ಎಲಿಮಿನೇಟರ್‌ನಲ್ಲಿ ಆರ್ ಸಿಬಿ ವಿರುದ್ಧ ಲಕ್ನೊ ಸೋಲಿಗೆ "ಸ್ಪಷ್ಟ" ಕಾರಣಗಳ ಪಟ್ಟಿ ಮಾಡಿದ ರಾಹುಲ್

ಕೋಲ್ಕತಾ: ಐಪಿಎಲ್ ಎಲಿಮಿನೇಟರ್‌ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ವಿರುದ್ಧ  14 ರನ್‌ಗಳ ಸೋಲಿಗೆ ಲಕ್ನೋ ಸೂಪರ್ ಜೈಂಟ್ಸ್ ನಾಯಕ ಕೆ.ಎಲ್. ರಾಹುಲ್  ತಂಡದ ಕಳಪೆ ಫೀಲ್ಡಿಂಗ್ ಅನ್ನು ದೂಷಿಸಿದರು.  ಆದರೆ ರಜತ್ ಪಾಟಿದಾರ್ ಅವರ ಅದ್ಭುತ ಶತಕವು ಎರಡು ತಂಡಗಳ ನಡುವಿನ ವ್ಯತ್ಯಾಸಕ್ಕೆ ಕಾರಣವಾಗಿದೆ ಎಂಬುದನ್ನು ಒಪ್ಪಿಕೊಂಡರು.

28 ವರ್ಷದ ಇಂದೋರ್‌ನ ಪಾಟಿದಾರ್ 54 ಎಸೆತಗಳಲ್ಲಿ 112 ರನ್ ಗಳಿಸಿ ಏಕಾಂಗಿಯಾಗಿ ಐಪಿಎಲ್ ಎಲಿಮಿನೇಟರ್ ನಲ್ಲಿ  ಆರ್ ಸಿಬಿಗೆ ಗೆಲುವು ತಂದುಕೊಟ್ಟರು.

 "ನಾವು ಗೆಲ್ಲದಿರಲು ಕಾರಣಗಳು ಸ್ಪಷ್ಟವಾಗಿವೆ ಎಂದು ನಾನು ಭಾವಿಸುತ್ತೇನೆ. ನಾವು ಮೈದಾನದಲ್ಲಿ ಸುಲಭವಾದ ಕ್ಯಾಚ್‌ಗಳನ್ನು ಕೈಬಿಟ್ಟೆವು. ಇದು  ನಮಗೆ ತುಂಬಾ ದುಬಾರಿಯಾಯಿತು. ನಿಸ್ಸಂಶಯವಾಗಿ ಪಾಟಿದಾರ್ ಅವರ ಶತಕ ಎಲ್ಲ ವ್ಯತ್ಯಾಸಕ್ಕೆ ಕಾರಣವಾಯಿತು.  ಅಗ್ರ ಮೂವರಲ್ಲಿರುವ ಯಾರಾದರೂ ಶತಕ ಗಳಿಸಿದಾಗ, ಹೆಚ್ಚಾಗಿ ಆ ತಂಡವು ಗೆಲ್ಲುತ್ತದೆ" ಎಂದು ಪಂದ್ಯದ ನಂತರ ರಾಹುಲ್ ಹೇಳಿದರು.

ಪಾಟಿದಾರ್ ಶತಕದ ಹಾದಿಯಲ್ಲಿ ಮೂರು ಬಾರಿ ಲಕ್ನೊ ತಂಡದಿಂದ ಜೀವದಾನ ಪಡೆದಿದ್ದರು.

"ಅವರು (ಆರ್ ಸಿಬಿ) ನಿಜವಾಗಿಯೂ ಚೆನ್ನಾಗಿ ಫೀಲ್ಡಿಂಗ್ ಮಾಡಿದರು ಹಾಗೂ  ನಾವು ಫೀಲ್ಡಿಂಗ್ ವಿಚಾರದಲ್ಲಿ ದುರ್ಬಲರಾಗಿದ್ದೆವು" ಎಂದು ರಾಹುಲ್  ಹೇಳಿದರು.

ಆದಾಗ್ಯೂ ಹೊಸ ಫ್ರಾಂಚೈಸಿಯಾಗಿ ತಮ್ಮ ಮೊದಲ ಋತುವಿನಲ್ಲಿ ಅಗ್ರ ನಾಲ್ಕರಲ್ಲಿ ಸ್ಥಾನ ಪಡೆದಿದ್ದಕ್ಕೆ ರಾಹುಲ್  ಸಂತೋಷ ವ್ಯಕ್ತಪಡಿಸಿದರು.

"ನಾವು ಬಹಳಷ್ಟು ಧನಾತ್ಮಕ ಅಂಶಗಳನ್ನುಪಡೆದಿದ್ದೇವೆ. ಇದು ಹೊಸ ಫ್ರಾಂಚೈಸಿ. ನಾವು ಬಹಳಷ್ಟು ತಪ್ಪುಗಳನ್ನು ಮಾಡಿದ್ದೇವೆ.  ಪ್ರತಿ ತಂಡವು ಅದನ್ನು ಮಾಡುತ್ತದೆ. ಪ್ರಯತ್ನಿಸಬೇಕು ಹಾಗೂ ಮರು ಹೋರಾಟ ನೀಡಬೇಕು. ಇದು ಯುವ ತಂಡವಾಗಿದೆ. ಅವರು ತಮ್ಮ ತಪ್ಪುಗಳಿಂದ ಕಲಿಯುತ್ತಾರೆ , ಮನೆಗೆ ಹಿಂತಿರುಗಿ,ಪ್ರಯತ್ನಿಸಿ ಮತ್ತು ಉತ್ತಮ ಆಟಗಾರರಾಗುತ್ತಾರೆ’’ ಎಂದು ರಾಹುಲ್ ಹೇಳಿದರು.

"ಮುಹ್ಸಿನ್ ಖಾನ್ ಅವರು ಎಷ್ಟು ಶ್ರೇಷ್ಠರು ಹಾಗೂ ಅವರು ಯಾವ ಕೌಶಲ್ಯವನ್ನು ಹೊಂದಿದ್ದಾರೆಂದು ಎಲ್ಲರಿಗೂ ತೋರಿಸಿದರು. ಅವರು ಆತ್ಮವಿಶ್ವಾಸದಿಂದ ಬೆಳೆದಂತೆ, ಅವರು ಹೆಚ್ಚಿನ ವೇಗವನ್ನು ಪಡೆಯಲು ಸಾಧ್ಯವಾಗುತ್ತದೆ. ಅವರು ಮುಂದಿನ ಋತುವಿನಲ್ಲಿ ಆಶಾದಾಯಕವಾಗಿ ಇನ್ನೂ ಕೆಲವು ಕೌಶಲ್ಯಗಳನ್ನು ಕಲಿಯುತ್ತಾರೆ ಮತ್ತು ಅಭಿವೃದ್ಧಿಪಡಿಸುತ್ತಾರೆಂಬ ವಿಶ್ವಾಸವಿದೆ’’ ಎಂದು ರಾಹುಲ್ ಹೇಳಿದರು.