ಎಎಸ್ಡಿಡಿಒ ಪಟ್ಟಿಯಲ್ಲಿ ಹೆಸರು: ಮತದಾರರಿಗೇ ಮಾಹಿತಿ ಇಲ್ಲ!
ಮತಕಾವಲು ಸಮಿತಿ ಸಮೀಕ್ಷೆಯಲ್ಲಿ ಪ್ರಕರಣಗಳು ಪತ್ತೆ
ಬೆಂಗಳೂರು : ಮತದಾರರ ಪಟ್ಟಿ ವಿಶೇಷ ಪರಿಷ್ಕರಣೆ(ಎಸ್ಐಆರ್)ಪ್ರಕ್ರಿಯೆಯಲ್ಲಿ ಮತಪಟ್ಟಿಯಿಂದ ತಮ್ಮ ಹೆಸರು ಕೈಬಿಟ್ಟಿರುವುದೇ ಗೊತ್ತಿಲ್ಲದ ಹಲವು ಮತದಾರರ ಪ್ರಕರಣಗಳು ರಾಜ್ಯದ ವಿವಿಧ ಭಾಗಗಳಲ್ಲಿ ಬೆಳಕಿಗೆ ಬರುತ್ತಿವೆ. ನಾಗರಿಕ ಮತಕಾವಲು ಸಮಿತಿ ರಾಜ್ಯಾದ್ಯಂತ ನಡೆಸುತ್ತಿರುವ ಬೂತ್ ಮಟ್ಟದ ಸಮೀಕ್ಷೆಯ ವೇಳೆ ಚಿಕ್ಕಬಳ್ಳಾಪುರ ಜಿಲ್ಲೆಯ ಗೌರಿಬಿದನೂರು, ಕೊಪ್ಪಳ ಜಿಲ್ಲೆಯ
ಕುಷ್ಟಗಿ ತಾಲೂಕು ಹಾಗೂ ಉತ್ತರ ಕನ್ನಡ ಜಿಲ್ಲೆಯ ಕೆಲವು ಪ್ರದೇಶಗಳಲ್ಲಿ ಇಂತಹ ಪ್ರಕರಣಗಳು ಪತ್ತೆಯಾಗಿವೆ.
ಚಿಕ್ಕಬಳ್ಳಾಪುರ ಜಿಲ್ಲೆಯ ಗೌರಿಬಿದನೂರು ವಿಧಾನಸಭಾ ಕ್ಷೇತ್ರದ ಬೂತ್ ಸಂಖ್ಯೆ-96ರಲ್ಲಿ ನೇತ್ರಾ ಎಂಬ ಮತದಾರರ ಹೆಸರನ್ನು ಎಎಸ್ಡಿಡಿಒ ಪಟ್ಟಿಯಲ್ಲಿ ‘ಶಾಶ್ವತ ಸ್ಥಳಾಂತರ’ ಎಂದು ನಮೂದಿಸಿ ಸ್ಥಳೀಯ ನಿವಾಸಿಯನ್ನೇ ಮತದಾರರ ಪಟ್ಟಿಯಿಂದ ಕೈಬಿಡಲಾಗಿದೆ. ಆದರೆ ತಮ್ಮ ಹೆಸರು ಪಟ್ಟಿಯಿಂದ ತೆಗೆದುಹಾಕಲ್ಪಟ್ಟಿರುವುದೇ ನೇತ್ರಾ ಅವರಿಗೆ ತಿಳಿದಿಲ್ಲ. ನಾಗರಿಕ ಮತಕಾವಲು ಸಮಿತಿ ತಂಡ ಕ್ಷೇತ್ರ ಸಮೀಕ್ಷೆ ನಡೆಸುವ ವೇಳೆ ಈ ವಿಷಯ ಬೆಳಕಿಗೆ ಬಂದಿದೆ ಎಂದು ಚಿಕ್ಕಬಳ್ಳಾಪುರ ಜಿಲ್ಲಾ ಸಂಯೋಜಕ ಶಮೀರ್ ತಿಳಿಸಿದ್ದಾರೆ.
