ಸಾಗರ ರಸ್ತೆಯ ಸಂಕಷ್ಟ: ಅನಧಿಕೃತ ಗೂಡಂಗಡಿಗಳಿಂದ ತೀವ್ರ ಸಮಸ್ಯೆ
ಭಟ್ಕಳ: ನಗರದ ಸಾಗರ ರಸ್ತೆಯಲ್ಲಿ ರಸ್ತೆ ಅಗಲೀಕರಣ ಮತ್ತು ಸಿಮೆಂಟ್ ರಸ್ತೆ ನಿರ್ಮಾಣ ಕಾರ್ಯ ಚುರುಕಾಗಿ ನಡೆಯುತ್ತಿದ್ದರೂ, ಅನಧಿಕೃತ ಗೂಡಂಗಡಿಗಳ ಸಮಸ್ಯೆ ಈ ಕಾಮಗಾರಿಯ ಪ್ರಗತಿಗೆ ಮತ್ತು ಸಂಚಾರದ ಸುಗಮತೆಗೆ ದೊಡ್ಡ ಅಡ್ಡಿಯಾಗಿದೆ. ಶಂಸುದ್ದೀನ್ ಸರ್ಕಲ್ನಿಂದ ಸರಕಾರಿ ಆಸ್ಪತ್ರೆ ರಸ್ತೆ ಕ್ರಾಸ್ವರೆಗಿನ ಈ ಪ್ರಮುಖ ರಸ್ತೆಯಲ್ಲಿ ಗೂಡಂಗಡಿಗಳು, ಅನಧಿಕೃತ ವಾಹನ ಪಾರ್ಕಿಂಗ್ ಮತ್ತು ರಸ್ತೆ ಬದಿಯ ವ್ಯಾಪಾರದಿಂದ ಸಂಚಾರ ಸಂಪೂರ್ಣ ಅಸ್ತವ್ಯಸ್ತವಾಗಿದೆ. ಈ ಸಮಸ್ಯೆಗೆ ಸಂಬಂಧಪಟ್ಟ ಇಲಾಖೆಗಳ ನಿರ್ಲಕ್ಷ್ಯ ಧೋರಣೆಯೇ ಮೂಲ ಕಾರಣವಾಗಿದೆ.
ಅನಧಿಕೃತ ಗೂಡಂಗಡಿಗಳು ರಸ್ತೆ ಸಂಚಾರಕ್ಕೆ ತೊಡಕು: ಸಾಗರ ರಸ್ತೆಯು ಭಟ್ಕಳದ ಹೃದಯಭಾಗವಾಗಿದ್ದು, ಸರಕಾರಿ ಆಸ್ಪತ್ರೆ, ಕಾಲೇಜು, ಪ್ರೌಢಶಾಲೆ, ಪೊಲೀಸ್ ವಸತಿಗೃಹ, ಅರಣ್ಯ ಇಲಾಖೆ ಕಚೇರಿ, ದೇವಸ್ಥಾನ ಮತ್ತು ರಾಜ್ಯ ಸಾರಿಗೆ ಸಂಸ್ಥೆಯ ಡಿಪೋದಂತಹ ಪ್ರಮುಖ ಸಂಸ್ಥೆಗಳಿವೆ. ಇದರಿಂದ ಈ ರಸ್ತೆಯಲ್ಲಿ ವಾಹನ ಸಂಚಾರ ಮತ್ತು ಪಾದಾಚಾರಿಗಳ ಓಡಾಟ ದಟ್ಟವಾಗಿರುತ್ತದೆ. ಆದರೆ, ರಸ್ತೆಯ ಒಂದು ಭಾಗವನ್ನು ಅನಧಿಕೃತ ಗೂಡಂಗಡಿಗಳು ಆಕ್ರಮಿಸಿಕೊಂಡಿವೆ. ಈ ಗೂಡಂಗಡಿಗಳು ಆರಂಭದಲ್ಲಿ ತಾತ್ಕಾಲಿಕವಾಗಿ ತಲೆ ಎತ್ತಿದರೂ, ಕಾಲಾಂತರದಲ್ಲಿ ಕಲ್ಲುಕಟ್ಟೆ, ಶೀಟ್ ಹಾಕಿ ಶಾಶ್ವತ ಕಟ್ಟಡಗಳಂತೆ ರೂಪಾಂತರಗೊಳ್ಳುತ್ತಿವೆ. ಇವು ರಸ್ತೆಯ ಜಾಗವನ್ನು ಕಸಿದುಕೊಂಡು ಸಂಚಾರಕ್ಕೆ ತೀವ್ರ ತೊಂದರೆಯನ್ನುಂಟುಮಾಡಿವೆ.
