ಹಿಮಾಲಯದಲ್ಲಿ ಹಂಪಿ ತಂಡದ ಸಾಧನೆ : ಜೆಕೆ ಟೈರ್ ರ್ಯಾಲಿ ಆಫ್ ಹಿಮಾಲಯಸ್‌ನಲ್ಲಿ ಎರಡು ವಿಭಾಗಗಳಲ್ಲಿ ಗೆಲುವು
ಹೊಸಪೇಟೆ: ಹಿಮಾಲಯದ ಅತ್ಯಂತ ಕಠಿಣ ಹಾಗೂ ಸವಾಲಿನ ಭೂಪ್ರದೇಶದಲ್ಲಿ ನಡೆದ 2026ರ 6ನೇ ಜೆಕೆ ಟೈರ್ ರ್ಯಾಲಿ ಆಫ್ ಹಿಮಾಲಯಸ್‌ನಲ್ಲಿ ವಿಜಯನಗರ ಜಿಲ್ಲೆಯ ಹಂಪಿ ಮೋಟಾರ್‌ಸ್ಪೋರ್ಟ್ಸ್ ತಂಡ ಗಮನಾರ್ಹ ಸಾಧನೆ ಮಾಡಿದೆ. ಎರಡು ವಿಭಾಗಗಳಲ್ಲಿ ಗೆಲುವು ಸಾಧಿಸಿರುವ ತಂಡ, ಒಟ್ಟಾರೆ ವಿಜೇತ, ಜಂಟಿ ವಿಜೇತ ಹಾಗೂ ಪೋಡಿಯಂ ಸ್ಥಾನಗಳನ್ನು ಪಡೆದುಕೊಂಡಿದೆ.
ಸೆ.26ರಿಂದ 30ರವರೆಗೆ ಐದು ದಿನಗಳ ಕಾಲ ನಡೆದ ರ್ಯಾಲಿಯು ಸಮುದ್ರಮಟ್ಟದಿಂದ ಸುಮಾರು 10 ಸಾವಿರದಿಂದ 17 ಸಾವಿರ ಅಡಿ ಎತ್ತರದ ಪ್ರದೇಶಗಳಲ್ಲಿ ನಡೆಯಿತು. ರೋಹ್ಟಾಂಗ್ ಪಾಸ್, ಕುಂಝುಮ್ ಲಾ, ಕಾಜಾ ಹಾಗೂ ಶಿಂಕುಲಾ ಪಾಸ್ ಸೇರಿದಂತೆ ಕಠಿಣ ಪರ್ವತ ಮಾರ್ಗಗಳಲ್ಲಿ ಸ್ಪರ್ಧಿಗಳು ತಮ್ಮ ಚಾಲನಾ ಹಾಗೂ ನ್ಯಾವಿಗೇಷನ್ ಕೌಶಲ್ಯವನ್ನು ಪರೀಕ್ಷಿಸಿಕೊಂಡರು.
ಫ್ಲ್ಯಾಗ್‌ಶಿಪ್ ಎಕ್ಸ್‌ಟ್ರೀಮ್ 4-ವೀಲರ್ ವಿಭಾಗದಲ್ಲಿ ಚಾಲಕ ರಾಜೀವ್ ಯಾದವ್ ಹಾಗೂ ಸಹಚಾಲಕ ರೋಹಿತ್ ಗೌಡ ಒಟ್ಟಾರೆ ವಿಜೇತರಾಗಿ ಹೊರಹೊಮ್ಮಿದರು. ಇದರೊಂದಿಗೆ ಅವರು ತಮ್ಮ ವಿಭಾಗದಲ್ಲೂ ಪ್ರಥಮ ಸ್ಥಾನ ಪಡೆದು ತಂಡಕ್ಕೆ ಪ್ರಮುಖ ಗೆಲುವು ತಂದುಕೊಟ್ಟರು. ಚಾಲಕ ಸಂತೋಷ್ ಎಚ್.ಎಂ. ಹಾಗೂ ಸಹಚಾಲಕ ಪ್ರಕಾಶ್ ಮುತ್ತುಸ್ವಾಮಿ ಪ್ರೊ ವರ್ಗದಲ್ಲಿ ವಿಜೇತರಾದರು. ಇದೇ ವೇಳೆ ಅಡ್ವೆಂಚರ್ ಟಿಎಸ್‌ಡಿ ವಿಭಾಗದಲ್ಲಿ ಒಟ್ಟಾರೆ ಜಂಟಿ ವಿಜೇತರು ಎಂಬ ಗೌರವಕ್ಕೂ ಪಾತ್ರರಾದರು.
ಕಠಿಣ ಹಂತಗಳಲ್ಲಿ ನಿಖರ ನ್ಯಾವಿಗೇಷನ್ ಹಾಗೂ ಸ್ಥಿರ ಪ್ರದರ್ಶನ ಕಾಯ್ದುಕೊಂಡ ಸಂತೋಷ್ ಮತ್ತು ಪ್ರಕಾಶ್, ರ್ಯಾಲಿಯ ಎಲ್ಲ ಪ್ರಮುಖ ಹಂತಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿ ತಂಡದ ಗೆಲುವಿಗೆ ಕೊಡುಗೆ ನೀಡಿದರು.
ಇದೇ ವಿಭಾಗದಲ್ಲಿ ಚಾಲಕ ಕರಣ್ ರಾಜೇಶ್ ಹಾಗೂ ಸಹಚಾಲಕ ಚಂದ್ರಶೇಖರ್ ಥಾರ್ ವಿಭಾಗದಲ್ಲಿ 2ನೇ ರನ್ನರ್‌ಅಪ್ ಸ್ಥಾನ ಪಡೆದುಕೊಂಡರು.
