ರೈತರ ಪಾಲಿಗೆ ಚಿನ್ನವಾಗುವ ‘ಬಂಗಾರದ ಹುಳ’..!

ಕುಂದಾಪುರ: ಮನೆ, ಹೋಟೆಲ್ ಸೇರಿದಂತೆ ವಿವಿಧ ಘಟಕಗಳಿಂದ ಸಂಗ್ರಹವಾಗುವ ಹಸಿ ತ್ಯಾಜ್ಯ ಕೂಡ ಝಣಝಣ ಹಣ ಎಣಿಸುವ ‘ಬಂಗಾರ’ವಾಗಬಹುದು ಎಂಬುದಕ್ಕೆ ವಂಡ್ಸೆ ಗ್ರಾಮ ಪಂಚಾಯತ್ ಸಾಕ್ಷಿ ಒದಗಿಸುತ್ತಿದೆ. ಸುತ್ತಮುತ್ತಲಿನ ಏಳು ಗ್ರಾಮ ಪಂಚಾಯತ್‌ಗಳ ವ್ಯಾಪ್ತಿ ಯಲ್ಲಿರುವ ತ್ಯಾಜ್ಯಗಳನ್ನು ಸಂಗ್ರಹಿಸಿ ಎಸ್‌ಎಲ್‌ಆರ್‌ಎಂ ಘಟಕ ದಲ್ಲಿ ‘ಬಂಗಾರದ ಹುಳು’ ಬಳಸಿ ಗೊಬ್ಬರವಾಗಿಸುವ ಮೂಲಕ ಅದು ಕೈತುಂಬಾ ಆದಾಯ ಗಳಿಸುತ್ತಿದೆ.

ಏನಿದು ಬಂಗಾರದ ಹುಳ? :

ಬಂಗಾರದ ಹುಳು (ಬ್ಲ್ಯಾಕ್ ಸೋಲ್ಜರ್ ಫ್ಲೈ)ವಿನ ವೈಜ್ಞಾನಿಕ ಹೆಸರು ಹರೇಸಿಯಾ ಇಲ್ಲುಸೆನ್ಸ್ ಇದು ಸ್ಟ್ರಾಷಿಯೋಮಿಡೆ ಕುಟುಂಬಕ್ಕೆ ಸೇರಿದ ಒಂದು ಬಗೆಯ ನೊಣವಾಗಿದೆ. ಈ ನೊಣ ಉಷ್ಣವಲಯ ಪ್ರದೇಶವುಳ್ಳ ದೇಶಗಳಲ್ಲೆಲ್ಲಾ ಸಾಮಾನ್ಯವಾಗಿ ಕಂಡುಬರುತ್ತದೆ. ತಿಂದು ಎಸೆಯುವ ಅಳಿದುಳಿದ ಆಹಾರ ಹಾಗೂ ಇತರ ಸಾವಯವ ತ್ಯಾಜ್ಯ ಪದಾರ್ಥಗಳೇ ಬಂಗಾರಹುಳುವಿಗೆ ಆಹಾರ. ಹಸಿಕಸವನ್ನು ರಸ ಮಾಡಿಕೊಂಡು, ಹಸಿ-ಕಸದಗುಂಡಿಯಲ್ಲೇ ಬದುಕಿ-ಬಾಳಿ, ಕಸವನ್ನು ಶ್ರೇಷ್ಠ ಸಾವಯವ ಗೊಬ್ಬರವಾಗಿಸಿ ಪರಿಸರವನ್ನು ಶುದ್ಧಗೊಳಿಸುತ್ತವೆ.

