ಇಡೀ ಜಗತ್ತಿಗೇ ಸತ್ಯ ಗೊತ್ತಿದ್ದರೂ, ಇಸ್ರೇಲ್ ಪರಮಾಣು ಶಸ್ತ್ರಾಸ್ತ್ರಗಳನ್ನು ಹೊಂದಿಲ್ಲ ಎಂದು ಏಕೆ ಸುಳ್ಳು ಹೇಳುತ್ತಿದೆ?

ಭಾಗ- 2

ಬಾಂಬ್ ತಯಾರಿಸುವ ತಂತ್ರಜ್ಞಾನ ಇಸ್ರೇಲಿ ವಿಜ್ಞಾನಿಗಳಿಗೆ ಸಿಕ್ಕ ಸಂಪೂರ್ಣ ವಿಷಯ ವಿಶ್ವದ ಅತಿದೊಡ್ಡ ಶಕ್ತಿಯಾದ ಅಮೆರಿಕದ ಕಣ್ಣುಗಳಿಂದ ಮರೆಮಾಚುವುದಷ್ಟೇ ಬಾಕಿಯುಳಿದ ವಿಷಯವಾಗಿತ್ತು.

1960ರಲ್ಲಿ ಅಮೆರಿಕದ ಯು2 ಗೂಢಚಾರ ವಿಮಾನ ಇಸ್ರೇಲ್‌ನ ನೆಗೆವ್ ಮರುಭೂಮಿಯ ಮೇಲೆ ಹಾರುತ್ತಿತ್ತು. ಅದು ಕೆಲವು ಚಿತ್ರಗಳನ್ನು ತೆಗೆದುಕೊಂಡಿತು ಮತ್ತು ಈ ಚಿತ್ರಗಳು ಸಿಐಎ ಪ್ರಧಾನ ಕಚೇರಿಯನ್ನು ತಲುಪಿದವು. ವಿಶ್ಲೇಷಕರು ಪರಿಶೀಲಿಸಿದಾಗ, ಚಿತ್ರಗಳಲ್ಲಿ ಒಂದು ದೊಡ್ಡ ಕಾಂಕ್ರಿಟ್ ಗುಮ್ಮಟ ಗೋಚರಿಸಿತು. ಇಸ್ರೇಲ್ ಅದು ಜವಳಿ ಕಾರ್ಖಾನೆ ಎಂದು ಹೇಳಿಕೊಂಡಿತು. ತನಿಖೆಯ ನಂತರ, ಸಿಐಎಗೆ ಅದು ಪರಮಾಣು ರಿಯಾಕ್ಟರ್ ಎಂದು ತಿಳಿದುಬಂತು. ಇದನ್ನು ನೆಗೆವ್ ಮರುಭೂಮಿಯ ಡಿಮೋನಾ ಎಂಬ ಸ್ಥಳದಲ್ಲಿ ನಿರ್ಮಿಸಲಾಗಿದೆ.

ಸಿಐಎ ವರದಿ ಪರಮಾಣು ಪ್ರಸರಣ ನಿಷೇಧದ ಕಟ್ಟಾ ಬೆಂಬಲಿಗರಾಗಿದ್ದ ಅಮೆರಿಕ ಅಧ್ಯಕ್ಷ ಜಾನ್ ಎಫ್ ಕೆನಡಿ ಅವರ ಬಳಿಗೆ ತಲುಪಿತು.

ಇದರ ನಂತರ, ಇಸ್ರೇಲ್ ಪ್ರಧಾನಿ ಡೇವಿಡ್ ಬೆನ್-ಗುರಿಯನ್ ಮತ್ತು ಜೆಎಫ್‌ಕೆ ನಡುವೆ ಒಂದು ಸುತ್ತಿನ ಪತ್ರವ್ಯವಹಾರ ನಡೆಯಿತು. ಕೆನಡಿಯವರ ಭಾಷೆ ನೇರ ಮತ್ತು ಕಟ್ಟುನಿಟ್ಟಾಗಿತ್ತು. ಇಸ್ರೇಲ್ ಸತ್ಯವನ್ನು ಹೇಳಬೇಕು ಮತ್ತು ಅಮೇರಿಕನ್ ವಿಜ್ಞಾನಿಗಳು ಡಿಮೋನಾವನ್ನು ಪರೀಕ್ಷಿಸಲು ಅವಕಾಶ ನೀಡಬೇಕು ಎಂದು ಅವರು ಒತ್ತಾಯಿಸಿದರು.

ಬೆನ್-ಗುರಿಯನ್ ಅವರ ಉತ್ತರಗಳು ರಾಜತಾಂತ್ರಿಕತೆಗೆ ಉದಾಹರಣೆಯಾಗಿದ್ದವು. ಅವರು ತಪ್ಪಿಸಿಕೊಳ್ಳುವ ಭಾಷೆ ಬಳಸಿದ್ದರು.

ಪ್ರತೀ ಪತ್ರದಲ್ಲೂ, ಇಸ್ರೇಲ್‌ನ ಉದ್ದೇಶ ಶಾಂತಿಯುತವಾಗಿದೆ ಎಂದು ಅವರು ಪುನರುಚ್ಚರಿಸಿದರು. ಆದರೆ ತಪಾಸಣೆಯ ಬದಲು, ಅವರು ‘ಯಾವಾಗಲೂ ಭೇಟಿ’ ಎಂಬ ಪದವನ್ನು ಬಳಸುತ್ತಿದ್ದರು.

ಮೇ 1961ರಲ್ಲಿ ಇಬ್ಬರೂ ನಾಯಕರು ನ್ಯೂಯಾರ್ಕ್‌ನಲ್ಲಿ ಭೇಟಿಯಾದರು. ರಹಸ್ಯ ಸಭೆಯಲ್ಲಿ ಕೆನಡಿ ಬೆನ್-ಗುರಿಯನ್ ಮೇಲೆ ಒತ್ತಡ ಹೇರಿದರು.

ಅಂತಿಮವಾಗಿ, ಇಸ್ರೇಲ್ ಅಮೇರಿಕನ್ ವಿಜ್ಞಾನಿಗಳ ಭೇಟಿಗಳಿಗೆ ಒಪ್ಪಿಕೊಂಡಿತು. ನಂತರ ಅದು ಶುರುಮಾಡಿದ್ದೇ ಇತಿಹಾಸದಲ್ಲಿನ ಅತಿದೊಡ್ಡ ನಾಟಕವಾಗಿತ್ತು.

ಕಪಿನ್ ತಮ್ಮ ‘ದಿ ಬಾಂಬ್ ಇನ್ ದಿ ಬೇಸ್‌ಮೆಂಟ್’ ಪುಸ್ತಕದಲ್ಲಿ, ಇಸ್ರೇಲಿಗಳು ಅಮೇರಿಕನ್ ತಂಡವನ್ನು ಮೋಸಗೊಳಿಸಲು ಹಾಲಿವುಡ್ ಚಿತ್ರದ ಸೆಟ್‌ನಂತೆ ಸಿದ್ಧತೆಗಳನ್ನು ಮಾಡಿಕೊಂಡಿದ್ದರು ಎಂದು ಹೇಳುತ್ತಾರೆ.

