ಸಂವಿಧಾನ ವಿರೋಧಿ ಆಡಳಿತ ವ್ಯವಸ್ಥೆಯ ವಿರುದ್ಧ ಸಿಡಿದೆದ್ದ ಯುವಜನತೆ

ದೇಶದ 2 ಕೋಟಿ ಯುವಜನರ ಕೈಗೆ ಉದ್ಯೋಗ ಕೊಡುತ್ತೇವೆ ಎಂಬ ಬಿಜೆಪಿ ಮಾತು ನಂಬಿದ್ದ ‘ಜೆನ್ ಝಿ’ಗಳು ಕಳೆದ 12 ವರ್ಷಗಳಿಂದ ಕಾದು ಕುಳಿತಿದ್ದರು. ಇಂದು ಉದ್ಯೋಗ ಕೊಡುತ್ತಾರೆ, ನಾಳೆ ಕೊಡುತ್ತಾರೆ ಎಂಬ ಭರವಸೆಯಲ್ಲಿದ್ದರು. ಆದರೆ ಆರೆಸ್ಸೆಸ್ ನಿಯಂತ್ರಿತ ಕೇಂದ್ರ ಸರಕಾರ ಉದ್ಯೋಗ ನೀಡಲು ವಿಫಲವಾದಾಗ ಯುವಜನರು ಕೇಂದ್ರ ಸರಕಾರದ ವಿರುದ್ಧ ಬಂಡೆದ್ದಿದ್ದಾರೆ. ‘ಕಾಕ್ರೋಚ್’ ರೂಪದಲ್ಲಿ ಬಿಜೆಪಿ ಸರಕಾರದ ವಿರುದ್ಧ ದಂಗೆಯನ್ನೇ ಸಾರಿದ್ದಾರೆ. ‘ನೀಟ್’ ಪರೀಕ್ಷೆ ವಿಫಲವಾದಾಗ ಜೆನ್ ಝಿಗಳ ಆಕ್ರೋಶ ಕಟ್ಟೆಯೊಡೆದಿತ್ತು. ದೇಶದಾದ್ಯಂತ ಪಕ್ಷಾತೀತವಾಗಿ, ಜಾತ್ಯತೀತವಾಗಿ ಯುವಜನರು ಆಂದೋಲನ ನಡೆಸಿದ ಪರಿಣಾಮ ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ರಾಜೀನಾಮೆ ನೀಡಬೇಕಾಯಿತು. ಇದು ಜೆನ್ ಝಿಗಳ ಮೊದಲ ಗೆಲುವಾಗಿತ್ತು.

ಈಗ ಕೇಂದ್ರ ಸರಕಾರದ ಇನ್ನೊಂದು ಷಡ್ಯಂತ್ರ, ಪ್ರಜಾಪ್ರಭುತ್ವ ವಿರೋಧಿ, ಸಂವಿಧಾನ ವಿರೋಧಿಯಾಗಿರುವ ನಡೆ ಜೆನ್ ಝಿಗಳಿಗೆ ಅರ್ಥವಾಗಿದೆ. ಯುವಜನರ ವಿಶ್ವಾಸ ಕಳೆದುಕೊಂಡಿರುವ ಕೇಂದ್ರ ಸರಕಾರ ಚುನಾವಣಾ ವ್ಯವಸ್ಥೆಯನ್ನು ಬುಡಮೇಲು ಮಾಡಿ ಮುಂದೆ ದೇಶದಾದ್ಯಂತ ಅಧಿಕಾರ ನಡೆಸುವ ಹುನ್ನಾರ ನಡೆಸುತ್ತಿದೆ. ಮತ್ತೆ ಕೇಂದ್ರದಲ್ಲಿ ಅಧಿಕಾರಕ್ಕೆ ಬರುವ ಷಡ್ಯಂತ್ರ ರೂಪಿಸುತ್ತಿದೆ. ಅದೇ ಈಗ ನಮ್ಮ ಮುಂದಿರುವ ಸಂವಿಧಾನ ವಿರೋಧಿ ಎಸ್‌ಐಆರ್.