ಕ್ಷೇತ್ರ ಸಮೀಕ್ಷೆಯಲ್ಲಿ ಭಾಗವಹಿಸಿದ ಕಾರ್ಯಕರ್ತರ ಪ್ರಕಾರ, ಇದೇ ರೀತಿಯ ಪ್ರಕರಣಗಳು ಕುಷ್ಟಗಿ ತಾಲೂಕು ಮತ್ತು ಉತ್ತರ ಕನ್ನಡ ಜಿಲ್ಲೆಯಲ್ಲಿಯೂ ಕಂಡುಬಂದಿವೆ. ಹಲವು ಮತದಾರರು ತಮ್ಮ ಹೆಸರು ಮತದಾರರ ಪಟ್ಟಿಯಲ್ಲಿ ಇದೆಯೇ ಇಲ್ಲವೇ ಎಂಬುದನ್ನು ನಿಯಮಿತವಾಗಿ ಪರಿಶೀಲಿಸುವುದಿಲ್ಲ. ಚುನಾವಣಾ ಆಯೋಗವು ಡಿಲೀಟ್ ಆಗಿರುವ ಮತದಾರರಿಗೆ ಯಾವುದೇ ನೋಟಿಸ್ ಸಹ ನೀಡುವುದಿಲ್ಲ. ಇವರಿಗೆ ತಮ್ಮ ಹೆಸರು ಕೈಬಿಟ್ಟಿರುವುದು ಮುಂದಿನ ಚುನಾವಣೆ ಸಮೀಪಿಸುವವರೆಗೂ ಗೊತ್ತಾಗುವುದೇ ಇಲ್ಲ.
ನಾಗರಿಕ ಮತಕಾವಲು ಸಮಿತಿಯ ಪ್ರಕಾರ, ಇದು ಕೇವಲ ಕೆಲವು ಪ್ರತ್ಯೇಕ ಪ್ರಕರಣಗಳ ಪ್ರಶ್ನೆಯಲ್ಲ. ರಾಜ್ಯದಲ್ಲಿ ನಡೆಯುತ್ತಿರುವ ವಿಶೇಷ ತೀವ್ರ ಮತದಾರರ ಪಟ್ಟಿ ಪರಿಷ್ಕರಣೆ ಪ್ರಕ್ರಿಯೆಯ ಹಿನ್ನೆಲೆಯಲ್ಲಿ
ಎಎಸ್ಡಿಡಿಒ ಸೇರಿದಂತೆ ವಿವಿಧ ವರ್ಗಗಳ ಪಟ್ಟಿಗಳು ವೆಬ್ಸೈಟ್ನಲ್ಲಿ ಪ್ರಕಟವಾಗುತ್ತಿವೆ. ಆದರೆ ಆ ಪಟ್ಟಿಗಳಲ್ಲಿ ತಮ್ಮ ಹೆಸರು ಇರುವುದನ್ನು ಅನಕ್ಷರಸ್ಥರು, ಗ್ರಾಮೀಣ ಪ್ರದೇಶದ ರೈತರು, ಮಹಿಳೆಯರು, ಹಿರಿಯ ನಾಗರಿಕರಿಗೆ ಪರಿಶೀಲಿಸಿಕೊಳ್ಳಲು ಸಾಧ್ಯವಾಗುವುದಿಲ್ಲ. ಎಎಸ್ಡಿಡಿಒ ಪಟ್ಟಿ ಅಂದರೆ ಏನು ಎನ್ನುವುದೇ ಹಲವರಿಗೆ ಮಾಹಿತಿ ಇಲ್ಲ ಎಂದು ತಿಳಿಸಿದೆ.
ನನ್ನ ಹೆಸರು ಪಟ್ಟಿಯಲ್ಲಿ ಇಲ್ಲ ಎನ್ನುವುದು ಮತ್ತು ಎಎಸ್ಡಿಡಿಒ ಪಟ್ಟಿಯಲ್ಲಿ ನಿರ್ದಿಷ್ಟ ವರ್ಗಕ್ಕೆ ಸೇರಿದೆ ಎನ್ನುವುದು ಇದುವರೆಗೂ ಮಾಹಿತಿಯೇ ಇಲ್ಲ. ಆಯೋಗದವರು ಯಾರನ್ನು ಕೇಳಿ ನನ್ನ ಮತ ಡಿಲೀಟ್ ಮಾಡಿದ್ದೀರಿ? ನಾನು ಗಣತಿ ನಮೂನೆಯನ್ನು ತುಂಬಿ ಬಿಎಲ್ಒಗೂ ನೀಡಿದ್ದೇನೆ. ಆದರೆ ನನ್ನನ್ನು ಶಾಶ್ವತ ಸ್ಥಳಾಂತರ ಎಂದು ಗುರುತಿಸಿ ನನ್ನ ಮತ ಹೇಗೆ ಡಿಲೀಟ್ ಮಾಡುತ್ತೀರಿ? ನಾನು ಇಲ್ಲಿನ ಸ್ಥಳೀಯ ನಿವಾಸಿ. ನೀವು ಡಿಲೀಟ್ ಮಾಡಿರುವುದು ಮೂರನೇ ವ್ಯಕ್ತಿಗಳಿಂದ ಸಮೀಕ್ಷೆಯ ವೇಳೆಯಲ್ಲಿ ಗೊತ್ತಾಗಿದೆ.
-ನೇತ್ರಾ, ಸಂತ್ರಸ್ತೆ ಗೌರಿಬಿದನೂರು.