ಡಿಬೋನಾ ರಿಯಾಕ್ಟರ್ ಒಳಗೆ ಆರು ಅಂತಸ್ತಿನ ಬೃಹತ್ ಪ್ಲುಟೋನಿಯಂ ಮರು ಸಂಸ್ಕರಣಾ ಘಟಕವನ್ನು ನೆಲದಡಿಯಲ್ಲಿ ನಿರ್ಮಿಸಲಾಗಿತ್ತು. ಈ ಸ್ಥಾವರಕ್ಕೆ ಹೋಗುವ ಲಿಫ್ಟ್‌ಗಳು ಮತ್ತು ಮಾರ್ಗಗಳನ್ನು ನಕಲಿ ಗೋಡೆಗಳಿಂದ ಮುಚ್ಚಲಾಗಿತ್ತು. ಮೇಲೆ ನಕಲಿ ನಿಯಂತ್ರಣ ಕೊಠಡಿಯನ್ನು ನಿರ್ಮಿಸಲಾಗಿತ್ತು.ಅದರಲ್ಲಿ ಕೆಲಸ ಮಾಡದ ಆದರೆ ನಿಜವಾಗಿ ಕಾಣುವ ಉಪಕರಣಗಳಿದ್ದವು.

ಅಮೆರಿಕನ್ ವಿಜ್ಞಾನಿಗಳ ತಂಡ ಡಿಮೋನಾವನ್ನು ತಲುಪಿದಾಗ, ಪ್ರೊ. ದೋಸ್ಟ್ರೋವ್ಸ್ಕಿ ನೇತೃತ್ವದ ಇಸ್ರೇಲ್‌ನ ಪರಮಾಣು ಶಕ್ತಿ ಆಯೋಗದ ವಿಜ್ಞಾನಿಗಳು ಅವರನ್ನು ಸ್ವಾಗತಿಸಿದರು.

ದೋಸ್ಟ್ರೋವ್ಸ್ಕಿ ಸ್ವತಃ ಒಬ್ಬ ಅದ್ಭುತ ವಿಜ್ಞಾನಿ.ಆದರೆ ಜನರನ್ನು ಮರುಳು ಮಾಡುವ ಕೌಶಲ್ಯವನ್ನು ಅವರು ಹೊಂದಿದ್ದರು.

ರಿಯಾಕ್ಟರ್‌ನ ತಂಪಾಗಿಸುವ ಸಾಮರ್ಥ್ಯ ವಿದ್ಯುತ್ ರೇಟಿಂಗ್‌ಗಿಂತ ಹೆಚ್ಚಿನದಾಗಿದೆ ಎಂದು ತೋರುತ್ತದೆ ಎಂಬಂತಹ ಕಠಿಣ ಪ್ರಶ್ನೆಗಳನ್ನು ಅಮೆರಿಕನ್ ತಂಡ ಕೇಳುತ್ತಿತ್ತು. ದೋಸ್ಟ್ರೋವ್ಸ್ಕಿ ಅವರನ್ನು ಸಂಕೀರ್ಣವಾದ ವೈಜ್ಞಾನಿಕ ಡೇಟಾ ಮತ್ತು ಸಮೀಕರಣಗಳೊಂದಿಗೆ ಗೊಂದಲಕ್ಕೆ ಈಡು ಮಾಡುತ್ತಿದ್ದರು. ತಪ್ಪಾದ ರೀಡಿಂಗ್‌ಗೆ ದೋಷಯುಕ್ತ ಉಪಕರಣಗಳನ್ನು ದೂಷಿಸುತ್ತಿದ್ದರು.

ಇದು ಕೇವಲ ವೈಜ್ಞಾನಿಕ ವಂಚನೆಯಾಗಿರಲಿಲ್ಲ. ಎವ್ನರ್ ಕೊಹೆನ್ ತಮ್ಮ ‘ದಿ ವರ್ಸ್ಟ್ ಕೆಪ್ಟ್ ಸೀಕ್ರೆಟ್’ ಪುಸ್ತಕದಲ್ಲಿ ಈ ಮಹಾ ವಂಚನೆಯ ಬಗ್ಗೆ ಆಸಕ್ತಿದಾಯಕ ವಿವರಣೆ ನೀಡಿದ್ದಾರೆ.

ಅಮೆರಿಕನ್ ತಂಡವನ್ನು ಬಿಝಿ ಆಗಿಡಲು, ಹಿರಿಯ ರಹಸ್ಯ ಏಜೆಂಟ್‌ನನ್ನು ಡಿಮೋನಾದ ಮೇಯರ್ ಆಗಿ ನೇಮಿಸಲಾಯಿತು. ಈ ಮೇಯರ್ ಅಮೆರಿಕನ್ ವಿಜ್ಞಾನಿಗಳ ತಂಡವನ್ನು ದೀರ್ಘ ಭೋಜನಕ್ಕೆ ಕರೆದೊಯ್ಯುತ್ತಿದ್ದರು. ಆತ ಅವರಿಗೆ ಸ್ಥಳೀಯ ಕಥೆಗಳನ್ನು ಹೇಳುತ್ತಿದ್ದರು ಮತ್ತು ನಗರದ ಸಮಸ್ಯೆಗಳನ್ನು ಚರ್ಚಿಸುತ್ತಿದ್ದರು. ಇದರಿಂದಾಗಿ ಅವರಿಗೆ ರಿಯಾಕ್ಟರ್ ಬಗ್ಗೆ ಪ್ರಶ್ನೆಗಳನ್ನು ಕೇಳಲು ಕಡಿಮೆ ಸಮಯ ಸಿಗುತ್ತಿತ್ತು.

ಅಮೆರಿಕನ್ ವಿಜ್ಞಾನಿಗಳು ಪ್ರತಿ ಬಾರಿಯೂ ಬರಿಗೈಯಲ್ಲಿ ಹಿಂದಿರುಗಿದರು.ಅವರಿಂದ ಏನನ್ನೋ ಮರೆಮಾಚಲಾಗುತ್ತಿದೆ ಎಂದು ಅವರಿಗೆ ತಿಳಿದಿತ್ತು. ಆದರೆ ಅವರ ಬಳಿ ಯಾವುದೇ ಗಟ್ಟಿ ಪುರಾವೆಗಳು ಇರಲಿಲ್ಲ.

ಇಲ್ಲಿ, ಅಮೆರಿಕ ನಿಜವಾಗಿಯೂ ಮುಗ್ಧವಾಗಿತ್ತೇ ಅಥವಾ ಅದು ಇಸ್ರೇಲ್ ಜೊತೆ ಸೇರಿಕೊಂಡು ಇಡೀ ಜಗತ್ತನ್ನು ವಂಚಿಸಿತೇ ಎಂಬ ಪ್ರಶ್ನೆ ಉದ್ಭವಿಸುತ್ತದೆ.

