ಮುದ್ದೇಬಿಹಾಳ ನಗರ ಯೋಜನಾ ಪ್ರಾಧಿಕಾರ ಪುನರ್‌ರಚನೆ

ಮುದ್ದೇಬಿಹಾಳ: ಪಟ್ಟಣದ ಸಮಗ್ರ ಹಾಗೂ ಯೋಜನಾಬದ್ಧ ಅಭಿವೃದ್ಧಿಗೆ ಅನುಕೂಲವಾಗುವಂತೆ ಮುದ್ದೇಬಿಹಾಳ ಪುರಸಭಾ ಯೋಜನಾ ಪ್ರಾಧಿಕಾರವನ್ನು ರದ್ದುಗೊಳಿಸಿ, ಮುದ್ದೇಬಿಹಾಳ ನಗರ ಯೋಜನಾ ಪ್ರಾಧಿಕಾರವನ್ನು ರಾಜ್ಯ ಸರಕಾರ ಪುನರ್ ರಚಿಸಿದೆ.

ಈ ಕುರಿತು ನಗರಾಭಿವೃದ್ಧಿ ಇಲಾಖೆಯು ಸರಕಾರದ ಆದೇಶ ಸಂಖ್ಯೆ ನಅಇ 289 ಬೆಮಪ್ರಾ 2024 (ಇ), ಅ. 5ರಂದು ಅಧಿಕೃತ ಅಧಿಸೂಚನೆ ಹೊರಡಿಸಿದ್ದು, ಆದೇಶ ಜಾರಿಗೆ ಬಂದಿದೆ.

ಕರ್ನಾಟಕ ನಗರ ಮತ್ತು ಗ್ರಾಮಾಂತರ ಯೋಜನಾ ಕಾಯ್ದೆ-1961ರ ಕಲಂ 4(ಎ)ರ ಅನ್ವಯ 2001ರ ಮೇ.2

ರಂದು ಹೊರಡಿಸಿದ್ದ ಅಧಿಸೂಚನೆಯಡಿ ಮುದ್ದೇಬಿಹಾಳ ಪಟ್ಟಣವನ್ನು ಸ್ಥಳೀಯ ಯೋಜನಾ ಪ್ರದೇಶವೆಂದು ಘೋಷಿಸಿ, ಮುದ್ದೇಬಿಹಾಳ ಪುರಸಭಾ ಯೋಜನಾ ಪ್ರಾಧಿಕಾರ ರಚಿಸಲಾಗಿತ್ತು. ಇದೀಗ ಕಾಯ್ದೆಯ ಕಲಂ 4(ಸಿ)(1)ರಡಿ ಸರಕಾರಕ್ಕೆ ಇರುವ ಅಧಿಕಾರವನ್ನು ಚಲಾಯಿಸಿ ಹಳೆಯ ಪ್ರಾಧಿಕಾರವನ್ನು ರದ್ದುಗೊಳಿಸಿ, ಅದರ ಬದಲಿಗೆ ಮುದ್ದೇಬಿಹಾಳ ನಗರ ಯೋಜನಾ ಪ್ರಾಧಿಕಾರವನ್ನು ಪುನರ್ ರಚಿಸಲಾಗಿದೆ.

ಆಸ್ತಿ, ನಿಧಿ ಮತ್ತು ಹೊಣೆಗಾರಿಕೆ ವರ್ಗಾವಣೆ

ಹಳೆಯ ಮುದ್ದೇಬಿಹಾಳ ಪುರಸಭಾ ಯೋಜನಾ ಪ್ರಾಧಿಕಾರದ ಅಧೀನದಲ್ಲಿದ್ದ ಎಲ್ಲ ಆಸ್ತಿ, ನಿಧಿ ಹಾಗೂ ಹೊಣೆಗಾರಿಕೆಗಳನ್ನು ನೂತನ ನಗರ ಯೋಜನಾ ಪ್ರಾಧಿಕಾರಕ್ಕೆ ವರ್ಗಾಯಿಸಲಾಗಿದೆ. ಈ ಕುರಿತು ಸರಕಾರದ ಅಧೀನ ಕಾರ್ಯದರ್ಶಿ ಲತಾ ಕೆ. ಅವರು ಆದೇಶ ಹೊರಡಿಸಿದ್ದಾರೆ.

10,405.77 ಹೆಕ್ಟೇರ್‌ಗೆ ವಿಸ್ತರಣೆ

ಹೊಸ ಅಧಿಸೂಚನೆಯ ಪ್ರಮುಖ ಅಂಶವೆಂದರೆ ಸ್ಥಳೀಯ ಯೋಜನಾ ಪ್ರದೇಶದ ವ್ಯಾಪ್ತಿಯನ್ನು ಗಣನೀಯವಾಗಿ ವಿಸ್ತರಿಸಿರುವುದು.

