೂರು ನಗರ 93, ಬೆಳಗಾವಿ ನಗರ 86, ಕಲಬುರಗಿ ನಗರ 120, ಕೆಜಿಎಫ್‌ನಲ್ಲಿ 48, ಬಳ್ಳಾರಿ 135, ವಿಜಯನಗರ 112, ಕೊಪ್ಪಳ 173, ರಾಯಚೂರು 354, ಕರ್ನಾಟಕ ರೈಲ್ವೇಸ್‌ನಲ್ಲಿ 4 ದಲಿತರ ಮೇಲಿನ ದೌರ್ಜನ್ಯ ಪ್ರಕರಣಗಳು ದಾಖಲಾಗಿವೆ.

ಬೆಂಗಳೂರು ನಗರ ಹೊರತುಪಡಿಸಿ ಬೆಂಗಳೂರು ಜಿಲ್ಲಾ ವ್ಯಾಪ್ತಿಯಲ್ಲಿ 328, ಬೆಂಗಳೂರು ದಕ್ಷಿಣ(ರಾಮನಗರ) 218, ಕೋಲಾರ 166, ತುಮಕೂರು 425, ಚಿಕ್ಕಬಳ್ಳಾಪುರ 159, ಚಿತ್ರದುರ್ಗ 205, ದಾವಣಗೆರೆ 266, ಶಿವಮೊಗ್ಗ 361, ಹಾವೇರಿ 199, ದಕ್ಷಿಣ ಕನ್ನಡ 120, ಉಡುಪಿ 167, ಚಿಕ್ಕಮಗಳೂರು 254, ಉತ್ತರ ಕನ್ನಡ ಜಿಲ್ಲೆಯಲ್ಲಿ 168 ದಲಿತ ಮೇಲಿನ ದೌರ್ಜನ್ಯ ಪ್ರಕರಣಗಳು ದಾಖಲಾಗಿವೆ.

ಬೆಳಗಾವಿ ಜಿಲ್ಲೆ 394, ಬಾಗಲಕೋಟೆ 220, ವಿಜಯಪುರ 294, ಧಾರವಾಡ 156, ಗದಗ 148, ಬೀದರ್ 131, ಕಲಬುರಗಿ ಜಿಲ್ಲೆಯಲ್ಲಿ 180, ಯಾದಗಿರಿ 199, ಚಾಮರಾಜನಗರ 155, ಹಾಸನ 339, ಕೊಡಗು 120, ಮಂಡ್ಯ 266, ಮೈಸೂರು ಜಿಲ್ಲೆಯಲ್ಲಿ 212 ದಲಿತರ ಮೇಲಿನ ದೌರ್ಜನ್ಯ ಪ್ರಕರಣಗಳು ದಾಖಲಾಗಿವೆ.

