ಅಂಡರ್-19 ವಿಶ್ವಕಪ್‌ಗೆ ಔರಾದ್‌ನ ಸೃಷ್ಟಿ ಪಾಟೀಲ್ ಆಯ್ಕೆ
2027ರ ಟಿ20 ವಿಶ್ವಕಪ್‌ನಲ್ಲಿ ಇಂಗ್ಲೆಂಡ್ ಮಹಿಳಾ ತಂಡವನ್ನು ಪ್ರತಿನಿಧಿಸಲಿರುವ ಕನ್ನಡತಿ
ಔರಾದ್ : 2027ನೇ ಜನವರಿಯಲ್ಲಿ ನೇಪಾಳ ಮತ್ತು ಬಾಂಗ್ಲಾದೇಶದಲ್ಲಿ ನಡೆಯಲಿರುವ ಐಸಿಸಿ ಅಂಡರ್ 19 ಮಹಿಳಾ ಟಿ-20 ವಿಶ್ವಕಪ್ ಇಂಗ್ಲೆಂಡ್ ದೇಶದ 15 ಜನ ಸದಸ್ಯರ ತಂಡದಲ್ಲಿ ತಾಲೂಕಿನ ಬಲ್ಲೂರ್(ಜೆ) ಗ್ರಾಮದ ಸೃಷ್ಟಿ ಪಾಟೀಲ್ ಆಯ್ಕೆಯಾಗುವ ಮೂಲಕ ಅಂತರ್‌ರಾಷ್ಟ್ರೀಯ ಮಟ್ಟದಲ್ಲಿ ಖ್ಯಾತಿ ಗಳಿಸಿದ್ದಾರೆ.
ಬಲ್ಲೂರ್ (ಜೆ) ನಿವಾಸಿಗಳಾದ ಜ್ಯೋತಿ ಹಾಗೂ ರೇವಣಪ್ಪ ಪಾಟೀಲ್ ದಂಪತಿ ಮಗಳಾದ ಸೃಷ್ಟಿ ಪಾಟೀಲ್ ಈ ಐತಿಹಾಸಿಕ ಸಾಧನೆ ಮಾಡಿದ್ದು, ಎಲ್ಲರ ಗಮನ ಸೆಳೆಯುವಂತೆ ಮಾಡಿದೆ.
ವಿಶ್ವಕಪ್‌ಗೂ ಮುನ್ನ ಸೃಷ್ಟಿ ಪಾಟೀಲ್ ನ.26ರಿಂದ ಡಿ.6ರವರೆಗೆ ಭಾರತದ ಬರೋಡಾ ಮತ್ತು ಸೂರತ್‌ನಲ್ಲಿ ನಡೆಯಲಿರುವ ಐದು ಟಿ-20 ಸರಣಿ ಪಂದ್ಯಗಳಲ್ಲಿಯೂ ಇಂಗ್ಲೆಂಡ್ ದೇಶವನ್ನು ಪ್ರತಿನಿಧಿಸಿ, ತಾಯ್ನಾಡಿನಲ್ಲಿ ಪಂದ್ಯಗಳನ್ನು ಆಡಲಿದ್ದಾರೆ.
ಸೃಷ್ಟಿ ಪಾಟೀಲ್ ಅವರ ತಂದೆ ರೇವಣಪ್ಪ ಪಾಟೀಲ್ ವೃತ್ತಿಯಲ್ಲಿ ಸಾಫ್ಟ್‌ವೇರ್ ಇಂಜಿನಿಯರ್ ಆಗಿದ್ದು, ಮುಂಬಯಿ, ಆಸ್ಟ್ರೇಲಿಯಾಗಳಲ್ಲಿ ಆರ್ಕಿಟೆಕ್ಚರ್ ಆಗಿ ಕೆಲಸ ಮಾಡಿದ್ದಾರೆ. ಇದೀಗ 20 ವರ್ಷದಿಂದ ಲಂಡನ್‌ನಲ್ಲಿ ನೆಲೆಸಿ, ಪೈಪ್‌ಲೈನ್ ಇಂಜಿನಿಯರಿಂಗ್ ಕೆಲಸ ಮಾಡುತ್ತಿದ್ದಾರೆ. ತಾಯಿ ಜ್ಯೋತಿ ಅವರು ಗೃಹಿಣಿಯಾಗಿದ್ದಾರೆ.