ಈ ಹುಳುವಿಗೆ ಮಾರುಕಟ್ಟೆಯಲ್ಲಿ ಪ್ರತೀ ಕೆ.ಜಿ.ಗೆ ಸುಮಾರು 10 ಸಾವಿರ ರೂ. ಬೆಲೆ ಇದೆ. ಬೆಳೆದ ಮರಿಗೆ ಕೆ.ಜಿ.ಗೆ 500 ರೂ., ಗೊಬ್ಬರಕ್ಕೂ ಬೇಡಿಕೆಯಿದೆ. ಈ ಹುಳುಗಳು ತಮ್ಮ ದೇಹದ ತೂಕಕ್ಕಿಂತ 10 ಪಟ್ಟು ಹೆಚ್ಚು ಕಸವನ್ನು (ಹಸಿತ್ಯಾಜ್ಯವನ್ನು) ತಿಂದು ವಿಲೇವಾರಿ ಮಾಡುತ್ತವೆ. ಈ ಪ್ರಕ್ರಿಯೆಯಿಂದ ದೊರೆಯುವ ಗೊಬ್ಬರವನ್ನು ಕೃಷಿಯಲ್ಲಿ ಬಳಸಲಾಗುತ್ತಿದೆ. ವಂಡ್ಸೆ ಘಟಕದಲ್ಲಿ ತಯಾರಾಗುವ ಗೊಬ್ಬರವನ್ನು ಪ್ರತಿ ಕೆ.ಜಿ.ಗೆ 30 ರೂ. ಹಾಗೂ 12 ರೂ.ನಂತೆ ರೈತರಿಗೆ ಮಾರಾಟ ಮಾಡಲಾಗುತ್ತಿದೆ. ಇದರಿಂದ ತ್ಯಾಜ್ಯ ನಿರ್ವಹಣೆಯ ಜೊತೆಗೆ ಆದಾಯ ಸೃಷ್ಟಿಯೂ ಆಗುತ್ತಿದೆ.

ಉಪಯೋಗಗಳು :

ಬಂಗಾರಹುಳುಗಳ ಸಾಕಣೆಯಿಂದ ಪರಿಸರ ಮಾಲಿನ್ಯ ಕಡಿಮೆ ಯಾಗುವುದರ ಜೊತೆಗೆ ಪ್ರಾಣಿಗಳ ಆಹಾರ ತಯಾರಿಕೆಗೂ ಇವು ಬಳಕೆಯಾಗುತ್ತಿವೆ. ಎರೆಹುಳುವಿಗಿಂತಲೂ ವೇಗವಾಗಿ ಮತ್ತು ಉತ್ತಮ ಗುಣಮಟ್ಟದ ಸಾವಯವ ಗೊಬ್ಬರ ಇದರಿಂದ ತಯಾರಾಗುತ್ತದೆ. ಹಸಿತ್ಯಾಜ್ಯ ನಿರ್ವಹಣೆಗೆ ಇದೊಂದು ಪರಿಸರಸ್ನೇಹಿ ವಿಧಾನವಾಗಿದೆ. ಅಲ್ಲದೇ ಸಾವಯವ ಗೊಬ್ಬರ, ಜೈವಿಕ-ಜಲ ಹಾಗೂ ಜೈವಿಕ- ಇಂಧನ ಇಲ್ಲಿ ಉತ್ಪತ್ತಿಯಾಗುತ್ತದೆ.

ಬಂಗಾರಹುಳುವಿನಿಂದ ತಯಾರಾದ ಸಾವಯವ ಗೊಬ್ಬರದಲ್ಲಿ (ಹರ್ಮಿಕಾಂಪೋಸ್ಟ್) ಶೇ.2.9ರಷ್ಟು ಸಾರಜನಕ, ಶೇ.1.8ರಷ್ಟು ಫಾಸ್ಪರಸ್(ಗಂಧಕ) ಹಾಗೂ ಶೇ.1.3ರಷ್ಟು ರಂಜಕವಿದೆ. ತಿಪ್ಪೆಹುಳುವಿನ ಕೋಶಗಳಲ್ಲಿ ಶೇ.40-60 ಪ್ರೊಟೀನ್, ಶೇ.10-20 ಕೊಬ್ಬು ಹಾಗೂ ಪ್ರಾಣಿಗಳ ಬೆಳವಣಿಗೆಗೆ ಆವಶ್ಯವಿರುವ ಪೋಷಕಾಂಶಗಳಿರುವುದರಿಂದ ಕೋಳಿ- ಮೀನುಗಳ ಆಹಾರ ತಯಾರಿಸಲು ಮಾರುಕಟ್ಟೆ ಯಲ್ಲಿ ಹೆಚ್ಚು ಬೇಡಿಕೆ ಹಾಗೂ ಉತ್ತಮ ಬೆಲೆಯಿದೆ ಎಂದು ಕೃಷಿ ವಿಜ್ಞಾನಿ ಹಾಗೂ ಬ್ರಹ್ಮಾವರ ಕೃಷಿ ಸಂಶೋಧನಾ ಕೇಂದ್ರದ ಹಿರಿಯ ಸಂಶೋಧಕ ರೇವಣ್ಣ ರೇವಣ್ಣನವರ್ ಮಾಹಿತಿ ನೀಡಿದ್ದಾರೆ.

