ಬೆಂಗಳೂರು, ಜೂ.30: ರಾಜ್ಯದಲ್ಲಿನ ಹಲವು ಸರಕಾರಿ ಶಾಲೆಗಳು ಶತಮಾನ ಪೂರೈಸಿವೆ. ತುರ್ತಾಗಿ ಶತಮಾನದ ಶಾಲೆಗಳ ಅಭಿವೃದ್ಧಿಯಾಗಬೇಕಿದೆ. ಸರಕಾರಿ ಶಾಲೆಗಳಷ್ಟೇ ಅಲ್ಲದೆ, ಖಾಸಗಿ ವಲಯದ ಕನ್ನಡ ಶಾಲೆಗಳಿಗೂ ಒತ್ತು ನೀಡುವ ಪೂರಕ ಯೋಜನೆಯೊಂದನ್ನು ಕನ್ನಡ ಅಭಿವೃದ್ಧಿ ಪ್ರಾಧಿಕಾರ ಹಾಕಿಕೊಂಡಿದೆ.
ಶತಮಾನವನ್ನು ಪೂರೈಸಿರುವ ಸುಮಾರು 200 ಶಾಲೆಗಳನ್ನು ಗುರುತಿಸಿ, ಅಭಿವೃದ್ಧಿ ಮಾಡಲಾಗುವುದು. ಶಾಲಾ ಶಿಕ್ಷಣ ಸಚಿವ ಮಧು ಬಂಗಾರಪ್ಪಸರಕಾರದಿಂದ ಆರ್ಥಿಕ ಸಹಾಯದ ಭರವಸೆ ನೀಡಿದ್ದು, ಶಾಲಾ ಅಭಿವೃದ್ಧಿ ಸಮಿತಿಯನ್ನು ರಚಿಸಿ ಅದರ ಮೂಲಕ ದೇಣಿಗೆ ಸಂಗ್ರಹಿಸಿ, ಜತೆಗೆ ಸಿಆರ್ಎಸ್ ಅನುದಾನವನ್ನು ಬಳಸಿಕೊಂಡು ಶತಮಾನ ಪೂರೈಸಿರುವ ಶಾಲೆಗಳ ಅಭಿವೃದ್ಧಿಗಾಗಿ ಶ್ರಮಿಸುತ್ತೇನೆ ಎನ್ನುತ್ತಾರೆ ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಪ್ರೊ.ಪುರುಷೋತ್ತಮ ಬಿಳಿಮಲೆ.
‘ವಾರ್ತಾಭಾರತಿ’ ಪತ್ರಿಕೆಯೊಂದಿಗೆ ಮಾತನಾಡಿದ ಬಿಳಿಮಲೆ, ‘ಕನ್ನಡದ ಸಮಸ್ಯೆಗಳ ಪರಿಹಾರಕ್ಕಾಗಿ ಪ್ರಾಧಿಕಾರ ಯಾವ ರೀತಿ ಕೆಲಸ ಮಾಡಬೇಕು ಹಾಗೂ ತಮ್ಮ ಮುಂದಿರುವ ಸವಾಲುಗಳು, ಕನ್ನಡ ಭಾಷೆ, ನಾಡಿನ ಅಭಿವೃದ್ಧಿ ಕುರಿತು ಹಾಕಿಕೊಂಡಿರುವ ಯೋಜನೆಗಳ ಸಮಗ್ರ ಮಾಹಿತಿಯನ್ನು ಹಂಚಿಕೊಂಡರು.
ಎರಡು ನೂರಕ್ಕೂ ಅಧಿಕ ಭಾಷೆಗಳಿರುವ ಕರ್ನಾಟಕಕ್ಕೆ ಒಂದು ಸಶಕ್ತವಾದ ಭಾಷಾ ನೀತಿಯ ಅಗತ್ಯವಿದೆ. (19,569 ತಾಯ್ನುಡಿಗಳಿರುವ ಭಾರತಕ್ಕೂ ಭಾಷಾ ನೀತಿ ಇಲ್ಲ). ಈ ನಿಟ್ಟಿನಲ್ಲಿ ಭಾಷಾ ತಜ್ಞರ ಸಮಿತಿಯೊಂದನ್ನು ರಚಿಸಿ, ಕರಡು ನೀತಿಯನ್ನು ಸಿದ್ಧಪಡಿಸಿ, ಸಾರ್ವಜನಿಕರ ಅಭಿಪ್ರಾಯಕ್ಕೆ ಬಿಡುಗಡೆ ಮಾಡಿ, ಅಂತಿಮ ವರದಿಯನ್ನು ಸರಕಾರಕ್ಕೆ ಸಲ್ಲಿಸಲಾಗುವುದು.
