ಸಲ್ಮಾನ್ ಖಾನ್ ಮಂಗಳೂರಿನಲ್ಲಿ ಮದುವೆ ಕಾರ್ಯಕ್ರಮದಲ್ಲಿ ಭಾಗಿಯಾದರೇ?
ಮಂಗಳೂರು: ಸೂಪರ್ ಹಿಟ್ ಚಿತ್ರ 'ಪಠಾಣ್' ಸಿನೆಮಾದಿಂದ ಸದ್ಯ ಸುದ್ದಿಯಲ್ಲಿರುವ ಬಾಲಿವುಡ್ ನ ಖ್ಯಾತ ನಟ ಸಲ್ಮಾನ್ ಖಾನ್ (Salman Khan) ಸದ್ದಿಲ್ಲದೇ ಗುರುವಾರ ಮಂಗಳೂರಿಗೆ (Mangaluru) ಬಂದು ಹೋದರೇ ? ಹೀಗೆಂದು ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಯಾಗುತ್ತಿದೆ. ಮಂಗಳೂರಿನಲ್ಲಿ ಬಹುಭಾಷಾ ನಟಿ ಪೂಜಾ ಹೆಗ್ಡೆಯ ಸಹೋದರನ ಮದುವೆ ಕಾರ್ಯಕ್ರಮದಲ್ಲಿ ಸಲ್ಮಾನ್ ಭಾಗವಹಿಸಿ ವಧುವರರಿಗೆ ಶುಭ ಕೋರಿದ್ದಾರೆ ಎಂದು indiatoday ಕೂಡ ವರದಿ ಮಾಡಿದ್ದು ಇದಕ್ಕೆ ಕಾರಣ.
ಸಲ್ಮಾನ್ ಖಾನ್ ಮಂಗಳೂರಿಗೆ ಬಂದು ಹೋದರೇ ? ಮದುವೆ ಕಾರ್ಯಕ್ರಮ ಆಗಿದ್ದು ಎಲ್ಲಿ? ಯಾಕೆ ಎಲ್ಲಿಯೂ ಇದು ಸುದ್ದಿಯಾಗಿಲ್ಲ ಎಂದು ಗುರುವಾರ ಸಂಜೆ ಚರ್ಚೆ ಶುರುವಾಗಿದೆ .
ಆದರೆ ನಟ ಸಲ್ಮಾನ್ ಖಾನ್ ಮಂಗಳೂರಿಗೆ ಆಗಮಿಸಿರುವ ಸುದ್ದಿ ಸತ್ಯಕ್ಕೆ ದೂರವಾಗಿದ್ದು, ನಟಿ ಪೂಜಾ ಹೆಗ್ಡೆಯ ಸಹೋದರನ ಮದುವೆ ಕಾರ್ಯಕ್ರಮ ಮುಂಬೈಯ ಬಾಂದ್ರದಲ್ಲಿರುವ ಪಂಚತಾರಾ ಹೋಟೆಲೊಂದರಲ್ಲಿ ನಡೆದಿದೆ. ಅಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಸಲ್ಮಾನ್ ಖಾನ್ ಭಾಗವಹಿಸಿದ್ದಾರೆಂದು ವಾರ್ತಾಭಾರತಿಗೆ ಖಚಿತ ಮಾಹಿತಿ ದೊರಕಿದೆ.
ಸಲ್ಮಾನ್ ಮಂಗಳೂರಿಗೆ ವಿಮಾನದಲ್ಲಿ ಬಂದಿಲ್ಲ ಎಂದು ವಿಮಾನ ನಿಲ್ದಾಣದ ಮೂಲಗಳೂ ಖಚಿತಪಡಿಸಿವೆ.
ಪೂಜಾ ಹೆಗ್ಡೆ ಮೂಲತಃ ತುಳುನಾಡಿನವರಾಗಿದ್ದು, ಸಲ್ಮಾನ್ ಖಾನ್ ರ ಮುಂಬರುವ ಆ್ಯಕ್ಷನ್ ಕಾಮಿಡಿ ಸಿನಿಮಾ 'ಕಿಸಿ ಕಾ ಭಾಯ್ ಕಿಸೀಕಾ ಜಾನ್' ಚಿತ್ರದಲ್ಲಿ ಮುಖ್ಯ ಪಾತ್ರದಲ್ಲಿ ನಟಿಸಿದ್ದಾರೆ. ಪೂಜಾ ಹೆಗ್ಡೆಯ ಸಹೋದರ ರಿಶಭ್ ಹೆಗ್ಡೆ ಮದುವೆಯಲ್ಲಿ ಸಲ್ಮಾನ್ ಭಾಗವಹಿಸಿರುವ ಸಲ್ಮಾನ್ ಖಾನ್, ಕುಟುಂಬಸ್ಥರೊಂದಿಗಿನ ಫೋಟೊದಲ್ಲೂ ಕಾಣಿಸಿಕೊಂಡಿದ್ದಾರೆ.