ಬಂಗಾರಹುಳು ನಾಲ್ಕು ಹಂತಗಳಲ್ಲಿ (ಪ್ರೌಢ/ರೆಕ್ಕೆಹುಳು, ಮೊಟ್ಟೆ, ಮರಿ ಹಾಗೂ ಕೋಶ) ಬೆಳೆದು, ಒಟ್ಟು 28-41 ದಿನಗಳಲ್ಲಿ ಜೀವನವನ್ನು ಪೂರ್ಣಗೊಳಿಸುತ್ತದೆ. ರೆಕ್ಕೆಯುಳ್ಳ ಪ್ರೌಢ ಬಂಗಾರಹುಳುವಿನ ದೇಹವು ಕಪ್ಪು ಬಣ್ಣದ್ದಾಗಿದೆ. ಸಾಮಾನ್ಯವಾಗಿ 1.6 ಸೆ. ಮೀ. ಉದ್ದ ಹಾಗೂ 0.5 ಸೆ.ಮೀ. ಅಗಲವಿರುತ್ತದೆ. ಜೀವಿತಾವಧಿ 5-8 ದಿನಗಳು.

ಬಂಗಾರಹುಳುವಿನ ಮೊಟ್ಟೆ :

ಮೊಟ್ಟೆಗಳು ಗುಂಪಾಗಿರುತ್ತವೆ. ಒಂದು ಗುಂಪಿನಲ್ಲಿ ಸುಮಾರು 500ರಿಂದ 900 ಮೊಟ್ಟೆಗಳಿರುತ್ತವೆ. ಮೊಟ್ಟೆಗಳು ಸಣ್ಣಗಾತ್ರದ ಜೀರಿಗೆ ಅಕ್ಕಿ ತರಹ ಹಳದಿ ಮಿಶ್ರಿತ ಬಿಳಿ ಬಣ್ಣದ್ದಾಗಿದ್ದು, ಸುಮಾರು 0.5-1.0 ಮಿ. ಮೀ. ಉದ್ದವಾಗಿರುತ್ತವೆ. ಜೀವನಾವಧಿ 3-5 ದಿನಗಳು.

ಬಂಗಾರ ಹುಳುವಿನ ಮರಿ :

ಮೊಟ್ಟೆ ಒಡೆದು ಹೊರಬಂದ ಮರಿಹುಳು ಬಿಳಿ ಬಣ್ಣದಿಂದ ಕೂಡಿದ್ದು, ಪ್ರಾರಂಭದಲ್ಲಿ ಸುಮಾರು 1.0 ಮಿ. ಮೀ. ಉದ್ದವಾಗಿದ್ದು, ಕ್ರಮೇಣ ಸುಮಾರು 2.7 ಸೆ. ಮೀ.ನಷ್ಟು ಉದ್ದ ಬೆಳೆದು ಕಂದುಬಣ್ಣ ಹೊಂದುತ್ತದೆ. ಜೀವಿತಾವಧಿ 20ರಿಂದ 28 ದಿನಗಳು.