ಚುನಾವಣಾ ಆಯೋಗದ ಮುಖ್ಯಸ್ಥ ಜ್ಞಾನೇಶ್ ಕುಮಾರ್ ನರೇಂದ್ರ ಮೋದಿ, ಅಮಿತ್ ಶಾ ಹಾಗೂ ಆರೆಸ್ಸೆಸ್ ನಾಯಕರ ಕೈಗೊಂಬೆಯಾಗಿದ್ದಾರೆ. ಮತದಾರರ ಪಟ್ಟಿ ಸಮಗ್ರ ಪರಿಷ್ಕರಣೆ ಹೆಸರಿನಲ್ಲಿ ಅಲ್ಪಸಂಖ್ಯಾತರ ಮತಗಳನ್ನು ರದ್ದು ಮಾಡುವ ಕೆಲಸಕ್ಕೆ ಕೈಹಾಕಿದ್ದಾರೆ. ಫಾರಂ-7 ಮೂಲಕ ಮುಸ್ಲಿಮರ ಮತಗಳನ್ನು ರದ್ದು ಮಾಡುವಂತೆ ಬಿಜೆಪಿ ಸದಸ್ಯರು, ಆರೆಸ್ಸೆಸ್ ಕಾರ್ಯಕರ್ತರು ಆಯೋಗಕ್ಕೆ ಸಾವಿರಾರು ಸಂಖ್ಯೆಯಲ್ಲಿ ಅರ್ಜಿ ಸಲ್ಲಿಸುತ್ತಿದ್ದಾರೆ. ಆ ಮೂಲಕ ಬೇರೆ ಯಾವ ಪಕ್ಷವೂ ಅಧಿಕಾರಕ್ಕೆ ಬಾರದಂತೆ ತಡೆದು ತಾವೇ ಹಿಂದಿನ ಬಾಗಿಲ ಮೂಲಕ ಅಧಿಕಾರ ಹಿಡಿಯಲು ಬಿಜೆಪಿ ಪ್ರಯತ್ನಿಸುತ್ತಿದೆ. ಚುನಾವಣಾ ಆಯೋಗದ ಇತರ ಸದಸ್ಯರ ಯಾವುದೇ ಮಾತುಗಳಿಗೆ ಮಾನ್ಯತೆ ನೀಡದ ಜ್ಞಾನೇಶ್ ಕುಮಾರ್ ಆರೆಸ್ಸೆಸ್ ಆಣತಿಯಂತೆ ನಿರ್ಧಾರ ಕೈಗೊಳ್ಳುತ್ತಿದ್ದಾರೆ. ಇದಕ್ಕೆ ನ್ಯಾಯಾಂಗ ವ್ಯವಸ್ಥೆಯೂ ಇಂಬು ಕೊಡುತ್ತಿರುವುದು ದುರದೃಷ್ಟಕರ ಬೆಳವಣಿಗೆಯಾಗಿದೆ.

ಈಗ ಅಲ್ಪಸಂಖ್ಯಾತರ ಮತ ರದ್ದು ಮಾಡುವ ಚುನಾವಣಾ ಆಯೋಗ, ಮುಂದೆ ದಲಿತರು, ಹಿಂದುಳಿದ ವರ್ಗಗಗಳ ಮತಗಳನ್ನು ರದ್ದು ಮಾಡುವ ಅಪಾಯ ನಿರ್ಮಾಣವಾಗಲಿದೆ. ಆ ಮೂಲಕ ಇಡೀ ದೇಶವನ್ನು ಮನುವಾದಕ್ಕೆ, ಶಿಲಾಯುಗಕ್ಕೆ ಕರೆದೊಯ್ಯುವ ಉದ್ದೇಶ ಬಿಜೆಪಿ, ಆರೆಸ್ಸೆಸ್‌ಗೆ ಇದೆ. ಜೆನ್ ಝಿಗಳ ಆಕ್ರೋಶವನ್ನು ನೇರವಾಗಿ ಎದುರಿಸುವ ಶಕ್ತಿ ಬಿಜೆಪಿ, ಆರೆಸ್ಸೆಸ್ ನಾಯಕರಿಗೆ ಇಲ್ಲ. ಯುವಜನರ ಆಕ್ರೋಶವನ್ನು ಹೇಗಾದರೂ ಮಾಡಿ ನಾಶಗೊಳಿಸಬೇಕು ಎಂಬ ಕಾರಣಕ್ಕೆ ಹೀನ ಕೆಲಸಗಳಿಗೆ ಕೈಹಾಕುತ್ತಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಅವರೇ ವಿದ್ಯಾರ್ಥಿ ನಾಯಕರನ್ನು ‘ದಿಮಾಗಿ ನಕ್ಸಲ್, ನಗರ ಮಾವೋವಾದಿಗಳು’ ಎಂದು ಕರೆಯುವ ಮೂಲಕ ಜೆನ್ ಝಿಗಳ ಮೇಲೆ ತಮಗಿರುವ ಹತಾಶೆ ಮನೋಭಾವವನ್ನು ಹೊರಹಾಕಿದ್ದಾರೆ.