ಸತ್ಯ ಎಲ್ಲೋ ನಡುವೆ ಇದೆ.

ಕೆನಡಿ ಆಡಳಿತ ಖಂಡಿತವಾಗಿಯೂ ಚಿಂತಿತವಾಗಿತ್ತು. ಆದರೆ 1963 ರಲ್ಲಿ ಅವರ ಹತ್ಯೆಯ ನಂತರ, ಪರಿಸ್ಥಿತಿ ಬದಲಾಯಿತು. ಹೊಸ ಅಧ್ಯಕ್ಷ ಲಿಂಡನ್ ಬಿ. ಜಾನ್ಸನ್ ಇಸ್ರೇಲ್ ಬಗ್ಗೆ ತುಂಬಾ ಮೃದುವಾಗಿದ್ದರು.

ಅವರ ಸಮಯದಲ್ಲಿ, ಅವರು ವಿಯೆಟ್ನಾಂ ಯುದ್ಧ ಮತ್ತು ದೇಶೀಯ ಸಮಸ್ಯೆಗಳಲ್ಲಿ ಸಿಲುಕಿಕೊಂಡರು. ಅದಕ್ಕಾಗಿಯೇ ಜಾನ್ಸನ್‌ಗೆ ಇಸ್ರೇಲ್‌ನ ಡಿಮೋನಾ ಆದ್ಯತೆಯಾಗಿರಲಿಲ್ಲ. ಇಸ್ರೇಲ್ ಈ ಬದಲಾವಣೆಯನ್ನು ಗ್ರಹಿಸಿತು ಮತ್ತು ತನ್ನ ಕೆಲಸವನ್ನು ತೀವ್ರಗೊಳಿಸಿತು.

ಅಮೆರಿಕಕ್ಕೆ ಇಸ್ರೇಲ್ ಅನ್ನು ಸಾರ್ವಜನಿಕವಾಗಿ ಎದುರಿಸುವುದು ಕಷ್ಟಕರ ರಾಜಕೀಯ ನಡೆಯಾಗಿತ್ತು. ಏಕೆಂದರೆ ಇಸ್ರೇಲ್‌ಗೆ ಇಂದಿನಂತೆಯೇ ಯುಎಸ್ ಕಾಂಗ್ರೆಸ್‌ನಲ್ಲಿ ಅಪಾರ ಬೆಂಬಲವಿತ್ತು. ಆದ್ದರಿಂದ, ಇಸ್ರೇಲ್ ಸುಳ್ಳು ಹೇಳುತ್ತಲೇ ಇರುತ್ತದೆ ಮತ್ತು ಅಮೆರಿಕ ಆ ಸುಳ್ಳುಗಳನ್ನು ನಂಬುವಂತೆ ನಟಿಸುತ್ತಲೇ ಇರುತ್ತದೆ ಎಂಬಂತೆ ಅಘೋಷಿತ ಒಪ್ಪಂದಕ್ಕೆ ಬರಲಾಯಿತು.

ಆದರೆ ಇಸ್ರೇಲ್‌ನ ದೊಡ್ಡ ಸವಾಲು ಕಚ್ಚಾ ವಸ್ತುವಾಗಿತ್ತು. ಬಾಂಬ್‌ಗೆ ಅತ್ಯುನ್ನತ ಪುಷ್ಟೀಕರಿಸಿದ ಯುರೇನಿಯಂ ಅಗತ್ಯವಿತ್ತು. ಅದು ಅಪರೂಪದ ಸರಕು. ಯಾರೂ ಅದನ್ನು ಒಂದು ಬೆಲೆಗೆ ಮಾರಾಟ ಮಾಡುವುದಿಲ್ಲ ಎಂದು ಅರ್ಥಮಾಡಿಕೊಂಡ ಇಸ್ರೇಲ್, ನಂತರ ಅದನ್ನು ಕದಿಯಲು ಯೋಚಿಸಿತು. ಈ ಕೆಲಸದ ಜವಾಬ್ದಾರಿಯನ್ನು ಇಸ್ರೇಲ್‌ನ ಅತ್ಯಂತ ರಹಸ್ಯ ಸಂಸ್ಥೆಗೆ ನೀಡಲಾಯಿತು. ಅದು ಮೊಸ್ಸಾದ್ ಅಲ್ಲ. ಅದರ ಹೆಸರು ಲಾಕಾಮ್.

ಲಾಕಾಮ್ ಮೊಸ್ಸಾದ್‌ಗಿಂತ ಹೆಚ್ಚು ನಿಗೂಢ ಹಾಗೂ ರಹಸ್ಯವಾಗಿತ್ತು. ಪರಮಾಣು ಕಾರ್ಯಕ್ರಮಕ್ಕಾಗಿ ತಂತ್ರಜ್ಞಾನ ಮತ್ತು ವಸ್ತುಗಳನ್ನು ಯಾವುದೇ ಬೆಲೆಗೆ ಪಡೆಯುವುದು, ಅದನ್ನು ಕದಿಯುವುದು, ಉಕ್ಕನ್ನು ಮರಳಿ ಎರವಲು ಪಡೆಯುವುದು ಅದರ ಏಕೈಕ ಕೆಲಸವಾಗಿತ್ತು.

ಅದು ಮೊದಲು ಅಮೆರಿಕದ ಮೇಲೆ ತನ್ನ ದೃಷ್ಟಿ ಹರಿಸಿತು. ಈ ಕಾರ್ಯಾಚರಣೆಯ ಕೇಂದ್ರ ಪೆನ್ಸಿಲ್ವೇನಿಯಾದ ಅಪೊಲೊ ಎಂಬ ಸಣ್ಣ ಪಟ್ಟಣ ಮತ್ತು ನ್ಯೂಮೆಕ್ ಎಂಬ ಕಂಪೆನಿಯಾಗಿತ್ತು. ಇದರ ಮಾಲಕ ಡಾ. ಜಲ್ಮನ್ ಶಪಿರೊ ಒಬ್ಬ ವಿಜ್ಞಾನಿ. ನ್ಯೂಮೆಕ್ ಸ್ಥಾವರದ ಭದ್ರತಾ ವ್ಯವಸ್ಥೆ ಆಶ್ಚರ್ಯಕರವಾಗಿ ಸಡಿಲವಾಗಿತ್ತು ಎಂದು ‘ದಿ ಸ್ಯಾಮ್ಸನ್ ಆಪ್ಷನ್’ ಪುಸ್ತಕದಲ್ಲಿ ಹೇಳಲಾಗಿದೆ. ಅದು ಪರಮಾಣು ಬಾಂಬ್ ತಯಾರಿಸಲು ಸಾಕಷ್ಟು ಯುರೇನಿಯಂ ಅನ್ನು ಇರಿಸಲಾಗಿದ್ದ ಸ್ಥಳವಾಗಿತ್ತು. ಆದರೆ ಅಲ್ಲಿನ ನಿಯಮಗಳು ಯಾವುದೇ ಸಾಮಾನ್ಯ ಕಾರ್ಖಾನೆಯಂತೆಯೇ ಇದ್ದವು.

