Raichur | ಮುಸ್ಲಿಮರನ್ನು ಗುರಿಯಾಗಿಸಿಕೊಂಡು ಮತದಾನದ ಹಕ್ಕು, ಪೌರತ್ವದ ವಿಚಾರದಲ್ಲಿ ತಾರತಮ್ಯ : ಪಿ.ಜೆ.ಜೇಮ್ಸ್

ರಾಯಚೂರು: ಸಿಪಿಐ (ಎಂಎಲ್) ರೆಡ್‌ಸ್ಟಾರ್ ಪಕ್ಷದ 13ನೇ ಮಹಾಧಿವೇಶನವು ಸೆ.16ರಿಂದ 20ರವರೆಗೆ ರಾಯಚೂರಿನಲ್ಲಿ ಐದು ದಿನಗಳ ಕಾಲ ಯಶಸ್ವಿಯಾಗಿ ನಡೆದಿದ್ದು, ಆರೆಸ್ಸೆಸ್ ಫ್ಯಾಸಿಸಂ ವಿರುದ್ಧದ ಹೋರಾಟವನ್ನು ತೀವ್ರಗೊಳಿಸುವ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಪಕ್ಷದ ಪ್ರಧಾನ ಕಾರ್ಯದರ್ಶಿ ಪಿ.ಜೆ.ಜೇಮ್ಸ್ ತಿಳಿಸಿದರು.

ನಗರದ ಪತ್ರಿಕಾ ಭವನದಲ್ಲಿ ಸೋಮವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಮಹಾಧಿವೇಶನದಲ್ಲಿ 33 ಸದಸ್ಯರ ಕೇಂದ್ರ ಸಮಿತಿ, 13 ಸದಸ್ಯರ ಪಾಲಿಟ್ ಬ್ಯೂರೋ ಹಾಗೂ ಮೂವರು ಸದಸ್ಯರ ಕೇಂದ್ರ ನಿಯಂತ್ರಣ ಆಯೋಗವನ್ನು ಆಯ್ಕೆ ಮಾಡಲಾಗಿದೆ. ದೇಶದ 14 ರಾಜ್ಯಗಳು ಹಾಗೂ ಸಾಗರೋತ್ತರ ಸಮಿತಿಯಿಂದ ಸುಮಾರು 250 ಪ್ರತಿನಿಧಿಗಳು, ವೀಕ್ಷಕರು ಮತ್ತು ವಿವಿಧ ಪಕ್ಷಗಳ ಸೌಹಾರ್ದ ಪ್ರತಿನಿಧಿಗಳು ಮಹಾಧಿವೇಶನದಲ್ಲಿ ಭಾಗವಹಿಸಿದ್ದರು ಎಂದರು.

ಅಮೆರಿಕ ನೇತೃತ್ವದ ಸಾಮ್ರಾಜ್ಯಶಾಹಿ ಆಕ್ರಮಣಶೀಲತೆ ಹಾಗೂ ತೀವ್ರ ಬಲಪಂಥೀಯ ಕಾರ್ಪೊರೇಟಿಸಂನಿಂದ ವಿಶ್ವದ ಜನರ ಮೇಲೆ ದಾಳಿ ನಡೆಯುತ್ತಿರುವ ಸಂದರ್ಭದಲ್ಲಿ ಪಕ್ಷದ 13ನೇ ಮಹಾಧಿವೇಶನ ನಡೆದಿದೆ. ಫೆಲೆಸ್ತೀನಿಯನ್ನರ ಮೇಲಿನ ನರಮೇಧದ ಮುಂದುವರಿದ ಭಾಗವಾಗಿ ಇರಾನ್ ಮೇಲಿನ ಅಮೆರಿಕ–ಜಿಯೋನಿಸ್ಟ್ ಆಕ್ರಮಣ ನಡೆಯುತ್ತಿದೆ ಎಂದು ಅವರು ಆರೋಪಿಸಿದರು. ಇದೇ ವೇಳೆ ವಿಶ್ವದ ವಿವಿಧೆಡೆ ಫ್ಯಾಸಿಸಂ ವಿರುದ್ಧ ಜನರ ಪ್ರತಿರೋಧವೂ ಜಾಗೃತಗೊಳ್ಳುತ್ತಿದೆ ಎಂದರು.

ಭಾರತದಲ್ಲಿ ಆರೆಸ್ಸೆಸ್ ಪ್ರಭಾವ ಹೆಚ್ಚಾಗಿದ್ದು, ದೇಶದ ಸಂಪನ್ಮೂಲಗಳು ಮತ್ತು ಜನರ ಜೀವನೋಪಾಯವನ್ನು ಅದಾನಿ, ಅಂಬಾನಿ ಸೇರಿದಂತೆ ಕಾರ್ಪೊರೇಟ್ ಶತಕೋಟ್ಯಧಿಪತಿಗಳಿಗೆ ಪರಭಾರೆ ಮಾಡಲಾಗುತ್ತಿದೆ ಎಂದು ಪಿ.ಜೆ. ಜೇಮ್ಸ್ ಆರೋಪಿಸಿದರು. ಪೊಲೀಸ್, ಮಿಲಿಟರಿ, ನ್ಯಾಯಾಂಗ, ಶಿಕ್ಷಣ ಮತ್ತು ಸಂಸ್ಕೃತಿ ಸೇರಿದಂತೆ ಆಡಳಿತ ವ್ಯವಸ್ಥೆಯ ಮೇಲೆ ಫ್ಯಾಸಿಸ್ಟ್ ಶಕ್ತಿಗಳ ಪ್ರಭಾವ ಹೆಚ್ಚುತ್ತಿದೆ ಎಂದು ದೂರಿದರು.