ಯುವಜನರಿಗೆ ಕೇಂದ್ರ ಸರಕಾರದ ಷಡ್ಯಂತ್ರ ಅರ್ಥವಾಗಿದೆ. ಇನ್ನುಮುಂದೆ ತಮ್ಮ ಕನಸುಗಳು, ಭವಿಷ್ಯದ ಭರವಸೆಗಳು ಅರ್ಥ ಕಳೆದುಕೊಳ್ಳಲಿವೆ ಎಂಬ ಸತ್ಯ ಅರ್ಥವಾಗಿದೆ. ಬಿಜೆಪಿ ಇನ್ನೊಮ್ಮೆ ಅಧಿಕಾರಕ್ಕೆ ಬಂದುಬಿಟ್ಟರೆ ಇಡೀ ಜೆನ್ ಝಿಗಳ ಧ್ವನಿಯನ್ನು ಅಡಗಿಸುತ್ತಾರೆ ಎಂಬ ವಾಸ್ತವಾಂಶ ಯುವಕ, ಯುವತಿಯರಿಗೆ ಗೊತ್ತಾಗುತ್ತಿದೆ. ಇದೇ ಕಾರಣಕ್ಕೆ ದೇಶದಾದ್ಯಂತ ಜೆನ್ ಝಿಗಳು ಚುನಾವಣಾ ಆಯೋಗದ ಮುಖ್ಯಸ್ಥರ ವಿರುದ್ಧ ಸಮರ ಸಾರಿದ್ದಾರೆ.

ಡಾ.ಬಿ.ಆರ್. ಅಂಬೇಡ್ಕರ್ ಅವರು ಸಂವಿಧಾನ ರಚಿಸುವ ಮೂಲಕ ಒಬ್ಬ ವ್ಯಕ್ತಿ, ಒಂದು ಮತ, ಒಂದು ಮೌಲ್ಯ ಎಂಬ ಸಾರ್ವತ್ರಿಕ ವಯಸ್ಕ ಮತದಾನದ ಹಕ್ಕು ನೀಡಿದರು. ರಾಜೀವ್ ಗಾಂಧಿ ಅವರು ಪ್ರಧಾನಿ ಆಗಿದ್ದ ಸಂದರ್ಭದಲ್ಲಿ 18 ವರ್ಷ ತುಂಬಿದ ಎಲ್ಲಾ ಯುವಜನರಿಗೂ ಮತದಾನ ಹಕ್ಕು ನೀಡುವ ಮೂಲಕ ಚುನಾವಣಾ ವ್ಯವಸ್ಥೆಯನ್ನು ಬಲಗೊಳಿಸಿದರು. ಆದರೆ ಚುನಾವಣೆಯ ವ್ಯವಸ್ಥೆಯ ಬಲಹೀನಗೊಳಿಸುವುದೇ ಬಿಜೆಪಿ, ಆರೆಸ್ಸೆಸ್ ಮುಖಂಡರ ಉದ್ದೇಶವಾಗಿದೆ.