ಇಸ್ರೇಲ್‌ನ ಲಾಕಾಮ್ ಈ ಸಡಿಲತೆಯ ಲಾಭ ಪಡೆಯಿತು. ಅಲ್ಲಿ ಬರುತ್ತಿದ್ದ ಇಸ್ರೇಲಿ ಅತಿಥಿಗಳಲ್ಲಿ ರಫಿ ಈತಾನ್ ಪ್ರಮುಖರಾಗಿದ್ದರು. ಅವರು ಇಸ್ರೇಲಿ ಗುಪ್ತಚರ ವ್ಯವಸ್ಥೆಯ ಅನುಭವಿ. ಈತಾನ್ ಮತ್ತು ಇತರ ಇಸ್ರೇಲಿ ಏಜೆಂಟರು ನ್ಯೂಮೆಕ್ ಸ್ಥಾವರದಲ್ಲಿ ಮುಕ್ತವಾಗಿ ಸುತ್ತಾಡುತ್ತಿದ್ದರು.

ಸಿಐಎ ಮತ್ತು ಎಫ್‌ಬಿಐ ತನಿಖೆ ಪ್ರಾರಂಭಿಸಿದಾಗ, ನೂರಾರು ಕಿಲೋಗ್ರಾಂಗಳಷ್ಟು ಯುರೇನಿಯಂ ಸ್ಥಾವರದಿಂದ ಕಾಣೆಯಾದದ್ದು ಗೊತ್ತಾಯಿತು. ಈತಾನ್‌ನಂತಹ ಜನರು ಹಲವಾರು ಬಾರಿ ಸ್ಥಾವರಕ್ಕೆ ಭೇಟಿ ನೀಡಿದ್ದರು ಎಂದು ಅವರು ಕಂಡುಕೊಂಡರು.

ಪುರಾವೆಗಳು ಕೇವಲ ಸಾಂದರ್ಭಿಕವಾಗಿರಲಿಲ್ಲ. ತನಿಖೆಯ ಸಮಯದಲ್ಲಿ, ಅಮೆರಿಕನ್ ಇನ್ಸ್‌ಪೆಕ್ಟರ್‌ಗಳು ಇಸ್ರೇಲ್‌ನಲ್ಲಿ ಗಾಳಿಯ ಮಾದರಿಗಳಲ್ಲಿ ಹೆಚ್ಚು ಸಮೃದ್ಧವಾಗಿರುವ ಯುರೇನಿಯಂನ ಕಣಗಳನ್ನು ಕಂಡುಕೊಂಡರು. ಈ ಮಾದರಿಗಳನ್ನು ಪ್ರಯೋಗಾಲಯದಲ್ಲಿ ಪರೀಕ್ಷಿಸಿದಾಗ, ಆಘಾತಕಾರಿ ವಿಷಯ ಬೆಳಕಿಗೆ ಬಂದಿತು. ಯುರೇನಿಯಂ ನ್ಯೂಮೆಕ್‌ನಿಂದ ಉತ್ಪಾದಿಸಲ್ಪಟ್ಟ ಮತ್ತು ಅಲ್ಲಿಂದ ಕದ್ದ ಅದೇ ನಿರ್ದಿಷ್ಟ ಬ್ಯಾಚ್‌ನಿಂದ ಬಂದಿದ್ದಾಗಿತ್ತು.

ಈ ವರದಿ ಎಷ್ಟು ಸ್ಫೋಟಕವಾಗಿತ್ತೆಂದರೆ, ಇದನ್ನು ಸರಕಾರದ ಉನ್ನತ ಮಟ್ಟದಲ್ಲಿ ಮತ್ತೊಮ್ಮೆ ಹತ್ತಿಕ್ಕಲಾಯಿತು. ಯಾವುದೇ ಅಧ್ಯಕ್ಷರು ತಮ್ಮ ನದರಿನಡಿಯೇ ಪರಮಾಣು ವಸ್ತುಗಳನ್ನು ಕದಿಯಲಾಗಿದೆ ಅಥವಾ ಅವರು ಕದಿಯಲು ಅವಕಾಶ ಮಾಡಿಕೊಟ್ಟಿದ್ದಾರೆ ಎಂದು ಬಹಿರಂಗವಾಗಿ ಒಪ್ಪಿಕೊಳ್ಳುವುದು ರಾಜಕೀಯ ಬಿರುಗಾಳಿಯನ್ನೇ ಸೃಷ್ಟಿಸುತ್ತಿತ್ತು. ಅಂತೂ ಇಸ್ರೇಲ್ ಅಮೆರಿಕದಿಂದ ಹೆಚ್ಚು ಪುಷ್ಟೀಕರಿಸದ ಯುರೇನಿಯಂ ಅನ್ನು ಕಳ್ಳತನದ ಮೂಲಕ ಪಡೆದುಕೊಂಡಿತ್ತು. ಅದಕ್ಕೆ ಪ್ರತ್ಯಕ್ಷವಾಗಿ ಅಥವಾ ಪರೋಕ್ಷವಾಗಿ ಅಮೆರಿಕದಿಂದ ಅದಕ್ಕೆ ಸಾಕಷ್ಟು ಸಹಾಯವೂ ಸಿಕ್ಕಿತ್ತು.

ಆದರೆ ಡಿಮೋನಾದ ಬೃಹತ್ ರಿಯಾಕ್ಟರ್ ಅನ್ನು ಚಲಾಯಿಸಲು ಇನ್ನೂ ಹೆಚ್ಚಿನ ಯುರೇನಿಯಂ ಅಗತ್ಯವಿತ್ತು. ಅದಕ್ಕೆ ಹೆಚ್ಚಿನ ಪ್ರಮಾಣದ ನೈಸರ್ಗಿಕ ಯುರೇನಿಯಂ ಅಂದರೆ ಯೆಲ್ಲೋ ಕೇಕ್ ಅಗತ್ಯವಿತ್ತು. ಇದಕ್ಕಾಗಿ, ಲಾಕಾಮ್ ಮತ್ತು ಮೊಸ್ಸಾದ್ ಒಟ್ಟಾಗಿ ಒಂದು ಕಾರ್ಯಾಚರಣೆ ನಡೆಸಿದವು. ಇದನ್ನು ಇನ್ನೂ ಗುಪ್ತಚರ ಸಂಸ್ಥೆಗಳ ಇತಿಹಾಸದಲ್ಲಿ ಒಂದು ಉದಾಹರಣೆ ಎಂದು ಪರಿಗಣಿಸಲಾಗಿದೆ.

ಅದು ಆಪರೇಷನ್ ಪ್ಲಂಬಟ್.

1968ರಲ್ಲಿ ಮೊಸ್ಸಾದ್ ಏಜೆಂಟ್ ಡಾನ್ ಓಬಲ್ ಒಂದು ಬಲೆ ಹಾಕಿದರು.

