ರಾಯಚೂರು ಜಿಲ್ಲೆಯಲ್ಲಿ ಭತ್ತದ ಕೊರತೆ : ಉತ್ತರ ಪ್ರದೇಶದಿಂದ 2,184 ಟನ್ ಭತ್ತ ಖರೀದಿಸಿದ ರೈಸ್ ಮಿಲ್ ಮಾಲಕರು

ರಾಯಚೂರು: ಜಿಲ್ಲೆಯಲ್ಲಿ ಈ ಬಾರಿ ಮಳೆಯ ಕೊರತೆಯಿಂದ ತೀವ್ರ ಬರ ಆವರಿಸಿದ್ದು ಮಳೆಯಾಶ್ರಿತ ಪ್ರದೇಶದಲ್ಲಿ ಭತ್ತದ ಬೆಳೆ ಬಿತ್ತನೆ ಕೊರತೆಯಾದ ಹಿನ್ನೆಲೆಯಲ್ಲಿ ಇತ್ತೀಚೆಗೆ ಅಕ್ಕಿ ಗಿರಣಿ ಮಾಲಕರು ಉತ್ತರ ಪ್ರದೇಶದಿಂದ ಗೂಡ್ಸ್ ರೈಲಿನ ಮೂಲಕ ಭತ್ತ ಆವಕ ಮಾಡಿಕೊಂಡಿದ್ದಾರೆ.
ಉತ್ತರ ಪ್ರದೇಶದ ಅಮೇತಿ ಜಿಲ್ಲೆಯ ಗೌರಿಗಂಜ್ ತಾಲೂಕಿನಿಂದ ಜಿಲ್ಲೆಯ ನಾಲ್ಕೈದು ರೈಸ್ ಮಿಲ್ ಮಾಲಕರು ಇತ್ತೀಚೆಗೆ ಗೂಡ್ಸ್ ರೈಲಿನ ಮೂಲಕ 12 ರೇಕ್ (42 ಬೋಗಿಗಳಲ್ಲಿ) 2184 ಟನ್ ಭತ್ತ ಖರೀದಿ ಮಾಡಿದ್ದಾರೆ. ರಾಯಚೂರು ಹಾಗೂ ಕೊಪ್ಪಳ ಜಿಲ್ಲೆಯಲ್ಲಿ ಅತಿ ಹೆಚ್ಚು ಭತ್ತ ಬೆಳೆಯಲಾಗುತ್ತಿದ್ದು ಈ ಬಾರಿ ಮಳೆಯ ಕೊರತೆಯಿಂದ ಭತ್ತದ ಕೊರತೆಯಾಗಬಹುದು ಎಂಬ ಮುಂದಾಲೋಚನೆಯಿಂದ ಭತ್ತ ಖರೀದಿಸಲಾಗಿದೆ ಎನ್ನಲಾಗಿದೆ.
ರಾಯಚೂರಿನ ಎಪಿಎಂಸಿಗೆ ಪಕ್ಕದ ಆಂಧ್ರಪ್ರದೇಶ, ತೆಲಂಗಾಣದ ರೈತರು ಪ್ರತಿ ವರ್ಷ ಹೆಚ್ಚಿನ ಸಂಖ್ಯೆಯಲ್ಲಿ ಭತ್ತ ಮಾರಾಟ ಮಾಡುವುದು ಸಾಮಾನ್ಯ. ಆದರೆ ಈ ಬಾರಿ ಉತ್ತರ ಪ್ರದೇಶದಿಂದ ಭತ್ತ ಖರೀದಿಸಿದ್ದು ಐತಿಹಾಸಿಕವಾಗಿದೆ. ಜಿಲ್ಲೆಯಲ್ಲಿ ಅಂದಾಜು 120 ರೈಸ್ ಮಿಲ್ಗಳಿದ್ದು ಇಲ್ಲಿ ತಯರಾಗುವ ಸೋನಾ ಮಸೂರಿ ಅಕ್ಕಿ ಶ್ರೀಲಂಕಾ, ಬಾಂಗ್ಲಾದೇಶ ಸೇರಿ ಅನೇಕ ಹೊರ ದೇಶಗಳಿಗೂ ರಫ್ತಾಗುತ್ತದೆ.