ಮುಸ್ಲಿಮರನ್ನು ಗುರಿಯಾಗಿಸಿಕೊಂಡು ಮತದಾನದ ಹಕ್ಕು ಮತ್ತು ಪೌರತ್ವದ ವಿಚಾರದಲ್ಲಿ ತಾರತಮ್ಯ ನಡೆಯುತ್ತಿದೆ ಎಂದು ಅವರು ಆರೋಪಿಸಿದರು. ದಲಿತರು ಮತ್ತು ಮಹಿಳೆಯರ ಮೇಲಿನ ದಬ್ಬಾಳಿಕೆಯೂ ಹೆಚ್ಚುತ್ತಿದೆ ಎಂದು ಹೇಳಿದರು.

ಮಹಾಧಿವೇಶನದಲ್ಲಿ ಅಂಗೀಕರಿಸಲಾದ ಕಾರ್ಯಕ್ರಮ ಹಾಗೂ ಮೂಲ ದಾಖಲೆಗಳ ಆಧಾರದಲ್ಲಿ ಆರೆಸ್ಸೆಸ್ ಫ್ಯಾಸಿಸಂ ಮತ್ತು ದೇಶದ ಮೇಲೆ ಸಾಮ್ರಾಜ್ಯಶಾಹಿ–ಕಾರ್ಪೊರೇಟ್ ಬಂಡವಾಳದ ಪ್ರಾಬಲ್ಯದ ವಿರುದ್ಧ ವಿವಿಧ ಆಯಾಮಗಳಲ್ಲಿ ಹೋರಾಟ ನಡೆಸಲು ನಿರ್ಧರಿಸಲಾಗಿದೆ. ಭಾರತದ ಸಾಮಾಜಿಕ ವಾಸ್ತವದಲ್ಲಿ ಜಾತಿ ಪ್ರಶ್ನೆಯನ್ನು ಸರಿಯಾದ ದೃಷ್ಟಿಕೋನದಲ್ಲಿ ಅರ್ಥೈಸಿಕೊಳ್ಳಲು ಭಾರತೀಯ ಕಮ್ಯುನಿಸ್ಟ್ ಚಳವಳಿಯ ಹಿಂದಿನ ತಪ್ಪುಗಳಿಂದ ಆತ್ಮವಿಮರ್ಶಾತ್ಮಕವಾಗಿ ಪಾಠ ಕಲಿಯಬೇಕಿದೆ. ಜನರ ಜೀವನೋಪಾಯದ ಹೋರಾಟವನ್ನು ಜಾತಿ ವಿನಾಶದ ಹೋರಾಟದೊಂದಿಗೆ ಬೆಸೆಯುವ ಮೂಲಕ ಫ್ಯಾಸಿಸ್ಟ್ ವಿರೋಧಿ ಚಳವಳಿಯನ್ನು ಮುನ್ನಡೆಸಲು ಪ್ರಗತಿಪರ ಮತ್ತು ಪ್ರಜಾಸತ್ತಾತ್ಮಕ ಶಕ್ತಿಗಳೊಂದಿಗೆ ಕೈಜೋಡಿಸುವಂತೆ ಕಾರ್ಮಿಕ ವರ್ಗ ಹಾಗೂ ಶೋಷಿತ ಜನರಿಗೆ ಮಹಾಧಿವೇಶನ ಕರೆ ನೀಡಿದೆ ಎಂದು ತಿಳಿಸಿದರು.

ಪಕ್ಷದ ಪಾಲಿಟ್ ಬ್ಯೂರೋ ಸದಸ್ಯ ಆರ್. ಮಾನಸಯ್ಯ ಮಾತನಾಡಿ, ಫೆಲೆಸ್ತೀನಿಯನ್ನರ ಮೇಲಿನ ಅಮೆರಿಕ–ಜಿಯೋನಿಸ್ಟ್ ದಾಳಿ, ಇರಾನ್ ಮೇಲಿನ ಆಕ್ರಮಣ, ಮೋದಿ ಸರ್ಕಾರದ ನೀತಿಗಳು, ಎನ್‌ಆರ್‌ಸಿ/ಎಸ್‌ಐಆರ್, ಮುಸ್ಲಿಂ ವಿರೋಧಿ ಕ್ರಮಗಳು, ಉಮರ್ ಖಾಲಿದ್ ಬಂಧನ, ಮನುವಾದಿ–ಕಾರ್ಪೊರೇಟ್ ಶಿಕ್ಷಣ ನೀತಿ, ಸಮರ್ಪಕ ಜಾತಿ ಗಣತಿ, ಕ್ಷೇತ್ರ ಮರುವಿಂಗಡಣೆ, ಕೇಂದ್ರ–ರಾಜ್ಯ ಸಂಬಂಧಗಳು ಹಾಗೂ ರಾಜ್ಯಪಾಲರ ಹುದ್ದೆ ರದ್ದುಗೊಳಿಸುವುದು ಸೇರಿದಂತೆ ಅಂತರರಾಷ್ಟ್ರೀಯ ಮತ್ತು ಭಾರತೀಯ ವಿಚಾರಗಳಿಗೆ ಸಂಬಂಧಿಸಿದ ಒಟ್ಟು 19 ನಿರ್ಣಯಗಳನ್ನು ಮಹಾಧಿವೇಶನದಲ್ಲಿ ಸರ್ವಾನುಮತದಿಂದ ಅಂಗೀಕರಿಸಲಾಗಿದೆ ಎಂದು ಹೇಳಿದರು.

ಪತ್ರಿಕಾಗೋಷ್ಠಿಯಲ್ಲಿ ಎಂ. ಗಂಗಾಧರ್, ಶಂಕರ್, ರುದ್ರಯ್ಯ, ಕಬೀರ್, ಬುಹಿನ್ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.