ರಾಷ್ಟ್ರಪತಿಗಳು ಮಧ್ಯಪ್ರವೇಶಿಸಲಿ

ನೀಟ್ ಪರೀಕ್ಷೆಯೂ ಸೇರಿ ಹಲವು ಪರೀಕ್ಷೆಗಳಲ್ಲಿ ನಡೆಯುತ್ತಿರುವ ಪರೀಕ್ಷಾ ಅಕ್ರಮಗಳು, ಪ್ರಶ್ನೆಪತ್ರಿಕೆಯ ಸೋರಿಕೆ ಹಾಗೂ ಪರೀಕ್ಷಾ ವ್ಯವಸ್ಥೆಯ ವೈಫಲ್ಯವನ್ನು ವಿರೋಧಿಸಿ ದಿಲ್ಲಿಯ ಜಂತರ್‌ಮಂಥರ್‌ನಲ್ಲಿ ಸೋನಮ್ ವಾಂಗ್ಚುಕ್ ಅವರು ಉಪವಾಸ ಸತ್ಯಾಗ್ರಹ ಕೈಗೊಂಡು ಹದಿನೆಂಟು ದಿನಗಳು ದಾಟಿವೆ. ಆದರೆ ಇದುವರೆಗೂ ಸರಕಾರ ಯಾವ ಸ್ಪಂದನವನ್ನೂ ಮಾಡಿಲ್ಲ. ಅವರ ಆರೋಗ್ಯ ಕ್ಷೀಣಿಸುತ್ತಿದ್ದು ಸರಕಾರ ತಕ್ಷಣ ಅವರ ಮನವಿಗೆ ಕಿವಿಗೊಟ್ಟು ಅವರ ಪ್ರಾಣಕ್ಕೆ ಸಂಚಕಾರವಾಗದಂತೆ ನೋಡಿಕೊಳ್ಳಬೇಕು. ಈಗಾಗಲೇ ಈ ವೈಫಲ್ಯದ ಪರಿಣಾಮವಾಗಿ ವಿದ್ಯಾರ್ಥಿಗಳು ಆತ್ಮಹತ್ಯೆ ಮಾಡಿಕೊಂಡಿದ್ದು ಅತೀವ ದುಃಖದ ಸಂಗತಿಯಾಗಿದ್ದು ಇದನ್ನು ಸರಕಾರ ಗಂಭೀರವಾಗಿ ಪರಿಗಣಿಸದೆ ಇರುವುದು ಅತ್ಯಂತ ಅಮಾನವೀಯ ನಡೆಯಾಗಿದೆ. ಸೋನಮ್ ವಾಂಗ್ಚುಕ್ ಅವರ ಆಗ್ರಹವು, ದೇಶದ ಎಲ್ಲಾ ಪೋಷಕರು ಮತ್ತು ವಿದ್ಯಾರ್ಥಿಗಳ ಆಗ್ರಹವೂ ಆಗಿದೆ. ಉನ್ನತ ಶಿಕ್ಷಣದ ಸಂಪೂರ್ಣ ವ್ಯವಸ್ಥೆಯೇ ಕುಸಿದು ಹೋಗಿದ್ದು ಇದನ್ನು ತಕ್ಷಣ ಸರಿಪಡಿಸಿ ನಾಗರಿಕರಿಗೆ ನ್ಯಾಯ ಒದಗಿಸಬೇಕಾದದ್ದು ಚುನಾಯಿತ ಸರಕಾರಗಳ ಕರ್ತವ್ಯವಾಗಿದ್ದು ಇದಕ್ಕೆ ಕುರುಡು/ಕಿವುಡಾಗಿ ವರ್ತಿಸುತ್ತಿರುವುದು ಆಘಾತಕಾರಿ ಸಂಗತಿಯಾಗಿದೆ. ಶಿಕ್ಷಣ ವ್ಯವಸ್ಥೆಯ ಖಾಸಗೀಕರಣದಿಂದ ಕೈಗೆಟುಕದಿರುವಂತಾಗಿರುವುದು ಒಂದೆಡೆಯಾದರೆ, ಇನ್ನೊಂದೆಡೆ ಶಿಕ್ಷಣದ ಸೀಟು ಲಭ್ಯತೆಯ ಅವಕಾಶವನ್ನು ವಿಕೇಂದ್ರೀಕರಣದಿಂದ ಕೇಂದ್ರೀಕರಣಗೊಳಿಸಿ ಅವಕಾಶಗಳ ಸಮತೋಲನವನ್ನು ಹದಗೆಡಿಸಿರುವುದು ನಡೆಯುತ್ತಿದೆ. ಸುಧಾರಣೆಗಿಂತಲೂ ಅವ್ಯವಸ್ಥೆ ಮತ್ತು ಅದರೆಡೆಗಿನ ನಿರ್ಲಕ್ಷ್ಯವನ್ನು ಭಾರತ ಸರಕಾರ ಗಂಭೀರವಾಗಿ ಪರಿಗಣಿಸಬೇಕಿದೆ. ಸಂಬಂಧಪಟ್ಟ ಮಂತ್ರಿಗಳ ಕಾರ್ಯಕ್ಷಮತೆ ಸಂಶಯಕ್ಕೀಡಾಗಿದ್ದು ಪ್ರತಿಭಟನಾಕಾರರ ಬೇಡಿಕೆಗಳು ನ್ಯಾಯಬದ್ಧವಾಗಿದೆ. ಈ ಕಾರಣದಿಂದ ಸರಕಾರವು ತಕ್ಷಣವೇ ಪ್ರತಿಭಟನಾಕಾರರ ಜೊತೆಗೆ ಮಾತುಕತೆ ಆರಂಭಿಸಿ ಬೇಡಿಕೆಗಳ ಕಡೆಗೆ ಗಮನ ಹರಿಸಿ ಪ್ರಜೆಗಳ ಅಹವಾಲನ್ನು ಗೌರವಿಸಬೇಕು ಮತ್ತು ಇದಕ್ಕಾಗಿ ರಾಷ್ಟ್ರಪತಿಗಳು ಮಧ್ಯಪ್ರವೇಶಿಸಬೇಕು ಎಂದು ನಾವು ಆಗ್ರಹಿಸುತ್ತಿದ್ದೇವೆ.