ಡಿಜಿಟಲ್ ಇಂಡಿಯಾ, ಕಪ್ಪು ಹಣ ವಾಪಸಾತಿ, ರೈತರ ಆದಾಯ ದ್ವಿಗುಣ ಮುಂತಾದ ಭರವಸೆಗಳನ್ನು ನೀಡಿ ಅಧಿಕಾರವೇರಿದರು. ಆದರೆ ಈ ಎಲ್ಲಾ ಮಾತುಗಳೂ ತಪ್ಪಿವೆ. ಹಾಗಾಗಿ ದೇಶದ ಮೂಲೆಮೂಲೆಯಲ್ಲಿ ಆಡಳಿತ ವಿರೋಧಿ ಅಲೆ ಕಾಳ್ಗಿಚ್ಚಿನಂತೆ ಹರಡುತ್ತಿರುವುದು ಬಿಜೆಪಿ ಮುಖಂಡರಿಗೆ, ಆರೆಸ್ಸೆಸ್ ನಾಯಕರಿಗೆ ನುಂಗಲಾಗದ ತುತ್ತಾಗಿದೆ. ಆದ್ದರಿಂದ ಅನ್ಯ ಮಾರ್ಗದ ಮೂಲಕ ಅಧಿಕಾರ ಹಿಡಿದು ಸಾಂವಿಧಾನಿಕ ತತ್ವಗಳನ್ನು ಗಾಳಿಗೆ ತೂರುವುದು ಅವರ ಉದ್ದೇಶವಾಗಿದೆ. ಅದಕ್ಕೆ ಚುನಾವಣಾ ಆಯೋಗವನ್ನು ಬಳಸಿಕೊಳ್ಳುತ್ತಿರುವುದು ಜಗಜ್ಜಾಹೀರಾಗಿದೆ.

ಧರ್ಮಗಳನ್ನು ಎತ್ತಿಕಟ್ಟಿ, ಜಾತಿಜಾತಿಗಳನ್ನು ಎತ್ತಿಕಟ್ಟಿ ಬಿಜೆಪಿ ಮುಖಂಡರು ತಮ್ಮ ಬೇಳೆ ಬೇಯಿಸಿಕೊಳ್ಳುತ್ತಿದ್ದರು, ಚುನಾವಣೆಗಳನ್ನು ಗೆಲ್ಲುತ್ತಿದ್ದರು. ಮುಗ್ಧ ಜನರನ್ನು ಯಾಮಾರಿಸಿಯೇ ಗೆದ್ದು ಬೀಗುತ್ತಿದ್ದರು. ಆದರೆ ವಿದ್ಯಾರ್ಥಿಗಳನ್ನು, ಜೆನ್ ಝಿಗಳನ್ನು ಯಾಮಾರಿಸಲು ಸಾಧ್ಯವೇ? ಅದು ಸಾಧ್ಯವಾಗುವುದಿಲ್ಲ ಎಂಬ ಕಾರಣಕ್ಕೆ ಮತದಾರರ ಪಟ್ಟಿಗೆ ಕೈಹಾಕಿ ಅದಕ್ಕೆ ಎಸ್‌ಐಆರ್ ಎಂಬ ಕತೆ ಹೆಣೆದಿದ್ದಾರೆ.

ಕಳೆದ ಲೋಕಸಭಾ ಚುನಾವಣೆಯಲ್ಲಿ ಬಿಜೆಪಿಗೆ ಬಹುಮತ ಬಂದಿಲ್ಲ. ಇದೇ ಬಿಜೆಪಿ ಮುಖಂಡರಿಗೆ ಎಚ್ಚರಿಕೆಯ ಗಂಟೆಯಾಗಿತ್ತು. ಇದೇ ಪರಿಸ್ಥಿತಿಯಲ್ಲಿ ಮುಂದುವರಿದರೆ 2029ರ ಲೋಕಸಭಾ ಚುನಾವಣೆಯಲ್ಲಿ ಎನ್‌ಡಿಎ ಅಧಿಕಾರಕ್ಕೆ ಬರುವುದಿಲ್ಲ ಎಂಬ ಸತ್ಯ ಅರ್ಥವಾಗಿದೆ. ಆಂಧ್ರದಲ್ಲಿ ಚಂದ್ರಬಾಬು ನಾಯ್ಡು, ಬಿಹಾರದಲ್ಲಿ ನಿತೀಶ್ ಕುಮಾರ್, ಪಶ್ಚಿಮ ಬಂಗಾಳದಲ್ಲಿ ಸುವೇಂದು ಅಧಿಕಾರಿ, ಕರ್ನಾಟಕದಲ್ಲಿ ಮಾಜಿ ಪ್ರಧಾನಿ ಎಚ್.ಡಿ. ದೇವೇಗೌಡ, ಎಚ್.ಡಿ. ಕುಮಾರಸ್ವಾಮಿ ಅವರನ್ನು ಬುಟ್ಟಿಗೆ ಹಾಕಿಕೊಂಡು ಮುಂದಿನ ಚುನಾವಣೆಯಲ್ಲಿ ಮತ್ತೆ ಅಧಿಕಾರ ಹಿಡಿಯಲು ಷಡ್ಯಂತ್ರ ರೂಪಿಸುತ್ತಿದೆ.