35 ಪ್ರಕರಣಗಳಲ್ಲಿ ಅಪರಾಧಿಗಳ ಬಂಧನ: 2023ರಿಂದ 2025ರವರೆಗೆ ದಲಿತರ ಮೇಲೆ ದೌರ್ಜನ್ಯ ಎಸಗಿದ 35 ಅಪರಾಧಿಗಳನ್ನು ಬಂಧಿಸಲಾಗಿದೆ. 2023ರಲ್ಲಿ ದಾಖಲಾದ ಒಟ್ಟು ದಲಿತರ ಮೇಲಿನ ದೌರ್ಜನ್ಯ ಪ್ರಕರಣಗಳ ಪೈಕಿ 16 ಪ್ರಕರಣಗಳಲ್ಲಿ ಅಪರಾಧಿಗಳನ್ನು ಬಂಧಿಸಲಾಗಿದೆ, 300 ಪ್ರಕರಣಗಳನ್ನು ವಿಲೇವಾರಿ ಮಾಡಿ ಮುಕ್ತಾಯಗೊಳಿಸಲಾಗಿದೆ. ಉಳಿದ 66 ಪ್ರಕರಣಗಳು ತನಿಖೆ ಹಂತದಲ್ಲಿಯೇ ಉಳಿದಿವೆ. 2024ರಲ್ಲಿ 13 ಪ್ರಕರಣಗಳಲ್ಲಿ ಅಪರಾಧಿಗಳನ್ನು ಬಂಧಿಸಲಾಗಿದೆ, 207 ಪ್ರಕರಣಗಳನ್ನು ವಿಲೇವಾರಿ ಮಾಡಲಾಗಿದೆ. ಉಳಿದ 57 ಪ್ರಕರಣಗಳು ತನಿಖೆ ಹಂತದಲ್ಲಿಯೇ ಉಳಿದಿವೆ. 2025ರಲ್ಲಿ ದಾಖಲಾದ ಒಟ್ಟು ದಲಿತ ಮೇಲಿನ ದೌರ್ಜನ್ಯ ಪ್ರಕರಣಗಳ ಪೈಕಿ 6 ಪ್ರಕರಣಗಳಲ್ಲಿ ಅಪರಾಧಿಗಳನ್ನು ಬಂಧಿಸಲಾಗಿದೆ, 55 ಪ್ರಕರಣಗಳನ್ನು ವಿಲೇವಾರಿ ಮಾಡಿ ಮುಕ್ತಾಯಗೊಳಿಸಲಾಗಿದೆ. ಉಳಿದ 373 ಪ್ರಕರಣಗಳು ತನಿಖೆ ಹಂತದಲ್ಲಿಯೇ ಉಳಿದಿವೆ. 2026ರಲ್ಲಿ 1,051 ಪ್ರಕರಣಗಳು ತನಿಖೆ ಹಂತದಲ್ಲಿಯೇ ಉಳಿದಿವೆ ಎಂದು ಪೊಲೀಸ್ ಇಲಾಖೆಯು ಮಾಹಿತಿ ನೀಡಿದೆ.

1,034 ಸುಳ್ಳು ಪ್ರಕರಣ ದಾಖಲು

2023ರಿಂದ 2026ರವರೆಗೆ ದಾಖಲಾದ ಒಟ್ಟು ದಲಿತ ದೌರ್ಜನ್ಯ ಪ್ರಕರಣಗಳ ಪೈಕಿ 1,034 ಸುಳ್ಳು ಪ್ರಕರಣಗಳೆಂದು ತಿಳಿದು ಬಂದಿದೆ. 2023ರಲ್ಲಿ 388 ಸುಳ್ಳು ಪ್ರಕರಣಗಳೆಂದು ಸಾಬೀತಾದರೆ, 2024ರಲ್ಲಿ 345 ಪ್ರಕರಣ, 2025ರಲ್ಲಿ 291 ಪ್ರಕರಣ, 2026ರಲ್ಲಿ 10 ಸುಳ್ಳು ಪ್ರಕರಣಗಳೆಂದು ಸಾಬೀತಾಗಿವೆ.

4,643 ಪ್ರಕರಣಗಳ ವಿಚಾರಣೆಯೇ ಇಲ್ಲ

2023ರಲ್ಲಿ ದಾಖಲಾದ ದಲಿತರ ಮೇಲಿನ ದೌರ್ಜನ್ಯ ಪ್ರಕರಣಗಳ ಪೈಕಿ 1,272 ಪ್ರಕರಣಗಳ ವಿಚಾರಣೆಯೇ ನಡೆದಿಲ್ಲ. 2024ರಲ್ಲಿ 1,396 2025ರಲ್ಲಿ 1,645 ಮತ್ತು 2026ರಲ್ಲಿ 330 ದಲಿತರ ಮೇಲಿನ ದೌರ್ಜನ್ಯ ಪ್ರಕರಣಗಳ ವಿಚಾರಣೆಯೇ ನಡೆದಿಲ್ಲ. 2023ರಿಂದ ಇಲ್ಲಿಯವರೆಗೆ ದಾಖಲಾದ ಒಟ್ಟು 4,643 ಪ್ರಕರಣ ಗಳ ವಿಚಾರಣೆಯೇ ನಡೆದಿಲ್ಲ ಎಂದು ಪೊಲೀಸ್ ಇಲಾಖೆ ನೀಡಿದ ದಾಖಲೆಯಿಂದ ದೃಢವಾಗಿದೆ.