ರಾಹುಲ್ ಗಾಂಧಿ ಸದ್ದಾಂ ಹುಸೇನ್ ರಂತೆ ಕಾಣುತ್ತಿದ್ದಾರೆ: ಅಸ್ಸಾಂ ಮುಖ್ಯಮಂತ್ರಿ ವ್ಯಂಗ್ಯ

ಅಹಮದಾಬಾದ್: ರಾಹುಲ್ ಗಾಂಧಿ ಅವರ  ಮುಖಚಹರೆ ಬದಲಾಗಿದೆ. ಅವರು ಈಗ ಸದ್ದಾಂ ಹುಸೇನ್‌ರಂತೆ ಕಾಣುತ್ತಿದ್ದಾರೆ ಎಂದು ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವಾ ಶರ್ಮಾ ಅವರು ವ್ಯಂಗ್ಯವಾಡಿದ್ದಾರೆ.

"ರಾಹುಲ್ ಗಾಂಧಿ ಅವರ ಹೊಸ ಲುಕ್‌ಗೆ ಯಾವುದೇ ತೊಂದರೆ ಇಲ್ಲ ಎಂದು ನಾನು ಕೆಲವು ದಿನಗಳ ಹಿಂದೆ ದೂರದರ್ಶನದ ಸಂದರ್ಶನದಲ್ಲಿ ಹೇಳಿದ್ದೆ, ಆದರೆ ನೀವು ನಿಮ್ಮ ಲುಕ್ ಅನ್ನು  ಬದಲಾಯಿಸಲು ಬಯಸಿದ್ದರೆ, ಕನಿಷ್ಠ ವಲ್ಲಭಭಾಯ್ ಪಟೇಲ್ ಅಥವಾ ಜವಾಹರಲಾಲ್ ನೆಹರು ಅವರ ಹಾಗೆ ಕಾಣುವಂತೆ ಇರಿ. ನೀವು ಗಾಂಧೀಜಿಯವರಂತೆ ಕಂಡರೆ ಇನ್ನೂ ಉತ್ತಮ. ಆದರೆ ನೀವು ಈಗ ಸದ್ದಾಂ ಹುಸೇನ್‌ರಂತೆ ಏಕೆ ಕಾಣುತ್ತೀರಿ?"ಎಂದು  ಹಿಮಂತ ಬಿಸ್ವಾ ಶರ್ಮಾ ಅವರು ಮಂಗಳವಾರ ಅಹಮದಾಬಾದ್‌ನಲ್ಲಿ ಚುನಾವಣಾ ಪ್ರಚಾರವನ್ನು ಉದ್ದೇಶಿಸಿ ಹೇಳಿದ್ದಾರೆ.

“ಕಾಂಗ್ರೆಸ್ ಸಂಸ್ಕೃತಿ ಭಾರತಕ್ಕೆ ಹತ್ತಿರವಾಗಿಲ್ಲ. ಅವರ ಆಚರಣೆಗಳು ಭಾರತವನ್ನು ಇನ್ನೂ ಅರ್ಥಮಾಡಿಕೊಳ್ಳದವರಿಗೆ ಹತ್ತಿರವಾಗಿವೆ”ಎಂದು ಅಸ್ಸಾಂ ಮುಖ್ಯಮಂತ್ರಿ ಹೇಳಿದರು.

ಸಿಎಂ ಹಿಮಂತ ಬಿಸ್ವಾ ಶರ್ಮಾ ಹೇಳಿಕೆಗೆ ಪ್ರತಿಕ್ರಿಯಿಸಿದ ಅಸ್ಸಾಂ ಕಾಂಗ್ರೆಸ್ ಮುಖ್ಯಸ್ಥ ಭೂಪೇನ್ ಕುಮಾರ್ ಬೋರಾ, ಹಿಮಂತ ಬಿಸ್ವಾ ಶರ್ಮಾ ಅವರು ಕೇವಲ ಪ್ರಚಾರದಲ್ಲಿರಲು  ಬಯಸುತ್ತಾರೆ. ಅವರು ರಾಹುಲ್ ಗಾಂಧಿಯವರ ಹೆಸರನ್ನು ಎತ್ತಿದಾಗ ಮಾತ್ರ ಅವರಿಗೆ ಪ್ರಚಾರ ಸಿಗಲು ಸಾಧ್ಯ ಎಂದು ಹೇಳಿದರು.

"ಹಿಮಂತ ಬಿಸ್ವಾ ಶರ್ಮಾ ಏನು ಬೇಕಾದರೂ ಹೇಳಬಹುದು. ಅವರು ಅಧಿಕಾರಕ್ಕಾಗಿ ಯಾವುದೇ ಹಂತಕ್ಕೆ ಹೋಗಬಹುದು. ನಾವು ಆ ಕುರಿತು ಗಮನ ಹರಿಸುವುದಿಲ್ಲ" ಎಂದು ಬೋರಾ ಹೇಳಿದರು.