‘ಕರ್ನಾಟಕ ಸಂಸ್ಕೃತಿ’ಯ ಸೌಹಾರ್ದಯುತ ನೆಲೆಗಳ ಕುರಿತು ಪ್ರೌಢಶಾಲೆ, ಪದವಿ ಪೂರ್ವ ಮತ್ತು ಕಾಲೇಜು ವಿದ್ಯಾರ್ಥಿಗಳಿಗೆ ಸರಳವಾದ ಭಾಷೆಯಲ್ಲಿ ತಿಳಿಸುವ ಕೆಲಸವನ್ನು ಕನ್ನಡ ಅಭಿವೃದ್ಧಿ ಪ್ರಾಧಿಕಾರ ತುರ್ತಾಗಿ ಕೈಗೆತ್ತಿಕೊಳ್ಳುತ್ತದೆ. ಕರ್ನಾಟಕದ ಚರಿತ್ರೆಯು ಅದರ ಸಂಕೀರ್ಣ ಮತ್ತು ಸೌಹಾರ್ದ ಪರಂಪರೆಗೂ ಕಾರಣವಾಯಿತು. ಇದನ್ನೇ ಕುವೆಂಪು ಅವರು ‘ಸರ್ವಜನಾಂಗದ ಶಾಂತಿಯ ತೋಟ’ವೆಂದು ಕರೆದಿದ್ದು, ಈ ರಾಜ್ಯದಲ್ಲಿ ಹಲವು ಸಣ್ಣ ಪುಟ್ಟ ಭಾಷೆಗಳಿವೆ. ಹಲವು ಸಮುದಾಯಗಳಿವೆ. ಎಲ್ಲವೂ ಸೌಹಾರ್ದಯುತವಾಗಿ ಬದುಕಿವೆ. ಈ ಹಿನ್ನೆಲೆಯಲ್ಲಿ ಕರ್ನಾಟಕ ಸಂಸ್ಕೃತಿಯ ವಿಭಿನ್ನ ನೆಲೆಗಳನ್ನು ನಾವು ಹೊಸ ತಲೆಮಾರಿಗೆ ಪರಿಚಯಿಸಬೇಕಾಗಿದೆ. ಇದಕ್ಕಾಗಿ 65ರಿಂದ 70 ಪುಟಗಳ ಸಣ್ಣ ಸಣ್ಣ ಪುಸ್ತಕಗಳನ್ನು ಪ್ರಕಟಿಸಿ, ನಾಡಿನಾದ್ಯಂತ ತಲುಪಿಸುವ ಚಿಂತನೆ ಪ್ರಾಧಿಕಾರ ಮಾಡಿದೆ.
ಕನ್ನಡೇತರರಿಗೆ ಕನ್ನಡ ಕಲಿಕೆಗೆ ಯೋಜನೆ: ಜಾಗತಿಕರಣದ ಪರಿಣಾಮವಾಗಿ ಬೆಂಗಳೂರು, ಮೈಸೂರಿನಲ್ಲಿ ದೊಡ್ಡ ಸಂಖ್ಯೆಯಲ್ಲಿ ಕನ್ನಡೇತರರು ವಾಸಿಸುತ್ತಿದ್ದು, ಅವರಿಗೆ ಪ್ರಾಥಮಿಕ ಕನ್ನಡ ಭಾಷೆಯನ್ನು ಕಲಿಸುವ ತರಗತಿಯನ್ನು ಯೋಜಿಸಲಾಗಿದೆ. ಕನ್ನಡ ಕಲಿಸಲು ಕೆಲವು ಯುವ ಶಿಕ್ಷಕರನ್ನು ನೇಮಿಸಿಕೊಂಡು ಅವರಿಗೆ ಅಗತ್ಯ ತರಬೇತಿ ನೀಡಲಾಗುವುದು. ತರಗತಿಗಳು ಸಾಯಂಕಾಲ ಆರರಿಂದ ಏಳರವರೆಗೆ ವಾರಕ್ಕೆ ಮೂರು ದಿನಗಳು ನಡೆಸಲು ಪ್ರಾಧಿಕಾರ ಚಿಂತಿಸಿದೆ.