ಈ ದಂಪತಿ 20 ವರ್ಷದಿಂದ ಲಂಡನ್‌ನಲ್ಲಿ ನೆಲೆಸಿದ್ದಾರೆ. ಇವರಿಗೆ ಎರಡು ಮಕ್ಕಳಿದ್ದು, ಮಗ ಶಿವಪ್ರಸಾದ್ ಯೂರೋಪ್‌ನಲ್ಲಿ ವೈದ್ಯ ಪದವಿ ಪಡೆಯುತ್ತಿದ್ದಾರೆ. ಹ್ಯಾಂಪ್‌ಷೈರ್ ನಗರದಲ್ಲಿ ಸೃಷ್ಟಿ ಪಾಟೀಲ್ ಪಿಯುಸಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದು, 2027ರಲ್ಲಿ ಜರುಗುವ ಅಂಡರ್-19 ವಿಶ್ವಕಪ್ ಟಿ-20 ಇಂಗ್ಲೆಂಡ್ ಮಹಿಳಾ ತಂಡದಲ್ಲಿ ಒಪನರ್ ಬ್ಯಾಟಿಂಗ್ ಹಾಗೂ ಬೌಲರ್ ಆಗಿ ಆಯ್ಕೆಯಾಗಿದ್ದಾರೆ.
ತನ್ನ ಅಣ್ಣನ ಜೊತೆಗೆ ಪ್ರತಿದಿನ ಕ್ರಿಕೆಟ್ ಮೈದಾನಕ್ಕೆ ಹೋಗುತ್ತಿರುವ ಸೃಷ್ಟಿ ಪಾಟೀಲ್ ಕ್ರಿಕೆಟ್ ಅಭಿರುಚಿ ಬೆಳೆಸಿಕೊಂಡು ಉತ್ತಮ ಪ್ರತಿಭೆಯಾಗಿ ಹೊರಹೊಮ್ಮಿದ್ದಾರೆ. ಸೃಷ್ಟಿ ಪಾಟೀಲ್ ಅವರ ಸಾಧನೆಗೆ ಹೂಟ್ಟರಾದ ಬಲ್ಲೂರ್ ಹಾಗೂ ತಾಯಿಯ ತವರೂರಾದ ಕಮಲನಗರ್ ತಾಲೂಕಿನ ಹಕ್ಯಾಳ್ ಗ್ರಾಮದಲ್ಲಿ ಸಡಗರ ಸಂಭ್ರಮ ಮನೆ ಮಾಡಿದೆ.
ನಮ್ಮ ಸೋದರ ಸೊಸೆ ಇಂಗ್ಲೆಂಡ್ ತಂಡವನ್ನು ಪ್ರತಿನಿಧಿಸುತ್ತಿರುವುದು ನಮಗೆ ಹೆಮ್ಮೆಯ ಸಂಗತಿಯಾಗಿದೆ. ಅವಳು ಆಡುವ ಪಂದ್ಯಕ್ಕಾಗಿ ಎಲ್ಲರು ನೋಡಲು ಕಾತುರಾಗಿದ್ದೇವೆ. ಮುಂದಿನ ದಿನಗಳಲ್ಲಿ ಅವಳು ಉತ್ತಮ ಆಟಗಾರ್ತಿಯಾಗಿ ಹೊರಹೊಮ್ಮಲಿ ಎಂದು ಹಾರೈಸುತ್ತೇನೆ.
-ಶರದ್ ಪಾಟೀಲ್, ಸೃಷ್ಟಿ ಪಾಟೀಲ್ ಸೋದರ ಮಾವ
ಸೃಷ್ಟಿ ಪಾಟೀಲ್ ಅವರ ಸಾಧನೆ ಗಡಿ ಜಿಲ್ಲೆ ಬೀದರ್ ಹೆಮ್ಮೆ ಪಡುವ ವಿಚಾರವಾಗಿದೆ. ನಮ್ಮ ಜಿಲ್ಲೆಯ ಹೆಸರು ಅಂತರ್‌ರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಮಾಡಲಿ. ಸೃಷ್ಟಿ ಪಾಟೀಲ್ ಅವರ ಸಾಧನೆ ಎಲ್ಲರಿಗೂ ಪ್ರೇರಣೆಯಾಗಿದೆ.
-ಡಾ.ಬಸವರಾಜ್ ಬಲ್ಲೂರ್, ಸಾಹಿತಿ ಬೀದರ್