ಜರ್ಮನ್ ಕಂಪೆನಿಯೊಂದು ಬೆಲ್ಜಿಯಂ ಕಂಪೆನಿಯಿಂದ 200 ಟನ್ ಯೆಲ್ಲೋ ಕೇಕ್ ಅನ್ನು ಖರೀದಿಸಿತು. ದಾಖಲೆ ಪ್ರಕಾರ, ಅದನ್ನು ಇಟಾಲಿಯನ್ ಪೇಂಟ್ ಕಂಪೆನಿಗೆ ಮಾರಾಟ ಮಾಡಬೇಕಿತ್ತು. ಅದನ್ನು ಶೆಸ್‌ಬರ್ಗ್ ಎ ಎಂಬ ಹಡಗಿನಲ್ಲಿ ಲೋಡ್ ಮಾಡಲಾಯಿತು. ಹಡಗು ಮೆಡಿಟರೇನಿಯನ್ ಸಮುದ್ರವನ್ನು ತಲುಪಿದಾಗ ನಿಜವಾದ ಆಟ ಶುರುವಾಯಿತು.

ಹಡಗು ತನ್ನ ಟ್ರಾನ್ಸ್‌ಪಾಂಡರ್‌ಗಳನ್ನು ಆಫ್ ಮಾಡಿ ಕತ್ತಲೆಯಲ್ಲಿ ಅಜ್ಞಾತ ಸ್ಥಳದ ಕಡೆಗೆ ಹೋಯಿತು. ಅಲ್ಲಿ ಇಸ್ರೇಲಿ ಸರಕು ಹಡಗು ಆಗಲೇ ಕಾಯುತ್ತಿತ್ತು. ರಾತ್ರಿಯಲ್ಲಿ ಎರಡೂ ಹಡಗುಗಳ ಸಿಬ್ಬಂದಿ ಒಟ್ಟಾಗಿ ಆ 560 ಭಾರವಾದ ಉಕ್ಕಿನ ಡ್ರಮ್‌ಗಳನ್ನು ಒಂದು ಹಡಗಿನಿಂದ ಮತ್ತೊಂದು ಹಡಗಿಗೆ ಸ್ಥಳಾಂತರಿಸಿದರು. ಸರಕುಗಳನ್ನು ವರ್ಗಾಯಿಸಿದ ನಂತರ, ಶೆಸ್‌ಬರ್ಗ್ ಎ ನ ನಿಜವಾದ ಸಿಬ್ಬಂದಿ ಹಡಗಿನಿಂದ ಇಳಿದರು. ಅವರಿಗೆ ದೊಡ್ಡ ಮೊತ್ತದ ಹಣ ನೀಡಲಾಯಿತು ಮತ್ತು ಶಾಶ್ವತವಾಗಿ ಮೌನವಾಗಿರಲು ಸೂಚಿಸಲಾಯಿತು.

ಮೊಸ್ಸಾದ್‌ನ ಏಜೆಂಟರು ಹಡಗನ್ನು ನಿಯಂತ್ರಣಕ್ಕೆ ತೆಗೆದುಕೊಂಡು, ಖಾಲಿ ಸ್ಥಿತಿಯಲ್ಲಿ ತುರ್ಕಿಯ ಬಂದರಿಗೆ ತೆಗೆದುಕೊಂಡು ಹೋಗಿ ಅಲ್ಲಿಯೇ ಬಿಟ್ಟರು.

ವಾರಗಳ ನಂತರ ಹಡಗು ಇಲ್ಲಿ ನಿಂತಿದೆ ಎಂದು ತಿಳಿದಾಗ, ಅಂತರ್‌ರಾಷ್ಟ್ರೀಯ ತನಿಖಾ ಸಂಸ್ಥೆಗಳು ದಿಗ್ಭ್ರಮೆಗೊಂಡವು. ಜರ್ಮನ್ ಕಂಪೆನಿ, ಇಟಾಲಿಯನ್ ಕಂಪೆನಿ, ಲೈಬೀರಿಯಾದ ಧ್ವಜ, ಎಲ್ಲವೂ ಇಸ್ರೇಲ್ ರಚಿಸಿದ ಚಕ್ರವ್ಯೆಹದ ಭಾಗವಾಗಿತ್ತು. ಯಾವುದೇ ದೇಶ ಇಸ್ರೇಲ್ ಅನ್ನು ಅಂತಹ ಯಾವುದೇ ಅಪರಾಧದ ಬಗ್ಗೆ ಅಧಿಕೃತವಾಗಿ ಆರೋಪಿಸಲು ಸಾಧ್ಯವಾಗಲಿಲ್ಲ. ಅದು ಪರ್ಫೆಕ್ಟ್ ಕ್ರೈಂನಂತೆ ಇತ್ತು.

1960ರ ದಶಕದ ಅಂತ್ಯದ ವೇಳೆಗೆ, ಇಸ್ರೇಲ್ ತನ್ನ ಅಗತ್ಯಗಳನ್ನು ಪೂರೈಸಿತ್ತು. ಅಮೆರಿಕದಿಂದ ಕಳ್ಳತನ ಮತ್ತು ವಂಚನೆಯ ಮೂಲಕ ಹೆಚ್ಚು ಪುಷ್ಟೀಕರಿಸಿದ ಯುರೇನಿಯಂ ಅನ್ನು ಪಡೆಯಲಾಯಿತು ಮತ್ತು ಯುರೋಪಿನ ಸಮುದ್ರಗಳಲ್ಲಿ ದರೋಡೆಯ ಮೂಲಕ ಯೆಲ್ಲೊ ಕೇಕ್ ಅನ್ನು ಪಡೆಯಲಾಯಿತು.

ಈಗ ಬೆನ್-ಗುರಿಯನ್ ಕನಸು ವಾಸ್ತವದಿಂದ ಕೇವಲ ಒಂದು ಹೆಜ್ಜೆ ದೂರದಲ್ಲಿತ್ತು. ಎಲ್ಲಾ ವೈಜ್ಞಾನಿಕ, ರಾಜತಾಂತ್ರಿಕ ಮತ್ತು ಲಾಜಿಸ್ಟಿಕಲ್ ಅಡೆತಡೆಗಳು ಬಗೆಹರಿದಿದ್ದವು. ಕೊನೆಯ ಹಂತವೆಂದರೆ ಪರಮಾಣು ಶಸ್ತ್ರಾಸ್ತ್ರವನ್ನು ಜೋಡಿಸುವುದು.

ಮೇ 1967ರಲ್ಲಿ ಇಸ್ರೇಲ್ ಮೇಲೆ ಯುದ್ಧದ ಮೋಡಗಳು ಕವಿದಿದ್ದವು. ‘‘ನಮ್ಮ ಮುಖ್ಯ ಉದ್ದೇಶ ಇಸ್ರೇಲ್ ನಾಶ’’ ಎಂಬ ಈಜಿಪ್ಟ್ ಅಧ್ಯಕ್ಷ ನಾಸರ್ ಸವಾಲು ಕೈರೋ ರೇಡಿಯೊದಲ್ಲಿ ಪ್ರತಿಧ್ವನಿಸುತ್ತಿತ್ತು. ಸಿರಿಯಾ, ಜೋರ್ಡಾನ್ ಮತ್ತು ಇರಾಕ್‌ನ ಸೈನ್ಯಗಳು ಇಸ್ರೇಲಿ ಗಡಿಗಳಲ್ಲಿ ಒಟ್ಟುಗೂಡಿದವು.