ಕರ್ನಾಟಕದಲ್ಲಿ ಕೆಪಿಎಸ್‌ಸಿ ಹಾಳಾಗಿದ್ದು ಕೂಡ ಬಿಜೆಪಿಯ ಸಂವಿಧಾನ ವಿರೋಧಿ ಆಯ್ಕೆಯಿಂದಾಗಿಯೇ. ಆರೆಸ್ಸೆಸ್ ಹಿನ್ನೆಲೆಯ ಸಾಹುಕಾರ್ ಶಿವಶಂಕರಪ್ಪ ತನ್ನ ಸ್ವಂತ ಮಕ್ಕಳಿಗೆ ಕೆಲಸ ಕೊಡಿಸಲು ಹೋಗಿ ಈಗ ಕಂಬಿ ಎಣಿಸುತ್ತಿದ್ದಾನೆ. ಕಳೆದ ಹಲವು ವರ್ಷಗಳಿಂದ ಕೆಪಿಎಸ್‌ಸಿಯಲ್ಲಿ ಆಗಿರುವ ಬ್ರಹ್ಮಾಂಡ ಭ್ರಷ್ಟಾಚಾರ ಈಗ ಬೆಳಕಿಗೆ ಬಂದಿದೆ. ಸ್ವಾಯತ್ತ ಸಂಸ್ಥೆಗಳ ಕುಲಗೆಡಿಸುವ ಕೆಲಸವನ್ನು ಬಿಜೆಪಿ ನಿರಂತರವಾಗಿ ಮಾಡುತ್ತಿದೆ. ಐಟಿ, ಈ.ಡಿ., ಸಿಬಿಐ ಮುಂತಾದ ಸಂಸ್ಥೆಗಳನ್ನು ತಮ್ಮ ತಾಳಕ್ಕೆ ಕುಣಿಯುವಂತೆ ಬಿಜೆಪಿ ಮಾಡಿಕೊಂಡಿದೆ. ಈಗ ಚುನಾವಣಾ ಆಯೋಗವನ್ನೂ ತಮ್ಮತ್ತ ಸೆಳೆದುಕೊಂಡಿದೆ. ಮುಂದೆ ಜ್ಞಾನೇಶ್ ಕುಮಾರ್ ಅವರನ್ನು ದೇಶದ ರಾಷ್ಟ್ರಪತಿ ಮಾಡಿದರೂ ಆಶ್ಚರ್ಯಪಡಬೇಕಾಗಿಲ್ಲ.

ಬಿಜೆಪಿ, ಆರೆಸ್ಸೆಸ್ ನಾಯಕರು ಈಗ ಜೆನ್ ಝಿಗಳ ಮುಂದೆ ಬೆತ್ತಲಾಗಿದ್ದಾರೆ. ಅವರು ಮಾಡುತ್ತಿರುವ ಸಂವಿಧಾನ ವಿರೋಧಿ ಕೃತ್ಯಗಳು ಯುವಜನತೆಗೆ ಅರ್ಥವಾಗಿವೆ. ವಿದ್ಯಾವಂತರಾದ, ವೈಜ್ಞಾನಿಕ ಚಿಂತನೆಯುಳ್ಳ ಯುವಜನರನ್ನು ಯಾಮಾರಿಸಲು ಸಾಧ್ಯವೇ?

ಈಗ ಅವರಿಗೆ ಬೇಕಿರುವುದು ನೈತಿಕ ಬೆಂಬಲ. ಜಾತ್ಯತೀತ, ಪಕ್ಷಾತೀತವಾದ ಬೆಂಬಲ ನಮ್ಮ ಮಕ್ಕಳಿಗೆ ಸಿಗಬೇಕಾಗಿದೆ. ಹಿರಿಯರಾದವರು ಜೆನ್ ಝಿಗಳಿಗೆ ನೈತಿಕ ಬೆಂಬಲ ನೀಡಿದರೆ ನಮ್ಮ ದೇಶದ ಬೆಳವಣಿಗೆಗೆ ಉತ್ತಮ ಕೊಡುಗೆ ಕೊಟ್ಟಂತೆಯೇ.