ಊರಿನ ಹೆಸರುಗಳನ್ನು ಸೇರಿಸುವ ಅಭಿಯಾನ: ಇತ್ತೀಚಿನ ದಿನಗಳಲ್ಲಿ ಸರಕಾರದ ಇಲಾಖೆಗಳು, ಉದ್ಯಮಗಳು, ಸ್ವಾಯತ್ತ ಸಂಸ್ಥೆಗಳು, ಶಿಕ್ಷಣ ಸಂಸ್ಥೆಗಳು, ಅಂಗಡಿಗಳು ಆಸ್ಪತ್ರೆಗಳು ಮೊದಲಾದ ಕಡೆಗಳಲ್ಲಿ ತಮ್ಮ ನಾಮಫಲಕದ ಜೊತೆಗೆ ಊರಿನ ಹೆಸರನ್ನು ಸೇರಿಸುವ ಪ್ರವೃತ್ತಿ ಕಡಿಮೆಯಾಗಿದೆ. ಇದರಿಂದಾಗಿ ಶತಮಾನಗಳಿಂದ ಉಳಿದು ಬಂದಿರುವ ಸುಮಾರು 65 ಸಾವಿರ ಕನ್ನಡ ಪದಗಳು ನಿಧಾನವಾಗಿ ಇತಿಹಾಸದ ಪುಟ ಸೇರುತ್ತಿವೆ. ಕೆಲವು ಹೆಸರುಗಳನ್ನು ಅನಗತ್ಯವಾಗಿ ತಿರುಚಲಾಗುತ್ತಿದೆ. ಈ ನಿಟ್ಟನಲ್ಲಿ ಎನ್ಎಸ್ಎಸ್ ವಿದ್ಯಾರ್ಥಿಗಳ ಮೂಲಕ ಪ್ರತೀ ಊರಿನಲ್ಲಿ ಜಾಗೃತಿ ಮೂಡಿಸಿ, ಊರಿನ ಹೆಸರು ಆ ಊರಿನ ಎಲ್ಲ ನಾಮಫಲಕಗಳಲ್ಲಿ ಕನ್ನಡ ಭಾಷೆಯಲ್ಲಿ ದಾಖಲಾಗುವಂತೆ ‘ಹೆಸರು ಬಳಸಿ, ಹೆಸರು ಉಳಿಸಿ’ ಅಭಿಯಾನವೊಂದನ್ನು ಆರಂಭಿಸಲಾಗುವುದು ಎಂದು ತಿಳಿಸಿದ್ದಾರೆ.
ಇದುವರೆಗೂ ಸಾಹಿತ್ಯ ಸಮ್ಮೇಳನಕ್ಕೆ ಮಹಿಳಾ ಅಧ್ಯಕ್ಷರಾಗಿದ್ದು ಕೇವಲ ಬೆರಳೆಣಿಕೆಯಷ್ಟು ಮಾತ್ರವಾಗಿರುವುದರಿಂದ ಈ ಬಾರಿ ಮಹಿಳಾ ಸಾಹಿತಿ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷೆಯಾಗಬೇಕು. ಹಿಂದೊಮ್ಮೆ ಮಂಡ್ಯದಲ್ಲಿ ಸಾಹಿತ್ಯ ಸಮ್ಮೇಳನಕ್ಕೆ ಜಯದೇವಿ ತಾಯಿ ಲಿಗಾಡೆಯವರು ಅಧ್ಯಕ್ಷೆಯಾಗಿದ್ದರು. ಅದಕ್ಕಾಗಿ ಈ ಬಾರಿ ಮಂಡ್ಯದಲ್ಲಿ ನಡೆಯುವ ಸಾಹಿತ್ಯ ಸಮ್ಮೇಳನಕ್ಕೆ ಮಹಿಳೆಯೊಬ್ಬರು ಅಧ್ಯಕ್ಷೆಯಾಗಬೇಕು. ಕನ್ನಡ ಸಾಹಿತ್ಯ ಪರಿಷತ್ ಸ್ವಾಯತ್ತವಾಗಿರುವುದರಿಂದ ಚರ್ಚಿಸಿ ತೀರ್ಮಾನ ತೆಗೆದುಕೊಳ್ಳಬೇಕು ಹಾಗೂ ದೇಶ ಮತ್ತು ರಾಜ್ಯ ಆರ್ಥಿಕ ಬಿಕ್ಕಟ್ಟಿನಲ್ಲಿರುವುದರಿಂದ ಸಮ್ಮೇಳನಕ್ಕೆ ಅನಗತ್ಯ ಖರ್ಚುಗಳನ್ನು ಕಡಿಮೆ ಮಾಡಬೇಕು.