ಮಳೆ ಕೊರತೆಯಾಗಿದ್ದರಿಂದ ಭತ್ತದ ಬೆಳೆ ಕಡಿಮೆಯಾಗಿ ರೈಸ್ ಮಿಲ್ ಗಳು ಬಂದ್ ಆಗಬಹುದು ಎಂದು ಮಾಲಕರು ಆತಂಕಕ್ಕೆ ಗುರಿಯಾಗಿ ಹೊರ ರಾಜ್ಯದಿಂದ ಖರೀದಿ ಮಾಡಿದ್ದಾರೆ. ಜಿಲ್ಲೆಯ ರೈಸ್ ಮಿಲ್ಗಳಲ್ಲಿ ಸುಮಾರು 3000 ಕಾರ್ಮಿಕರು ಕೆಲಸ ಮಾಡುತ್ತಿದ್ದು ಈ ಪೈಕಿ ಉತ್ತರ ಪ್ರದೇಶ, ಬಿಹಾರ, ಜಾರ್ಖಂಡ್ ಸೇರಿ ಉತ್ತರ ಭಾರತದ ಕಾರ್ಮಿಕರೇ ಎರಡು ಸಾವಿರ ಮಂದಿ ಇದ್ದಾರೆ. ಇವರಿಗೆಲ್ಲಾ ವರ್ಷಪೂರ್ತಿ ಕೆಲಸ ನೀಡಬೇಕಿದೆ. ಎರಡು ಮೂರು ತಿಂಗಳು ಕೆಲಸ ಬಂದ್ ಮಾಡಿ ತವರು ಜಿಲ್ಲೆಗೆ ಹೋದರೆ ಮತ್ತೆ ವಾಪಸ್ ಬರುವುದೇ ಅನುಮಾನ. ಹೀಗಿರುವಾಗ ಯಾವುದೇ ಕಾರಣಕ್ಕೂ ರೈಸ್ ಮಿಲ್ಗಳನ್ನು ಬಂದ್ ಮಾಡಲು ಸಾಧ್ಯವಾಗುವುದಿಲ್ಲ ಎಂದು ರೈಸ್ ಮಿಲ್ ಮಾಲಕರೊಬ್ಬರು ತಿಳಿಸಿದರು.
15 ದಿನಗಳ ಹಿಂದೆ ಹೊಸಭತ್ತ ಬಂದಿದೆ. ನಮ್ಮಲ್ಲಿ ನಿಗದಿ ಮಾಡಿದ್ದಷ್ಟೇ ಭತ್ತ ಖರೀದಿ ಮಾಡುತ್ತಿದ್ದೇವೆ. ಭತ್ತದ ಕೊರತೆಯಾಗಬಹುದು ಎಂಬ ಆತಂಕದಿಂದ ಉತ್ತರ ಪ್ರದೇಶದಿಂದ ಭತ್ತ ಖರೀದಿ ಮಾಡಿದ್ದೇವೆ, ಈಗ ಆಂಧ್ರಪ್ರದೇಶ, ತೆಲಂಗಾಣದಿಂದ ರಾಯಚೂರು ಎಪಿಎಂಸಿಗೆ ಭತ್ತ ಆವಕವಾಗುತ್ತಿದೆ. ಆದರೆ ಜಿಲ್ಲೆಯಲ್ಲಿ ಭತ್ತ ಖರೀದಿಗೆ ಸರಕಾರ ಇಷ್ಟೇ ಅಂತ ನಿಗದಿ ಮಾಡಬಾರದು. ಇದರಿಂದ ರೈಸ್ ಮಿಲ್ಗಳಿಗೆ ಮುಂದೆ ಭತ್ತ ಕೊರತೆಯಾಗಿ ಅಕ್ಕಿ ಉತ್ಪಾದನೆ ಕಡಿಮೆ ಆಗಲಿದೆ. ಇದು ಅಕ್ಕಿ ಏರಿಕೆಗೂ ಕಾರಣಬಾಗಬಹುದು.
<ಸಾವಿತ್ರಿ ಪುರುಷೋತ್ತಮ,
ಕರ್ನಾಟಕ ರಾಜ್ಯ ಅಕ್ಕಿ ಗಿರಣಿ ಮಾಲಕರ ಸಂಘದ ಕಾರ್ಯಾಧ್ಯಕ್ಷ.