ಪ್ರಧಾನಿ ಲೆವಿ ಎಶ್ಕೋಲ್ ಹಿಂಜರಿಯುತ್ತಿದ್ದರು ಮತ್ತು ಅವರ ಜನರಲ್‌ಗಳು ಅವರ ಹಿಂಜರಿಕೆ ದೇಶವನ್ನು ಮತ್ತೊಂದು ಹತ್ಯಾಕಾಂಡದತ್ತ ತಳ್ಳಬಹುದು ಎಂದು ಭಯಪಟ್ಟರು.

ತೀವ್ರ ಹತಾಶೆಯ ಈ ಸ್ಥಿತಿಯಲ್ಲಿ, ಇಸ್ರೇಲ್ ತನ್ನ ಸ್ಯಾಮ್ಸನ್ ಆಪ್ಷನ್ ಅನ್ನು ಸಕ್ರಿಯಗೊಳಿಸಲು ನಿರ್ಧರಿಸಿತು. ಈ ಕಾರ್ಯಾಚರಣೆಯನ್ನು ಮುನ್ನಡೆಸಿದ ವ್ಯಕ್ತಿ ಬ್ರಿಗೇಡಿಯರ್ ಜನರಲ್ ಎಡ್ಸಾಕ್ ಯತ್ಸಾ ಯಾಕೊ.

ಈಜಿಪ್ಟ್ ಬಾಂಬರ್‌ಗಳು ಬಹುಶಃ ರಾಸಾಯನಿಕ ಶಸ್ತ್ರಾಸ್ತ್ರಗಳೊಂದಿಗೆ ಟೆಲ್ ಅವೀವ್ ಮೇಲೆ ದಾಳಿ ಮಾಡಲು ತಯಾರಿ ನಡೆಸುತ್ತಿದ್ದಾರೆ ಎಂದು ಗುಪ್ತಚರ ವರದಿಗಳು ಬಹಿರಂಗಪಡಿಸಿದ್ದವು.

ಯತ್ಸಾ ಕಮಾಂಡೋಗಳು ಮತ್ತು ವಿಜ್ಞಾನಿಗಳ ಒಂದು ಸಣ್ಣ ತಂಡವನ್ನು ಒಟ್ಟುಗೂಡಿಸಿ ಮರುಭೂಮಿಯಲ್ಲಿರುವ ರಹಸ್ಯ ಅಡಗುತಾಣಕ್ಕೆ ಕರೆದೊಯ್ದರು.

ಇಸ್ರೇಲ್‌ನ ಮೊದಲ ಕಾರ್ಯಸಾಧ್ಯ ಪರಮಾಣು ಸಾಧನವನ್ನು ತ್ವರಿತವಾಗಿ ಜೋಡಿಸುವುದು ಅವರ ಕೆಲಸವಾಗಿತ್ತು. ಅದನ್ನು ನೇರವಾಗಿ ಕೈರೋ ಅಥವಾ ಡಮಾಸ್ಕಸ್ ಮೇಲೆ ಬೀಳಿಸುವುದು ಉದ್ದೇಶವಾಗಿರಲಿಲ್ಲ.

ಇಸ್ರೇಲಿ ಸೈನ್ಯ ಸೋಲಲು ಪ್ರಾರಂಭಿಸಿದರೆ ಮತ್ತು ಈಜಿಪ್ಟ್ ಸೈನ್ಯ ಟೆಲ್ ಅವೀವ್ ಕಡೆಗೆ ನುಗ್ಗತೊಡಗಿದರೆ, ಇದನ್ನು ಸಿನಾಯ್‌ನಲ್ಲಿರುವ ಪರ್ವತದ ಮೇಲೆ ಸ್ಫೋಟಿಸಿ ಜಗತ್ತಿಗೆ ತೋರಿಸುವುದು ಯೋಜನೆಯಾಗಿತ್ತು.

ಈ ಸ್ಫೋಟ ಅರಬ್ ದೇಶಗಳು ಮತ್ತು ಜಗತ್ತಿಗೆ ನಮ್ಮಲ್ಲಿ ಅಂತಹ ಸಾಧನಗಳಿವೆ ಎಂದು ಎಚ್ಚರಿಕೆ ನೀಡುತ್ತದೆ ಎಂಬುದು ಲೆಕ್ಕಾಚಾರವಾಗಿತ್ತು. ಇಸ್ರೇಲ್ ಸೋಲಿನ ಅಂಚಿನಲ್ಲಿದ್ದಾಗ ಇದನ್ನು ಮಾಡಬೇಕಾಗಿತ್ತು. ಇದು ಇಸ್ರೇಲ್‌ನ ಪರಮಾಣು ಸಿದ್ಧಾಂತವೂ ಆಗಿದೆ. ಇಸ್ರೇಲ್ ಮೇಲೆ ಎಂದಾದರೂ ದೊಡ್ಡ ದಾಳಿ ನಡೆದರೆ ಮತ್ತು ಅಂತ್ಯ ಖಚಿತ ಎಂದು ಭಾವಿಸಿದರೆ, ಅದು ತನ್ನೊಂದಿಗೆ ತನ್ನ ಶತ್ರುಗಳನ್ನು ನಾಶಪಡಿಸುತ್ತದೆ.

ಜೂನ್ 5, 1967ರ ಬೆಳಗ್ಗೆ, ಇಸ್ರೇಲಿ ವಾಯುಪಡೆ ದಾಳಿ ಪ್ರಾರಂಭಿಸಿತು. ಕೆಲವೇ ಗಂಟೆಗಳಲ್ಲಿ, ಈಜಿಪ್ಟ್, ಜೋರ್ಡಾನ್ ಮತ್ತು ಸಿರಿಯಾದ ವಾಯುಪಡೆಗಳು ಶಿಥಿಲಗೊಂಡವು. ಇಸ್ರೇಲ್ ಯುದ್ಧವನ್ನು ಗೆದ್ದಿತು ಮತ್ತು ಯುದ್ಧ ಕೊನೆಗೊಂಡಾಗ, ಸ್ಯಾಮ್ಸನ್ ಆಪ್ಷನ್ ಅಗತ್ಯವಿರಲಿಲ್ಲ.