-ಪ್ರೊ.ಪುರುಷೋತ್ತಮ ಬಿಳಿಮಲೆ, ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ
ಭಾಷೆಯಿಂದ ವರ್ಗ ವ್ಯತ್ಯಾಸ ಬಂದಿಲ್ಲ
ಇಂಗ್ಲಿಷ್ನ್ನು ಒಂದು ಭಾಷೆಯಾಗಿ ಕಲಿಯುವುದರಲ್ಲಿ ನನ್ನ ತಕರಾರು ಇಲ್ಲ. ಒಂದರಿಂದ ಐದನೇ ತರಗತಿಯವರೆಗೆ ಇಂಗ್ಲಿಷ್ನ್ನು ಒಂದು ಭಾಷೆಯಾಗಿ ಹೇಳಿಕೊಡಬಹುದು. ಐದನೇ ತರಗತಿಯವರೆಗೆ ಮಕ್ಕಳಿಗೆ ಕನ್ನಡ ಮಾಧ್ಯಮದಲ್ಲಿ ಕಲಿಸುವುದರಿಂದ ಮಗುವಿನ ಕಲಿಕೆ ಉತ್ತಮವಾಗುತ್ತದೆ. ಆರನೇ ತರಗತಿಯಿಂದ ಇಂಗ್ಲಿಷ್ ಮಾಧ್ಯಮದಲ್ಲಿ ಕಲಿಸಬಹುದು. ಬೇರೆ ಎಲ್ಲ ದೇಶಗಳಲ್ಲಿ ಮಾತೃ ಭಾಷೆಯಲ್ಲಿಯೇ ಶಿಕ್ಷಣ ಪಡೆಯುತ್ತಾರೆ. ಕನ್ನಡ ಶಾಲೆಗಳನ್ನು ಅಭಿವೃದ್ಧಿ ಮಾಡಿದರೆ ಪೋಷಕರು ತಮ್ಮ ಮಕ್ಕಳನ್ನು ಸರಕಾರಿ ಶಾಲೆಗೆ ಕಳಿಸುತ್ತಾರೆ. ಆಗ ಖಾಸಗಿ ಇಂಗ್ಲಿಷ್ ಶಾಲೆಗಳಿಗೆ ವಿದ್ಯಾರ್ಥಿಗಳು ಹೋಗುವುದೇ ಇಲ್ಲ. ವರ್ಗ ವ್ಯತ್ಯಾಸ ಭಾಷೆಯಿಂದ ಬಂದಿಲ್ಲ. ಸರಕಾರದ ಆಡಳಿತಾತ್ಮಕ ಸಮಸ್ಯೆಯಿಂದ ಬಂದಿದೆ. ಇಂಗ್ಲಿಷ್ ಕಲಿತರೆ ಎಲ್ಲ ಸಮಸ್ಯೆಗಳು ಬಗೆ ಹರಿಯುವುದಿಲ್ಲ. ಇಂಗ್ಲಿಷ್ನಲ್ಲಿಯೂ ತಾರತಮ್ಯ ಇದೆ. ಇಂಗ್ಲಿಷ್ ಓದುವುದರಿಂದ ದಲಿತರು ಬಿಡುಗಡೆ ಯಾಗುವುದಾದರೆ. ನಾನೇ ಇಂಗ್ಲಿಷ್ ತರಗತಿ ಮಾಡು ತ್ತೇನೆ ಎಂದು ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಪುರುಷೋತ್ತಮ ಬಿಳಿಮಲೆ ಅಭಿಪ್ರಾಯಪಟ್ಟಿದ್ದಾರೆ.