ಗೂಡಂಗಡಿಗಳಿಂದಾಗಿ ರಸ್ತೆಯ ಒಂದು ಭಾಗ ಸಂಪೂರ್ಣ ಇಲ್ಲದಂತಾಗಿದ್ದು, ವಾಹನಗಳು ಚಲಿಸಲು ಹರಸಾಹಸ ಪಡುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಕೆಲವರು ರಸ್ತೆಯ ಮಧ್ಯದಲ್ಲೇ ವಾಹನಗಳನ್ನು ನಿಲ್ಲಿಸಿ ವ್ಯಾಪಾರ ನಡೆಸುತ್ತಿದ್ದಾರೆ. ಇದರಿಂದ ಎದುರಿನಿಂದ ಬರುವ ವಾಹನಗಳಿಗೆ ತೀವ್ರ ಕಿರಿಕಿರಿಯಾಗುತ್ತಿದೆ. ಈ ಅವ್ಯವಸ್ಥೆಯಿಂದ ವಾಹನಗಳು ಒಂದಕ್ಕೊಂದು ತಾಗಿಕೊಳ್ಳುವ ಸಾಧ್ಯತೆ, ಜಗಳಗಳು ಮತ್ತು ಅನಾಹುತಗಳಿಗೆ ಆಸ್ಪದವುಂಟುಮಾಡುತ್ತಿದೆ. ರಸ್ತೆ ಅಗಲೀಕರಣ ಕಾಮಗಾರಿಯೂ ಈ ಒತ್ತುವರಿಯಿಂದಾಗಿ ಮಂದಗತಿಯಲ್ಲಿ ಸಾಗುತ್ತಿದೆ.
ಇಲಾಖೆಗಳ ನಿರ್ಲಕ್ಷ್ಯ ಸಮಸ್ಯೆ ಉಲ್ಭಣಕ್ಕೆ ಕಾರಣ: ಅನಧಿಕೃತ ಗೂಡಂಗಡಿಗಳ ಸಮಸ್ಯೆ ಭಟ್ಕಳದಲ್ಲಿ ಹೊಸದೇನಲ್ಲ. ಆದರೆ, ಈ ಸಮಸ್ಯೆಯನ್ನು ತಡೆಗಟ್ಟಲು ಅಥವಾ ತೆರವುಗೊಳಿಸಲು ಸಂಬಂಧಪಟ್ಟ ಇಲಾಖೆಗಳಾದ ಪುರಸಭೆ, ಪೊಲೀಸ್ ಇಲಾಖೆ, ಲೋಕೋಪಯೋಗಿ ಇಲಾಖೆ ಮತ್ತು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಯಾವುದೇ ಗಂಭೀರ ಕ್ರಮ ಕೈಗೊಳ್ಳದಿರುವುದರಿಂದ ಗೂಡಂಗಡಿಗಳ ಸಂಖ್ಯೆ ದಿನೇ ದಿನೇ ಹೆಚ್ಚುತ್ತಿದೆ. ಇದರಿಂದಾಗಿ ಸಾರ್ವಜನಿಕರಿಗೆ ತೊಂದರೆಯಾಗುವುದರ ಜೊತೆಗೆ ರಸ್ತೆಯ ಸೌಂದರ್ಯ, ಸುರಕ್ಷತೆ ಮತ್ತು ಕಾಮಗಾರಿಯ ಪ್ರಗತಿಗೂ ಧಕ್ಕೆಯಾಗುತ್ತಿದೆ.