ಇಸ್ರೇಲ್‌ನ ಈ ಗೆಲುವು ಅಮೆರಿಕವನ್ನು ಹೊಸ ಸಂದಿಗ್ಧತೆಗೆ ಸಿಲುಕಿಸಿತು. 1969ರಲ್ಲಿ ಅಧ್ಯಕ್ಷ ರಿಚರ್ಡ್ ನಿಕ್ಸನ್ ಅವರ ಸರಕಾರ ಇಸ್ರೇಲ್‌ನ ಪರಮಾಣು ಸಾಮರ್ಥ್ಯದ ಬಗ್ಗೆ ರಹಸ್ಯ ಅಧ್ಯಯನ ನಡೆಸಿತು. ಈ ಅಧ್ಯಯನವನ್ನು ಹೆನ್ರಿ ಕಿಸ್ಸೆಂಜರ್ ರೂಪಿಸಿದ್ದರು. ಅವ್ನೆರ್ ಕೊಹೆನ್ ಅವರ ‘ದಿ ವರ್ಸ್ಟ್ ಕೆಪ್ಟ್ ಸೀಕ್ರೆಟ್’ ಪುಸ್ತಕದಲ್ಲಿ ಇದನ್ನು ಹೇಳಲಾಗಿದೆ. ಕಿಸ್ಸೆಂಜರ್ ಅವರ ತೀರ್ಮಾನ ತುಂಬಾ ಸ್ಪಷ್ಟವಾಗಿತ್ತು. ಇಸ್ರೇಲ್‌ನ ಬಾಂಬ್ ಅನ್ನು ತೆಗೆದುಹಾಕಲು ಪ್ರಯತ್ನಿಸುವುದು ವ್ಯರ್ಥ. ಅದು ಪ್ರತಿಕೂಲ ಪರಿಣಾಮ ಬೀರುತ್ತದೆ. ಮಿತ್ರರಾಷ್ಟ್ರದೊಂದಿಗೆ ಹೋರಾಡುವುದಕ್ಕಿಂತ ಈ ರಹಸ್ಯವನ್ನು ಇಟ್ಟುಕೊಳ್ಳುವುದು ಬುದ್ಧಿವಂತಿಕೆ.

ಈ ತಿಳುವಳಿಕೆ ಸೆಪ್ಟಂಬರ್ 1969ರಲ್ಲಿ ನಡೆದ ಐತಿಹಾಸಿಕ ಸಭೆಗೆ ಅಡಿಪಾಯ ಹಾಕಿತು. ಅದು ಮುಂದಿನ 50 ವರ್ಷಗಳ ಕಾಲ ಮಧ್ಯಪ್ರಾಚ್ಯದ ವಾಸ್ತವತೆಯನ್ನು ನಿರ್ಧರಿಸಿತು.

ಇಸ್ರೇಲ್‌ನ ಹೊಸ ಪ್ರಧಾನಿ ಗೋಲ್ಡಾ ಮೀರ್ ಅಧ್ಯಕ್ಷ ನಿಕ್ಸನ್ ಅವರನ್ನು ಶ್ವೇತಭವನದಲ್ಲಿ ಭೇಟಿಯಾದರು. ಅಲಿಖಿತ ಒಪ್ಪಂದ ಮಾಡಿಕೊಳ್ಳಲಾಯಿತು. ಪರಮಾಣು ಅಸ್ಪಷ್ಟತೆಯ ತತ್ವ ಎಂದು ಕರೆಯಲಾದ ಒಪ್ಪಂದ ಅದಾಗಿತ್ತು. ಅದು ತುಂಬಾ ಸರಳವಾದ ಒಪ್ಪಂದವಾಗಿತ್ತು. ಆದರೆ ಅದು ಬುದ್ಧಿವಂತಿಕೆಯದ್ದಾಗಿತ್ತು.

ಇಸ್ರೇಲ್ ತನ್ನ ಪರಮಾಣು ಶಸ್ತ್ರಾಸ್ತ್ರಗಳನ್ನು ಪರೀಕ್ಷಿಸುವುದಿಲ್ಲ ಅಥವಾ ಅವುಗಳ ಅಸ್ತಿತ್ವವನ್ನು ಸಾರ್ವಜನಿಕವಾಗಿ ಘೋಷಿಸುವುದಿಲ್ಲ ಎಂದು ಗೋಲ್ಡಾ ಮೀರ್ ಭರವಸೆ ನೀಡಿದರು. ನಂತರ ಭರವಸೆಯನ್ನು ಮುರಿಯಲಾಯಿತು. ‘‘ಮಧ್ಯಪ್ರಾಚ್ಯಕ್ಕೆ ಪರಮಾಣು ಶಸ್ತ್ರಾಸ್ತ್ರಗಳನ್ನು ತಂದ ಮೊದಲ ದೇಶ ಇಸ್ರೇಲ್ ಆಗುವುದಿಲ್ಲ’’ ಎಂಬ ಪ್ರಸಿದ್ಧ ಹೇಳಿಕೆಯನ್ನು ಕೂಡ ಅವರು ಕೊಟ್ಟರು. ಪ್ರತಿಯಾಗಿ, ನಿಕ್ಸನ್ ಅವರು ಡಿಮೋನಾ ಮೇಲಿನ ಅಮೆರಿಕದ ಒತ್ತಡ ಮತ್ತು ಕಣ್ಗಾವಲನ್ನು ಶಾಶ್ವತವಾಗಿ ಕೊನೆಗೊಳಿಸಲು ಒಪ್ಪಿಕೊಂಡರು.

ಅಲ್ಲದೆ, ಸಾಂಪ್ರದಾಯಿಕ ಶಕ್ತಿ ಬಂದರೆ ಪರಮಾಣು ಆಯ್ಕೆಯ ಅಗತ್ಯವಿರುವುದಿಲ್ಲ ಎಂದು ಫ್ಯಾಂಟಮ್ ಫೈಟರ್ ಜೆಟ್‌ಗಳಂತಹ ಮುಂದುವರಿದ ಸಾಂಪ್ರದಾಯಿಕ ಶಸ್ತ್ರಾಸ್ತ್ರಗಳನ್ನು ಇಸ್ರೇಲ್‌ಗೆ ದೊಡ್ಡ ಪ್ರಮಾಣದಲ್ಲಿ ನೀಡುವುದಾಗಿ ಅಮೆರಿಕ ಭರವಸೆ ನೀಡಿತು.

ಆ ಒಪ್ಪಂದ ಒಂದು ಅದ್ಭುತ ತಂತ್ರವಾಗಿತ್ತು. ಇಡೀ ಅರಬ್ ಜಗತ್ತು ಅಥವಾ ಇರಾನ್ ಪರಮಾಣು ಬಾಂಬ್ ಹೊಂದಿರಲಿಲ್ಲ. ಆದರೆ ಇಸ್ರೇಲ್‌ಗೆ ವಿಶೇಷ ಸ್ಥಾನಮಾನವಿದೆ. ಇದರಿಂದಾಗಿ, ಭಾರತ ಅಥವಾ ಪಾಕಿಸ್ತಾನದೊಂದಿಗೆ ಸಂಭವಿಸಿದ ರೀತಿಯ ಸೆನ್ಸರ್‌ಶಿಪ್ ಅಥವಾ ಬಹಿಷ್ಕಾರವನ್ನು ಅದು ಎದುರಿಸಬೇಕಾಗಿಲ್ಲ.