ಅಕ್ಕಿ ಉದ್ಯಮದಲ್ಲಿ ಹೊಸ ಐತಿಹಾಸಿಕ ಬೆಳವಣಿಗೆ
ಉತ್ತರ ಪ್ರದೇಶದಿಂದ ಕರ್ನಾಟಕದ ರಾಯಚೂರಿಗೆ ರೈಲಿನ ಮೂಲಕ ಭತ್ತದ ದಾಸ್ತಾನು ಬಂದಿರುವುದು ಜಿಲ್ಲೆಯ ಕೃಷಿ ವ್ಯಾಪಾರ ಮತ್ತು ಅಕ್ಕಿ ಉದ್ಯಮ ಕ್ಷೇತ್ರದಲ್ಲಿ ಮಹತ್ವದ ಬೆಳವಣಿಗೆಯಾಗಿದೆ.
ರಾಯಚೂರು ಜಿಲ್ಲೆ ಭತ್ತದ ಉತ್ಪಾದನೆ ಮತ್ತು ಅಕ್ಕಿ ಉದ್ಯಮಕ್ಕೆ ಹೆಸರುವಾಸಿಯಾಗಿದೆ. ಇಂತಹ ಜಿಲ್ಲೆಗೆ ಉತ್ತರ ಭಾರತದ ಉತ್ತರ ಪ್ರದೇಶದಿಂದ ರೈಲ್ವೆ ಸರಕು ಸಾಗಣೆ ಮೂಲಕ ಭತ್ತ ಆಗಮಿಸಿರುವುದು ಅಂತರ್ರಾಜ್ಯ ಕೃಷಿ ವ್ಯಾಪಾರಕ್ಕೆ ಹೊಸ ಅವಕಾಶಗಳನ್ನು ತೆರೆದಿದೆ ಎಂದು ವಿಶ್ಲೇಷಣೆ ಮಾಡಲಾಗುತ್ತಿದೆ.
ಜಿಲ್ಲೆಯಲ್ಲಿ ಭತ್ತ ಹಾಗೂ ಹತ್ತಿ ಹೆಚ್ಚಾಗಿ ಬೆಳೆಯಲಾಗುತ್ತದೆ. ನೀರಾವರಿ ಪ್ರದೇಶವಿರುವುದರಿಂದ ಇದು ಭತ್ತ ಬೆಳೆಯಲು ಪ್ರಮುಖ ಕಾರಣವೂ ಒಂದು. ಕರ್ನಾಟಕ ರಾಜ್ಯಕ್ಕೆ ಉತ್ತರ ಪ್ರದೇಶದಿಂದ ರೈಲಿನ ಮೂಲಕ ಭತ್ತ ಸಾಗಣೆ ಮಾಡುವುದರಿಂದ ಹೆಚ್ಚಿನ ಪ್ರಮಾಣದ ಕೃಷಿ ಉತ್ಪನ್ನಗಳನ್ನು ಕಡಿಮೆ ಸಮಯದಲ್ಲಿ ಮತ್ತು ವ್ಯವಸ್ಥಿತವಾಗಿ ಸಾಗಿಸಲು ಸಾಧ್ಯವಾಗುತ್ತದೆ. ರಸ್ತೆ ಸಾರಿಗೆಗೆ ಪರ್ಯಾಯವಾಗಿ ರೈಲ್ವೆ ಸರಕು ಸಾಗಣೆ ಬಳಸುವುದರಿಂದ ದೊಡ್ಡ ಪ್ರಮಾಣದ ವ್ಯಾಪಾರ ವಹಿವಾಟಿಗೆ ಅನುಕೂಲವಾಗಬಹುದು ಎಂದು ಹೇಳಲಾಗುತ್ತಿದೆ.
ಈ ಬಾರಿ ಮಳೆ ಕೊರತೆಯಿಂದ ಭತ್ತದ ಬೆಳೆ ಕಡಿಮೆಯಾಗಿದೆ. ಹೀಗಾಗಿ ರೈಸ್ ಮಿಲ್ ಮಾಲಕರು ಹೊರ ರಾಜ್ಯದಿಂದ ಭತ್ತ ಖರೀದಿ ಮಾಡಿದ್ದು, ಇದರಿಂದ ಇಲ್ಲಿನ ರೈತರಿಗೆ ಸಮಸ್ಯೆಯಾಗುವುದಿಲ್ಲ,
<ಚಾಮರಸ ಮಾಲಿ ಪಾಟೀಲ್,
ಕರ್ನಾಟಕ ರಾಜ್ಯ ರೈತ ಸಂಘದ ಗೌರವಾಧ್ಯಕ್ಷ