ರಾಷ್ಟ್ರೀಯ ಹೆದ್ದಾರಿಯ ಬದಿಯಲ್ಲೂ ಇದೇ ರೀತಿಯ ಸಮಸ್ಯೆ ಕಾಣುತ್ತಿದೆ. ಗೂಡಂಗಡಿಗಳು, ಅನಧಿಕೃತ ಪಾರ್ಕಿಂಗ್ ಮತ್ತು ರಸ್ತೆ ಬದಿಯ ವ್ಯಾಪಾರದಿಂದ ಬಸ್ಗಳು ಸೇರಿದಂತೆ ಇತರ ವಾಹನಗಳಿಗೆ ಚಲಿಸಲು ಕಷ್ಟವಾಗುತ್ತಿದೆ. ಈ ಸಮಸ್ಯೆಯ ಜವಾಬ್ದಾರಿಯನ್ನು ಯಾವ ಇಲಾಖೆ ತೆಗೆದುಕೊಳ್ಳಬೇಕು ಎಂಬುದೇ ಸ್ಪಷ್ಟವಾಗಿಲ್ಲ. ಇದರಿಂದ ಸಮಸ್ಯೆ ಮತ್ತಷ್ಟು ಉಲ್ಬಣಗೊಂಡಿದೆ.
ತಕ್ಷಣದ ಕ್ರಮಕ್ಕೆ ಒತ್ತಾಯ: ಅನಧಿಕೃತ ಗೂಡಂಗಡಿಗಳ ಸಮಸ್ಯೆ ಈಗ ಭಟ್ಕಳದ ಸಾಗರ ರಸ್ತೆಯಲ್ಲಿ ಗಂಭೀರ ಸ್ವರೂಪ ಪಡೆದುಕೊಂಡಿದೆ. ಇದು ಕೇವಲ ಸಂಚಾರದ ತೊಂದರೆಗೆ ಸೀಮಿತವಾಗಿಲ್ಲ, ರಸ್ತೆಯ ಸುರಕ್ಷತೆ, ಸೌಂದರ್ಯ ಮತ್ತು ಜನರ ದೈನಂದಿನ ಜೀವನದ ಮೇಲೂ ಪರಿಣಾಮ ಬೀರುತ್ತಿದೆ. ಸಂಬಂಧಪಟ್ಟ ಇಲಾಖೆಗಳು ಈಗಲಾದರೂ ಎಚ್ಚೆತ್ತುಕೊಂಡು ತಕ್ಷಣ ಕ್ರಮ ಕೈಗೊಳ್ಳಬೇಕು. ಗೂಡಂಗಡಿಗಳನ್ನು ತೆರವುಗೊಳಿಸಿ, ವ್ಯಾಪಾರಿಗಳಿಗೆ ಪರ್ಯಾಯ ಸ್ಥಳವನ್ನು ಒದಗಿಸುವ ಮೂಲಕ ಶಾಶ್ವತ ಪರಿಹಾರ ಕಂಡುಕೊಳ್ಳಬೇಕು. ಈ ಕ್ರಮವು ಗೂಡಂಗಡಿ ವ್ಯಾಪಾರಸ್ಥರ ಜೀವನೋಪಾಯವನ್ನು ರಕ್ಷಿಸುವ ಜೊತೆಗೆ ರಸ್ತೆಯ ಸಂಚಾರವನ್ನು ಸುಗಮಗೊಳಿಸಲಿದೆ.
ಪರಿಹಾರಕ್ಕಾಗಿ ತುರ್ತು ಕ್ರಮಗಳು: ರಸ್ತೆಯ ಸಂಚಾರಕ್ಕೆ ತೊಂದರೆಯಾಗುವ ಎಲ್ಲ ಅನಧಿಕೃತ ಗೂಡಂಗಡಿಗಳನ್ನು ತಕ್ಷಣವೇ ತೆರವುಗೊಳಿಸಬೇಕು. ವ್ಯಾಪಾರಿಗಳಿಗೆ ಪುರಸಭೆಯಿಂದ ಪರ್ಯಾಯ ಸ್ಥಳವನ್ನು ಒದಗಿಸಿ, ಒತ್ತುವರಿಗೆ ತಡೆಯಲು ಕಟ್ಟುನಿಟ್ಟಿನ ಕಾನೂನು ಜಾರಿಗೊಳಿಸಬೇಕು.