ಇಸ್ರೇಲ್‌ನ ಪರಮಾಣು ಕಾರ್ಯಕ್ರಮದ ಬಗ್ಗೆ ಜಗತ್ತಿಗೆ ತಿಳಿದಿರಲಿಲ್ಲ ಎಂದಲ್ಲ. ಅಥವಾ ಇಸ್ರೇಲ್ ಇದನ್ನೆಲ್ಲಾ ರಹಸ್ಯವಾಗಿ ಮಾಡಿತು ಎಂತಲೂ ಅಲ್ಲ. ಎಲ್ಲರ ಕಣ್ಣುಗಳು ಮುಚ್ಚಿದ್ದವು ಅಷ್ಟೆ.ಇಸ್ರೇಲ್ ಪರಮಾಣು ಪರೀಕ್ಷೆ ನಡೆಸಿದಾಗಲೂ ಯಾರೂ ಒಂದು ಮಾತನ್ನೂ ಹೇಳಲಿಲ್ಲ.

ಇಸ್ರೇಲ್ ಸೆಪ್ಟಂಬರ್ 22, 1979ರಂದು ದಕ್ಷಿಣ ಆಫ್ರಿಕಾದ ಪ್ರಿನ್ಸ್ ಎಡ್ವರ್ಡ್ಸ್ ದ್ವೀಪಗಳಲ್ಲಿ ಹೇಗೆ ಪರಮಾಣು ಪರೀಕ್ಷೆಯನ್ನು ನಡೆಸಿತು ಎಂಬುದನ್ನು ಎಪ್ರಿಲ್ 9, 2025ರಂದು ‘ದಿ ಪ್ರಿಂಟ್’ನಲ್ಲಿ ಪ್ರಕಟವಾದ ಪ್ರವೀಣ್ ಸ್ವಾಮಿ ಅವರ ಲೇಖನ ಹೇಳುತ್ತದೆ.

ದಕ್ಷಿಣ ಆಫ್ರಿಕಾದ ದಕ್ಷಿಣದಲ್ಲಿರುವ ಕೇಪ್ ಟೌನ್‌ನಿಂದ 2,200 ಕಿ.ಮೀ. ದೂರದಲ್ಲಿರುವ ಅಂಟಾರ್ಕ್ಟಿಕಾದಲ್ಲಿ ಒಂದು ಸ್ಥಳವನ್ನು ಆಯ್ಕೆ ಮಾಡಲಾಯಿತು. ಪರಮಾಣು ಸ್ಫೋಟ ಖಂಡಿತವಾಗಿಯೂ ನಡೆದಿದೆ ಮತ್ತು ನಂತರ ಆಸ್ಟ್ರೇಲಿಯದಲ್ಲಿಯೂ ಪುರಾವೆಗಳು ಕಂಡುಬಂದಿವೆ ಎಂದು ಡೇಟಾ ಹೇಳುತ್ತದೆ.

ಸ್ಫೋಟದಿಂದ ಉದ್ಭವಿಸಿದ ವಿಕಿರಣಶೀಲ ಕಣಗಳು ಆಸ್ಟ್ರೇಲಿಯದಲ್ಲಿ ಹಾರಿ ಬಿದ್ದವು ಮತ್ತು ಅಲ್ಲಿ ಮೇಯುತ್ತಿದ್ದ ಕುರಿಗಳ ಥೈರಾಯ್ಡ್ ಗ್ರಂಥಿಗಳನ್ನು ಪರೀಕ್ಷಿಸಿದಾಗ, ವಿಕಿರಣಶೀಲತೆ ಪತ್ತೆಯಾಯಿತು. ಅಮೆರಿಕನ್ ಉಪಗ್ರಹ ಬೆಳಕನ್ನು ದಾಖಲಿಸಿತು. ಬ್ರಿಟನ್‌ನ ಪ್ರಯೋಗಾಲಯದಿಂದಲೂ ಸ್ಫೋಟ ದೃಢಪಟ್ಟಿತು. ಆದರೆ ಇಸ್ರೇಲ್‌ನ ಬಾಂಬ್ ಬಗ್ಗೆ ಮಾಹಿತಿ ತಿಳಿದರೆ, ಮಧ್ಯಪ್ರಾಚ್ಯದಲ್ಲಿ ಭೂಕಂಪ ಸಂಭವಿಸುತ್ತದೆ ಎಂದು ಅಮೆರಿಕ ಭಾವಿಸಿದ್ದರಿಂದ ಈ ಎಲ್ಲಾ ದೇಶಗಳು ಬಾಯಿ ಮುಚ್ಚಿಕೊಂಡವು.

ಪರೀಕ್ಷೆಗಳನ್ನು ಯಾರು ನಡೆಸಿದ್ದಾರೆ ಎಂಬ ಪ್ರಶ್ನೆ ಉದ್ಭವಿಸಲು ಯಾರೂ ಅವಕಾಶ ಮಾಡಿಕೊಡದ ಕಾರಣ ಇಡೀ ಪಶ್ಚಿಮ ಇಸ್ರೇಲ್ ಅನ್ನು ಸೆನ್ಸರ್‌ಶಿಪ್ ಮತ್ತು ಬಹಿಷ್ಕಾರದಿಂದ ರಕ್ಷಿಸಿತು.

ಇಂದಿನಂತೆಯೇ, ಆಗಲೂ ಇಸ್ರೇಲ್ ಪರಿಶೀಲನೆಯಿಂದ ಸಂಪೂರ್ಣ ವಿನಾಯಿತಿ ಹೊಂದಿತ್ತು. ಎರಡನೇ ಮಹಾಯುದ್ಧ ಮತ್ತು ಹತ್ಯಾಕಾಂಡದ ಅಪರಾಧದಿಂದಾಗಿ ಪಶ್ಚಿಮಕ್ಕೆ ಪ್ರಶ್ನೆಗಳನ್ನು ಕೇಳಲು ಸಾಧ್ಯವಿಲ್ಲ ಎಂದು ಇಸ್ರೇಲ್‌ಗೆ ಗೊತ್ತಿತ್ತು.

ಇಸ್ರೇಲ್ ಸ್ವತಃ ರಹಸ್ಯವಾಗಿ ಪರಮಾಣು ಬಾಂಬ್ ತಯಾರಿಸಿದೆ.

ಇಲ್ಲಿಯವರೆಗೆ ಅದು ಪರಮಾಣು ಪ್ರಸರಣ ರಹಿತ ಒಪ್ಪಂದಕ್ಕೆ ಸಹಿ ಹಾಕಿಲ್ಲ.

ಅಂತಹ ಇಸ್ರೇಲ್ ಈಗ ಇರಾನ್‌ನ ಬೆನ್ನುಬಿದ್ದಿರುವುದು ಮಾತ್ರ ವಿಚಿತ್ರ.

Khabargaon ಯೂಟ್ಯೂಬ್ ಚಾಲೆನ್‌ನ ನಿಖಿಲ್ ವಾತ್ ಅವರ ಅಲಿಫ್ ಲೈಲಾ ಕಾರ್ಯಕ್ರಮ ಆಧಾರಿತ