ಈ ಹಿಂದೆ ಮುದ್ದೇಬಿಹಾಳ ಪಟ್ಟಣ, ಬಿದರಕುಂದಿ, ಕುಂಟೋಜಿ ಹಾಗೂ ಶಿರೋಳ ಗ್ರಾಮಗಳ ಸುಮಾರು 825 ಹೆಕ್ಟೇರ್ ಪ್ರದೇಶ ಮಾತ್ರ ಯೋಜನಾ ವ್ಯಾಪ್ತಿಯಲ್ಲಿತ್ತು. ಇದೀಗ ಹೊಸ ಅಧಿಸೂಚನೆಯ ಅನುಸೂಚಿ-ಎ ಅನ್ವಯ ಮುದ್ದೇಬಿಹಾಳ ಪಟ್ಟಣ, ಬಿದರಕುಂದಿ, ಕುಂಟೋಜಿ, ಕವಡಿಮಟ್ಟಿ, ಮುದ್ನಾಳ, ಹಡಲಗೇರಿ ಹಾಗೂ ಶಿರೋಳ ಗ್ರಾಮಗಳ ಸಂಪೂರ್ಣ ಕಂದಾಯ ಮತ್ತು ಗ್ರಾಮಠಾಣ ಪ್ರದೇಶಗಳನ್ನು ಯೋಜನಾ ವ್ಯಾಪ್ತಿಗೆ ಸೇರಿಸಲಾಗಿದೆ. ಇದರಿಂದ ಸ್ಥಳೀಯ ಯೋಜನಾ ಪ್ರದೇಶದ ಒಟ್ಟು ವಿಸ್ತೀರ್ಣ 10,405.77 ಹೆಕ್ಟೇರ್‌ಗೆ ಏರಿಕೆಯಾಗಿದೆ.

ಅನುಸೂಚಿ-ಎ ಪ್ರಕಾರ ಮುದ್ದೇಬಿಹಾಳ ಪಟ್ಟಣದ 963 ಹೆಕ್ಟೇರ್, ಬಿದರಕುಂದಿಯ 1,928.71 ಹೆಕ್ಟೇರ್ ಹಾಗೂ ಕುಂಟೋಜಿಯ 3,614.08 ಹೆಕ್ಟೇರ್ ಸೇರಿದಂತೆ ಕವಡಿಮಟ್ಟಿ, ಮುದ್ನಾಳ, ಹಡಲಗೇರಿ ಮತ್ತು ಶಿರೋಳ ಗ್ರಾಮಗಳ ಪ್ರದೇಶವೂ ನೂತನ ಯೋಜನಾ ವ್ಯಾಪ್ತಿಗೆ ಸೇರ್ಪಡೆಯಾಗಿದೆ.

ಸರ್ವೇ ನಂಬರ್‌ಗಳಿಗೂ ಪ್ರಾಧಿಕಾರದ ನಿಯಂತ್ರಣ

ಅಧಿಸೂಚನೆಯ ಅನುಸೂಚಿ-ಬಿಯಲ್ಲಿ ವಿಸ್ತರಿತ ಸ್ಥಳೀಯ ಯೋಜನಾ ಪ್ರದೇಶದ ಚತುಸ್ಸೀಮೆಯನ್ನು ಸರ್ವೆ ನಂಬರ್‌ವಾರು ಗುರುತಿಸಲಾಗಿದೆ. ಉತ್ತರ, ಪೂರ್ವ, ದಕ್ಷಿಣ ಹಾಗೂ ಪಶ್ಚಿಮ ದಿಕ್ಕುಗಳಲ್ಲಿ ವಿವಿಧ ಗ್ರಾಮಗಳ ನಿರ್ದಿಷ್ಟ ಸರ್ವೆ ನಂಬರ್‌ಗಳನ್ನು ಆಧರಿಸಿ ಗಡಿ ನಿಗದಿಪಡಿಸಲಾಗಿದೆ.

ಇನ್ನು ಮುಂದೆ ಈ ವಿಸ್ತರಿತ ಯೋಜನಾ ಪ್ರದೇಶದೊಳಗೆ ಬಡಾವಣೆ ನಿರ್ಮಾಣ, ನಿವೇಶನ ಅಭಿವೃದ್ಧಿ, ಭೂ ಪರಿವರ್ತನೆ ಹಾಗೂ ಕಟ್ಟಡ ನಿರ್ಮಾಣ ಸೇರಿದಂತೆ ಯೋಜನಾ ಚಟುವಟಿಕೆಗಳಿಗೆ ಸಂಬಂಧಿಸಿದ ಅನುಮತಿಗಳನ್ನು ನಗರ ಯೋಜನಾ ಪ್ರಾಧಿಕಾರದ ನಿಯಮಾನುಸಾರ ಪಡೆಯಬೇಕಾಗುತ್ತದೆ.

ನೂತನ ನಗರ ಯೋಜನಾ ಪ್ರಾಧಿಕಾರದ ರಚನೆಯಿಂದ ಮುದ್ದೇಬಿಹಾಳ ಪಟ್ಟಣ ಹಾಗೂ ಸುತ್ತಮುತ್ತಲಿನ ಗ್ರಾಮಗಳ ಭವಿಷ್ಯದ ನಗರೀಕರಣ, ರಸ್ತೆ, ವಸತಿ ಪ್ರದೇಶ, ಮೂಲಸೌಕರ್ಯ ಹಾಗೂ ಇತರ ಅಭಿವೃದ್ಧಿ ಚಟುವಟಿಕೆಗಳನ್ನು ಹೆಚ್ಚು ವ್ಯವಸ್ಥಿತವಾಗಿ ರೂಪಿಸಲು ಅವಕಾಶ ಕಲ್ಪಿಸಿದಂತಾಗಿದೆ.