1. ಸೋನಮ್ ವಾಂಗ್ಚುಕ್ ಹಾಗೂ ಪ್ರತಿಭಟನಾ ನಿರತ ವಿದ್ಯಾರ್ಥಿಗಳ ಬೇಡಿಕೆಗಳಿಗೆ ಸ್ಪಂದಿಸಿ ಕೂಡಲೇ ಮಾತುಕತೆ ಆರಂಭಿಸಬೇಕು.

2. ಪರೀಕ್ಷಾ ಅಕ್ರಮಗಳನ್ನು ಸರಿಯಾಗಿ ತನಿಖೆ ನಡೆಸಿ ತಕ್ಷಣದಿಂದಲೇ ಸುಧಾರಣೆಗಳನ್ನು ಮಾಡಬೇಕು ಹಾಗೂ ತಪ್ಪಿತಸ್ಥರಿಗೆ ಕಠಿಣ ಶಿಕ್ಷೆಯಾಗಬೇಕು.

3. ನೀಟ್ ಪರೀಕ್ಷೆಗಳನ್ನು ರದ್ದು ಪಡಿಸಿ ಪ್ರತೀ ರಾಜ್ಯಕ್ಕೂ ನ್ಯಾಯ ಸಲ್ಲುವಂತೆ ವಿಕೇಂದ್ರೀಕರಣ ಮಾಡಿ ಮುಂದೆ ಇಂತಹ ಪರಿಸ್ಥಿತಿಗಳು ನಿರ್ಮಾಣವಾಗದಂತೆ ನೋಡಿಕೊಳ್ಳಬೇಕು.

4. ಹೆಚ್ಚು ಹೆಚ್ಚು ಸರಕಾರಿ ಕಾಲೇಜುಗಳನ್ನು ತೆರೆದು, ನಿಪುಣ ಅಧ್ಯಾಪಕ ವರ್ಗಗಳ ನೇಮಕಾತಿ ಮಾಡಬೇಕು.

5. ವಿದ್ಯಾರ್ಥಿಗಳ ಉನ್ನತ ಶಿಕ್ಷಣದ ಅವಕಾಶ ಹಾಗೂ ಉದ್ಯೋಗದ ಅವಕಾಶವನ್ನು ಹೆಚ್ಚಿಸುವುದಕ್ಕಾಗಿ ಬಜೆಟ್‌ನಲ್ಲಿ ಶಿಕ್ಷಣಕ್ಕೆ ಹೆಚ್ಚು ಅನುದಾನ ನಿಗದಿ ಪಡಿಸಬೇಕು.

ಕರ್ನಾಟಕದ ಹಲವಾರು ಸಾಹಿತಿಗಳು, ಪ್ರಾಧ್ಯಾಪಕರು, ವಿದ್ಯಾರ್ಥಿ ಯುವಜನರು, ಸಾಮಾಜಿಕ ಕಾರ್ಯಕರ್ತರು, ಗೃಹಿಣಿಯರು ಮತ್ತು ಹಲವು ವಲಯದ ಸಹಿ ಹಾಕಿರುವ 250ಕ್ಕೂ ಹೆಚ್ಚಿನ ಪ್ರಜೆಗಳ ಪರವಾಗಿ

-ಡಾ. ಸಬಿತಾ ಬನ್ನಾಡಿ

ನಿವೃತ್ತ ಪ್ರಾಧ್ಯಾಪಕರು ಹಾಗೂ ಲೇಖಕರು

ಶಿವಮೊಗ್ಗ