ಪಾರ್ಕಿಂಗ್ ನಿಯಂತ್ರಣ: ಅನಧಿಕೃತ ಪಾರ್ಕಿಂಗ್ಗೆ ಕಡಿವಾಣ ಹಾಕಲು ಪೊಲೀಸ್ ಇಲಾಖೆ ಕಠಿಣ ಕ್ರಮ ಕೈಗೊಳ್ಳಬೇಕು. ಪಾರ್ಕಿಂಗ್ಗೆ ವಿಶೇಷ ವ್ಯವಸ್ಥೆ ರೂಪಿಸಬೇಕು. ಪುರಸಭೆ, ಪೊಲೀಸ್ ಇಲಾಖೆ, ಲೋಕೋಪಯೋಗಿ ಇಲಾಖೆ ಮತ್ತು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಒಟ್ಟಾಗಿ ಕಾರ್ಯನಿರ್ವಹಿಸಿ, ಸಮಸ್ಯೆಗೆ ಶಾಶ್ವತ ಪರಿಹಾರ ಕಂಡುಕೊಳ್ಳಬೇಕು.
ಜನಜಾಗೃತಿ: ಸಾರ್ವಜನಿಕರಲ್ಲಿ ರಸ್ತೆಯ ಸರಿಯಾದ ಬಳಕೆ ಮತ್ತು ನಿಯಮಗಳ ಬಗ್ಗೆ ಅರಿವು ಮೂಡಿಸುವ ಕಾರ್ಯಕ್ರಮಗಳನ್ನು ಆಯೋಜಿಸಬೇಕು.
ಸಾಗರ ರಸ್ತೆಯ ಅಗಲೀಕರಣ ಕಾಮಗಾರಿಯು ಭಟ್ಕಳದ ಜನರಿಗೆ ದೀರ್ಘಕಾಲೀನ ಪ್ರಯೋಜನವನ್ನು ತರುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯಾಗಿದೆ. ಆದರೆ, ಅನಧಿಕೃತ ಗೂಡಂಗಡಿಗಳಿಂದ ಉಂಟಾಗಿರುವ ಸಂಚಾರದ ತೊಂದರೆಗಳು ಜನರ ದೈನಂದಿನ ಜೀವನವನ್ನು ಅಸ್ತವ್ಯಸ್ತಗೊಳಿಸಿವೆ. ಈ ಗಂಭೀರ ಸಮಸ್ಯೆಯನ್ನು ಸಂಬಂಧಪಟ್ಟ ಇಲಾಖೆಗಳು ಗಂಭೀರವಾಗಿ ಪರಿಗಣಿಸಿ, ಗೂಡಂಗಡಿಗಳನ್ನು ತಕ್ಷಣ ತೆರವುಗೊಳಿಸಿ, ವ್ಯಾಪಾರಿಗಳಿಗೆ ಪರ್ಯಾಯ ವ್ಯವಸ್ಥೆ ಕಲ್ಪಿಸಬೇಕು. ಇದಕ್ಕೆ ಒಂದು ಗಡುವನ್ನು ನಿಗದಿಪಡಿಸಿ, ಕಾಲಮಿತಿಯೊಳಗೆ ಕ್ರಮ ಕೈಗೊಂಡರೆ, ಸಾಗರ ರಸ್ತೆಯ ಸಂಚಾರ ಸುಗಮವಾಗುವುದರ ಜೊತೆಗೆ ಭಟ್ಕಳದ ಈ ಪ್ರಮುಖ ರಸ್ತೆ ನಗರಕ್ಕೊಂದು ಮಾದರಿಯಾಗಿ ಮಾರ್ಪಡಲಿದೆ. ಸಂಬಂಧಪಟ್ಟ ಅಧಿಕಾರಿಗಳು ಇನ್ನಾದರೂ ಜನರ ಆಗ್ರಹಕ್ಕೆ ಸ್ಪಂದಿಸಬೇಕು. ಸಾಗರ ರಸ್ತೆ ಸಂಚಾರಕ್ಕೆ ಸಂಪೂರ್ಣ ಮುಕ್ತವಾಗುವಂತೆ ಗಮನ ಹರಿಸಬೇಕು.
